लुका 4
4
येसु जाँच ले़ःॽपॽआ
(मत्ति १:१-११; मरकुस १:१२-१३)
1येसु यरदन होङ्माबाङ टेमाबेॽ खोबेॽ पबित्रा होङ्निवा लेस्सा। खो पबित्रा होङ्निवे़ॽ रे़क्रे़क्मा ठाउँबेॽ चिक्खे़ॽटु। 2मोबेॽ सैतानडे़ॽ खो रिक्पोङ याकठोक येसु जाँच ले़ःॽनुङ पापबेॽ रेम्एम्मा योगु। मो रिक्पोङ याकनोॽ येसुडे़ॽ इमाङ्सो मे़न्चाबॽआ ले़टे़। मोडोगे़ॽ खो बेॽलोनोॽ सगे़ॽ सिबॽआ ले़टा। 3मोडोक्पेॽनोॽ सैतानडे़ॽ येसु लुसु, “चइबानोॽ हे़न निवाहाङ्मि पसा ले़येहोङ इगो रुङ्गोॽवा चरेपा लिमेॽखाए, मोबा रुङ्गोॽवा चरेपा लिरो।” 4येसुडे़ॽ सैतान लुसु, “धारमिक नेॽचिराबेॽ इडोॽ साप्पॽआ ले़ये, ‘याॽमि चरेपाडे़ॽरेॽनोॽ हिङ्निबा’#यहुदि धारमिक नियम ८:३ ।”
5मोबा सैतानडे़ॽ येसु अग्लोमा टोक्टोक्मे़ॽटु चिक्खे़ॽनुङ मक्खाम्डेमबेॽहा चोप राज्य खाङ्मेॽसाङ खो लुसु, 6“का इघा चोप राज्यमि हाङ्बानुङ चोप याङ्सरावामि अधिकार चुप्इटुङे। इघा चोप के़ॽ हे़न पिन्ने़ इन्ढोङ्होङ के़ॽ नेन्जाबॽआ असाहोङ्सो पिहेनुङे। 7हे़ने़ॽ का ढोग ले़ःॽङाहोङ, इघा चोप थोक हे़ने़हा लिहा।” 8येसुडे़ॽ मो सैतान लुसु, “धारमिक नेॽचिराबेॽ इडोॽ साप्पॽआ ले़ये, खेप्से ‘हे़ने़ॽ हे़ने़ए़ निवाहाङ्रेॽ ढोग ले़ःॽमे, खोमिरेॽनोॽ आदर ले़ःॽमे’#यहुदि धारमिक नियम ६:१३ ।”
9मोबा मो सैतानडे़ॽ येसु यरुसलेमबेॽ चिॽखे़ॽनुङ मन्दिरमि वाचेनमि धुरिबेॽ लाघे़ॽनुङ लुसु, “हे़न चइबानोॽ निवाहाङ्मि पसानोॽ ले़येहोङ लो इगोबाङ मिम्मु आम्युघाए, 10इन्ढोङ्होङ धारमिक नेॽचिराबेॽ इडोॽ साप्पॽआ ले़ये-
‘हे़न हुकपेॽ टाःप्सिॽ निवाहाङ्डे़ॽ थाङ्सिरिदुतजि पाङ्इन्डुजे।
11मोबा हे़ने़ए़ सराङ्बेॽ रुङ्गोवे़ॽ हुवा मे़सिॽरो लुनुङ माहाजिडे़ॽ हे़न हुक हुकपेॽनोॽ टाःप्इम्मे’#भजनसङ्ग्रह ९१:११-१२ ।”
12येसुडे़ॽ लुसु, “निवाहाङ्मि बचनबेॽ इडोक्सो साप्पॽआ ले़हा- ‘हे़ने़ॽ टाङ्बामि निवाहाङ्मि जाँच ए़ले़ःॽमे’#यहुदि धारमिक नियम ६:१६ ।” 13मो सैतानडे़ॽ येसु नानाओले लुनुङ पापबेॽ रेम्एम्मा योगु तर मे़रेम्हेसु, मोबा ए़क्साङ फेरि मौका मे़न्चुप्लो येसु याःॽयोसु।
गालिल ठाउँबेॽ येसुडे़ॽ योम्बोक तरिक्पॽआ
(मत्ति ४:१२-१७; मरकुस १:१४-१५)
14पबित्रा होङ्निवामि सक्ति चुप्नुङ येसु गालिल टेघडा। खोमि टुम्बेॽहा खा किॽयु मिॽयु चोप ठाउँराजि मुक्पुगा। 15खोसे़ॽ यहुदिजि सुम्ढाम खिमराजि इःडुजि, मोबाङ चोबे़ॽ खोमि ओहाङ ले़टुजि।
नासरतबेॽहा याॽमिजिमि अबिस्वास
(मत्ति १३:५३-५८; मरकुस ६:१-६)
16येसु खो वाबोक्पॽआ खिम्डेम नासरतबेॽ लेस्सा। मोबा खो सानिङ्डोक्नोॽ नाजामे यिडे़ॽ यहुदिजि सुम्ढाम खिमबेॽ खडा मोबेॽ खो निवाहाङ्मि बचन नेॽसिॽ येःॽपुगा। 17मोबेॽ खो अगमबक्ता यसैयाडे़ॽ साप्पॽआ नेॽचिरा नेॽमेॽटुजि। खोसे़ॽ मो नेॽचिराबेॽ इडोॽ साप्पॽआ टेओक्नुङ नेडु-
18 “परभु निवाहाङ्मि होङ्निवा काबेॽ टुये,
“इन्ढोङ्होङ गरिब याॽमिजि सुसमाचार खेम्मेॽसिॽ खोसे़ॽ का से़न्इटिङे।
“से़क्सिघे़ॽपॽआजि छुट्कारा पिसिॽ,
“मिक मे़ए़ॽखुबाजि ए़ःॽमे़ॽसिॽ,
“चुङ्सिघे़ॽपॽआजि छुट्कारा पिसिॽ
19 निवाहाङ्मि याॽमिजि छुट्कारा पिमे बेला लेङ्इटे़ लुनुङ चोप खेम्मेॽसिॽ
“परभु निवाहाङ्डे़ॽ कानोॽ पाङ्इटिङे #
यसैया ६१:१-२ ।”
20मोबा ए़क्साङ येसुडे़ॽ नेॽचिरा खोजिनोॽ पिनुङ पेना। मोबेॽ टुबॽआ चोप याॽमिजिडे़ॽ निवा टिनुङ येसु खाङ्मे़ॽनिङ्सिडुजि। 21मोबा खोसे़ॽ माहाजि लुसुजि, “निवाहाङ्मि बचनमि खा हे़निङे़ॽ खेम्डिङ्माबेॽनोॽ पुरा लिटाहा।”
22चोप याॽमिजिडे़ॽ खोमि ओहाक ले़टुजि। खोमि अनुग्रहानुङ्हा खा खेम्नुङ माहाजिडे़ॽ खरि मिन्नुङ लुसुजि, “इगोगो योसेफमिनोॽ पसा ने़ॽनेन्डे ?” 23येसुडे़ॽ लुसुजि, “हागो चइबानोॽ हे़निङे़ॽ का इगो खानवा लुन्डानिङे, ‘होउ सिडा ले़ःॽखुबा! हे़न आमटाङ्बा नुबुगे।’ मोबा ‘कफरनहुम सहरबेॽ ले़ःॽपॽआडोक्हा खरिहा योम्बोक आमटाङ्बामि खिम्डेमबेॽसो ले़टे’ लुन्डानिङे।”
24येसुडे़ॽ लुसु, “चइबानोॽ हाम्बेॽसो अगमबक्ताजि खोम खिम्डेमबेॽहा याॽमिजिडे़ॽ मान ले़टुजिने। 25चइबानोॽ के़ॽ हे़निङ लुनिम्ने़, एलियामि पालोबेॽ सुम निङ चुक्चि महिनाडोक वारि मे़लेम्बॽआसे़ॽ बेॽएम्मा साकआङ्सा लिबॽआ ले़टे़। मोडोक्पेॽ बेॽलो राङ्मिॽमाजि इस्राएलबेॽ टुसामे। 26तर सिदोन ठाउँबेॽ सिॽटे़ सारपत लुमे खिम्डेमबेॽए इक्को राङ्मिॽमाबेॽरेॽनोॽ निवाहाङ्डे़ॽ एलिया पाक्सु#१ हाङ्बा १७:८-१६ । 27मोडोक्नोॽ एलिसा अगमबक्ता टुमाबेॽ इस्राएलबेॽ सुक्टुबाङेॽ चुप्पॽआ बेॽलो याॽमिजि टुसामे। तर माहाजिबेॽ सिरिया देसबेॽए नामान निङ ले़ःॽखुबा याॽमिरेॽ नुबुक्हेसा#२ हाङ्बा ५:१-१४ ।”
28इगो खा खेम्नुङ यहुदिजि सुम्ढाम खिमबेॽ टुबॽआ चोप याॽमिजि बेॽलो सुरकडामि। 29मोबा माहा याॽमिजि चोप सुवाक्टोॽ येःपोगामि मोबा येसु राःप्नुङ से़ॽसाङ सहरबाङ पाखे़ॽयु लाघे़ॽटुजि। मो सहर टोक्टोक्माबेॽ सिॽटे़ मोबा माहाजिडे़ॽ येसु टोक्टोक्माबेॽए याक्फुबाङ हेॽएम्मा योगुजि। 30तर येसु माहा याॽमिजिमि रुम्बाङ लेॽखे़ॽनुङ खडा।
चाबे़ॽ टुक्पॽआ याॽमि नुबोक्पॽआ
(मरकुस १:२१-२८)
31मोबा ए़क्साङ येसु गालिलबेॽए कफरनहुम लुमे सहरबेॽ लेस्सा। खोसे़ॽ सानिङ्नोॽ नाजामे याकपेॽ याॽमिजि इःडुजे। 32खोमि खा खेम्नुङ माहाजि खरि मिनामि इन्ढोङ्होङ खोसे़ॽ माहाजि अधिकारनुङ इःडुजे।
33यहुदिजिमि सुम्ढाम खिमबेॽ इक्को याॽमि मङे़ॽमा चापटे़ॽ टुक्पॽआ ले़टे़। मोसे़ॽ बेॽए सेम्लाडे़ॽ वोसाङ लुसु, 34“हे नासरतबेॽए येसु, हे़ने़ॽ कानिङ इमाङ ले़ःॽमा योॽइये ? इमाङ कानिङ नासि ले़ःॽसिॽटे़ लेङ्इटे़ ? हे़न निवाहाङ्डे़ॽ पाङ्बॽआ लुनुङ के़ॽ लेनुङे़।” 35इगो खेम्नुङ येसुडे़ॽ मो चाप योप्साङ लुसु, “योङ उःक्नुङ इगो याॽमिबाङ खे़ॽपेसे!” मोबा मोसे़ॽ मो याॽमि चोपमि रुम्बेॽ चेप्आनुङ खे़ॽपेसा तर मो याॽमि इमाङ्बेॽसो हुवा मे़सिॽटा।
36चोप याॽमिजि खरि मिङ्साङ खा इःबुगामि, “इगो याॽमिमि खाबेॽ इन्डोक्मा सक्ति टुये, इगोसे़ॽको योप्मासोरोॽ चापजिसो चिखे़म्मे ले़!” 37मोबा कफनरहुम सहरमि किॽयु मिॽयु येसुमि खा मुक्पुगा।
येसुडे़ॽ बेॽलो याॽमिजि नुबुगुजि
(मत्ति ८:१४-१७; मरकुस १:२९-३४)
38येसु यहुदिजि सुम्ढाम खिमबाङ पे़आप्नुङ सिमोनमि खिमबेॽ खडा। मोडोक्पेॽ सिमोनमि नाम्मा बेॽलो ए़चेडेसे़ॽ रुङ्घाक्पेॽ नेगिगे़। खिमबेॽहा याॽमिजिडे़ॽ “इगो नुबोक्पेॽमा” लुनुङ येसु बिन्ति ले़टुजि। 39येसु सिमोनमि नाम्मा के़क्पेॽ खे़ॽनुङ ए़चिॽमाङ योप्मासोरोॽ लेप्पेसु। मोबा मोडोक्पेॽनोॽ खो पुःक्नुङ खोजिमि सेवा ले़टुजि।
40नम आघे़ॽसिॽपोरोक्माबेॽ याॽमिजिडे़ॽ खाल खालहा टुक्खुबाजि येसुबेॽ चिक्चे़डुजि। येसुडे़ॽ माहा चोप टुक्खुबाजि हुगे़ॽ सुःप्नुङ नुबुगुजि। 41बेॽलो याॽमिजिबाङ चापजि इडोॽ वोसाङ खडामि, “हे़न निवाहाङ्मि पसानोॽ ले़ये।” तर येसुडे़ॽ माहा चापजि योङ उःक्मेॽटुजि। इन्ढोङ्होङ येसु छुट्कारा पिघुबा हाङ्बा खिरिस्ट ले़ये लुनुङ माहा चापजिडे़ॽ लेसुजे।
येसुडे़ॽ हाइखा ठाउँबेॽसो परचार ले़ःॽमे योम्बोक ले़ःॽपॽआ
(मरकुस १:३५-३९)
42नम टे़ॽमासोरोॽ येसु साङ्गासुमा ठाउँबेॽ खे़ॽपेसा। तर याॽमिजि खोनोॽ योक्साङ खडामि। खो चुप्टुजेबाङ माहाजिडे़ॽ “कानिङ याःॽयानुङ ए़क्खे़ॽने” लुसाङ येसु से़क्मा योगुजि। 43येसुडे़ॽ माहाजि लुसुजि, “के़ॽ निवाहाङ्मि राज्यमि सुसमाचार हाइखा ठाउँबेॽसो खेम्मेॽमानोॽ खे़हा, इन्ढोङ्होङ निवाहाङ्डे़ॽ का इघा योम्बोक ले़ःॽसिॽनोॽ पाङ्इटिङे।” 44इडोक्नोॽ येसुडे़ॽ यहुदियाबेॽहा चोप यहुदि सुम्ढाम खिमबेॽ खे़ॽनुङ निवाहाङ्मि राज्यमि सुसमाचार खेम्मेॽटुजि।
Currently Selected:
लुका 4: YAMP
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
