मत्ति 11
11
बप्तिस्मा पिघुबा युहन्नाडे़ॽ येसु सिम्बॽआ
(लुका ७:१८-३५)
1येसुडे़ॽ खोमि बारो जना चोङ्साजि इघा चोप आग्या पिसेॽनुङ खो चाहिँ के़क्पेॽहा खिम्डेमराजि, सिक्छे इःॽसिॽनुङ परचार ले़ःॽसिॽ खडा।
2युहन्नाडे़ॽ खिरिस्टमि योम्बोकमि टुम्बेॽहा खा तिरिङ्गा खिमबेॽ खेम्डोक्नुङ खोमि चोङ्साजि येसुबेॽ सिम्सिॽ पाक्सुजि। 3माहाजि येसुबेॽ लेन्नुङ सिप्सुजि, “इमा लेङ्खुबा मुक्तिदाङ्बा हे़ननोक्टे, कि कानिङे़ॽ हाइकोमि राम खाङ्मे ?” 4येसुडे़ॽ माहाजि लुसुजि “हे़निङे़ॽ खेम्बॽआनुङ खाङ्बॽआ खा खे़ॽनुङ युहन्ना लुबेॽटानुमे- 5मिक मे़ए़ॽखुबाजि मिक ए़ॽपोगामि, सोक्लोङ्गे़याजि राम्बोक्इटामि, सुक्टुबाङेॽ सुक्पॽआजि चोखो लिनुङ नुबोगामि, ने़ए़क मे़ङ्खेम्खुबाजि खेम्बोगामि, सिघे़ॽपॽआजि हिङ्बोगामि, दुःखि गरिबजिडे़ॽ सुसमाचार खेम्डोक्इटुजि। 6काबेॽ सङ्क मे़ले़ःॽलेॽ बिस्वास ले़ःॽखुबा याॽमिडे़ॽ चइबानोॽ आसिस चुप्मिन्डुए।”
7मोबा बप्तिस्मा पिघुबा युहन्नामि चोङ्साजि खे़ॽमे़ॽनिङ्सिमाबेॽ येसुडे़ॽ मोबेॽ सुम्बॽआ याॽमिजि युहन्नामि टुम्बेॽ खेम्मेॽपोगुजि, “हे़निङ रे़क्रे़क्मा ठाउँबेॽ इमाङ खाङ्सिॽ खडानिङे ? इमा हिॽवाबे़ॽ हिॽपॽआ इङ्भु खाङ्सिॽटे खडानिङे ? 8हे़निङ इमाङ खाङ्सिॽ खडानिङे ? नुबा चेॽ चाङ्खुबा याॽमि खाङ्सिॽटे ? नुबा नुबा चेॽ चाङ्खुबाजिगो हाङ्खिमबेॽ पेङ्इम्मे। 9हे़निङ इमाङ खाङ्सिॽटे खडानिङे ? अगमबक्ता खाङ्सिॽटे ? चइबानोॽ लुमाहोङ हे़निङे़ॽ अगमबक्ताबाङ्सो बेॽएम्मा याॽमि खाङ्डोक्इटानुमे। 10इगो याॽमि मोनोॽ ले़ये, खोमि टुम्बेॽ धारमिक नेॽचिराबेॽ इडोॽ साप्पॽआ ले़ये, ‘खाक्सानुमे, के़ॽ काङ्मि दुत हे़नबाङ पोम्बेॽ पोम्बेॽ पाङ्इनुङे, मोसे़ॽ हे़ने़ए़ लागि राम पोरोक्इन्डुए।’
11 “चइबानोॽ हे़निङ लुनिम्ने़, मेॽनामिॽचिबाङ टोक्पॽआ याॽमिजिबेॽ युहन्नाबाङ बेॽएम्मा असासो माॽआम्मि। तरसो थाङ्सिरिमि राज्यबेॽ असा चोप्पाङ ए़डेम्मा ले़ये, मो युहन्नाबाङ्सो महान ले़ये। 12बप्तिस्मा पिघुबा युहन्नामि पालोबाङ आयुरो थाङ्सिरि राज्यमि योम्बोक येॽयेॽ वाबोक्मे़ॽनिङ्सिये, मोबा भक्ति ले़ःॽखुबा याॽमिजिडे़ॽ येॽयेॽ इगोबेॽ पे़ए़म्मा योक्मे़ॽनिङ्सिम्मे। 13इन्ढोङ्होङ युहन्नामि पालोठोक मोसाबाङ पिबॽआ यहुदि नियमनुङ खोरो खोरो अगमबक्ताजिडे़ॽ खोरो खोरो बेलाबेॽ अगमबानि इःसुजि। 14हे़निङे़ॽ बिस्वास ले़न्डानुमहोङ, हागो लेङ्इये लुबॽआ एलिया चाहिँ युहन्नानोॽ ले़ये। 15असामि ने़ए़क टुये, मोसे़ॽ नुरोॽ खेप्सुरो।
16 “हागो के़ॽ इगो पुस्ताबेॽहा याॽमिजि असाडोॽहाजि ले़म्मे लुमे ? इघाजिगो हाटाबेॽ पवे़ॽखुबा ए़द्रिहा पिच्छाजिडोॽ ले़म्मे, माहा पिच्छाजिडे़ॽ खोजिमि लङ्गामजि के़ःॽनुङ लुन्डुजे
17 ‘कानिङे़ॽ हे़निङ्मि लागि बासुरि मिडुङ्मा,
तर हे़निङ मे़सिम्आसानिङ।
कानिङे़ॽ बिलौनामि सेम इःसुङ्मा,
तर हे़निङ मे़हाःबानिङ।’
18 “इन्ढोङ्होङ युहन्ना मद्य मे़उङ्खुबानुङ मे़न्जारेॽ पेङ्खुबा ले़टा, माहाजिडे़ॽ खो मङे़ॽमा चापडे़ॽ राःप्मिटुए लुसुजि। 19मोबा याॽमिमि पसा चाहिँ चामानुङ, उङ्मानुङ लेस्सा, माहाजिडे़ॽ लुसुजि ‘खाक्सानुमे, आक्को रोप्कि, ठोम्घुबा, मे़क्चेन लाघुबाजिनुङ पापिजिमि लङ्गाम’ लुनुङ आप्टिक टिमे़ॽनिङ्सिन्डुजे। निवाहाङ्मि निवा नुबा ले़ये लुमे खामि परमान खोमि राम्बेॽ राम्घुजिमि योम्बोकबाङ्नोॽ खाङ्मुये।”
बिस्वास मे़ले़ःॽखुबा याॽमिजि लुबॽआ
(लुका १०:१३-१५)
20हाम्बे हाम्बे सहरबेॽ येसुडे़ॽ बेॽलो खरिहा योम्बोक ले़ःॽपॽआ ले़टे़, मोबेॽहा याॽमिजि खोजिमि पापबाङ मे़न्टेबॽआसे़ॽ माहा सहरबेॽहा याॽमिजि खोसे़ॽ वोःप्साङ इडोॽ लुसुजि,
21 “इनामा हे़न, खोराजिननुङ बेथसेदाबेॽहा याॽमिजि! हे़निङ्मि ठाउँबेॽ ले़ःॽपॽआ खरिहा योम्बोक टुरोसनुङ सिदोन सहरबेॽ ले़ःॽपॽआ ले़टाहोङ मोबेॽहा याॽमिजिडे़ॽ याक्लोनोॽ पापबाङ टेनुङ, सिङ्घिमामि चेॽ चाङ्मानुङ खरानि सिडुजि होला। 22तर के़ॽ हे़निङ लुनिम्ने़, न्यायमि याकपेॽ हे़निङ्मि दसाबाङ्गो टुरोसनुङ सिदोनबेॽहा याॽमिजिमि दसा बोरु आङ्हेमारोमा लिये।
23 “होउ कफरनहुमबेॽहा याॽमिजि, इमा हे़निङे़ॽ थाङ्सिरिॽटु खे़ॽटोक्इन्डानुमे ? ने़ॽनि हे़निङगो खेःलोकपेॽ राप्खे़न्डानिङे। इन्ढोङ्होङ हे़निङ्बेॽ ले़ःॽपॽआ खरिहा योम्बोक सदोमबेॽहा याॽमिजिमि रुम्बेॽ ले़ःॽपॽआ ले़टाहोङ माहाजिमि सहर हागोरोसो टुसा। 24तर के़ॽ हे़निङ लुनिम्ने़, न्यायमि याकपेॽ हे़निङ्मि दसाबाङ सदोमबेॽहा याॽमिजिमि दसा बेॽलोनोॽ आङ्हेये।”
याःक्चाघे़ॽपॽआजि नाजामे
(लुका १०:२१-२२)
25मोडोक्पेॽ येसुडे़ॽ लुसु, “हे पाबा, थाङ्सिरिनुङ मक्खाम्डेमबेॽए परभु, के़ॽ हे़न ओहाक पिन्ने़, इन्ढोङ्होङ निवादाङ्बानुङ चेन्दुबाजिबाङ चुम्नुङ युङ्बॽआ खा पिच्छाजिडोॽहा याॽमिजिमि पोम्बेॽ खाङ्मुसु। 26हे पाबा, हे़ने़ॽ इडोॽ ले़ःॽमानोॽ नुबा मिॽटु।
27 “के़ए़ पाबाडे़ॽ चोप थोक का जिम्मा पिटिङे। पाबाबाङ हाइखा असे़ॽसो पसा लेसुजिनिनुङ पसाबाङ हाइको असे़ॽसो पाबा लेसुजिने, मोबा पसे़ॽ लेमेॽपॽआजिडे़ॽ चाहिँ पाबा लेन्डुजे।
28 “होउ याःक्चाघे़ॽपॽआनुङ खाल खालहा कोगे़ॽ टिप्पॽआ याॽमिजि, काबेॽ आबानिङे, के़ॽ हे़निङ नाजाढाम ठाउँ पिनिम्ने़। 29के़ए़ जुवा खिसानुमेनुङ कानुङ चिनानुमे, इन्ढोङ्होङ का नम्रानुङ नम्नावादाङ्बा ले़ङे, मोबा हे़निङ्मि होङ्निवाडे़ॽ नाजाडोक्इन्डुए। 30इन्ढोङ्होङ के़ए़ जुवा खिमा ने़ःक्चा ले़येनुङ के़ए़ कोक सोप्मिये।”
Currently Selected:
मत्ति 11: YAMP
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
