Va'Atəŋ 20
20
Abraham də Abimelek
1Sədak na, Abraham ambatək aka va na Negev. Asan də gəla aka walaŋ Kades də Sur, siske na ndən pay ənziya siɗikke a Gerar. 2#VAA 12:13; 26:7Abraham anah akat Sara ɗak nan na: «Məlmuwtə», yaŋ Abimelek, məlĩ na Gerar, agəmta. 3Yaŋ Maŋgəlva ade aka Abimelek addəv issine də dəfɗa, aɓsən na: «Wakəmtə aka batamət ɗak kəgəm kəŋkə, vi də zələttə.» 4Abimelek dəzar azat tagay ɓa, yaŋ amna: «Yawe! Wakəzet ɗiy metiŋ-metiŋ vaŋ də an təstəsəŋ dayday sa? 5Ndəni dənah su na: “Məlmuwtə ɓa sa”? Nat pak tənahək na: “Məlmuwi yi.” Də makraw bartata nəɗɗa wən nani, vaw salala yi addəv wən nani.»
6Yaŋ Maŋgəlva azlan sən addəv issine na: «Naw pak nəsənək na, də mokrok bartata yi kəɗɗa, naw intə nətakuk dəɗɗa mambray akawa; sən wən nani nəpəlsuk tive nawrəŋgət ɓa. 7Amndagat sənət ga ɗəfəŋ kakaŋka, vi məskəleŋgi yi wakkam ammbok kəmbəlgəni. Ya an kəmndagat ɓa, asən na, wakəmtə is dit ɗiy nok pakə.»
8Abimelek alvəɗka, ayek gewleɗ nan pakə, anah sit wən nan pakə, ɗiy nek ageslne'eŋgik diyɗa. 9Yaŋ Abimelek aya Abraham, apsən na: «Miy kəgəɗ səməŋ di! Mambray miy nəgəɗ suk nawkiy mambray metiŋgin akaw də dələv naw di? Zəga an naɗɗay ɓa kəgəɗ suwa.» 10Abimelek anah sən Abraham əmpa na: «Miy kəwəl kəɗɗa zəga vaŋkəŋ di?» 11Abraham amna: «Naw azawna: “Geslne na Maŋgəlva tay ahəŋ siɗikke dayday ɓa yi, kawbaywiy ammbat guluk nawa.” 12Gesiŋ nan na, məlmu wətən əbbatə, wətət əmmatə ɓa hara, yaŋ nəgəmət ka guluk nawa. 13Adan Maŋgəlva agilgu səna afu da, nənah sət na: “Moggon nok yaŋ an kədagəɗ su a təki məmbat pakə, anah na: məlmuwiyi.”»
14Abimelek agəmək gilew dit wasliɗe, belemɗe mezeŋgleket dit muguluŋgiti epsin Abraham, amilgət sənət Sara guluk nani, 15Abimelek amna: «Dələv naw yaŋ aboko, asok akkiy mokrok aŋgəl pakə.» 16Yaŋ anah sət Sara na: «Awle, in tat əpsən təbəz babar gabal sən məlmuko, wasan ka zəga narban azet geleŋgiɗuk dit meggeŋgiɗuk na, bartata kənani.»
17Abraham akkamanək Maŋgəlva, Maŋgəlva anzaɗək Abimelek, guluk nan dit belemɗe muguluŋgit nan pak, awaŋka. 18Vi Yawe akkpeŋgetik gil na Abimelek pak ndarzlayɗe, aka batamət Sara, ga Abraham.
Currently Selected:
Va'Atəŋ 20: GB
Highlight
Share
Copy
Want to have your highlights saved across all your devices? Sign up or sign in
All right reserved
