Luka 13
13
Əɗi marava awaniɓa əmta
1Pay dəpaska, ɗiy meɓɓet azzoŋguk ənah sən wən net məs Galileɗe məs Pilat aslehẽt mbel net dit en net zəgeɗ atawaŋ a matuya neti. 2Yesu azlanka, aɓsit na: mənokum əɗɗum na, mə Galileɗiskiŋ məs mambray daykiyit mə Galileɗ pak vi agəɗ aket vas sa? 3Vaski ɓa, in tat ənah sukum an kəɗiyaŋ marava ɓa, vas kədawzaŋ baymokum. 4Awaniɓa ɗiy kəlaw kiyit dədopodo məs gəla nawga aɓəsl aket a Silowe, abeye, mənokum əɗɗum na ndəɗaŋ dəraygənən daykiyit ɗiy dəssoŋ a Yerusalem pak sa? 5Vaski ɓa, in tat ənah sukum an kəɗiyaŋ marava ɓa, vas kədawzaŋ baymokum.
Wənməkkpaŋga na sokoyo məza uwa akan
6Yaŋ Yesu apel sit wənməkkpaŋgaŋka: Ɗəf ampək sokoyo addəv guli net megezlembirkeɗ nani, yaŋ ade əkay uwa akani, ya dərah ɓa. 7Yaŋ anah sən məgə guli net megezlembirkeɗ na: Əzva hoku yaŋ nədazzaw əkay uwa aka sokoyoŋka, ya nawrah ɓa. Abəla, vimi adawyan dəlvafuŋ ɗar di? 8Məgə guli azlani, aɓsən na: Daya, appan dabyaŋ əmpa, wanəso'on mammban tərwəslə, wanəzi sən ba'arə, 9kuzuŋ abe na wawə an tay vas ɓa na Kəbəlgən kana.
Yesu tay əmbəlgət guluk məɓrukət pay naffete
10Yesu tay ərba wən addəv gəla nakkal net Yudeɗ maɓɓani, pay naffete. 11Ɗak tat adak məs əmpəs mbərayən aɓruk wəzva kəlaw kiyən dədopoɗo, tat ɓe'e tawɓap əsilyat ziw ɓa. 12Adan Yesu awləta, apel sətka, aɓsət na: Gulku kəppetik səka əɓruk noko. 13Aɗiyək van akata, ndət ləŋ le' ziwi, təgagdakan Maŋgəlva. 14#ƏGI 20:9,10; ƏMS 5:13,14Yaŋ daya na gəla nakkal net mə Yudeɗi adə gədəva vi Yesu ambəlgət pay naffete, aɓsit ɗiy na: Pay sləre tay vi naɗɗa wəza, dəpas na məde kərahaŋgən əmbəla, məza pay naffet ɓa. 15Daya azlan sənəka, amna: Məs muluvuluvuɗe, mənokum pak kawpəlnən medgeɗge awaniɓa koro nokum sə təki nawzəm pay naffet kawkan amet iŋkile ɓa sa? 16Ya gulukkəŋ wətən Abraham məs Satan aɓruk wəzva kəlaw kiyən dədopoɗoŋ, dəslə kawpələt səka əɓruk nat pay naffet ɓa sa? 17Adan apel vaska, məzuzelɗe nan pak wil adetinke, ɗiy pak annekeŋke vi zəgeɗ gagdakɗe agəɗəŋki.
Wənməkkpaŋga na zeŋve na meslene
(MAT 13:31-32; MAR 4:30-32)
18Yaŋ anah kan na: Də mi nədawsla məlĩ na Maŋgəlva di? Də mi nədawslan di? 19Agilik va zeŋve na meslene, ɗəf agəmtək azlgətək addəv guli net wəleŋɗe nani, təɓayka, təkkpaŋgək wəlaŋga, biŋgeɗ na disiŋ əzaɓən gəla net aka ki vani.
Wənməkkpaŋga na wuɗo
(MAT 13:33)
20Yaŋ anah əmpa na: Də mi nədawsla məlĩ na Maŋgəlva di? 21Agilik va wuɗo, guluk təgəm təslahan ara gəpa marga taka, gəpa pak ahəska.
Maddamba feŋge
(MAT 7:13-14,21-23)
22Yaŋ Yesu adawtoŋ dəddivit walaŋgeleɗe gugriɗe, mãy dəddivit walaŋgeleɗe əyeget ɗiy dawmbat a Yerusalem. 23Ɗəf aɓsən na: Daya ɗiy siɗikke dədawkõhoŋ sa? Yesu aɓsit na: 24Məsok zukum ətoŋ kəla maddamba feŋge. In tat ənah sukum: Vi ɗiy diyɗa wagayaŋ ətoŋgo, ya aɓapən na ɓa.
25An afən gəla asilke, ampanək maddamba, munokum nappaka wakətəŋgən ərga maddamba dawnəh na: Daya akol səmə. Wazlan wanah sukum na: Nəsən səŋga kənanən di ɓa. 26Wakətəŋgaŋ ənəh na: Məzəmək aboko, məsəka gəm, kərbək wən aket tiveɗ gugriɗ namə. 27#GLƊ 6:9Wazlan dawnah sukum na: Nəsən səŋga kənanən di ɓa. Məzar səzawa munokum məɗɗaŋ mambray pakə. 28#MAT 22:13; 25:30#MAT 8:11,12Adaki əhəm gəm əmpəran slay ɗəf asani, an kulanənək Abraham, Isak gəm Yakob dit məskəleŋɗe pak addəv məlĩ na Maŋgəlva, nokum tamə kazgokumi appaka. 29Ɗiy wazzoŋ hã səmmba pay nampum gəm na moskoyo sə kəla disiŋ gəm sə dohoŋ wassoŋ addəv məlĩ na Maŋgəlva kawzəma. 30#MAT 19:30; 20:16; MAR 10:31Asna ɗiy en meddirɓe wakkpaŋgaŋ maddaabəŋ, ɗiy en maddaabəŋ wakkpaŋgaŋ meddirɓe.
Yesu tay əhəmgən Yerusalem
(MAT 23:37-39)
31Dəpaska Farisaɗe meɓɓet azzoŋgu ənah sən na: Agil dok səŋka, vi Herodə man aka əbayko. 32Yaŋ aɓsit na: Məddoŋ mənah sən balwayəs na: In yakəŋ ərɓehet tuyeŋɗe gəm əmbəlgit ɗiy dəpaŋka gəm pumpum, pay mahokoni wanəgraka. 33Ya adahək nəzbangən tive nan dəpaŋka, mazayən gəm zaya, vi dəslə məskəleŋ dəmtəgən a mapoho na Yerusalem ɓa.
34Yerusalem, Yerusalem, is məbay məskəleŋɗe, məskə en məslən azok dit gərmeŋge. Təl gbəgbar nəŋgəl əkkelet ɗiy nok va gəmnda adakkelet kirtin ammba persleken kawvoŋ aket di, ya kəŋgereŋ ɓa. 35#GLƊ 118:26Mula, məppani gəla nokum. In tat ənah sukum: Sessel kuləwən na ɓa təŋ kakaŋka, hã gap mənokum ənahaŋ na: Əzaɓ aka ɗəf an dədazzan də iya na Daya.
Currently Selected:
Luka 13: GB
Highlight
Share
Copy
Want to have your highlights saved across all your devices? Sign up or sign in
All right reserved
