Va'Atəŋ 12
12
Dəha məkuturkutur: Abraham, Isak, Yakob
(12:1—35:29)
Maŋgəlva tay əya Abram dəzargən səka dələv nani
1 #
WNM 7:2,3; IBR 11:8 Yawe aɓsən Abram na: «Dok səka dələv noko, səret ɗiy noko, səŋgil ana afukda, dəka dələv məs nədarban suko. 2Wanəkkpaŋgok ka ɗiy diyɗa, wanəɗɗa əzaɓ akoko. Wanəkkpaŋgan iya nok metiŋgini. Akəsok ka əzaɓ net ɗiy mbirti. 3#GAL 3:8Wanəɗɗa əzaɓ aket ɗiy en dədawzaɓokuni, wanəreygit en dədawraygukuni; ɗiy nammba dələv pak, warahaŋ əzaɓ ammboko.»
4Abram ambatək va Yawe anah səni, Lot ambatək dəndəni. Wəzva na Abram agəɗək kaklaw buhul kiyən sle', gala asil sə Haran. 5Abram agəmtək Saray ɗak nani, Lot wətən məlməni, arya an arah pak dit belemɗe en albah sə Haran. Addoŋguk aka dələv na Kana'an.
Abram aka dələv na Kana'an gəm a Eziptə
Agapaŋgək aka dələv na Kana'an. 6Abram aggarək ki dələv van hã gap a təki adawyaŋ na Sikem, hã gap aza wəlaŋga adawyaŋ na Elon na More. Mə Kana'anɗeŋ aka dələv vani.
7 #
WNM 7:5; GAL 3:16 Yawe arbanək zən aza Abram, amna: «Sən mazlalwõkiy nədapsən dəlvəŋka»; adak arkə təki nawzaɓ-Maŋgəlva sən Yawe dərban zən azanəŋka. 8Sədak ambat a walaŋ gərəm dəmmba pay nampum na Betel. Aziy gizlirke nan a walaŋ Betel dəmmba pay na moskoyo də Ay dəmmba pay nampummo, arkə təki nawzaɓ-Maŋgəlva sən Yawe adaka, akkaman Yawe də iya nani. 9Siske na, Abram adder siɗikke siɗikke, kəla Negev.
10May agəɗək aka dəlva, Abram alək a Eziptə kawsan siɗikke adaka, vi may gədaki diyɗa aka dəlva. 11Adan go'oy nawtoŋ a Eziptə na, anah sət ɗak nan Saray na: «Awle, nəsənək na, guluk lalawək kənan aza ula. 12Vasna an mə Eziptiɗ awlukunko, wanahaŋ na: “Guluk nantə,” wabaywən, kappok anok madaroko. 13#VAA 20:2; 26:7Kamə, anah na, məlmuw kənani, vi dərmuwəngən moggon moggon aka batamko, nəsawgən madaraw ammboko.»
14Agəɗək va Abram anahə aka agap a Eziptə, mə Eziptiɗ awlətənək guluk nak lallawək diyɗa sawɓa. 15Ɗiy gugriɗ na Farawən awlətəni, aɗiynən kiyət aza Farawən, agəmtənək guluk nak eŋgili. 16Aɗɗaŋ sənənək moggon sən Abram aka batamta, arahək gilewi, wasliɗe, korɗe, belemɗe mezeŋgleket dit muguluŋgiti, korɗe muguluŋgit dit zlogomeɗi. 17Yaŋ Yawe akiy wəray metiŋgin aka Farawən də gəla nani, aka wən nat Saray, guluk na Abram. 18Farawən ayak Abram, apsən na: «Miy kəgəɗ suwəŋ di? Vimi kənah su na, guluk noktə ɓa di? 19Vimi kənah su na: “Məlmuwtə di?” Hã in gəm əgəmət ka guluk naw ɗarə. Yaŋ na Guluk nok yakəŋkə, agəmta doko!»
20Farawən aɗi wən nan sit zeli, appanənək əmbat dət goni dit zəgeɗ nan pakə.
Currently Selected:
Va'Atəŋ 12: GBD
Highlight
Share
Copy
Want to have your highlights saved across all your devices? Sign up or sign in
All right reserved
