Lucas 4

Satanás koko Nai Jesus

(Mateus 4:1-11; Marcos 1:12-13)

1Sarani hotu tiha, Jesus husik mota Jordaun. Nia nakonu ho Espiritu Santu. I Espiritu Santu lori Jesus ba iha rai fuik maran. 2Iha nebaa, diabu koko Jesus durante loron haat-nulu atu halo Nia monu ba sala. Durante tempu nee tomak, Jesus la haan buat ida, too Nia hamlaha atu-mate.

3Depois diabu dehan ba Nia, “Se O Maromak nia Oan duni, haruka fatuk nee sai paun.”

4Maibee Jesus hataan, “Iha Livru Sagradu hakerek dehan,

‘Ema laos moris hosi hahaan deit.’ ”#Deuteronomio 8:3; Mateus 4:4

5Depois diabu lori Jesus sae ba iha fatin aas ida, i hatudu ba Jesus reinu hotu-hotu iha mundu tomak. 6Diabu dehan ba Jesus, “Hau sei foo kbiit ba O para ukun nasaun sira nee hotu, i sei foo sira nia rikusoin hotu ba O. Tanba buat sira nee hotu foo ona mai hau, i hau bele foo ba see-see deit, konformi hau. 7Hau sei foo hotu ba O, naran katak O hakneak hodi adora hau.”

8Maibee Jesus hataan fali ba nia, “Iha Livru Sagradu hakerek ona dehan,

‘O tenki adora Nai, o nia Maromak,

i serbii ba Nia deit.’ ”#Deuteronomio 6:13

9Depois diabu lori Jesus ba iha sidade Jerusalém, i lori Nia baa hamriik iha uma kreda boot nia tutun. Diabu dehan ba Jesus, “Se O Maromak nia Oan duni, haksoit tuun ba rai. 10Tanba iha Livru Sagradu hakerek dehan,

‘Nai Maromak sei haruka Nia anju sira

mai kuidadu O.

11Sira sei tane O,

atu O nia ain la bele kona fatuk.’ ”#Salmu sira 91:11-12

12Maibee Jesus hataan, “Iha Livru Sagradu mos bandu dehan,

‘La bele koko Nai, o nia Maromak!’ ”#Deuteronomio 6:16

13Ho nunee diabu koko Jesus ho dalan oi-oin deit. Hotu tiha, diabu husik lai Jesus hodi hein fali tempu diak para koko tan.

Nai Jesus hahuu Nia serbisu iha Galileia

(Mateus 4:12-17; Marcos 1:14-15)

14Hotu tiha, Jesus nebee nakonu ho Espiritu Santu nia kbiit, fila fali ba provinsia Galileia. Ema iha distritu nee tomak konta kona ba Nia. 15Jesus hanorin iha ema Judeu sira nia uma kreda iha fatin-fatin, i ema hotu hahii Nia.

Ema Nazaré sira lakohi simu Nai Jesus

(Mateus 13:53-58; Marcos 6:1-6)

16Iha loron ida, Jesus baa iha Nia aldeia Nazaré. Hanesan baibain iha loron Sabadu, Nia baa iha uma kreda. Depois Nia hamriik hodi lee Livru Sagradu. 17Sira foo profeta Isaias nia livru, i Nia loke hodi hetan liafuan sira nebee dehan,

18“Nai Maromak nia Espiritu iha Hau.

Tanba Nia foti ona Hau

para foo sai Novidade Diak ba ema kiak sira.

Nia haruka ona Hau foo hatene dehan,

ema dadur sira sei livre fali,

ema matan delek sira sei haree moos fali,

sira nebee ema hanehan, sei moris livre,

19i tempu too ona para Nai Maromak hatudu Nia laran diak.”#Isaías 61:1-2

20Lee tiha hotu, Jesus taka fali livru nee hodi entrega fila fali ba responsavel, depois Nia tuur. Ema hotu-hotu iha uma kreda laran hateke ba Nia, 21i Nia hatete ba sira, “Maromak nia liafuan nebee imi ohin rona nee, agora sai realidade duni.”

22Ema hotu komesa gaba Jesus. Sira admira tanba buat nebee Nia koalia nee loos duni. Maibee sira mos husu ba malu, “Nia nee laos José nia oan?”

23Jesus hatete ba sira, “Imi atu soe lia ida nee mai Hau, ‘Doutor, kura uluk ita boot nia aan!’ Imi sei dehan, ‘Ami rona Ita Boot halo milagre iha sidade Kafarnaum. Entaun halo took milagre nee iha Ita nia rain rasik!’ 24Maibee Hau hatete loloos ba imi, ema nunka simu Maromak nia profeta iha nia rain rasik.#Marcos 6:4; João 4:44 25Hanesan iha profeta Elias nia tempu, udan la mai durante tinan tolu ho balu, too rai hamlaha boot. Momentu nebaa, iha duni feto faluk barak iha Israel, 26maibee Maromak la haruka Elias baa sira. Nia haruka fali baa iha feto faluk ida iha aldeia Sarepta besik sidade Sidon.#1 Liurai sira 17:1,8-16

27Nunee mos ho profeta Eliseu. Iha tempu nebaa, ema Israel barak mak moras lepra. Maibee Maromak la kura sira, Nia so kura deit Naaman hosi rai Síria.”#2 Liurai sira 5:1-14

28Rona Jesus koalia nunee, ema hotu iha uma kreda laran nee hirus teb-tebes. 29Sira hotu hamriik hodi duni Nia sai. Aldeia nee iha foho leten. Sira lori Jesus sai hosi fatin nee, atu dudu tuun ba rai naruk. 30Maibee Nia lao sai hosi sira nia klaran hodi baa liu fatin seluk.

Nai Jesus duni sai espiritu aat hosi ema ida

(Marcos 1:21-28)

31Depois Jesus tuun baa sidade Kafarnaum iha provinsia Galileia. Iha loron Sabadu-sabadu Nia hanorin iha uma kreda. 32Nia hanorin nee halo ema admira, tanba Nia hanorin no nia liafuan iha kbiit boot.#Mateus 7:28-29

33Iha uma kreda laran, iha mos mane ida, espiritu aat domina hela nia. I nia hakilar ho lian makaas dehan, 34“Hei! Jesus, Ema Nazaré. O hakarak halo saida ba ami? O mai atu harahun ami ka? Hau hatene see mak O. O mak Ema Santu nebee Maromak haruka mai.”

35Maibee Jesus siak espiritu aat nee dehan, “Nonook! Sai hosi ema nee!” Derepenti espiritu aat riba ema nee ba rai iha sira hotu nia oin, i sai hosi ema nee, i la halo kanek nia.

36Ema hotu admira hodi dehan ba malu, “Liafuan nee makaas duni! Ema nee iha autoridade no kbiit foo orden ba espiritu aat nee, i sira sai kedas.” 37Entaun ema konta baa-mai kona ba Jesus iha rejiaun nee tomak.

Nai Jesus kura Simão nia banin feto ho ema seluk tan

(Mateus 8:14-17; Marcos 1:29-34)

38Bainhira Jesus sira sai hosi uma kreda, sira baa iha Simão nia uma. Momentu nee Simão nia banin feto isin manas makaas, i ema sira iha nebaa husu ba Jesus kura nia moras. 39Entaun Jesus baa hamriik iha ferik nee nia sorin hodi haruka isin manas sai. Derepenti nia moras nee lakon, i nia hadeer kedas hodi serbii sira.

40Bainhira loro monu dadauk, ema barak lori sira nia maluk sira nebee moras oi-oin ba Jesus. Nia tau liman ba sira ida-idak i kura tiha sira nia moras hotu. 41Nia mos haruka espiritu aat sira sai hosi ema barak nia laran, i sira sai duni hodi hakilar dehan, “O mak Maromak nia Oan!” Maibee Jesus siak espiritu aat sira nee i bandu sira la bele koalia, tanba sira hatene katak, Jesus mak Mesias [Salvador nebee Maromak promete hori uluk ona atu haruka mai].

Nai Jesus hanorin Novidade Diak iha sidade sira seluk

(Marcos 1:35-39)

42Iha fali aban dadeer san rai huun mutin, Jesus husik tiha sidade hodi baa iha rai fuik ida. Ema barak buka Nia. Bainhira sira hetan tiha Nia, sira husu ba Nia atu la bele husik hela sira.

43Maibee Nia hatete ba sira, “Hau mos tenki baa iha aldeia sira seluk hodi foo sai Novidade Diak kona ba Nai Maromak nia reinu, oinsaa Maromak ukun nudar liurai. Tanba Nai Maromak haruka Hau mai hodi halo ida nee duni.”

44Nunee Nia foo sai Novidade Diak hosi uma kreda ba uma kreda iha provinsia Judeia.

Currently Selected:

Lucas 4: BTDT

Highlight

Copy