Lucas 7
7
Nai Jesus kura komandante Roma ida nia atan
(Mateus 8:5-13)
1Jesus hanorin tiha hotu ema barak nee, Nia fila fali ba sidade Kafarnaum. 2Iha nebaa iha komandante Roma ida. Nia atan ida nebee nia hadomi teb-tebes, moras todan, besik atu mate. 3Bainhira komandante nee rona kona ba Jesus, nia haruka katuas Judeu balu baa husu Jesus para mai kura atan nee nia moras. 4Too iha nebaa, sira husu ho laran tomak atu Jesus baa kura nia. Sira dehan, “Nai, komandante nee serve duni atu Ita Boot tulun nia, 5tanba nia hadomi ita ema Judeu, i nia harii ona uma kreda ba ita.” 6Entaun Jesus baa hamutuk ho sira.
Sira besik too ona iha uma, komandante haruka nia kolega sira baa hatete ba Jesus dehan, “Nai la presiza lao kolen too mai, tanba hau la serve atu simu Ita Boot iha hau nia uma. 7I hau mos la serve atu baa hasoru Ita Boot. Nai hatete deit liafuan ida rua hosi nebaa mak hau nia atan sei hetan kura. 8Hau hatete nunee tanba hau nia komandante sira mos iha kbiit atu foo orden mai hau. Nunee mos, hau iha kbiit atu foo orden ba hau nia soldadu sira. Se hau manda hau nia soldadu ida dehan, ‘Baa nebaa!’, nia mos baa. Se hau hatete, ‘Mai iha nee!’, nia mai. I se hau haruka hau nia atan dehan, ‘Halo ida nee!’, mak nia sei halo.”
9Rona nunee, Jesus admira, i Nia fila oin ba ema barak nebee tuir Nia nee hodi hatete, “Hau seidauk haree iha Israel ema Judeu ida ke fiar makaas hanesan ema Roma nee.”
10Entaun komandante nia kolega sira nee fila fali. Too iha uma, sira haree atan nee diak tiha ona.
Nai Jesus halo moris fali feto faluk ida nia oan
11Tuir mai, Jesus ho Nia eskolanti sira baa iha vila ida naran Nain. Ema barak mos akompanha sira. 12Bainhira sira besik ona portaun atu tama ba vila, ema barak sai mai lori mate isin ida atu baa hakoi. Ida mate nee, feto faluk ida nia oan mane, nia oan mesak ida deit. 13Bainhira Nai Jesus haree feto faluk nee, Nia hanoin teb-tebes hodi hatete ba nia, “Keta tanis.”
14Jesus hakbesik ba ema sira nebee hulan mate isin nee hodi tau liman ba mate nee i sira paara tiha. I Jesus dehan, “Joven, Hau hatete ba o, hadeer ona.” 15Joven nee hadeer tuur kedas hodi komesa koalia. I Jesus entrega fali nia ba nia inan.
16Ema hotu iha nebaa tauk teb-tebes, i sira hahii Nai Maromak dehan, “Nai Maromak nia profeta boot ida mai tiha ona iha ita nia leet. Maromak mai ona hodi salva Nia povu.” 17Notisia nee, ema konta lemo-lemo iha provinsia Judeia tomak, ho mos too rai vizinhu sira.
João Sarani Nain haruka nia ema ba Nai Jesus
(Mateus 11:2-19)
18João Sarani Nain nia eskolanti sira konta ba João buat hotu-hotu nebee mak Jesus halo.#7:18:Iha tempu nee, João dadur hela iha kadeia. Haree Lucas 3:20. Entaun nia haruka ema nain rua 19baa hasoru Nai Jesus hodi husu, “Ita Boot mak Ema ida nebee Maromak promete atu haruka mai ka ami tenki hein ema seluk?”
20Sira too iha Jesus, sira husu, “João Sarani Nain haruka ami mai husu, Ita Boot mak Ema ida nebee Maromak promete atu haruka mai ka ami tenki hein fali ema seluk?”
21Iha tempu nee, Jesus kura hela ema moras barak. Nia duni sai espiritu aat hosi ema, i kura ema matan delek barak. 22Entaun Jesus hataan ba João nia eskolanti sira nunee: “Imi fila baa konta ba João kona ba buat hotu-hotu nebee imi ohin haree no rona rasik,
‘Ema matan delek, bele haree.
Ema ain aat lao la diak, bele lao.
Ema moras lepra, isin sai moos.
Ema tilun diuk, bele rona.
Ema mate, moris fila fali.
Ema kiak, rona Novidade Diak.’#7:22:Iha tempu nebaa, ema matan delek, ain aat, moras lepra ka tilun diuk, la bele hetan kura. Uluk kedas, Maromak nia profeta Isaias foo hatene katak, aban-bainrua Maromak sei haruka Kristu mai para kura moras sira nee i foo sai Novidade Diak ba ema kiak sira (Isaias 35:5-6, 61:1). Nai Jesus temi Isaias nia liafuan nee hodi hatudu ba João Sarani Nain katak, Jesus mak Kristu, Ida nebee Maromak promete atu haruka mai.
23Hatete tan ba João dehan, ‘Ema nebee la rejeita no la iha duvida mai Hau, nia hetan bensaun.’ ”
24Bainhira sira nain rua fila tiha, Jesus koalia ba ema barak nee kona ba João, dehan, “Uluk imi baa iha rai fuik maran hodi haree see loos? Imi baa atu haree ema nebee halai baa-mai tuir anin huu hanesan duut manlain, ka? 25Entaun imi baa atu haree saida? Atu haree ema nebee hatais ropa folin karu ka? Ema nebee hatais ropa diak i iha sasaan bar-barak hela iha liurai nia uma. 26Entaun imi baa atu haree saida? Imi hanoin atu haree Nai Maromak nia profeta ka? Loos duni! Maibee Hau hatete ba imi, João nee boot liu profeta. 27Nai Maromak nia liafuan hakerek ona kona ba João nia knaar dehan,
‘Rona mai! Hau haruka Hau nia manu ain ida
baa uluk O hodi prepara dalan ba O.’#Malaquias 3:1
28Hau hatete ba imi, la iha ema ida nebee moris hosi feto iha mundu nee boot liu João. Maski nunee, see mak hakruuk ba Maromak nudar Liurai, nia bele ema kiik mos, nia boot liu fali João.
29Ema hotu-hotu nebee rona Jesus nia liafuan nee, liu-liu kobrador impostu sira, sira rekonhese katak Maromak mak lia loos, tanba nee mak uluk João sarani sira. 30Maibee ema hosi grupu relijiaun Farizeu sira ho mestri relijiaun Judeu sira lakohi tuir Nai Maromak nia hakarak. Nee mak sira lakohi atu João foo sarani sira.#Mateus 21:32; Lucas 3:12
31Depois Jesus husu, “Ema ohin loron nee, oinsaa? Hau atu kompara sira ho saida? 32Sira hanesan labarik nebee tuur iha merkadu hodi hakilar ba malu, dehan,
‘Ami toka muzika kapaas loos,
maibee imi la dansa.
Ami tanis lelir,
maibee imi la tanis.’
33Tanba João Sarani Nain mai nia sempre jejun no la hemu tua, depois imi dehan, espiritu aat tama iha nia laran. 34Maibee Hau, Ema Oan mai, haan no hemu tua hanesan baibain, i imi dehan, Hau kaan-teen no lanu-teen, i halo belun ho kobrador impostu sira ho ema sala nain sira. 35Maibee ema hotu nebee moris tuir Maromak, sira hatudu katak matenek hosi Maromak nee loos duni.”
Feto aat ida kose mina morin ba Nai Jesus nia ain
36Iha ema Farizeu ida naran Simão, nia konvida Jesus baa haan iha nia uma. Entaun Jesus baa. Too iha uma, sira tuur iha meza hodi haan. 37Iha sidade nee, iha mos feto ida nebee sempre halo sala. Bainhira nia rona katak Jesus haan iha Simão nia uma, nia tama ba uma laran, i lori mina morin botir ida nebee karu teb-tebes. 38Nia baa hamriik iha Jesus nia kotuk, besik loos Nia ain. Nia tanis too nia matan been turu kona Jesus nia ain, depois nia hamaran matan been nee ho nia fuuk. I nia mos rei Jesus nia ain fila-fila hodi kose mina morin baa.#Mateus 26:7; Marcos 14:3; João 12:3
39Bainhira uma nain Farizeu nee haree feto nee nia hahalok, nia hanoin dehan, “Se Jesus nee Nai Maromak nia profeta, entaun Nia sei hatene feto nebee kona Nia nee moris iha sala.”
40Maibee Jesus hatene uma nain nia hanoin, i Nia dehan, “Simão, Hau hakarak hatete buat ida ba ita.”
Simão hataan, “Bele, mestri, koalia deit.”
41Depois Jesus soe lia ida dehan, “Iha senhor ida empresta osan ba ema nain rua. Ba ida, nia foo osan mutin atus lima, ba ida seluk, nia foo deit osan mutin lima-nulu. 42Maibee too iha loron atu foo fila fali osan nee, sira nain rua selu la bele. Entaun senhor nee hamoos tiha sira nain rua nia tusan. Tuir ita nia hanoin, hosi sira nain rua nee, ida nebee mak sei hadomi liu osan nain nee?”
43Simão hataan, “Karik ida nebee tusan boot liu.”
Jesus dehan, “Loos duni!”
44Depois Nia fila oin ba feto nee, i hatete ba Simão, “Ita haree took feto nee. Ohin Hau tama iha ita nia uma, ita la prepara bee hodi fasi Hau nia ain tuir ita nia lisan. Maibee nia habokon Hau nia ain ho nia matan been, depois nia hamaran ho nia fuuk. 45I ohin Hau tama iha ita nia uma, ita la rei Hau tuir ita nia lisan. Maibee feto nee, komesa ohin Hau tama mai iha nee, nia rei Hau nia ain fila-fila. 46Ita mos haluha tau mina mai Hau nia ulun, maibee nia tau mina morin ba Hau nia ain. 47Nunee, Hau hatete ba ita katak, feto nee sala barak duni, maibee nia sala hamoos hotu tiha ona. Nee mak nia hatudu domin boot mai Hau. Maibee se karik ema halo sala ituan deit, bainhira nia sala nee hamoos tiha ona, ema nee hadomi mos ituan deit.”
48Depois Jesus hatete ba feto nee, “Hau hamoos tiha ona o nia sala hotu.”
49Ema sira nebee tuur haan hamutuk ho Jesus nee komesa bis-bisi ba malu, dehan, “Nia hanoin Nia nee see?! Too Nia bele brani dehan Nia hamoos ema nia sala?”
50Maibee Jesus hatete ba feto nee, “Tanba o nia fiar mai Hau, nee mak o hetan salvasaun. Fila ho laran hakmatek.”
Currently Selected:
Lucas 7: BTDT
Highlight
Share
Copy
Want to have your highlights saved across all your devices? Sign up or sign in
© 2024 Wycliffe Timor-Leste.
