Mabikiri 3
3
Mwurunku ki kene bi ki
1Pyɛɛri fa Yuhana tirira bilana Kirinŋ nafɛmaŋ ki ru Kirinfusinaŋ ki ra, 2koŋ bɛɛ wuru nmaŋ, niŋ wuru mwurunku u. Ntiŋ ji po wuru ninkunŋ. Kí wuru ntiŋ shi-a jibi woo jibi, kí i ta ntiŋ sɔɔ-ri Kirinfusinaŋ ki faatɔnŋ bɛɛ ra, nwɔma ntiŋ i saraka rafɛ-ri ǹʼnu detɔnŋ kiri gbɛ. Kí wuru niŋ demantɔnŋ ki dɔri-ra tu Faatɔnŋ Shɔɔrinŋ. 3Mwurunku ki Pyɛɛri fa Yuhana ja-i de-a Kirinfusinaŋ ki ra, ntiŋ i saraka rafɛ kí gbɛ.
4Pyɛɛri fa Yuhana i arì ɲaniŋ ni da ntiŋ na, Pyɛɛri i ǹʼbi ntiŋ tɛ : « Yi shɛɛli. » 5Mwurunku ki i kí shɛɛli-li. Ǹʼwuru niŋ cirasun tu kí a ji-a finŋ bɛɛ wɔri afinŋ tɛ. 6Nka Pyɛɛri tu ntiŋ tɛ : « Jalinŋ míŋ gbɛ kì, sɛniŋ dumiŋ ńʼgbɛ kì, nka nwɔ̀ i míŋ gbɛ, míŋ a niŋ wɔri miŋ tɛ : Yesu Kirisa Nansarɛtitɔnŋ ki baraka ki ra, jɔrɔkɔ tu nʼkanŋ kiri sun, miŋ a so tiri tan-i! »
7Pyɛɛri i ntiŋ pa jɔrɔkɔ a paŋ gbɛ ki sun. Mìŋ manaanŋ tenŋ ki ru, ntiŋ kanŋ kiri fa ntiŋ wɔdamaŋ kiri fɛli kiri i baraka kila. 8Ntiŋ i see tu a kanŋ sun. Ntiŋ i tiri de kí fan Kirinfusinaŋ ki kaniŋ ki ru. Ntiŋ i tiri tiri de-ri, niŋ fa ntiŋ i see see de-ri, ntiŋ i Kirinŋ gbɛ-ri, ntiŋ i coolinŋ wɔri-ri ǹʼtɛ.
9Konaŋ ki bataa i ntiŋ ja, ntiŋ i tiri de-ri, ntiŋ i Kirinŋ gbɛ-ri, ntiŋ i ǹʼco-ri. 10Konaŋ kiri ǹʼtɔ-i waarinŋ wɔ̀ ru tu koŋ wɔ̀ wuru sɔɔ-ra Kirinfusinaŋ ki Faatɔnŋ Shɔɔrinŋ ki ra, ntiŋ i saraka ki rafɛ-ri, tu niŋ shuru ki i, ntiŋ kene-i ɲaan wɔ̀ tɛ, niŋ i bo kí tɔnŋ sun, ŋì i bali kí ra.
Pyɛɛri wɔ wulu ki Kirinfusinaŋ ki ra
11Konaŋ kiri ǹʼja-i tu ntiŋ i a san-a Pyɛɛri fa Yuhana na kì, ŋì i bo kí bataa tɔnŋ sun, kí i bili na arì rakɔli kí tonfan Kirinfusinaŋ ki tɔntɔɔ bɛɛ ru, nwɔ̀ wuru dɔri-ra tu Solomani wɔ Tɔntɔɔ.
12Pyɛɛri konaŋ ki ja-i waarinŋ wɔ̀ ru, ntiŋ i ǹʼbi kí tɛ tu : « Isirayɛlidaŋ ni, nfɛnŋ na niŋ i bo-ri ábɛɛ tɔnŋ sun? Nfɛnŋ ncin-a ábɛɛ yibɛɛ shɛɛli-li kɔɔn? Ábɛɛ cirasun tu yibɔɔ sotinbi walima yi wɔ tɔbi ncin, koŋ ka i so tiri tan-i wa? Aayi dɛ! 13Yibɛɛ tiŋ cɛɛnni Aburahamu, Ishaka fa Yakuba wɔ Kirinŋ ki, ninki a tɛ baara matɔnŋ Yesu ki tɔ ki gbɛ-i. Ábɛɛ ninwɔ̀ pa wɔri-i a kilɛntɔnŋ kiri tɛ, niŋ fa Pilati wuru ǹʼtɛ á i ntiŋ pani waarinŋ wɔ̀ ru, ábɛɛ á kaan-a niŋ sun. 14Ábɛɛ á kaan-a wɔlinŋ ki fa koŋ telimaan ki pani ki sun, á i Pilati rafɛ tu ntiŋ koŋ kilɛntɔnŋ ki pani niŋ ta ru. 15Ábɛɛ ɲaninkulutɔnbi wɔrɔtɔnŋ ki kilɛn-i, Kirinŋ ntiŋ ŋmɛni po san-i konkwuu kiri kanfɛ. Yibɛɛ i niŋ shɛɛri kiri i. 16Yibɛɛ bili-i ninwɔ̀ ra, yibɛɛ ntiŋ nafɛ-i, ninki ka koŋ ka kene-i, ábɛɛ ɲaniŋ i ninwɔ̀ ra, á i ninwɔ̀ tɔ-ri. Yibɔɔ bilinabi ki baraka ra niŋ Yesu ki ra, ninki wɔ so ki baraka ra, koŋ ka wɔ bɔlɔmabi ki kɔ-i, miŋ tu ábɛɛ ɲaniŋ i ǹʼna ɲaan wɔ̀ tɛ.
17Dɔnsaŋ, ńʼtindaŋ ni, míŋ ǹʼtɔ-i tu ǹʼtɔbalibi ncusun ábɛɛ fa á ŋununtiŋ kiri i ka ma. 18Nka, Kirinŋ i bi bataa tɔ-a. Ŋì ǹʼbi wuru awɔ cintɔnŋ kiri bataa tɔnŋ na tu, Yesu afinŋ Ɲaannakonshimaan ki kakan ŋì i cɔɔri, ŋì i kilɛn. Ninki ma-i kaa. 19Niŋ ki ra, á ntɔri bi áwɔ bijɛ kiri ra, á i na Kirinŋ tɛ, nwɔma ŋì i áwɔ bijɛ kiri tu á tɛ. 20A ábɛɛ niŋ ma, Ŋuntiŋ ki a ɲaanfɛfili wɔri ábɛɛ tɛ, ŋì i a Ɲaannakonshimaan ki bo na á tɛ sɛbɛ, ninwɔ̀ i Yesu. 21Ntiŋ kakan-i ntiŋ i tu kirinpɔli ki ra nmaŋ sun, fɔ finŋ fɔn bataa na napwulu ji ŋunaŋ i waarinŋ wɔ̀ ru. Kirinŋ yɛrima ki niŋ bi wuru awɔ cintɔnŋ wɔlinŋ kiri tɔnŋ na waaci ŋmani na.
22 Musa ǹʼbi wuru tu : ‹ Ŋuntiŋ ki, ábɔɔ Kirinŋ ki a na míŋ bishi cintɔnŋ po ábɛɛ tindaŋ kiri kanfɛ. Ntiŋ a na wulu wɔ̀ri bi ábɛɛ tɛ, á i na á tɔɔnye niŋ bataa tɛ.#Sariya kiri 18.15. 23A koŋ woo koŋ na niŋ cintɔnŋ ki wɔ wulu ki pa kì, nintiŋ a haliki po san Kirinŋ wɔ konanbi ki faninmwuŋ. ›#Sariya kiri 18.19; Sarakawɔrɔtɔnŋ kiri 23.29.
24Musa kɔɔtɛ, cintɔnŋ wɔ̀ri fɔn wulubi-i kabi Samuyɛli wɔ sunŋ ki ra, ŋì i ta bo nini cɛfan wɔ̀ kiri sun, nini fɔn bataa ka jibi kari wulu bi-i. 25Ábɛɛ i cintɔnŋ kiri nupo kiri, niŋ fa Kirinŋ a tɔnŋ wɔri-i a daŋ wɔ̀ri tɛ. Kirinŋ a tɔnŋ wɔri wuru ábɛɛ tiŋ cɛɛnni Aburahamu tɛ tu : ‹ Pwɔkulinŋ sun shiya ki bataa ra na juba kila miŋ nupo kiri bira. ›#Tɔnpa ki 22.18. 26Kirinŋ a tɛ baara matɔnŋ Yesu ki bo na-i waarinŋ wɔ̀ ru, ŋì ntiŋ cin na-i ábɛɛ kiri tɛ sun. Ŋì niŋ ma-i, nwɔma a i faan wɔri ábɛɛ tɛ, a i á bataa tenŋ tenŋ mwu, á i po san áwɔ saa jɛ kiri fan. »
Currently Selected:
Mabikiri 3: JOB
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
