Yuhana 11

Yesu wɔ wɔshuru Lansaari beŋ ki

1Shuru bɛɛ wuru Bɛtani, ntiŋ tɔ ki wuru tu Lansaari, niŋ i na kira. Niŋ Bɛtani ki wuru Mariyamu fa a naamari Mariti wɔ kili ki i. 2Mariyamu wɔ̀ ŋuŋ kini jii ki kɔri wuru Ŋuntiŋ Yesu kanŋ kiri sun, nmari i ǹʼsunciriki a ŋununshinŋ ki wu, ninki narinshuru wuru kira-a, ninwɔ̀ tɔ ki wuru tu Lansaari. 3Kiratɔnŋ ki narinmari kiri i cinŋ bo ta Yesu tɛ, tu : « Ŋuntiŋ ki, ábɔɔ wɔshuru ki kene kì. »

4Yesu niŋ wulu ki rama-i waarinŋ wɔ̀ ru, ntiŋ tu : « Ka kira ka ra rakɔ beŋ sun kì, ǹʼma-i nwɔma Kirinŋ wɔ sotinbi ki i ji, niŋ fa gbɛbi i bili Kirinŋ Danshuru ki sun. » 5Mariti fa a pwanmari ki niŋ fa Lansaari bidi wuru Yesu tɛ. 6Niŋ fa a fɔn na, ntiŋ Lansaari kira wulu ki rama-i, ŋì i ntiŋ tu kili wɔ̀ ra, ntiŋ i sunŋ fuuli ma niŋ mani ki ru sun. 7Niŋ kɔɔtɛ, ntiŋ i ǹʼbi awɔ kalindaŋ kiri tɛ : « Á ngban, yi yi pwulu tiri Yude sɔɔta ki ru. »

8Kalindaŋ kiri i ǹʼbi ntiŋ tɛ tu : « Kalimɔɔ, ǹʼcin-i sun kì, Yawutu kiri wuru ǹʼtɛ arì i ábɛɛ jɛri kwɔ ra, arì i á kilɛn, ábɛɛ i ji faa ǹʼbi-a, tu á ra á pwulu tiri niŋ mani ki ru wa? »

9Yesu tu : « Lɛɛri bwununfuuli sunŋ tenŋ ki ru kì wa? A konwɔtiŋ ji tiri-ra sunŋ ki ra, nintiŋ a kanŋ nakwuru-ra kì, sabu ntiŋ i maannaja-a sunŋ sarinŋ ki baraka ra. 10Nka konwɔtiŋ i tiri-ra cii ru, nintiŋ i a kanŋ nakwuru-ra, sabu manisarinŋ nmaŋ kì. » 11Yesu niŋ bi kɔ-i kí tɛ, ntiŋ i ǹʼbi tu : « Yibɔɔ wɔshuru Lansaari ɲinintan-i, míŋ a ta wú ŋmɛni. »

12Kalindaŋ kiri i ntiŋ nupwulu tu : « Ŋuntiŋ, a ntiŋ ji ɲinintan-a, niŋ i ǹʼbi-a tu ntiŋ a kene kɛ! » 13Yesu wuru Lansaari beeni wulu bi-a kalindaŋ kiri tɛ, nka kíbɛɛ cirasun, tu ntiŋ wuru ɲinintanmaanna bantenŋ wulu bi-a.

14Niŋ ki ra, Yesu i ǹʼfɔɔ bi kí tɛ tu : « Lansaari beeni-i. 15Míŋ ji nmaŋ kì, niŋ míŋ ciirudi-i ábɛɛ bira, nwɔma ábɛɛ i bilinabi ma, nka yi tiri wú tɛ. »

16Niŋ na, Toma wɔ̀ wuru dɔri-ra tu « Fili ki », niŋ i ǹʼbi kalindaŋ pyɛ kiri tɛ tu arì fa Yesu ta, arì i ta beeni ntiŋ fan.

Konkwuu kiri ŋmɛni bi ki fa ɲaninkulutɔnbi ki

17Yesu ta-i so niŋ mani ki ru waarinŋ wɔ̀ ru, ntiŋ i ta fa Lansaari kwuu ki sunŋ pyiiraŋ ma-i ta ki ru kɔ. 18Niŋ Bɛtani ki fa Yerusalɛmu faninmwuŋ ki wuru fwuu-ra kilo byaŋ sun kì. 19Yawutu mwɔɔnna ta wuru Mariti fa Mariyamu tɛ, kí i ta Lansaari beŋ coolinŋ ki tan kí tɛ.

20Mariti ǹʼnama-i waarinŋ wɔ̀ ru tu Yesu yiri-ra nmaŋ, nmari i ta ntiŋ ŋununafu, niŋ i fa Mariyamu sɔɔ wuru fu ki ru. 21Mariti i ǹʼbi Yesu tɛ tu : « Ŋuntiŋ, a ábɛɛ ji-ri kwumaŋ míŋ narinŋ ki wuru-ra beeni kì. 22Nka, hali dɔɔ, míŋ i ǹʼtɔ-a ńʼtu ábɛɛ finŋ woo finŋ nafɛ, ńʼtu Kirinŋ a niŋ ma ábɛɛ tɛ. »

23Yesu i Mariti rupwulu tu : « Miŋ narinŋ ki a ŋmɛni. »

24Nmari i Yesu rupwulu tu : « Míŋ tɔ-i tu ntiŋ a ŋmɛni konkwuu kiri ŋmɛni shikaŋ ki ru jibi rakɔɔra ki sun kɛ. »

25Yesu i ǹʼbi nmari tɛ tu : « Mínki i konkwuu kiri ŋmɛni-na, ŋí i ji ɲaninkulutɔnbi ki wɔri-ra. Koŋ finŋ woo bili míŋ na, hali a ntiŋ beeni, ntiŋ a na ŋmɛni. 26Niŋ fa koŋ finŋ woo finŋ tu-i a ɲaanna, a ntiŋ bili míŋ na, nintiŋ a bɔni a ɲinita ki ru kì. Miŋ bili-i niŋ na wa, Mariti? »

27Nmari i ntiŋ nupwulu tu : « Aawe Ŋuntiŋ, míŋ bili-i ǹʼna ńʼtu ábɛɛ Kirinŋ wɔ Koŋ Ɲaannashimaan ki i, Kirinŋ Danshuru ki, nwɔ̀ kakan wuru-i ŋì i na juniɲa nu. » 28Mariti niŋ wulu kiri bi kɔ-i waarinŋ wɔ̀ ru, nmari i ta a pwaŋ Mariyamu dɔri, nmari i ǹʼbi niŋ tɛ wulu tɔtɔɔlaaŋ nu tu : « Kalimɔɔ ki na-i, ntiŋ tu a na. » 29Mariyamu niŋ nama-i mani wɔ̀ ru, nmari i jɔrɔkɔ tiri Yesu tɛ.

30Niŋ fa wuru Yesu de-ri kili ki ciiru sun kì, Mariti ta wuru ntiŋ ŋununafu mani wɔ̀ ru, ntiŋ wuru faa-a niŋ mani ki ru. 31Yawutu wɔ̀ri na wuru beŋ coolinŋ tanmaŋ ki ru, nini ǹʼja-i tu Mariyamu po nukwululula, kí i ǹʼpa nmari cɛfan, kí cirasun tu nmari ra ji tiri-ra ŋuntan saali ki ra. 32Mariyamu so-i Yesu maŋ ki ru waarinŋ wɔ̀ ru, nmari ɲaniŋ bili-i ntiŋ sun mani wɔ̀ ru, nmari i ta a kwushiri ntiŋ fɛ, nmari i ǹʼbi ntiŋ tɛ tu : « Ŋuntiŋ ki, a ábɛɛ ji wuru kwumaŋ, míŋ narinŋ ki wuru-ra beeni kì. »

33Yesu Mariyamu fa a fan Yawutu kiri ja-i ŋuntan-a waarinŋ wɔ̀ ru, niŋ i ntiŋ ŋununsuntiri, ŋì i ntiŋ firi kilɛn. 34Ntiŋ i ǹʼbi : « Ábɛɛ ta ǹʼye da? » Kí tu : « Ŋuntiŋ ki, á na ǹʼshɛɛli. »

35Yesu i ŋuntan. 36Yawutu kiri tu : « Ábɛɛ ǹʼshɛɛli, Lansaari bidi wuru ntiŋ tɛ dɛ! » 37Nka ǹʼbɛɛ ri tu : « Mìntiŋ wɔ̀ ɲaanfwuu ki ɲaninaŋ kiri nawwuli-i, ntiŋ wuru-ra so beŋ ki suu ka shuru ka sun kì wa? »

Yesu wɔ sotinbi ki beŋ ki sun

38Yesu firi kilɛnmaan ki i ta so saali ki ra. Niŋ saali ki wuru faayɛli lu, kí faa la wuru nwɔ̀ tɔnŋ na.

39Yesu tu : « Á faa ki kulunkulu san nmaŋ. »

Koŋ beenimaan ki narinmari ki, Mariti i ǹʼbi Yesu tɛ tu : « Ŋuntiŋ ki, ǹʼkini ki a ji juu po-a kɔ, sabu ǹʼsunŋ pyiirantɔnŋ ki i kaa, ta ki ru. »

40Yesu i ǹʼbi nmari tɛ tu : « Míŋ ǹʼbi-ri miŋ tɛ tu, bilinabi ji miŋ gbɛ, ńʼtu miŋ a Kirinŋ wɔ sotinbi ki ja kì wa? »

41Niŋ wulu ki sun, kí i faa ki kulunkulu san ta ki tɔnŋ na, Yesu i a ŋuniŋ ki fɛshi kirina, ntiŋ i ǹʼbi : « Míŋ Tiŋ, ábɛɛ míŋ wulu ki rama-i, míŋ i baraka bi-a ábɛɛ tɛ niŋ bira. 42Míŋ kɔniŋ ǹʼtɔ-i ńʼtu ábɛɛ tɔɔnyemaan i míŋ tɛ waaci bataa ru, míŋ i ka bi-a ǹʼtonfantɔnŋ kiri bira, nwɔma kí i bili ǹʼna tu ábɛɛ yɛrima kiri míŋ cin. »

43Niŋ wulu kiri bimaan ki kɔɔtɛ, ntiŋ i fali tu : « Lansaari! Po taanna kwumaŋ! »

44Konkwuu ki i po, ǹʼkanŋ kiri fa ǹʼgbɛ kiri sunminiminimaan wuru-i juulinŋ kiri wu, ntiŋ ɲaannu ki i sunla sɛbɛ. Yesu tu kí tɛ tu : « Á juulinŋ kiri pili san ntiŋ sun, á i ntiŋ bo tiri. »

Lude-i Yesu sun

(Matiyu 26.1–5; Maraka 14.1–2; Luki 22.1–2)

45Yawutu wɔ̀ri na wuru Mariyamu tɛ, nini Yesu ja-i niŋ bi kiri ma-a, kí mwɔɔnna i bilinabi tan ntiŋ na. 46Nka ǹʼbɛɛ ri i ta Farinsiyɛnŋ kiri tɛ, kí i ta Yesu mabi ki bi nini tɛ.

47Sarakawɔrɔtɔnŋ ŋununtiŋ kiri fa Farinsiyɛnŋ kiri i arɔɔ kitikwurutoŋ ki rakɔli, kí tu : « Yi a nfɛnŋ ma, sabu ka weŋ ka i botɔnsunbi mwɔɔnna ma-a? 48A yibɛɛ wú tu a yɛrɛtɛ ka ɲaan ka tɛ, konaŋ ki bataa ra bili wú ra, nka a niŋ ma, Ɔrɔmutɔnŋ kiri ra na yibɔɔ Kirinfusinaŋ ki gwu, kí i yɔɔ shiya ki haliki. »

49Niŋ jiri fɛ sarakawɔrɔtɔnŋ kiri ŋununtiŋ sinaŋ ki, nwɔ̀ tɔ wuru tu Kayifu, niŋ tu kí tɛ : « Ábɛɛ finŋ tɔri tenŋ tɔ-a kì, 50ábɛɛ ǹʼtɔ tu koŋ tenŋ beeni konaŋ ki bataa bira, tu niŋ pari yibɔɔ shiya ki bataa halikimaan ki wu kì wa? »

51Kayifu niŋ wulu ki bi-ri a yɛri ki faan wu kì, miŋ tu mìntiŋ wuru niŋ jiri ki fɛ sarakawɔrɔtɔnŋ kiri ŋununtiŋ sinaŋ ki i, niŋ ki ra Kirinŋ i ka cintɔnbi wulu ka de ntiŋ daru, tu Yesu kakan ntiŋ beeni kɔ́ɔ́ shiya ki ta ru. 52Nka niŋ wuru-ra ma kɔ́ɔ́ shiya ki bantenŋ bira kì, Kirinŋ wɔ konanbi wɔ̀ri jeɲe tiri-i juniɲa ki kɛlinŋ ki bataa tɛ, ntiŋ wuru-ra beeni, nwɔma nini bataa i bo arìmaŋ sun, kí i ji finŋ tenŋ i.

53Ŋì i shi niŋ jibi ki sun, Yawutu jɛntɔnŋ kiri i fu ǹʼsun tu arì Yesu kilɛn. 54Ninki i ncin Yesu a tu ntiŋ i a maanni de-ri Yawutu kiri ɲaanfɛ kili kì. Ntiŋ i tiri jaŋ faninmwuŋ kɛlintɛ kili pyaanŋ bɛɛ ra, nwɔ̀ tɔ wuru tu Efarayimu, ntiŋ fa awɔ kalindaŋ kiri i ta sɔɔ niŋ kili ki ra.

55Niŋ waari ru, Yawutu kiri wɔ Jonbikɔ ɲaannabyɛ ki myɛ wuru kɔ. Koŋ mwɔɔnna wuru po-a kɛniŋ ki kili tɔri kiri ra, kí i na-ni Yerusalɛmu, ɲaannabyɛ ki i tu jɛŋ, nwɔma arì na arì yɛri wu fɔɔ, ŋì i kɛɲɛ arɔɔ ladaŋ kiri wu.

56Konaŋ kiri wuru Yesu maŋ ki ceeli de-a. Ŋì i kí tu Kirinfusinaŋ ki kaniŋ ki sun, kí i arìmaŋ nanɔri-ri : « Ábɛɛ ɲakilila ki ǹʼdanwɔ? Wú a na ɲaannabyɛ ki ru daa wú a na kì? » 57Niŋ fa wuru sarakawɔrɔtɔnŋ kiri ŋununtiŋ kiri fa Farinsiyɛnŋ kiri ǹʼbi-ri konaŋ kiri tɛ kɔ, tu koŋ woo koŋ Yesu maŋ tɔ, tu ntiŋ na ǹʼbi arì tɛ, nwɔma arì i ta ntiŋ pa.

Currently Selected:

Yuhana 11: JOB

Highlight

Copy