Uruti 2
2
Uruti wɔ bilaŋ kɔɔlifɛ bi ki
1Koŋ bɛɛ wuru Nawomi shinŋ kaniŋ ki sun, nwɔ̀ wuru nafulutiŋ sinaŋ tɔtiŋ i, ntiŋ ji Elimelɛki tindaŋ i, kí i Boonsi bi-ri ntiŋ tɛ.
2Jibi bɛɛ, Uruti i ǹʼbi Nawomi tɛ : « Míŋ i ǹʼtɛ, ŋí i ta jaŋ kiri ru bilaŋ tɛritɔnŋ kiri cɛfan. A konwɔtiŋ ta ńʼsunmakwulupa, ŋí i bilaŋ ki kɔɔlifɛ niŋ wɔ ji ki ru. » Nawomi tu nmari tɛ : « Tiri, ńʼdanmari. »
3Niŋ ɲaan ki tɛ, Uruti i tiri bilaŋ kɔɔli ceelimaŋ ki ru. Nmari i ta fu Boonsi wɔ ji ki wu, ninwɔ̀ wuru Nawomi wɔ shuru Elimelɛki tindaŋ i.
4Niŋ shikaŋ, Boonsi i po Bɛtilɛhɛmu, ntiŋ i so ji ki ru. Ntiŋ i bilaŋ tɛritɔnŋ kiri co tu : « Ŋuntiŋ Kirinŋ tu á fan. » Kí i ntiŋ nupwulu tu : « Kirinŋ baraka de á ru. » 5Niŋ kɔɔtɛ, Boonsi i awɔ bilaŋ tɛritɔnŋ kiri jɛntɔnŋ ki ranɔri : « Nkɛnŋ wɔ mari ka mari bulaaŋ kaa? »
6Bilaŋ tɛritɔnŋ kiri jɛntɔnŋ ki i ǹʼnupwulu tu : « Nawomi fa Mowabu daŋ wɔ̀ na-i arìmaŋ fan, kí i po Mowabu kɛniŋ ki ru, niŋ yɛ. 7Nmari míŋ nafɛ-i, tu míŋ ncusun a i bilaŋ kɔɔli ceeli bilaŋ tɛritɔnŋ kiri cɛfan. Nmari na-i kabi siira, a dɔnsaŋ ji-i kì, nufaan ki fɔn wuru cinŋ i nmari gbɛ. »
8Niŋ kɔɔtɛ, Boonsi i ta ǹʼbi Uruti tɛ : « Nʼtɔɔnye ńʼtɛ. Fa ta bilaŋ kɔɔlifɛ ji tɔri ru kili ka ji ka kɔɔtɛ kì. Fa nʼsan mɔ́ɔ́n cinŋ mamari kiri cɛfan kì. 9Tu ŋi i ji ki ru shɛɛli ta-ri, nʼfa mɔ́ɔ́n bilaŋ nakɔli mari kiri. Míŋ ǹʼbi-i bilaŋ tɛri ɲɔrɔkɔ kiri tɛ, ńʼtu kí fa myɛ miŋ na kì. A jumwunu nʼpa, ŋi i ta nʼmwunu kɔ́ɔ́ ju faamaan ki bɛɛ ra. »
10Niŋ na, Uruti i a kwushiri, nmari i a sunbili fwuniŋ sun Boonsi fɛ, nmari i ǹʼbi tu : « Nfɛnŋ na, ábɛɛ míŋ gbɛ-ri ka ɲaan ka tɛ, á i ńʼsunmakwulupa-ri, mínwɔ̀ i jɛ gbansanŋ i? »
11Boonsi i ǹʼnupwulu tu : « Miŋ nwɔ̀ ma-i nʼshinŋ ɲiŋ ki tɛ, nʼwɔ shuru ki beenimaan ki kɔɔtɛ, kí niŋ bataa bi-i míŋ tɛ. Míŋ ǹʼtɔ-i tu miŋ nʼɲiŋ ki fa nʼtiŋ ki tu nmaŋ, ŋi i nʼjikili ki tu nmaŋ, ŋi i na kɛniŋ nu, nʼwuru nwɔ̀ tɔ-a nmaŋ sun kì. 12Miŋ ninwɔ̀ ma-i, Ŋuntiŋ Kirinŋ nʼsali nini bataa ra. Aawe, Ŋuntiŋ Kirinŋ ki, Isirayɛlitɔnŋ kiri wɔ Kirinŋ ki nʼsalika shɔ nʼwɔ shɔɔrinŋ mamaan ki ra, miŋ na-i nʼbiye ninwɔ̀ gbɛsun. »
13Uruti i ǹʼbi niŋ na : « Ábɛɛ i míŋ shɔɔrintiŋ i, míŋ ŋuntiŋ, sabu ábɛɛ míŋ tɔnnafuru wulu bi-i, niŋ i faa míŋ yɛri ábɔɔ jonmari ki tɔri po kì! »
14Nufinŋ nu waaci ki na-i so, Boonsi i nmari dɔri tu : « Na sɔɔ yi nufinŋ ki nu, bwuru ki bɛɛ mwu, ŋi i ǹʼye wɛli ki ru. »
Niŋ na, nmari i sɔɔ bilaŋ tɛritɔnŋ kiri tɔntɛ. Ntiŋ i bilaŋ kanimaan ki bɛɛ wɔri nmari tɛ, nmari i nufinŋ ki nu, nmari i pyii-i, fɔ nmari i ǹʼpyɛ tu.
15Niŋ kɔɔtɛ, nmari i jɔrɔkɔ nmari i bilaŋ kɔɔlifɛ ki tɔnpa sɛbɛ. Boonsi i ǹʼbi awɔ cinŋ matɔnŋ kiri tɛ, tu : « Á ncusun nmari bilaŋ kɔɔli ki ceeli-li hali bilaŋ yɛkɔli kiri kanfɛ, á fa jɛbi nmari gbɛ kì. 16Á bilaŋ kaarinŋ kiri bɛɛ ri tu-ri á cɛfan, nmari i so nini bɛɛ ri kɔɔlifɛ-i, á fa jɛbi nmari gbɛ kì. »
17Uruti i ɔriji bilaŋ kɔɔli ki ceeli Boonsi wɔ ji ki ru niŋ ɲaan ki tɛ, fɔ bilana. Nmari bilaŋ wɔ̀ kɔɔlifɛ kila-i, nmari i niŋ bwɔ. Ǹʼbwɔmaan ki i shɛɛrinŋ sinaŋ tenŋ faa.#2.17 Niŋ wuru fu-a culo bwununbyaŋ bishi i. 18Uruti i tiri bilaŋ kɔɔlifɛmaan ki wu kulu. Nmari i ta ǹʼji a shinŋ ɲiŋ ki wu. Nmari i awɔ suunna pyɛ ki wɔri nmari tɛ sɛbɛ. 19Nawomi i Uruti ranɔri tu : « Miŋ ta bilaŋ kɔɔli ki ceeli da jiŋ? Miŋ ta baara ki ma nkɛnŋ wɔ ji ru jiŋ? Konwɔtiŋ miŋ sunmakwulupa-i, Kirinŋ baraka de ntiŋ nu. »
Niŋ na, Uruti ta wuru awɔ baara ki ma konwɔtiŋ gbɛ, nmari i niŋ ɲaanbi a shinŋ ɲiŋ ki tɛ, niŋ fa nmari i ǹʼbi : « Míŋ ta-i ńʼwɔ baara ki ma koŋ wɔ̀ gbɛ, nintiŋ tɔ ki i tu Boonsi. »
20Niŋ na, Nawomi i ǹʼbi a samari ki tɛ : « Ŋuntiŋ Kirinŋ shɔɔrinŋ ma koŋ ka tɛ, mìŋ Kirinŋ wɔ̀ ki a ɲakililafɔni konkwuu kiri fa ɲaninkulutɔnŋ kiri tɛ kì. » Nmari tu sɛbɛ : « Ka koŋ ka myɛ yibɛɛ tɛ. Nwɔ̀ri kakan-i, kí i arì ɲakili tu yibɛɛ ra, niŋ bɛɛ yɛ. »
21Mowabu nupo Uruti i ǹʼbi : « Ntiŋ ǹʼbi-i míŋ tɛ sɛbɛ tu míŋ fa ta ji tɔri ru afɔɔn ki ciniŋ kì, tu míŋ tu awɔ baaradaŋ kiri fan fɔ awɔ bilaŋ tɛri ki i ta kɔ. » 22Nawomi i ǹʼbi a samari ki tɛ : « Niŋ shɔ-i ńʼdanmari, tu ŋi i ta-ri baara ki ma-ni ntiŋ wɔ ji ki ru, kí fa na ta nʼnufyɛ ji tɔri ru kì. »
23Niŋ na, Uruti i a da tu Boonsi wɔ konanbi ki ra, nmari i bilaŋ kɔɔli ki ceeli-li, fɔ ɔriji bilaŋ ki fa alikaanma tɛri ki i ta kɔ. Nmari i tu a shinŋ ɲiŋ ki fan nmaŋ.
Currently Selected:
Uruti 2: JOB
Highlight
Share
Copy
![None](/_next/image?url=https%3A%2F%2Fimageproxy.youversionapistaging.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© Wycliffe Bible Translators, Inc.