Lucas 12

Hengetlhekmoskama fariseos malha harina apiepheskama

1Apvakhengvai'avek nak enenlhet'avok apentalhnema Jesús apkenmangkelha' m'a, apkeliengemmakpek nak na m'a, lhnak aptemak Jesús apkellanemo apkeltamesaikamok:

—¡Ellaho ta harina apiepheskama apanko'ok anak Fariseos akvesai'a hengiennenkeskama! 2Lhamakho qaselha alposemmalhka nak nkoliephongvetak hata, qaselha akielhammalhka nak, ngkolhek hata akiekpelkangvakmo. 3Ka ngkanek lhamakho apkelpakmetekama nak ketlhengkap ienaqtesakha lhma, knem ankek hato ka elvetakpok kanhan nkonnalhkak ma'a. Lhamakho apkelpaqmetekama nak apkelposkama apkellapekha atong, ngkolhek hata akvenengka takhalhet'ok apkakhaiangkolha.

Metka nengai'a enenlhet

4—Ka stak ko'o askellano ketlhengkap asketlhelhma'ak nengaqte, mellaga nkek enenlhet apkenmopvana nak enaqtevaksek vanlha apkeliokha nak, koka mankollapvankek mokhom etvaksek ma'a. 5Koka ellaho m'a apto apmopvana nak ellaqhek enenlhet'avok kakpota nhan eklho'ok ma'a nkospanei'akha talha, have niapak ankek ma'a.

6Ellanhono anata tko'ok 5 la'a, alianmoma koka hanet patakkom aliaqiema mankennave ka nkoie', Eniapom neten koka apkeltakmelkeskamak ma'a. 7Koka neten apankavek ketlhengkap have aptangko nak anata tko'ok anak. ¡Mankolhnamonkek na apkellai'a! Ngkanek Eniapom Neten apiavek aklhamakho apkeliokha nak akvakmo apva apkelietsatema.

Aktaqmanma anlhenek apvesai'a Jesús napaqtavek enenlhet'avok

8—Apkeleltennaskek hata nkek ketlhengkap heliekpelkemelha napaqtavek enenlhet'avok, Enenlhet Apketka nak etlhenek hata nhan apkeliekpelkemelha ketlhengkap napaqtavek ángeles apanko'ok Eniapom Neten. 9Koka apkeleltennaso la ketlhengkap mangheliekpelkema ko'o, nkolhek hata nhan atlheno metka nema aliekpelkemo napaqtavek ángeles apanko'ok Eniapom Neten ma'a.

10Eniapom Neten hata etneskesama apankek ngkolatsekama la aplheianma apvesai'a Enenlhet Apketka nak, koka metneskesama ta apankek nema aptevaskama la apvesai'a Espíritu Santo.

11Nnek hata nkek aliantemakho ketlhengkap ma'a apkaqnekhelha la judios, nlho ka la nhan napaqtavek hengeliekpelkemo apkelveskaie, koka moltama nkek apvalho'ok apkenmak'akha la etnangkok apkellatemmoikama m'a, 12Espíritu Santo ta ellangkok apkeliamo apkellatemmoikama ketlhengkap ma'a —lhna aptemak Jesús apkellanemo apkeltamesaikamok.

Enenlhet nkeskama apketsekama metka apqatek

13Lhema aphapak nak enenlhet apiavei'ak Jesús ma'a, lhna aptemak apkanemo Jesús:

—Hengetlhekmoskama, eltennes no eiepma eniana ta heiangkokhak nekhatkok qaselha apanko'ok alhta tata nnenga —lhna aptemak.

14Ka apkatemmoiangka lhnak Jesús ma'a:

—Have ko'o asto hengiekpelkemo niapom apanko'ok ketlhengkap, have nhan askelhpankesekha mota qaselha apanko'ok —lhna aptemak.

15Ka apkellan'o lhnak Jesús enenlhet'avok ma'a, lhna aptemak:

—Ellaho ta m'a, meteniamo nke mota ngkeskama apkelletsekama ketlhengkap ngkanek nenganiemhaikama nak have akteiapmakha m'a aiseksek anak ngkeskama nak netsekama —lhnak aptemak Jesús ma'a.

16Ka apkeleltennaseiangka lhnak Jesús lhema apietkeskama m'a, lhna aptemak:

—Lhema lhnak enenlhet nema apketsekama nietnengkek nak akiavai'a lhepop apankok ma'a, apnaklhengkek nak na akiavai'a nkek aklhamakma akielhna m'a. 17Mang nak eihamok apkakheskeianlha akielhna apnaklhema m'a, 18lhna ntemak aklheianmo apvalhok:

"Hai, atvasekhak hata ko'o pa'at apak aknaiangkelha aktek ehenkok, alanekhak hata alhnankok pa'at akiavai'a nkek kakpota altakmelkesek lhamakho aktek asnaklhema m'a, kakpota nhan lhamakho qaselha ehenko'ok konne. 19Netamen nkopaihekhak hata ko'o evalhok ngkanek nkaksek hata asketsekama kakpota nhan astoma. Ngkotnek hata akvenaktema akietnema qaselha ehenko'ok, kakpota nhan aholhek hata ngkotnek asiamposammalhka", lhna ntemak aklhenaikama apvalhok enenlhet anak ma'a.

20Koka lhna aptemak Eniapom Neten:

"Metka apqatek lheiap, enietsepok hata pelhasep anak, po'ok enenlhet hata etnekhak apankok apkeltakmelkeskama lhkek qaselha apanko'ok".

21Hata ngkotnek ma'a enenlhet apkankesaikamo mota apketsekama qaselha apanko'ok, koka m'a mamma nkek apketsekama napaqtek Eniapom Neten.

Metka akvannammalhka envalhok aimommalhka la qaselha

22Netamen nak Jesús ma'a lhna aptemak apkellanemo apkeltamesaikamok:

—Moltama nke mota apvalho'ok selha etavangkok ke kakpota nkoliennakteksek, kakpota nhan se lha elentalhnekhak ietamopai'a ie'. 23Ngkanek apkeltema nak aphalhnanko'ok akto neten ankek akiaspommalhka, mangko lhnok ma'a nentoma nak, ka apkeliokha nak neten ankek akiaspommalhka mangkolhnok ma'a apkelentalhnema nak. 24Ellanho no mama', mamma apnaklhekamok akielhna apkenaikamok, mamma nhan apnengkanvekhelha la'a akielhna apanko'ok, Eniapom Neten koka apkellaiangke mota aptekamok ma'a. Tep ankek hato ka ellangkok qaselha Eniapom Neten ketlhengkap, ngkanek tep ankek apkellelto apkeliaspommap, metlhok mama'. 25Nkaqhok nkoleltama apvalho'ok apkeleltemo nkovangkangkok apkellangiemhaikama tep atketsek la'a#12:25 Apkeltemakha mota judios lhema empengkaptek akvakho emmek alietkesammalhka apanko'ok malha medio metro., mankovenke pankek koka. 26Mankollapvankek ketlhengkap ellanangkok ma'a malha atketse nak qaselha, aqhemo altemeskeskama altaikama apvalho'ok ma'a qaselha niekhe nhan akiavai'a m'a.

27Ellanho no elhnemok alanmo nak iokhalhma, mamma akteniaikamok la aiempeiok nkonmakmama m'a kakpota nkoteniangkok alentalhnema, koka nkeltasek elhnemok malha alentalhnema. Man nak nanek eltetesammakpok apiav'akha apveske Salomón, melhnaiangkok na apkelentalhnema ngkeskama lhta niekhe altakmanma apketsekamaha. 28Eniapom Neten apkellaikamok elhnemok anak malha apkeltakmanma alentalhnema, vanlha koka akiakvatakho allenteiapma m'a kakpota ngkolhek alvanlhakho m'a. Tep ankek hato ka ngkotnek ketlhengkap apkellaikamok Eniapom Neten apkelentalhnema ietamopai'a. ¡Mokhom koka apkeliaskeiam Eniapom Neten ketlhengkap!

29Ka stak askellano mokhom ketlhengkap, moltama nkek apvalho'ok selha etavangkok ke, kakpota nhan einangkok. 30Ka apkeltemakha nak meliekpelkemo Eniapom Neten, nkeltama mota apvalho'ok qaselha aimommalhka. Koka ketlhengkap apnek Apkeliapom ma'a, apiavek aimommalhkelha la'a. 31Ntasek koka elientengkaso mota atlhenaikama apvalho'ok qaselha alleniem'o m'a akieto nak aptemakha apveske Eniapom Neten, netamen ellangkok lhamakho qaselha nak ma'a alaimommalhka la ketlhengkap.

Aktaqmanma angankesangkok netsekama m'a neten

32—Mankoliet ankek apkellai'a ketlhengkap apkellelto nak helieplekama, apkanet apanke niekhe ketlhengkap, koka Apkeliapom anak hata eltemeskesek apkelveskai'e apkelpasmekha m'a aniem'o apiamolhma m'a. 33Eklhamok hata akietnakha la qaselha apanko'ok, eltenia ta akianmoma patakkom kakpota ennaskekhak apieseksek enenlhet metka nak apkelletsekama, kakpota ngkoitek ketlhengkap ngkeskama apkeletsekama m'a akieto neten mankotnengvaianlha nnelha'. Mamma enenlhet apmenielhma m'a kakpota nhan mamma askok veneng aptevaskama la qaselha m'a. 34Ka akietno la qaselha akmennave apanko'ok enenlhet nalhepop anak, nietnek na apvalho'ok hengke'e, koka akietno la qaselha akmennave apanko'ok neten, nietnek na apvalho'ok ma'a.

Aktaqmanma antek nema hengasennaikama nel·halhnekama

35-36—Etnamok hata mota ketlhengkap malha nema allennengkasekama nak apkelel·halhnekama na mota apveske apanko'ok evak kelha neksa aktaqmelaikama lhma aliemhapma. Apkelpeneskamo nhan talha alhankok apanko'ok apkelapommatkesekha apkenmahai'a elpeneskasok apkenmaieskasekha atong apvenengka ta m'a apveske apanko'ok. 37Hata apvaktamo ta m'a, aktaqmelakho nke ta nkotnek apkellelto metka apnaqteianma aniem'o apkelel·halhnekama apveske apanko'ok. Ellavak hata nhan ma'a kakpota elpasengvomok aptavekha m'a, kakpota ellangkok na apanke aptekamok. 38Hai, aktaqmelakho nke ta nkotnek nema alennengkasekama apkelvetangvaktamo ta menaqteianma apveske apanko'ok, evatak kelha pelhasep apanke' nlho ka la nhan atsak'o.

39Malha nha aktonak ma'a apiapma'ak anak nematkak, apioho la'a se lha hora evak apmenielhma apnemakha, el·halhnamaha kakpota meniangkek enmenielhkesek qaselha apanko'ok apnemakha. 40Hata etnangkok na ketlhengkap ma'a, melvatesamok ankek apkelel·halhnekama kakpota nhan apkelpeneskamo ngkanek nkotlapkesek hata evatak Enenlhet Apketka nak —lhna aptemak Jesús.

Nema annengkasekama apiamolhma kanhan meihamolhma

41Koka lhnak aptemak Pedro apkenmalhneiangka Jesús ma'a:

—Apveske, ¿ennengko'o nlho hengelietkasak ma'a apietkeskama lhkek, nlho ka la aplhamakho enenlhet'avok anak, he? —lhna aptemak Pedro.

42Koka lhna aptemak Apveske:

—Ka asietkeskama lhkek aplhamakho apkellelto nak malha nema annengkasekama la apiamo panke apkeliehekho aptakha apkanemakha apveske apankok apkeltemo ellangkok aptekamok apketkak neptamen. 43-44Ka apvakho la mokhom apveske apankok ma'a, etangvetak apkeliehekho aptakha lhkek apaivoma apkeltemo ellana, etneskesek hata apkemhama apmanie apkeltakmelkeskeskama qaselha apanko'ok ma'a, avanhek hata ngkotnek aktaqmanma m'a apkennengkasekama nak. 45Koka nema annengkasekama aklheianma la apvalhok alhaiek apvekta apveske apankok, meltaqmelkeskesek hata nhan aplhamakho apkellennengkasekama apkelennava'ak kanhan ngkelvana'ak, kakpota eniempok aptavekha, einek nahan akvakmo nkeso akieihamalhma'. 46Nkotlapkesek hata evatak apveske apanko'ok, eiaqmongkasekhak hata akientalhnema nkek aptaiangkolha enenlhet meliamo nalhma. 47Nema annengkasekama la'a apiavek aptemakha apekkenkasekha apaivoma apveske apankok koka meliahakho la'a, nkaksek hata ngkolhek aliaqpelhketangka apiempek ma'a. 48Koka nema annengkasekama la'a meiho la apekkenkasekha apaivoma apveske apankok, aptemengvakho la lhma, aselhtek hata ngkotnek nema aliaqpelhketaikama apiempek ma'a. Nkeskama la qaselha aplhevai'a enenlhet, nkaksek hata nhan nema akiatekamok apkeltammap elanak lhamakho qaselha m'a kanhan nema akmahai'a ngkolhek akpeivesakho apkellanai'a lhamakho —lhna aptemak Jesús.

Nelhpankesammalhka aniem'o hengetlhekmoskama Jesús

49Lhnak aptemak Jesús apkellanemo m'a:

—Asva'ak ko'o kakpota alvetek talha kanke'e nalhepop anak, askeltave niekhe nkalaio' kolhvave nak. 50Malha ta ngkotnek na knema helavkeskekha aiseksek akientalhnakha neksa askaniemhaikama, avanhek aslengaiangko kolhvave nak akvakmo ta m'a aktakha nnelha. 51¿Apkellane nlho ketlhengkap asvai'ak ko'o hengke'e asoiam altaqmelaikama apvalho'ok, he? Ma, asva'ak ko'o asoiam askelhpankeskama ta. 52Malha aktonak enenlhet 5 la apketkak, apqanetolhem'a ta ennapakpok apqanet. 53Apiapom eniammelhekhak hata apketka apanke, apketka eniammelhakhak hata apiapom apanke. Ngken nkammelhekhak hata atka nkoie, atka nkammelhekhak hata ngken anko ie'. Niepiamong nkammelhekhak hata ataven angken, ataven angken nkammelhekhak hata niepiamong —lhna aptemak Jesús.

Qaselha mongenatkeskama aklheianma nkovak hata

54Lhnak aptemak Jesús apkellanemo enenlhet:

—Neksa apkelvetai'a ketlhengkap iephopai'a akteiapma akieto aktalhnengvanlha aknem, etlhenek hata akmahai'a nkomma, hata ngkotnek ma'a. 55Ka apkelhkakmo la nhan pieiam, etlhenek hata ketlhengkap akmahai'a nkatekha, ngkotnek hata nhan m'a. 56Apkeliavek ketlhengkap etlhenek nkovak hata m'a apkellan'o la qaselha neten kanhan nalhepop anak ¡Sek temo meliangveiakmo nak apkelvetai'o nak qaselha nenvanlha nak! ¡Hengeliennengkeskama niapma'ak ketlhengkap!

Nengasekhekho mokhom hengammelhaikama

57—¡Kotlhen koka mota apvalho'ok apankavek ketlhengkap akpeivomo la qaselha antehek! 58Aplhenakpek hata nkek lheiap apkellanai'a qaselha ngkolatsekama, ellanekha ta apankavek sekhek ma'a amanie ta apmahai'a ngkolhek akiantemakho napaqtavek hengiekpelkemo niapom, ngkanek eniangkongvomok hata lheiap apkellanekama atong ma'a kakpota ellaqlhengkesek konne nengaqlhengkasemmalhkelha lheiap ma'a. 59Eniaqlhengkasakpok hata m'a akvakmo aptangiengvakmok apkeliaqmoma m'a kakpota etepekhak lheiap ma'a —lhna aptemak ma'a.

Currently Selected:

Lucas 12: TMF

Highlight

Copy