Lucas 15
15
Apietkeskama Jesús nepkesek aplheneiam
1Apkelteteskai'o lhnak enenlhet apkenmaikamok anak patakkom impuestos ankok, kakpota nhan enenlhet apketlhenammap apkellanekamok ngkollatsekama apnakha Jesús ma'a, kakpota ellailhok apkeltennaikama m'a. 2Apkelvetai'ak nak fariseos ma'a kanha escribas, ka apkelmaleniosemmakpo lhnak mok apankavek ma'a, lhna aptaiangkok:
—Apalhakvakme nak Jesús enenlhet anak apkellanekamok ngkollatsekama kanhan aptavokhek lheme —lhnak aptaiangkok ma'a.
3Koka aplengai'ak nak Jesús ma'a, apkeleltennaseiangka lhnak lhema apietkeskama, lhna aptemak:
4—Apiangko la 100 nepkesek enenlhet, netamen elhnanmok kelha lhema aphapak apketkok. ¿Have nlho niapak elieniekhak sekhek 99 nepkesek ma'a kakpota eliangvakhak lhema lhkek aplheneiam nepkesek apketkok, he? 5Ka apvetakho la m'a, nkopaihekhak hata apvalhok, epatmentak hata neplatane. 6Apvakhek hata nkek apnemakha m'a, ellavama ta apkennemolhema kanhan apkeltaiangkolha apketlhelhma'ak nengaqte, hata etnek:
"Mpaihakhek ko'o evalhok, asvetakhek lhek nepkesek apketkok alhta aplheneiam, kolpaihekha ta nhan apvalho'ok ketlhengkap", hata etnek ma'a.
7Nnavek na m'a avanhek hata ngkotnek akpaihekha apvalhok neten anak apvet'o la lhema enenlhet apkelanai'a ngkollatsekama apiaqmongkasekha mo'ok apvalhok, aselhtek ma'a akpaihekha apvalhok apkellanei'o 99 enenlhet apkellelto apkelpeivomo metka alaimommalhka' nak apkeliaqmongkasekha mo'ok apvalho'ok ma'a —lhna aptemak Jesús.
Patakkom akiaqiema akteiam
8Mo'ok apietkeskama:
—Lhema ngkelvana kelha nhan ngkoitek 10 patakkom aliaqiema dracmas, nkotiemok kelha lhema. ¿Have nlho niapak kolhvavek ankek nkoliama apommatkeskama la'a kakpota nhan nkalhnasama konne' aknemakha kakpota nkotekhak ma'a, he? 9Netamen akvetakho la patakkom ankok, nkollavama ta annemolhema kanhan altaiangkolha atlhelhma'ak nengaqte, hata ngkotnek: "Kolpaihek hata lhemek ko evalhok, asvetakhek lhek patakkom dracma akteiam alhta", hata ngkotnek ma'a.
10Nnavek na m'a ángeles apkellapaskama Eniapom Neten nkolpaihekhak hata apvalho'ok apiaqmongkasakho la mo'ok apvalhok lhema enenlhet apkelanai'a ngkollatsekama —lhna aptemak Jesús.
3
11Apkeltennaiangka lhnak Jesús mokhom apietkeskama m'a, lhnak aptemak:
—Lhema enenlhet nak apqanet apketkak ma'a, 12apselhiek apketka lhnak apkenmalhnekama lhema nekha atkok qaselha apanko'ok apiapom, ka apkennaskekho lhnak apanko'ok apiapom, apkellaiangkok apqanet apketkak ma'a. 13Ka apiamasmo lhnak nema akianmoma apketsekama apselhiek ma'a apkaikamok lhek apiapom, apkenmamo patakkom akiavai'a, aplhengamo lhnak ma'a apmaiangko mo'ok apkellavakha. Ka aptevaskeiakmo lhnak patakkom apankok ma'a apvaianlha aniem'o qaselha ngkollatsekama apvanengvaiam ma'a. 14Mek nak na nietnemak ma'a, mamma lhnak nentoma m'a, ka aqhangveiakmo lhnak na mek apketkok ma'a. 15Apteniaiangka lhnak na apmakmekama, apvetekho aptaqmelkeskama ietapomap ma'a lhema iokhalhma. 16Apmahai'avek na niekhe etvok aptoma ietapomap teves ma'a, mang noka elhkaiak. 17Ka alketansemo lhnak apvalhok apketkok anak, lhnak ntemak aklhenaikama apvalhok:
"Mantek aptekamok apkenmakmesaikama tata netamen alhta aniep apankok, ko'o koka mek heiaqha ngvai'ak hengke'e. 18Ntasek hata ataqho netamen alhta kakpota altennaksek: Tata, mangkolatsema askelanai'a napaqtek Eniapom Neten kakpota nhan lheiap, 19mangheietok atnek apketka lheiap, ntasek hetneskasekhak apmakmesaikama lheiap", lhna ntemak mota aklhenaikama apvalhok apketkok anak.
20Ka aptaqhemo lhnak neptamen ma'a, apkanketkeskekho lhnak apnemakha apiapom. Mokhek nak apvetai'ak apiapom apkelhiaiakmo apketka, apietnai'avek nak napa'at, ka apketkaiangko lhnak aptangieiakmo m'a, apathetmo lhnak na m'a, apetsesmo lhnak nahan. 21Lhnak aptemak apketkok anak apkanemo apiapom:
"Tata, mangkolatsema askelanai'a ko'o napaqtek Eniapom Neten kakpota nhan lheiap, mangheietok atnek apketka lheiap", lhna aptemak apketkok.
22Koka lhna aptemak apiapom apkellanemo apkenmakmesaikama:
"Ellakhetkasama elvakhesek apkelentalhnema apkeltakmanma la hengke'e kakpota nhan apkatkeskama apophek kakpota nhan apnakteto apmankok, 23kakpota nhan eliantengvakhak vakka atkok akmelai'a aspokkanma lhta, ennahap hata nhan kakpota angellanangkok akiavai'a aktaqmelaikama lhma. 24Ngkanek apvaktaniek eietka malha apketsepma lhta aptemak, kolhva koka aphalhnankok mokhom, malha aplheneiam alhta nhan aptemak, kolhva koka asvetakhek mokhom", lhnak aptemak apiapom ma'a.
Ka apkelempai'o lhnak apkellanekhak apkeltakha aktaqmelaikama lhma' ankok ma'a. 25Apetma lhnoka aplomaka mokhom aniep apmakmekama, netamen aptaqhemo lhnak apnemakha. Neksa aplhengama lhnak aplengai'o akpaivoma iompat aktaqmelaikama lhma m'a, 26ka apkenmalhneiangka lhnak apmakmesaikama apiapom, lhna aptemak:
"¿Se lha akietno aie, he?", lhna aptemak.
27"Apvaktaniek lhek apialheng, avanhek akpaihekha apvalhok apiapom apvet'o aphalhnankok, ka apkelaneskaso nak aktaqmelaikama lhma, apkaqho nhan vakka atkok akmelai'a apokkanma lhta", lhnak aptemak apmakmesaikama apiapom ma'a.
28Mang na ngkeskama aploma apetma m'a, mang nak na nkomahai'ak etalhnengvomok konne pa'at ma'a. Ka apteiapmo lhnak apiapom apkelienlhaneiakmo lhna niekhe apkeltemo etalhnengvomok akietnakha aktaqmelaikama lhma m'a. 29Koka lhna aptemak apketka metno apketkok:
"Nlhamakmek iantelhkapa asmakmesaikama lheiap, askeliehekho motaha, mang koka heiaiangkok lhema ieta'ai apketkok kakpota alanak aktaqmelaikama lhma ieplomo askeltemo lheme nengaqtek apketko'ok. 30Koka apvaktamo apketka nak lheiap meihamolhma, aptevaskeskangkek na lheiap patakkom apankok ma'a apkaikamo lhta, ngkelvana'ak allanaktema apkellankongvaiakmok ma'a. Apmakhek koka takha mokhom lheiap, apkaqhaskeso nhan vakka atkok akmelai'a apokkanma lhta, apkelaneskaso nhan aktaqmelaikama lhma", lhna aptemak ma'a.
31Koka lhna aptemak apkatemmoiangka apiapom:
"Hai', asiavek ko'o mota heiasekhai'o lheiap, alhelhma mota nhan lheiap, ka ehenkok anak lhamakho lheiap na apanko'ok. 32Koka ntasek na angellanak aktaqmelaikama lhma, nkolpaihekhak na engvalho'ok apvaktaniek apialheng. Malha lhta apketsepma aptemak ma'a, aphalhnankok koka nelvetakhak mokhom, malha alhta aplheneiam na aptemak, koka nelvetakhek mokhom" lhna aptemak apiapom ma'a.
Currently Selected:
Lucas 15: TMF
Highlight
Share
Copy
Want to have your highlights saved across all your devices? Sign up or sign in
©2023 LETRA Paraguay
