Lucas 18

Lhentampe kanhan hengiekpelkemo niapom nkopeivomo aptemakha

1Apketlhekmoskangkek nak Jesús apkeltamesaikamok aktemakha mota nenmalhnongkoma metka nenhalhemmalhka, lhna aptema Jesús lhema apietkeskama:

2—Apnengkek nak lhema hengiekpelkemo niapom ma'a, meniai'o lhnak Eniapom Neten kakpota nhan enenlhet'avok ma'a. 3Nlomaka lhnak na m'a lhema ngkelvana lhentampe, metka nnelha lhna ntemak akiavekha apnakha hengiekpelkemo, altemo epasmok emaskeskesek alammelhammalhka akhaikamok, 4mang noka eniammelhmok hengiekpelkemo m'a. Koka nkelienlhaneiakmavek na mota, ka alketameiangka lhnak apvalhok ma'a, lhna ntemak: "Niekhe moliehekho ko'o Eniapom Neten kanhan enenlhet'avok, 5koka apasmok hata ehenkek lhentampe nak ma'a ngkanek avanhek ankek heliaskama lhma nkelhiakme mota asnakha", lhna ntemak aklheianma apvalhok ma'a.

6Ka apeneskamo lhnak Apveske apkeleltennasekama apietkeskama m'a, lhna aptemak apkellanemo apkeltamesaikamok:

—Ka enenlhet anak hengiekpelkemo niapom mepeivomo apasmongkek koka apankek ngkelvana lhentampe aniem'o alienlhaneiakmo. 7Eniapom Neten hata nhan epasmok ma'a apto enenlhet apkeliekieskama apkelienlhaneiakmo la'a apkenmalhnonkoma mota aknem anke kanhan pelhasep, melailhek hata nhan m'a, 8kolhvavek kankek hata nhan epasmok ma'a. Koka apmak'o ta evatak Enenlhet Apketka nak hengke'e metangvetaniek hatelha meliaskeiam enenlhet'avok —lhna aptemak Jesús.

Enenlhet apkammakpo kanhan enenlhet nalhepek apvalhok

9Apkelpaqmetkesaikama lhnak Jesús enenlhet'avok apkeleltammakpo apankavek apkelpeivomo kanhan apkelvannaikama po'ok, lhna aptemak Jesús apietkeskama:

10—Apqanet nak enenlhet apkenmeiekha Eniapom Neten apnemakha kakpota elelmalhnak ma'a. Lhema lhnak Fariseo, po'ok nak na apkenmama takha patakkom impuesto ankok. 11Apkenmekhek nak neten fariseo, lhna aptemak apkenmalhnonkoma m'a:

"Eniapom neten, avanhek astema gracias lheiap ngkanek have stonak ko'o po'ok enenlhet meliamolhma nak. Mamma asmenielhma, have nhan asto mopeivomo, mamma nhan astevaskama heliemhapma. Motnema aptemakha nak hengke'e apkenmama nak patakkom impuesto ankok. 12Hanet aknem lhema semana ankok askaqhaskesammalhko mota mek, askaiangkek na lhema nekha 10 anak akianmoma asmakmekama", lhna aptema mota apkenmalhnonkoma m'a.

13Koka enenlhet apkenmama takha patakkom impuesto ankok, taiepek nak apkenmaiangkolha m'a fariseo, apkapiosemmakpavek nak aphalhentamo nhan ma'a, aptekpoiangka lhna apneniek apankek ma'a, lhna aptemak:

"Eniapom Neten, eietno no neha'at mangkolatsekama ko'o askelanai'a mota", lhna aptemak apkenmalhnonkoma m'a.

14Ka apeneskamo lhnak apietkeskama Jesús ma'a, lhna aptemak apkellanemo enenlhet'avok:

—Have niapak ankek Eniapom Neten elhenek hata apto apeivomo apkenmama lhkek takha patakkom impuesto ankok, have koka m'a fariseo lhkek. Enenlhet apkeleltammakpo neten apankavek, ngkolhek hata altemeskesakho koneng. Koka enenlhet apkeltaikamok koneng anke, neten apankavek hata ngkolhek altemeskesakho m'a —lhna aptemak Jesús.

Apkeltakmelkeskeskama Jesús nematkak

15Mmahai'ak na niekhe ngkolhek aliantemo nematkak apnakha Jesús kakpota enengkenek apmeio'ok aietsekso'ok ma'a. Man nak eleltemok apkeltamesaikamok ma'a, apkeliamenaikama lhnoka allelto aliantemaiam ma'a. 16Ka apkellaveiangka lhnak Jesús nematkak, lhna aptema apkellanemo apkeltamesaikamok:

—¡Meliasamo lhma nematkak anak anmahai'a helteteska! Ngkanek allelto nhan anko'ok aptema nak Apveske Eniapom Neten. 17Ntasek enmankok takha m'a aptema nak Apveske Eniapom Neten ka aktaiangkolha nak nematkak anak. Koka mankonmak'o la enmankok takha, melentalhnengvomek hata m'a —lhna aptemak apkellanemo m'a.

Enenlhet nkeskama apketsekama

18Lhema apkemhama apmanie' lhnak apaqmetkeskai'ak Jesús, lhna aptemak:

—Hengetlhekmoskama apiamolhma', ¿ko la atnek ko'o kakpota ngkoitek akiennaktema enneniek mankotnengvaianlha nnelha, he? —lhna aptemak.

19Ka apkatemmoiangka lhnak Jesús ma'a, lhna aptemak:

—¿Se lha ntak heltangko nak asiamolhma lheiap ke, he? Vanlha Eniapom Neten apto apiamolhma. 20Apiavek lheiap henganemakha nak, ¡metves aliemhapma, meniaqha po'ok, memenielhankoie', metnama nkek apmopvana ania'a apmahai'a etselhnanak po'ok, eniaho nhan apiapom kanha ngken! —lhna aptemak Jesús.

21Ka apkatemmoiangka lhnak apkemhama apmanie, lhna aptemak:

—Hai, astemakha eietkok askeliehekho ko'o m'a —lhna aptemak.

22Koka lhna aptemak Jesús apkanemo:

—Lhema qaselha nkaimelhkak lheiap etnehek, etlhak lhamakho apketsekama apankok, etenia ta akianmoma patakkom kakpota ellangkongvomok patakkom metka nak apkelletsekama kakpota heieplomaha. Netamen ngkoitek hata lheiap ngkeskama apketsekama m'a neten —lhna aptemak ma'a.

23Aiosek na ntemak apvalhok aplengai'o enenlhet ma'a aniem'o ngkeskama apketsekama. 24Netamen Jesús lhna aptemak apkellanemo enenlhet'avok ma'a:

—¡Nientelhe ka nke eklhek aknema apketsekama akieto nak aptemakha apveske Eniapom Neten! 25Alhievai'a nke niekhe koka m'a nkoklhek alahak aktek#18:25 Ka alahak anak akvesai'a lhema atong atkok akientalhnema eklhek enenlhet. anak iama etanlheng, mangkolhnok ma'a eklhek ngkeskama nak apketsekama akieto aptemakha nak Apveske Eniapom Neten —lhna aptemak Jesús ma'a.

26Nkelpelapkeskangkek nak enenlhet'avok apkellengai'o m'a, lhna aptaiangkok:

—Mamma hatelha apkelvaiam la tep, hela —lhna aptaiangkok ma'a.

27Ka apkatemmoiangka lhnak Jesús ma'a:

—Enenlhet mankapvankek etnek akto nak hengke'e, koka Eniapom Neten apvanke etnehek apmak'akha la etnehek —lhna aptemak.

28Koka lhna aptemak Pedro:

—Apveske, nennenkenakhe lhta qaselha engankok ennengko'o, ka nelieplavengka lheiap —lhna aptemak.

29Ka apkatemmoiangka lhnak Jesús, lhna aptemak:

—Hai', have niapak ankek apkelto la enenlhet eieniekhak apnemakha, aptava, apkelialheng'a, ngkana'ak, apketkak, aniem'o apmahai'a eniasennama Apveske Eniapom Neten. 30Elhkak hata qaselha tep ankek mokhom hengke'e, netamen hata m'a emanie nak elhkak hata nhan akiennaktema apneniek ma'a —lhna aptemak Jesús.

Aplhenekho mokhom Jesús ematong hata

31Apkankesekhek nak Jesús 12 apkeltamesaikamok mok apankavek ma'a, lhna aptemak apkellanemo:

—Nenmeiakhek kolhva Jerusalen, hata ngkotalhkak ma'a akientalhnema apketlheianmo lhnak nanek apkeleltennasemmap ania'a annenga aktemakha ta apiaihekama Enenlhet Apketka nak. 32Elhkengvomok hata m'a metnangko nak judios, elvannama ta m'a, eltakneva ta nhan, elelhpaqhak hata nhan apkeliemanong ma'a. 33Eleliaqpelhketama ta nhan, ellaqhek hata nhan, koka hanetolhema aknem hata nkotnek apketsepma, elhatekhangvomok hata mokhom ma'a —lhna aptemak Jesús.

34Koka mang nak eliamok apkeltamesaikamok ma'a aktemakha aplheianma Jesús, malha lhna ntemak meleltammap eliohok ma'a.

Aptaqmelkasekha Jesús enenlhet metka apaqto'ok akieto Jerico

35Nengaqtek nak apvekha Jesús natemma Jerico m'a, apnengkek nak enenlhet metka apaqto'ok ma'a nekha amai, apkellanhekama lhna mota enenlhet patakkom ma'a. 36Aplengai'ak nak nema alpaqmetenta amai, ka apkelelmalhneiangka lhnak ma'a, lhna aptemak:

—¿Se lha akto ie, he?

37—Apiekak Jesús ko Nazaret hengke'e —lhna aptaiangkok enenlhet apkellatemmoiangka m'a.

38Ka apveneiangka lhnak metka apaqto'ok ma'a, lhna aptemak:

—Jesús, David aptaven neptamen, eietno neha'at —lhna aptemak.

39Koka enenlhet apketlhengama apmaniaie apkeliamenaikama lhnak apkeleltemo evanmak metka apaqto'ok ma'a. Koka apiangveskaiakmek nak apvenekama akiennaktema anke, lhna aptemak mokhom:

—David aptaven neptamen, eietno no neha'at —lhna aptemak.

40Ka apkenengvaiakmo lhnak Jesús ma'a, apkeltemo lhnak ngkolhek akiantemakmo enenlhet anak, lhna aptemak ma'a:

41—¿Sek la apkelto alanak ke, he? —lhna aptemak.

—Apveske, askeltavek atekha lhma' mokhom —lhna aptemak.

42—Hai', ntase, etaqmelekhak hata aniem'o mei'askeiam lheiap —lhna aptemak Jesús m'a.

43Kolhvavek ankek nak apvetekha lhma m'a, apieplekho lhnak Jesús. Apiavenkaseiangka nhan apvesai'a Eniapom Neten aniem'o apmopvana, apkeliavenkaseiangka nhan apvesai'a aplhamakho enenlhet'avok ma'a.

Currently Selected:

Lucas 18: TMF

Highlight

Copy