Lucas 20

Apientalhnemo Jesús

1Apnengkek nak Jesús ma'a konne Eniapom Neten apnemakha apketlhekmoskangkek nak ma'a ania'a aktaqmanma, ka apkelvai'o lhnak apkelveskaie sacerdotes, escribas kakpota nhan metno apketko'ok, 2lhnak aptaiangkok:

—¿Selha aikamok apientalhnemo lheiap kakpota ellanak lhamakho qaselha nak, he? —lhna aptaiangkok.

3Koka lhna aptemak Jesús apkellatemmoiangka:

—Ko'o nhan askeltavek alelmalhnama ketlhengkap, 4¿selha apaskama Juan kakpota ellavkesangkok iemmen enenlhet'avok ke, Eniapom Neten nlho ka la enenlhet? ¡Ngva, helatemmoma noho! —lhna aptemak.

5Ka apkellatemommakpo lhnak mok apankavek ma'a, lhna aptaiangkok:

—Nengellatemmongka la'a Eniapom Neten apkapaskama Juan, netamen hengelleltennasekhok hata Jesús mangeleliehekho Juan ma'a. 6Nengellatemmongka la'a enenlhet apkapaskama Juan, ello'ok hata nhan enenlhet'avok metaimong hata hengeliaqna', ngkanek apkeliavek enenlhet'avok Juan apkeltennasemmap ania'a apanke —lhnak aptaiangkok apkelpaqmetkasemmakpo mok apankavek ma'a.

7Ka apketlheianmo lhnak meliamok apto apkapaskama Juan kakpota ellavkesangkok konne iemmen enenlhet'avok ma'a. 8Lhnak aptemak na Jesús:

—Ko'o nhan momak'ak alhenek apto heiaikamok asientalhnemo kakpota allanak lhamakho qaselha nak —lhna aptemak.

Nema anmakmesaikama meliamolhma

9Lhnak aptemak lhema apietkeskama Jesús:

—Lhema enenlhet nak apkanmak uva alhkapok aniep apankok, ka apteniai'o lhnak enenlhet apkenmaikama sekhek nema akianmoma kakpota eltaqmelkesek aniep apankok, ka aplhengamo lhnak na m'a mo'ok apkellavakha. 10Ngvaiakmek nak pelten apnaklhemakha akielhna m'a, ka apkapaskamo lhnak lhema apmakmesaikama m'a kakpota elvakhesek nekha akielhna apanko'ok. Koka apkelvetai'ak nak apkenmakmekama aniep apvekho apkapasammap ma'a, ka apkeltanieiakmo lhnak, apkelpathetmo, apkeltekpoiangka nhan, apkellapasekho nhan mok apmeiok ma'a. 11Netamen apveske apkapasakho mokhom po'ok apmakmesaikama, apkeltaknongkomo lhnak na m'a, apkeltekpoiangka nhan ma'a, apkellapasekho mokhom mok apmeiok. 12Netamen apkapaskamo mokhom po'ok apmakmesaikama, apkeliensaskamo, apkeliengioseiangko nhan neiava' aniep ma'a. 13Netamen apto apankok aniep alketameiangka lhna apvalhok, lhna ntemak:

"Kelha askapaso la eietka askamelaiam, ellasekhok hatelha m'a", lhna ntemak aklheianma apvalhok ma'a.

14Koka apkellelto apkenmakmekama m'a apkelvetai'o nema apaskama, lhnak aptaiangkok apkelpaqmetkesammakpok mok apankavek ma'a:

"Koka apketka apanke ha'e, hata etnekhak apankok aniep anak. Ntasek hata angaqhek kakpota antangkokhak enganko'ok aniep anak", lhna aptaiangkok ma'a.

15Ka apkelpathetmo lhnak, apkeliaskamo neiava' aniep ma'a, apkellaqhangveiakmo lhnak na m'a.

¿Ko la aktakha atlheianma apvalho'ok ketlhengkap apvaktamo la otep aniep anak, he? 16Have niapak ankek ma'a ennapvetak hata apkenmakmesaikama meliamolhma lhkek kakpota ellangkokhak aniep po'ok enenlhet —lhna aptemak.

Koka lhna aptaiangkok apkellelto apkellengai'a m'a:

—Ma', metnek ma'a —lhnak aptaiangkok ma'a.

17Apkellanei'avek nak Jesús enenlhet'avok ma'a, lhnak aptemak:

—Ka ntak aktalhesammalhka Eniapom Neten apaivoma hengke'e:

«Metaimong alhta apkelhakhama apkellanekamok pa'at, koka ntakhek neten ankek akiaspommalhka m'a».

18Enenlhet apto la apteiam takhalhet metaimong anak, ekpelkakpok hata m'a, koka metaimong anak akteiakmo la takhaplhet enenlhet, apnek apankek hata etnekhak ma'a —lhnak aptemak Jesús ma'a.

19Apkeliekpelkangveiakmek nak apketlhenammap sacerdotes kakpota nhan escribas aktemakha apietkeskama Jesús ma'a, ka apkenmahai'o lhnak niekhe elpathetek ma'a, nkelvannammalhkek noka apvalho'ok ma'a, apkellai'ak nak ello'ok enenlhet'avok ma'a.

Nema anmalhnekama Jesús aktemakha impuestos

20Netamen nak ma'a apkellapaskamo lhnak enenlhet malha apkeliamolhma apankavek ma'a kakpota elenmalhnengvakhak lhema ania'a Jesús, koka apkenmahai'ak na niekhe etselhnanak kakpota ellangkongvomok apveske ko Roma. 21Lhnak aptaiangkok apkellanemo m'a:

—Hengetlhekmoskama, neniavek ennengko'o akto nak iokhalhme apaivoma lheiap mamma apkai'akha, mang na eteniak nkollekkeskasama apvalho'ok po'ok aptakha la aplheianma. Vanlha akietemo nkek apketlhekmoskama henganemakha Eniapom Neten, ka nemmak'o nak angelelmalhnama lheiap, 22¿ngkeltemengke nlho ley angelianmongkesek impuesto ankok apveske iokhalhma Roma, he? —lhna aptaiangkok ma'a.

23Apiamavek noka Jesús apkenmahai'o etselhnanak ma'a, lhnak aptemak apkellanemo:

24—¡Ngvanoho! Henkes no lhema patakkom akiaqiema nak nengaikamok anak impuesto ankok. ¿Selha na'at hengkaie, apvesai'a nhan? —lhna aptemak.

—Apveske Cesar ham —lhnak aptaiangkok ma'a.

25—Hai', ellangkongvakhak Cesar akto apankok kakpota nhan ellangkongvakhak Eniapom Neten akto apankok —lhna aptemak Jesús ma'a.

26Mannak nkollapvanka'ak etselhnanak Jesús ma'a, apkelvanmekhek nak ma'a, nkeliemaskangkek nak apvalho'ok apkellatemmoikama aknema apiamo Jesús.

Aktemakha nenlhatekhangveianlha

27Apkeliavekhek nak Saduceos apnakha Jesús ma'a, apkeliaskeiakmo lhnak aktemakha nenlhatekhangveiam nengetsepo la'a, lhna aptaiangkok:

28—Hengetlhekmoskama, Moises annenga hempekkenkasekha lhta apaivoma apketsepo la lhema enenlhet metka apketka, netamen apialheng hata emekha aptava neptamen. Apvetaskeso la atka ngkelvana, ngkotnek hata malha apketka apmanie lhkek apmaskengvaiam apetma' annenga.

29Nietnengkek nak lhema akvetammalhka m'a, nemmak'ak angeliohok aktakha aklheianma apvalhok lheiap ania'a nak. Apkakhaiangkek nak 7 apkelialheng'a enenlhet, nkeliemhapmek nak apkelpetma m'a, apketsepmo lhnak metka apketka m'a. 30Netamen apkemhaikamok apialheng apmekho lhnak aptava neptamen, ka apketsepmo lhnak na metka apketka m'a. 31Apmekho mokhom ngkelvana apkemhaikamok apialheng ma'a, apketsepmo lhnak na metka apketka m'a. Ntemengkek nak na m'a aplhamakha apkelialheng'a, apkeletsepmek nak na metka apketkak ma'a aplhamakho. 32Ka atsepmo lhnak na aktakha nnelha nkek ngkelvana m'a.

33Kolhva nenmak'ak angelelmalhnama lheiap, ¿se lha ngkotnekhak atava ngkelvana 7 nak apkelialheng'a akvakmo ta aknem apnaklhatekhangveianlha apieseksek apkenmaskengvaiakmo, he?#20:33 Koka saduceos apkeliaskeiakmek nak aktemakha nennaklhatekhangveianlha apieseksek apkenmaskengvaiakmok. —lhna aptaiangkok ma'a.

34Ka apkatemmoiangka lhnak Jesús, lhna aptemak:

—Nkeliemhapeiangke mota enenlhet'avok hengke'e, 35-36koka apkellelto apkeliekieskama Eniapom Neten enaklhatekhangvomok hata apieseksek apkenmaskengvaiakmo kakpota enmankok ma'a neten, mankoliemhapokhek hata m'a ngkanek mmaskek apkeletsepo mokhom, malha ángeles hata etnangkokhak ma'a, Eniapom Neten apketka'ak hata etnangkokhak.

37Kotlheianvakho no apvalho'ok ania'a iamet atkok lhnak nanek aleivomo, aplheianmo lhnak nanek Eniapom Neten apto apveske apankok Abraham, Isaak kakpota nhan Jacob annenga. Koka hengka ntasek nkotlheianvakho mota engelvalho'ok have niapak ankek nennaklhatekhangveiam hata apieseksek apkenmaskengvaiakmo. 38¡Nkanek Eniapom Neten have apveske apanko'ok ma'a apkeletsepma nak, vanlha koka aptangko Apveske apanko'ok ma'a aptangko nak aphalhnankok, aplhamakho koka aptangkok aphalhnankok napaqtek Eniapom Neten ma'a! —lhnak aptemak.

39Apkellengai'ak nak na escribas, lhnak aptaiangkok apkellanemo:

—Hengetlhekmoskama, nietavek hengellatemmoikama lheiap —lhna aptaiangkok ma'a.

40Mmaskenkek nak apkenmahai'a elelmalhnama Jesús ma'a.

Cristo apto David aptaven neptamen

41Koka lhna aptemak Jesús apkellanemo:

—¿Se lha ntemak apketlheianmo nak Cristo apto apveske David aptaven neptamen, he? 42Vakkahak Salmo nietnek ania'a aktalhesammalhka aplheianma lhnak nanek David, lhna aptemak:

«Lhta aptak Apveske aplheno apveske ehenkok ma'a: Elhnata neheqha akiennakha, 43akvakmo ta asavho askakheskeskekta koneng apmankok apkelammelhmakha lheiap», lhnak nanek aptemak.

44Apveske David aplheianmek nak Cristo apto apveske apankok, ¿etnekha nalhmok la apveske apankok aptaven neptamen, he? —lhna aptemak Jesús.

Apkeliennai'o Jesús apkellanei'o escribas

45Mang nantek apkellailhemo apkeltennaikama Jesús enenlhet'avok ma'a, lhna aptemak apkellanemo apkeltamesaikamok:

46—¡Ellaho ta escribas! Avanhe mota apkellammakpo, apkelentalhnekha apkelentalhnema apkeltakmanma, apkelvenaktema nepva'ak, apkeleltemo nhan ngkolhek alpaivesangka neksa apkelvaiam apkaknaiankolha la enenlhet. Nkellekave mota apvalho'ok eleliama apkakhengvekhelha apkelemhama apmaniaie akieto nemaknekhelha, kakpota nhan akieto aktakmelankelha lhma'. 47Koka apkeltakmelkeskamavek apkenmenielhkeskama qaselha anko'ok lhentampak'a, aholhek ankek na apkelelmalhnongkoma Eniapom Neten kakpota ngkolhek aleltangko apkeliamo lhma m'a. Avanhek hato ka nhan ngkotnek nema aliaqmongkaskesekhak apkeltemakha ngkollatsekama m'a —lhna aptemak Jesús.

Currently Selected:

Lucas 20: TMF

Highlight

Copy