Lucas 22

Nema alanekha ania'a kakpota epathetakpok Jesús

1Ketsek nak nkaimommalhkak aknem akvaianlha aktaqmelaikama lhma judios apanko'ok aptoiangkolha lhna mota pan metka apiepheskama, Pascua lhnak akvesai'a m'a. 2Apkeleliaikama lhnak aktemakha ania'a apkelveskaie sacerdotes kakpota nhan escribas kakpota ellaqhek Jesús ma'a, mang noka eleltemok ellengak enenlhet'avok ma'a, ngkanek apkellai'ak nak ello'ok. 3Ka aktalhnemo lhnak Satanas Judas Iscariote apvalhok ma'a, apto lhnak na lhema apieseksek apkeltamesaikamok Jesús. 4Apmeiekhek nak apkakhangkelha apkelemhama apmaniaie' sacerdotes kakpota nhan apkelveskaie apkellanekama atong Eniapom Neten apnemakha, apkelpaqmetkeskaiakmo lhnak ma'a, apkellanekho lhnak na aptangkolha m'a kakpota elpathetek Jesús. 5Nkelleklemavek nak apvalho'ok apkelemhama apmaniaie m'a, apketlheianmo lhnak ellangkok patakkom Judas ma'a. 6Ka apkempai'akha lhnak Judas apkeliaikama aktaqmelakha la'a metkelha la temma kakpota elpathetek Jesús.

Hengetlhekmoskama aktemakha nentoma aktaqmanma

7Ngvaiakmek nak aknem aktaqmelaikama lhma judios apanko'ok aptoiangkolha lhna mota pan metka apiepheskama, apkennapmakha lhna mota nepkesek apketkok Pascua ankok ma'a. 8Ka apkellaveiangka lhnak Jesús Pedro kakpota nhan Juan, lhnak aptemak:

—Enmeiakha ta apmaniaie m'a kakpota elpenesok nentavekhak ankok aktaqmelaikama lhma' Pascua —lhna aptemak Jesús.

Ka apkellatemmoiangka lhnak ma'a, lhna aptaiangkok:

9—¿Ko la kietelha angellanengvakhak ma'a, he? —lhna aptaiangkok.

10Ka apkatemmoiangka lhnak mokhom Jesús:

—Enmeiakha apiav'akha nak temma ha'e, elvetangvakhak hata m'a lhema enenlhet apiaiam ietangvalhva nema akmakmesaikama. Elieplakha ta m'a akvakho apnemakha apveske apankok ma'a. 11Eleltennes hata m'a apveske apankok, hata etnangkok ellanak hengke'e: "Hengetlhekmoskama lhkek apmak'ak eihok aktaqmelakha la etavokhak lhemek apkeltamesaikamok Pascua ankok", hata etnangkok ellanak ma'a. 12Ka enenlhet anak ma'a elvetaskesek hata akieto neten av'alhok pa'at akiavai'a nema akpeneskamo m'a, elpeneso ta m'a lhamakho aimelhkelha la'a kakpota antavokhak ma'a —lhnak aptemak Jesús apkellanemo m'a.

13Ka apkenmeiekho lhnak ma'a apkelvetangvekho lhnak lhamakho aktemakha aplheianma Jesús. Apkelpeneskamo lhnak na lhamakho aktaqmelaikama lhma' ankok nentavekha' m'a. 14Netamen nak ma'a, akvaiakmo lhnak hora apnaiakmo Jesús kanhan apkelapaskamo apankok nekha asota, 15lhnak aptemak Jesús apkellanemo m'a:

—Avanhek askeltemo atavekhok lhemek ketlhengkap aktaqmelaikama lhma nak ankok Pascua amanie aslengaiangko ta akientalhnema. 16Motavekhek hata lheme mokhom ketlhengkap aktaqmelaikama lhma nak akvakmo nentavokho ta mokhom ma'a akvo'o ta aptaiekha apveske Eniapom Neten —lhna aptemak Jesús.

17Ka apmamo lhnak nohaikok vino, aptemo lhnak na gracias Eniapom Neten ma'a, apkellaiangko lhnak na apkeltamesaikamok, lhnak aptemak apkellanemo:

—Enma einamok mok atkeietsek la'a, 18moinekhek hata lhemek vino mokhom ketlhengkap akvakmo ta aknem aptaiekha ta apveske Eniapom Neten —lhna aptemak.

19Ka apmamo lhnak na pan, aptemo nhan gracias Eniapom Neten, apkeliapto nhan, apkellangko apkeltamesaikamok. Lhnak aptemak:

—Koka hengke'e ehepetek, allangkok hata henaqtevaksek kakpota elvongkasakpok tep ketlhengkap, kolietnekho ta mota apaqto'ok ko'o apkellanengko la'a neksa aktaqmelaikama lhma' nak ketlhengkap —lhna aptemak Jesús apkellanemo apkeltamesaikamok.

20Ka apkelpeneskamo lhnak aptaveikokha m'a, apmakho lhnak na mokhom nohaikok Jesús ma'a, lhnak aptemak apkellanemo:

—Ka nohaikok anak vino akto ema ehenkok, nkolanak hata alhnankok annemo mo'ok apvalho'ok apkenmahai'akha ta etnangkok ma'a. Ka heng ema nak nkoiangkenalhkak hata kakpota nkoltaqmelkeskesek apkellangiemhaikama ketlhengkap. 21Koka heselhnanak hata lhema enenlhet apnek hengke'e nenieseksa nak. 22Ngva'ak qaselha aklhenammalhka ngkotnek hata takhaplhet Enenlhet Apketka nak, ¡koka enenlhet laie apto apselhnanongkoma m'a! —lhnak aptemak Jesús.

23Ka apkelpaqmetkesammakpo lhnak mok apankavek apkeltamesaikamok ma'a, lhnak aptaiangkok:

—¿Se lha enenlhet apmak'o nak eselhnena Jesús ke, he? —lhna aptaiangkok ma'a.

Neten ankek aktaqmanma angeltok hengasennama mota emmo'ok

24Apkellatemommakpo lhnak mok apankavek apkeltamesaikamok ma'a apketlheianmo lhnak apkenmahai'a niekhe etnangkok neten apankavek apieseksek ma'a. 25Koka aplengai'ak nak Jesús ma'a, lhnak aptemak apkellanemo:

—Apieseksek metnangko nak judios apkelientalhnesakpave mota apkelveskaie m'a, apketlhenammakpo pankave aktaqmanma apkellanekamok qaselha apieseksek enenlhet, koka aqhemo m'a. 26Metnamo nkek ketlhengkap aptaiangkolha nak ma'a, koka apto la neten apankek apieseksek anak ketlhengkap, etnek hata koneng ankek ma'a. Apto la nhan apkemhama apmanie apieseksek anak ketlhengkap, etne toka apkellasennaikama apketlhelhma'ak anak. 27Apieseksek la enenlhet'avok apto apnema nak nekha asota apto nhan neten apankek ma'a, koka apto la nema annengkasekama nak koneng apankek ma'a, ko'o koka hellasennama mota ketlhengkap.

28Helieplekama mota ketlhengkap neksa asvetai'a heiepkonma, 29ka ngkanek atneskesangko ta ketlhengkap apkelveskaie, ka kto nak Tata hetneskeskangke apveske ko'o. 30Hata antavokhak ma'a, anienangkok nahan nelpasmekha akieto ta m'a astakhelha ta apveske, eniaqhengvomok hata nhan ma'a apkeltanema apkelveskai'e kakpota eleliekpelkoho apkeltemakha m'a 12 apkelpasmekha apketkak neptamen Israel —lhna aptemak ma'a.

Aplheianma Jesús Pedro elhenek hata meiekpelkemo

31Lhnak aptemak Apveske apkanemo Pedro:

—Simon, etaqmelkaso no apkailhemo, nkeltavek Satanas nkolievhesama ketlhengkap malha aptemo nak trigo nema akievhesaikama nak. 32Ko'o koka askenmalhneskasak Eniapom Neten kakpota mankomaskengvomek mei'askeiam lheiap. Netamen hato ka m'a eiennekhok hata mokhom ma'a, kakpota mokhom elpasmekhak na apketlhelhma'ak anak eliennekhok hata nhan ma'a —lhna aptemak Jesús apkanemo Pedro.

33Koka lhna aptemak Pedro:

—¡Ma', moieniekhek lheiap! Nkaqhok hellaklhengkesek lhemek lheiap kakpota hengellaqhek nahan, moieniekhek koka lheiap —lhna aptemak.

34Koka lhnak aptemak Jesús apkanemo Pedro:

—Have niapak ankek asmak'akha nak atnek angvanak lheiap, amanie akpaivoma ta tape'e, hanetolhema ta ngkotnek aplheianma lheiap mangheiekpelkema —lhna aptemak Jesús.

Akvai'a nengaqte hengiepkonma

35Netamen Jesús lhnak aptemak apkellanemo apkeltamesaikamok:

—Kotlheianvakho no apvalho'ok askellapaso lhta elpaiaksek ania'a aktaqmanma, askelto lhta nhan melletsevek patakkom, aptekamok kakpota nhan mo'ok apnakteto apmanko'ok. ¿Nkaimelhke nlho lhta qaselha ketlhengkap ma'a, he?

Ka apkellatemmoiangka lhnak ma'a:

—Ma', mamma' lhta aimommalhka —lhna aptaiangkok apkeltamesaikamok.

36Koka lhnak aptemak mokhom Jesús apkellanemo m'a:

—Koka kolhvave nak ka stak askellano ketlhengkap, nietnek hata nkek patakkom, elletsav hata, kakpota nhan aptekamok. Mankoietno la pelettav akvenaktema apanko'ok, elieniav hata qaselha apanko'ok kakpota enmok ma'a. 37Helheianmek ko'o Eniapom Neten apaivoma ntemak hengke'e:

«Nne lhta aktemeskeso malha enenlhet meihamolhma», ntemak ma'a.

Haveniapak ankek ngkotnek hata kolhvave nak asiaihekama —lhna aptemak Jesús.

38Lhnak aptaiangkok apkeltamesaikamo apkellanemo:

—Apveske', ka hanet pelettav alvenaktema hengke'e —lhna aptaiangkok ma'a.

—Vanlha' —lhna aptemak apkatemmoiangka Jesús ma'a.

Apkenmalhnonkoma Jesús akieto Getsemani

39Apteiapmek nak Jesús na temma m'a, apmaiangko lhnak metaimong akhaiam akvesai'a Olivos aptemakha lhna mota m'a, apkelieplekhek nak na apkeltamesaikamok ma'a. 40Ka apkelvekho lhnak ma'a, lhnak aptemak Jesús apkellanemo apkeltamesaikamok:

—Elelmalhnama ta kakpota mankopalesemmek aliepkonma ta —lhna aptemak Jesús.

41Ka apkelieniekho lhnak tep atketsek ma'a, apkelteklhekvaiakmo lhnak aptapno'ok lhepop ma'a, lhna aptemak apkenmalhnongkomo m'a:

42—¡Ta! Heiekes hata akientalhnema nak akmak'o na nkovak, malha asnaqsepma ta akmaska. Koka momak'ak atnehek asmak'akha atnehek, vanlha apkelto la apmak'akha etnek lheiap —lhna aptemak.

43Mpelapkeskankek nak apiephongvai'o lhema ángel apkeniem'o neten apkeltemo lhnak eiennekhok Jesús ma'a. 44Avanhek ankek nak aplengaiangko akientalhnema m'a, koka niangveiakmek nak apkenmalhnonkoma Jesús ma'a, akteiapmo lhnak na apiemes ma'a malha ema lhna ntemak ma'a. 45Ka apkenmekho lhnak neten Jesús ma'a apmeiekho lhnak apkakhangkelha apkeltamesaikamok, apkelvetangvekho lhnak apnakteianma m'a, aniem'o lhnak anmaiosak'a apvalho'ok, aliamposkama nhan ma'a. 46Lhnak aptemak Jesús:

—Se lha akto apnakteno nak ke, enaklhatakha, elelmalhna nhan kakpota mankopalesemmek aliepkonma —lhna aptemak.

Apathetammap Jesús

47Nheklhek nak apkelpaqmetkesaiangka Jesús apkeltamesaikamok ma'a, akpelapkeskamo nhan apkelvai'a enenlhet'avok ma'a. Judas nak na m'a aplaqloiam, apto lhnak na lhema aphapak apieseksek 12 apkeltamesaikamok Jesús, ka apteteskai'o lhnak, apetseskamo nhan Jesús ma'a. 48Koka lhnak aptemak Jesús:

—Judas, apetseskek lheiap Enenlhet Apketka nak kakpota eselhnana —lhna aptemak Jesús.

49Ka apkelvetai'o lhnak apkeltamesaikamok Jesús ma'a, apkelelmalhneiangka lhnak ma'a:

—Apveske, ¿angeltaniemo i'e akieplomo pelettav akvenaktema enganko'ok, he? —lhna aptaiangkok ma'a.

50Lhema aphapak nak apiaqtemanmak akiennakha apaikok apkennengkasekama apiav'akha sacerdote m'a, 51koka lhnak aptemak Jesús:

—¡Vanlha, mennapap! —lhna aptemak.

Ka apmangveiakmo lhnak apaikok enenlhet lhek ma'a, aptaqmelekho nhan. 52Lhna aptemak Jesús apkellanemo apkelemhama apmaniaie sacerdote kakpota nhan apkelemhama apmaniaie Eniapom Neten apnemakha, kakpota nhan metno apketko'ok apkellelto apkenmahai'a elpathetek, lhna aptemak Jesús:

—Selha akto apkelvo'o nak akieplomo pelettav akvenaktema kakpota nhan iamet apmeio'ok, malha enenlhet apmenielhma nak heltemeskasak ketlhengkap. 53Lhamakho aknem alhta niekhe asketlhekmoskama Eniapom Neten apnemakha napaqtavek ketlhengkap, mang koka helpathetmak ma'a. Kolhva koka helpathetak ketlhengkap ngkanek ngva'ak aknem ankok akmovana ienaqtesa lhma —lhna aptemak apkellanemo Jesús ma'a.

Aplheianma Pedro meiekpelkema Jesús

54Ka apathetammakpo lhnak Jesús ma'a, apkeliantemekho lhnak apnakha apiav'akha sacerdote, apkelielhanmeiangkek nak na Pedro m'a apieplomo Jesús. 55Ka apkelvekho lhnak akieto avhak pa'at, nekha talha lhnak na apkakhaiangkok enenlhet ma'a, apnaiakmo lhnak na Pedro m'a. 56Ka akvetai'o lhnak lhema ngkelvana, apiav'akha sacerdote lhnak apkennengkasekama, nkeltameskamavek nak alanei'o Pedro m'a, lhna ntemak:

—Ka enenlhet anak hengke'e aplhelhma lhta nhan Jesús —lhna ntemak.

57—Have ko'o m'a, moiekpelkak ko'o enenlhet anak —lhnak aptemak apkatemmoiangka Pedro.

58Po'ok enenlhet nak na apiekpelkemak Pedro m'a, lhnak aptemak:

—Hai, lheiap alhta nhan apto apieplekama Jesús.

—Have ko'o m'a —lhna aptemak apkatemmoiangka mokhom Pedro m'a.

59Netamen akiekai'o lhnak lhema hora kelhaha, apto nhan po'ok enenlhet lhna aptemak:

—Have niapak enenlhet anak apto apieplekama Jesús, apto nhan ko Galilea ham —lhna aptemak.

60—Ma', apmopvana ania'a lheiap —lhnak aptemak Pedro apkatemmoiangka.

Nheklhek nak apaqmeteiangka Pedro m'a, ka akpaivomo lhnak tape'e. 61Apkammelhekhek nak Apveske apkenmangkelha Pedro m'a, aklheianvekho lhnak apvalhok aptemakha apaivoma Apveske eiennengkesek hanetolhem'a amanie akpaivoma tape'e. 62Netamen nak ma'a aptaqhekho lhnak Pedro, mang na ngkeskama apvenemo m'a.

Nema akvannaikama Jesús

63Enenlhet apkellelto apkellanekama Jesús apkelvannaikama lhnak ma'a, kakpota nhan apkeltekpoikama, 64apkelapmo lhnak na apaqto'ok ma'a, lhna aptaiangkok:

—Eihonoho, he ¿selha aktekpongo nak ke? —lhna aptaiangkok.

65Avanhek nak na apkellaikamok ngkollatsekama apatno'ok apkellanei'o m'a.

Jesús napaqtavek apkelientalhnakha apkelveskai'e

66Lhema aknem na ntemak akiekai'a m'a, apkaknekho lhna metno apketko'ok judios, escribas, kakpota nhan apkelemhama apmaniaie sacerdotes, apkeliantemekho lhnak Jesús ma'a napaqtavek apkelientalhnakha apkelveskai'e, apkelelmalhneiangka lhnak ma'a:

67—¿Lheiap anlho Cristo, he? —lhna aptaiangkok.

Ka apkatemmoiangka lhnak Jesús ma'a, lhna aptemak:

—Ka sto la hai, heliaskamok hata ketlhengkap, 68ka askelelmalhnengka la lhema qaselha ketlhengkap, manghellatemmoma ta nhan. 69Koka kolhvave nak Enenlhet Apketka nak elhnemok hata lheme neten akieto akiennakha Eniapom Neten apto akietnema apmopvana —lhna aptemak Jesús.

70Koka lhna aptaiangkok apkelemhama apmaniaie m'a:

—¿Lheiap anlho Eniapom Neten apketka, he? —lhna aptaiangkok.

Ka apkatemmoiangka lhnak Jesús:

—Ka aptangkelha nak apkelpaqmeiasma ketlhengkap —lhnak aptemak.

71Lhnak aptaiangkok mokhom apkelpaqmetkesammakpo mok apankavek ma'a:

—Kolhva nelleng'ak ennengko'o aplhenammakpo panke apto Eniapom Neten apketka enenlhet anak, meniaimekpo enenlhet apvetaiangko la'a apkelanai'a ngkolatsekama kakpota eselhnanakpok ha'e enenlhet anak —lhna aptaiangkok apkelemhama apmaniaie m'a.

Currently Selected:

Lucas 22: TMF

Highlight

Copy