Marcos 16
16
Aplhatekhangveiam Jesús apieseksek apkenmaskengvaiakmo
1Niekai'ak nak aknem#16:1 Lhema aknem apkeltemakha judios sekha akteiapma aknem akvakho aktalhno aknem. sabado nennekhelha m'a, María Magdalena, Salome kakpota nhan María Santiago ngken anmaiangko lhnak akmases aimes aimenek kakpota nkolelhpakhangvakha niekhe Jesús aphapak ma'a. 2Ampakhasekha nke aknem semana lhna ntemak ma'a, sekha akteiapma aknem nak anmeiekho lhnak akieto nemakha aknengkanveianlha enghapak, 3-4neksa atlhengama nkelelmalhnekama lhnak mo'ok:
—¿Sek hatelha henlekkesek nema apma nak atong nemakha akpekkanveianlha enghapak, he? ¡Avanhek ankek ma'a! —lhna ntaiangkok ma'a.
Neksa alvekha lhnak ma'a, alvetai'o lhnak aklekammalhka atong. 5Ka alentalhnemo lhnak konne nemakha aklhengkeskaianlha enghapak ma'a, alvetai'o lhnak na lhema enenlhet apketkok apmopai'a apankek aptalhnema apvenaktema, apnengkek nak akieto akiennakha'. Mang na ngkeskamak allai'a m'a, 6lhnak aptemak apkellanemo apketkok nak ma'a:
—Manghellaga, Jesús ko Nazaret nkelketamak ketlhengka, apketsepma lhta neten iamet aktenneskama. Mamma hengke'e, aplhatekhangvakmek lhek ma'a. ¡Kollanhono hengke'e, ka akietnakha lhta aphapak Jesús hengke'e! 7Koltaqho ta kolhvave, koleltennaso ta apkeltamesaikamok anak kakpota nhan Pedro, ka apmeiakhak apmanie m'a apmaniaie nhan akieto Galilea, hata elvetangvakhak ma'a, aktakha lhta apaivoma m'a —lhna aptemak.
8Nkeletkentaniek nak alenteiapmo konne nemakha aklhengkeskaianlha enghapak ma'a, nkelelpelhiennongkek nak na allai'a. Mang nak na nkotlheianmak aktemakha alvetai'a neksa alelhiaiam amai, nkelienvaktengkek na songkek ma'a.
Apvetaskesammap Jesús María Magdalena
9Ampakhasekha nke knem semana lhna ntemak ma'a, sosekhek ankek na ntemak ma'a aplhatekhangveiakmo Jesús apieseksek apkenmaskengvaiakmo. Apvetaskesammakpo nhan amanie María Magdalena, apkelentepkeskeskamo lhnak av'alhok sekhek ankek 7 kasekapok av'alho'ok ma'a. 10Ka aleltennaskekho lhnak ania'a apkeltamesaikamok ma'a, nkeliepvameiangkek nak ma'a, apiapqalhengkek nak nahan, 11koka apkeliaskeiakmek nak ma'a ania'a aktemakha aplhatekhangveiam Jesús.
Apvetaskesammap Jesús apqanet apkeltamesaikamok
12Netamen nak ma'a apvetaskesammakpo lhnak na Jesús apqanet apkeltamesaikamok neksa apketlhengama amai, moka aktema lhnoka ntemak napa'at ma'a. 13Netamen apkenmeiekho lhnak apkeleltennaskakho apketlhelhma'ak aktakha apkelvetai'a, koka apkeliaskeiakmek noka m'a. 14Netamen apvetaskesammakpo lhnak mokhom 11 apkeltamesaikamok ma'a, neksa aptaveikokha lhnak ma'a. Mang nak na enieskamak apatong Jesús apkelanei'o ngkanek apkeliaskeiakmek nak na apketlheianma apkeltemo lheme aptemakha apkelvetai'a aplhatekhangveiam ma'a, aniem'o nhan aliennaktema apvalho'ok.
Apkellapaskama Jesús apkeltamesaikamok elpaiaksek ania'a aktaqmanma
15Netamen lhna aptemak Jesús apkellanemo apkeltamesaikamok:
—Enmamok hata ketlhengkap lhmankek ham, eleltennasamok hata ania'a aktaqmanma m'a. 16Mang hata nkek eliaskakmok, ngkolhek hata nhan allavkeso konne iemmen, elvongkasakpok hata nhan tep ma'a. Koka apkeliaskakmo la'a, etlhenakpok hata apnaqtevasemmap. 17Enenlhet'avok la meliaskeiam ma'a, ko'o ta allangkok ellanak qaselha mongenatkeskama m'a. Elentepkeskasangkok hata kasekapok av'alho'ok, kakpota nhan apkenmopvanka'a mo'ok apkelpaqmeiasma. 18Enmok hata nha niekhe menasma, apienangko la nha niekhe aimenek hengaqhemo, mankoltemeskesama ta m'a. Eniakhesangkok hata nhan apmeio'ok takhaplhet anmaska apiempeiok, eltaqmelekhak hata m'a —lhna aptemak Jesús.
Apmeiekha neten Jesús
19Apsavhomo lhnak aktemakha apkeleltennasekama Apveske m'a, ka aknemo lhnak akiantemekho neten ma'a, apnekho nhan akiennakha apoktong Eniapom Neten. 20Ka apketlhengamo lhnak apkeltamesaikamok, apkeleltennaseiangka lhnak ania'a aktaqmanma lhma nkek ham, apkelpasmongkek nak na Apveske ma'a, apkellaiangkek nak apkenmopvanka'a kakpota ellanangkok qaselha mongenatkeskama. Apkeltemeskeskamo nhan iokhalhmek ankek apkellengai'a ania'a enenlhet'avok ma'a.
Currently Selected:
Marcos 16: TMF
Highlight
Share
Copy
Want to have your highlights saved across all your devices? Sign up or sign in
©2023 LETRA Paraguay
