Maruk 14
14
1Ŋañoŋaño gunak gúruba min gagaan gara Paak gútiiŋ son gara gúmbuur gabajut mee élewiir. Ñeer unafaan úsimena waawu bugo nꞌúpajula fuyuhoum Atúuha ngon fuŋes min gubil mee eŋar múluho ngujok Yéesu ngumugool. 2Nak gurok : « Ukáanumaal ejogool dó nꞌgagaan gaagu jambil ésuk yaayu éguuhoor. »
Akoña nawuhul ekarabanjo nꞌfukow Yéesu
(Máca 26.6-13 ; Saŋ 12.1-8)
3Nan Yéesu ammee Betani nꞌyaŋ Simoŋ han haahaaye ejogeen mee, akoña acee nanogenúl dó bugo nfúcaho. Akoña aahu naaken jíjabaabi jateepiteep#14.3 Jíjabaabi jaaju jiteepiteep nꞌwan guroge mee albâtre. Albâtre yo yommee ekenkereŋ ejajak yátaañie ebaj. Yo yommee ekenkereŋ ejajak yátaañie ebaj., dan ekarabanjo etakajom yoom yásuumut funoom, natojúl butum jíjabaabi jaaju, nawuhul ekarabanjo yaayu nꞌfukow Yéesu. 4Ñeer gucee nꞌgan to mee súumutiil jaram nak gurogoor : « Taŋ aahu gakajen ekarabanjo yaayu mara waa ? 5Ejúheene enoomeni síkori samemmeeŋ#14.5 Síkori saasu be etook bacaam gujenna guñen., nsiseni galek mee. » Giiñiil ngutiñ bu nꞌakoña aahu.
6Bare Yéesu narogiil : « Jikahenool ! Waa ucile njon ngayogenool ? Waaf wajajak nakaanaam ! 7Galek mee ubugu ró mꞌbuguul bu nanoonan ban jíjuhe jikaaniil jak nan súumuul. Bare ínje ibiloot gáani mꞌbuguul bu nanoonan. 8Akoña aahu ume, wan ájuh mee, wo nakaane. Nalogosáalilogosáali eniinom bu mara gafogom. 9Iroguulee, maregen tanootan nꞌdúniya tan Furim Fásuum mee fubil mee gawaarei, wan akoña aahu akaan mee be elobi to may. Mo bugan bu gawosenool. »
Yudas nacumb Yéesu
(Máca 26.14-16 ; Lúk 22.3-6)
10Púr to, Yudas Isikariot, ammee acee nꞌulagena Yéesu gammee guñen nꞌgúruba, najow atook unafaan úsimena waawu mbil gujamoor, najok Yéesu aseniil. 11Elob yaayu nésuumiil, ngujok be esenool síkori. Ñeer Yudas nan nfuŋes min abile ekaan najok Yéesu aseniil.
Yéesu naboñ gucee bu gacookoor mara Paak yaayu
(Máca 26.17-25 ; Lúk 22.7-14, 21-23 ; Saŋ 13.21-30)
12Nꞌfunak fútiyaara fara gagaan gara gúmbuur gabajut mee élewiir, nan nja gúsimen mee ésaaja yara Paak yaayu, ulagena Yéesu ngurogool : « Tuu nucamene ucookoor múcahoaay maamu mara Paak yaayu ? » 13Yéesu naboñ gúruba nꞌulagenaool, narogiil : « Jijow jinogen nꞌésuk yaayu. Buguul bu búrehoor nꞌamaañen acee hatebe jituen jara mal, njilagenool. 14Tan abil mee búnogen, njirok ara yaŋ yaayu : “Aliiga aahu naroge usonkeni nꞌgéy gásaag nabile fúcaho mꞌPaak yaayu bugo nꞌulagenaool.” 15Ho be eliiguul gásaag gáamak fatiya nꞌetaah yaayu gacookoori jak ban ngutennoori. Njicookoor dó múcahoaay maamu bu nꞌalaal. »
16Ñeer ulagenaool gammee gúruba ngujow gútiiŋ nꞌésuk yaayu, nguñow wan Yéesu alobiil mee peepe, ngucookoor múcahoaay maamu mara Paak yaayu.
17Bu gárusa, Yéesu nátiiŋul bugo nꞌulagenaool gammee guñen nꞌgúruba. 18Ngoom nfúcaho, narogiil : « Iroguulee, maregen acee mꞌbuguul ácaho'oor mee nꞌínje be ecumbom. » 19Njogiil jaram anooan mꞌbugo nasonkenool arogool : « Injé pére ? » 20Narogiil : « An aahu acee mꞌbuguul jammee guñen nꞌgúruba, hárur mee gañenool mꞌbúcahum baabu nu ganur nꞌínje. 21Maregen maregen, Aleeh An be ecet naŋ min Busafer baabu bulob mee moola. Wáob mátaañie bu gáani nꞌan aahu habilool mee ecumb ! Waregeene bajak, an aahu jambil abajeeni ! »
Fúcaho'oor Yéesu fúsola nꞌulagenaool gammee guñen nꞌgúruba
(Máca 26.26-30 ; Lúk 22.15-20 ; 1 Korent 11.23-25)
22Bugo nfúcaho faafu, Yéesu naŋar fúmbuur, nasal Atúuha afaak, nasaahoor fo aseniil, narogiil : « Jiyab jitiñ : úre eniinom. » 23Naŋar éraanum nasal Atúuha, naseniil yo guremoor búroomiil, 24narogiil : « Dáare fúsimom, fúsim faafu fakaan mee bapaalaay baabu nꞌAtúuha mbútik, fáyuhi mee bu mꞌbugan gamemmeeŋ. 25Iroguulee, maregen mat irem ébiiñ benen káŋ bu funak fan ibil mee ebaañ irem yo nꞌJáyiih jara Atúuha. »
Piyeer narien mara ho be emus akahen Yéesu
(Máca 26.31-35 ; Lúk 22.31-34 ; Saŋ 13.36-38)
26Nan Yéesu alob mee gurim gaagu, ngufooñ ufooñ wara esal Atúuha gufaak, ngúpur gujow bu nꞌeking yan guroge mee « emontaañ yara uoliiw. » 27Ngútiiŋ, Yéesu narok ulagenaool : « Buguul peepe bu gakahenom, naŋ min Atúuha alob mee mꞌBusafer baabu, nan arok mee :
“Injé be etek amaha aahu imuk,
ban sísaaja saasu bu gayiisoor nañ#14.27 Jiñow Sakari 13.7.”
28Bare nan ibil mee gayihoúl nꞌgacet mee, ínje be elohuul fácil mbil jitoogom bo Gálile. »
29Piyeer narogool : « Haani bugaagu peepe gukaheni, ínje mat ikaan mo. » 30Ñeer Yéesu narogool : « Irogiee, maregen nu fuk fe, bala gaŋana gurok ngúruten, aw be erok úmirutom ñoono ñáfaajiir. » 31Bare Piyeer najok to nꞌelobool narok : « Haani icehe nu ganur nꞌaw, mat imus irok ímiruti. » Bugo peepe nguyaboor elob yanur yaayu.
Yéesu náciin Atúuha bo Setusemani
32Púr to, Yéesu nꞌulagenaool ngujow bu tin tan guroge mee Setusemani. Nan gútiiŋ to mee, narogiil : « Jilako taahe njinaakom. Injé nijow be éciin Atúuha. » 33Naŋar Piyeer, Saak nꞌSaŋ najow. Nandiŋ násebi jaram atelen. 34Narogiil : « Gáwuusa ugu nemugom. Jilako taahe ban jambil jiŋot ! »
35Natos maa, nayah gújuul, min áciin arok éeni bu gájuho, mbil mátaañie me mukuhiool. 36Narok : « Abba, Paam, aw ájuh mee waafóowaaf, íciiniciin ufaren éraanum ye yara sílaam nekuhiom ! Manooman nnogoore, jambil ukaan wan ínje icamen mee, bare ukaan wan aw ucamen mee. »
37Nábaañul bu to nꞌulagenaool gammee gúfaajiir, natoogiil ngaŋot. Narok Piyeer : « Simoŋ, aw gaŋot ? Aw újuhut sah galako fáriit baŋohut ? 38Jambil jiŋot. Seetaane be eliik gabantenuul. Jíciin Atúuha jambil jiloh dó. An nja acamencamen ekaan majage, bare dit abaj sembe sara ekaan. »
39Yéesu nabaañ akahiil to, náciin Atúuha nꞌgurim ganur gaagu. 40Nábaañul benen, natoogiil bandiŋ ngaŋot mara umoyiil úlebilebi máamak. Ñeer gúmirut min gubilool ésuup.
41Nan abaañulo mee ñáfaaten, narogiil : « Jiroŋe nꞌgaŋot gaagu ? Mee gáyolen déhooro ? Kankaan ban ! Ñeer tíiŋe. Aleeh An abehibet nꞌguñen ukaana síjunube. 42Jiyiho nujaal ! An aahu habilaam mee ecumb acigulocik. »
Ejok Yéesu
(Máca 26.47-56 ; Lúk 22.47-53 ; Saŋ 18.3-12)
43Yéesu bafaagerut elobool, Yudas, ammee acee nꞌulagenaool gammee guñen nꞌgúruba, nátiiŋul. Nájaoorul nꞌgayooŋ gayekene úkundu son sigol. Unafaan úsimena waawu, úpajula fuyuhoum Atúuha bugo nꞌunafaan bugan gaagu guboñuliil. 44Yudas hacumbool mee alobuliilob arogiil : « An aahu han ibil mee egaab, ho maamu. Jijogool njiŋarool ban jíkaanumool. »
45Nan Yudas átiiŋ mee, nacik Yéesu narogool : « Anafaanom ! » Nagaabool. 46Ñeer gajaoorulo mee nꞌYudas ngujok Yéesu. 47Acee nꞌulagena Yéesu náñagul bákunduool nꞌgafoon bo atek ajágaga aahu hara anafaan úsimena waawu asaat gawos. 48Ñeer Yéesu narogiil : « Jijaalojow nꞌúkundu'uul nꞌsigoluul ró be ejogom naŋ akaana kóji ? 49Injé umueen mꞌbuguul nanoonan neliik bugan gaagu dó nꞌyaŋ Atúuha, ban jijogutom. Bare dó peepe mimbil wan Busafer baabu bulob mee újuh ukaano. »
50Ulagena Yéesu peepe ngutey gukahool bo. 51Bare akambaano accee habonnoore gábil déhooro nak alagenool. Ngujogool, 52bare nakahen gábil gaagu min atey akaay efatalak.
Yéesu najooŋoor fujoj fáamak fara Esúiif
(Máca 26.57-68 ; Lúk 22.54-55, 63-71 ; Saŋ 18.13-14, 19-24)
53Púr to, nguŋar Yéesu bu nꞌanafaan úsimena háamak aahu. Tootook min unafaan úsimena waawu, unafaan bugan gaagu, bugo nꞌúpajula fuyuhoum Atúuha guhomenoore to peepe. 54Piyeer nakuhi Yéesu nak alagenúl mꞌbúsol bu dó nꞌfukeelum anafaan úsimena háamak aahu. Nalako tan upooya waawu gommee ngárumo nꞌsambun.
55Unafaan úsimena waawu bugo nꞌfujoj fáamak faafu fara Esúiif peepe ngon fuŋes min gubile ekaan Yéesu silob mbil gumugool. Nguŋes guŋes, gubajut 56mara gameeŋe gáseedo mee gubibij gukaanool. Baloberiil let banur. 57Guceeiil nguyiho, ngubij gukaan Yéesu gurok : 58« Elí ujamoojam arok ho be efum yaŋ yaayu yara Atúuha yan guñen an guteep mee, ban nꞌgunak gúfaajiir ho bu gateep ecee yan guñen an guñumut gateep. » 59Bare haani dó nꞌelob yaayu, bandiŋ baloberiil let banur. 60Ñeer ásimena háamak aahu nayiho nꞌetut fujoj faafu min asonken Yéesu arogool : « Ubiloot ésuup ? Ujamut silob san gulobe mee mee guyah nꞌaw ? »
61Bare Yéesu nánif yemm, ásuuput. Asímena háamak aahu nabaañ asonkenool arogool : « Aw ommee apagena aahu, Aleeh Atúuha hásoonieni mee ? » 62Yéesu narogool : « Eem, ínje ho maame. Ban funak fucee, buguul be eñow Aleeh An min alakoe nꞌgañen gárib gara Atúuha ara sembe. Ban may buguul be eñowool awaloúl nꞌútuul wara émit. » 63Ñeer ásimena háamak aahu najis gájuwo'ool caac, narok : « Taahe ñeer bajut gáseedo gacee benen ! 64Buguul fannauul jijanjam gajel gan ajel mee Atúuha. Buu ñeer njipinoore ? » Bugo búroomiil ngujok mara tootook min acet. 65Ñeer guceeiil ngon ngamasenool. Nguguben buhulool nak gutegool sikurupeñ ngurogool : « Para ulobóli ay ategi ! » Upooya waawu may ngutegool uraab.
Piyeer narien, narok alet alagena Yéesu
(Máca 26.69-75 ; Lúk 22.56-62 ; Saŋ 18.15-18, 25-27)
66Tan Piyeer ammee bo nꞌetaam nꞌfukeelum faafu, ájagaga akoña hara ásimena háamak aahu nájool, 67nañowool ngárumo. Nañeeroorool táh, narogool : « Aw kum hara gayooŋ Yéesu aahu hara Nasaret ! 68Piyeer narien. Narok : « Imírut waa nucamene elob, ijogut haani fáriit. » Najow naŋ be épur nꞌgápeegum gáamak gaagu. [Gaŋana ngurok.]#14.68 Mꞌbusafer bameeŋe bútiyaara, furim fe fulet ró. 69Ajágaga aahu nañowool, nabaañ arok gan to mee : « Aahu bugo. » 70Piyeer nabaañ arien. Piyo maa, gan to mee ngurogool may : « Maregen ! Aw kum buguul. Aw may an hara Gálile. [Baloberuul banur.]#14.70 Mꞌbusafer bameeŋe bútiyaara, furim fe fulet ró. » 71Ñeer Piyeer nak akali ukali wajagut ayahooro. Narok : « Imírut an aahu han jilobe mee moola. » 72To bújooŋoor, gaŋana ngurok gúruten. Piyeer nawosen furim faafu fan Yéesu alobeenool mee farok mee : « Bala gaŋana gurok ngúruten, aw be erok úmirutom ñoono ñáfaajiir. » Ñeer nahuu ápiiset.
Currently Selected:
Maruk 14: gsl
Highlight
Copy
Compare
Share
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
