Maruk 15
15
Pilaat nátoomuloor Yéesu
(Máca 27.1-2, 11-26 ; Lúk 23.1-5, 13-25 ; Saŋ 18.28—19.15)
1Bunak ngakahen, fujoj fáamak faafu fahomen mee unafaan úsimena, nꞌunafaan bugan gaagu nꞌúpajula fuyuhoum Atúuha nfurehoor. Ngujok Yéesu gukok, nguŋarool gusen Pilaat. 2Ñeer Pilaat nasonkenool arogool : « Aw ommee áyiih Esúiif yaayu ? » Yéesu narogool : « Aw fannai ulob yo. » 3Unafaan úsimena waawu gukankaan Yéesu silob simeeeŋ. 4Pilaat nabaañ asonkenool arogool : « Mat úsuup ? Ujanjam wan gulob mee peepe guyah nꞌaw ? » 5Bare Yéesu ásuuput haani maa. Pilaat najaahali.
6Nꞌgagaanóogaan gara Paak, Pilaat nja akahenkahen acee nꞌgammee nꞌfupeek han bugan gaagu gucamen mee akaheniil. 7Tootook min amaañen acee, gajaool Barabas, an dó nꞌfupeek faafu mara bugo nꞌgupaalool gumumuk an nꞌgáguuhoor gacee. 8Ñeer gayooŋ gaagu ngujiŋ bu dó nꞌyaŋ Pilaat, gútiiŋ nguhuoorool min akaan wan nja apii mee nakaaniil. 9Pilaat narogiil : « Jicamencamen ikahenuluul áyiih Esúiif yaayu ? » 10(Nasonkeniisonken mee mara ámimir guciiñ son galat gucile min unafaan úsimena waawu gúŋarulool Yéesu.) 11Bare unafaan úsimena waawu ngukaan min gayooŋ gaagu gurok Pilaat : « Elí Barabas nucamene ukahenulóli. » 12Pilaat nabaañ arogiil : « Waa ñeer njicamene ikaan an aahu han buguul jiroge mee áyiih Esúiif yaayu ? » 13Ngurok máamak : « Ufaaŋool nꞌekuruwa ! » 14Narogiil : « Miñ buu nalaare ? » Bare ngureg nguroge máamak : « Ufaaŋool nꞌekuruwa ! » 15Pilaat nacamen mee ekaan gayooŋ gaagu min súumiil, nakahenuliil Barabas. Naboñ gukaruwaas Yéesu, naseniil ho be efaaŋ nꞌekuruwa.
Esondaar yaayu ngúfookul Yéesu
(Máca 27.27-31 ; Saŋ 19.2-3)
16Ñeer esondaar yaayu nguŋar Yéesu bu dó nꞌfukeelum fara yaŋ Pilaat, ngúwoogul gayooŋ gara gupaaliil esondaar peepe. 17Ngukaanool gájuwo gájuujuuk cám, nguŋar gúgook gabaje unuk gukaan fugaŋ guroopool nꞌfukow. 18Ngulob nu ho gurok : « Ayíih Esúiif yaayu, ulobe nꞌaw ! » 19Ngutegool fugol nꞌfukow, ngumasenool ban nguyahool gújuul naŋ gusoŋoosoŋ. 20Nan gúfookulool mee gufaak, nguñak gájuwo gaagu gájuuk mee, ngubaañenool wañool, ngúpurenool bu tíyaŋ be efaaŋool nꞌekuruwa.
Yéesu nafaaŋi nꞌekuruwa
(Máca 27.32-44 ; Lúk 23.26-43 ; Saŋ 19.17-27)
21Nan gommee nejow, ngurehoor nꞌamaañen acee hara Sireen aam mꞌbóohul nꞌurager, gajaool Simoŋ. Ho abaj mee Alekisand bugo nꞌRufus. Esondaar yaayu ngunuufenool min ateb ekuruwa yaayu yara Yéesu. 22Nguŋar Yéesu bu tan guroge mee Golugota, yo yommee « tin tara esend. » 23Ngucamen esenool bíiñ yan gúsuupoore mꞌmulosoor arem, nafoy yo marem. 24Ngufaaŋool nꞌekuruwa yaayu. Ngukaan bújeh be émir buu ngubile gawaajoor wañool.
25Nan gufaaŋool mee nꞌekuruwa yaayu busanjeel bateberúl. 26Jibabar jaaju dan gusafer mee wacil mee Yéesu namugi, gurim ge gon dó : “Ayíih hara Esúiif yaayu.”
27Babaj may ukaana kóji gúruba gan gufaaŋe nꞌsikuruwa to nu ho, aahu nꞌgañenool gárib, aahu nꞌgañenool gamay. [28Mo wan Busafer baabu burok mee ukaanokaano : « Gupinoopin nꞌgayooŋ ukaana kóji. » ]#15.28 Mꞌbusafer bameeŋe bútiyaara, furim fe fulet ró. Jiñow Esayi 53.12
29Bugan gammee newuj nak gutek gukowiil lág-lág, ngujelool nu mo ró gurok : « Hóh ! Aw habil mee efum yaŋ yaayu yara Atúuha nubaañ uteep yo nꞌgunak gúfaajiir, 30upagenooro, nuwaloúl nꞌekuruwa yaayu ! »
31Unafaan úsimena waawu bugo nꞌúpajula fuyuhoum Atúuha nak gúfookulool may gurok : « Nak apagen bugan, ho ájuhut apagenooro ! 32Eéni maregen ho ammee apagena aahu, áyiih hara Isirayeel, awaloúl maareer maa nꞌekuruwa yaayu min uñowaal, núyinenaal. » Gan gufaaŋ mee nꞌsikuruwa to nu ho ngon may nejelool.
Ecet Yéesu
(Máca 27.45-56 ; Lúk 23.44-49 ; Saŋ 19.28-30)
33Nan bunak bommee nꞌetut fukow, mmooc bíb mꞌmof maamu peepe káŋ jaram buŋaaho. 34Nan tiŋaaho mee maa, Yéesu nakaaw máamak arok : « Eloi, Eloi, laama sabakatani ? » Yo yommee : « Atúuhaom, Atúuhaom, waa ucile nukahom bo ? » 35Gucee nꞌgan to mee ngujamool, ngurok : « Jíyenten ! Yéesu umu newook anabiyoŋ aahu Eliyas. » 36Ñeer acee mꞌbugo natey aboojenúl jileeñuun bunuk bafifir akok nꞌegol, nañuhen yo mimbil Yéesu amoob jo. Narok : « Jinaak nuñowaal teer mbil Eliyas ájool awalenulool nꞌekuruwa yaayu. » 37Bare Yéesu nayah fukaaw fáaamak, nacet.
38To bújooŋoor, gábil gáamak gáginden mee tañaao mee ñara dáara yaŋ Atúuha, ngujiso kábiriŋ fatiya yah nꞌetaam, ngukaan upendeŋ úruba. 39Nan anafaan esondaar yaayu an to mee fácil Yéesu añow mee min acehe nogoor, narok : « Amaañen aahu ume, maregen Aleeh Atúuha naameen. »
40Bajembaj may ukoña gameeŋe gayihoe kuhi ngon neñeer. Mari hara ésuk yara Magudala, Mari jaw Soses bugo nꞌSaak apuu aahu, nꞌSalome ubugu dó mꞌbugo. 41Bugo nja gulagen mee Yéesu, ngucookoorool kábiriŋ ho Gálile. Mbaj to may ukoña gucee gameeŋe gajaoorulo nu ho bu Yéruusalem.
Gafok Yéesu
(Máca 27.57-61 ; Lúk 23.50-56 ; Saŋ 19.38-42)
42-43Funak faafu fommee fara gacookoor múcahoaay, mara fara gajom fo to fulako Esúiif yaayu. Mbaj amaañen acee gajaool Suseef hara ésuk yara Arimate, átiiŋulo. Kankaan an abaje fuyuhoum fáamak dó nꞌfujoj fara Esúiif yaayu. Ho may jáyiih Atúuha nan nenaak. Nan añow mee tinak utu nejon, nahaañi ejow bu yaŋ Pilaat be éciinool nasenool eñalen Yéesu. 44Pilaat najaahali min Yéesu acet mee tímer, naboñ gúwoogul anafaan esondaar yaayu min asonkenool teer maregen Yéesu baceherool bupiyopiyo. 45Nan anafaan esondaar yaayu agaanool mee wakaan mee, Pilaat nakat Suseef naŋar eñalen yaayu. 46Ñeer Suseef najow anoom gábil, nawalenúl eñalen Yéesu fatiya nꞌekuruwa yaayu. Naŋar gábil gaagu, naguub eñalen yaayu, nabaŋ yo mꞌbúwaay bawogi nꞌfúlankiin fáamak. Nákirinken ekenkereŋ atoj butum fuyaak faafu. 47Mari hara Magudala bugo mꞌMari jaw Soses nguñeer min guñow tan gubaŋ mee Yéesu.
Currently Selected:
Maruk 15: gsl
Highlight
Copy
Compare
Share
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
