Maruk 5
5
Yéesu násonten amaañen habaje érus
(Máca 8.28-34 ; Lúk 8.26-39)
1Ñeer Yéesu nꞌulagenaool ngujow guyah nꞌgaagu gahaja gara fal faafu, mꞌmof man gurege mee Gerasa. 2Nan Yéesu awaloulo mee mꞌbusaana baabu déhooro, amaañen acee han eseytaane enogene nápurul nꞌguyaak gaagu nájool ngurehoor. 3Amaañen aahu dó nꞌguyaak gaagu nacine, ban an ájuhutool ekok, haani uŋare ñiseel. 4Ñameeŋe mañ nja guŋar ngujenkool nꞌgoot, nguŋar ñiseel ngukogool nꞌguñen, bare ho be esaat ñiseel ñaañu natuj mañ maamu. An abajut sembe sara ekaanool nabuubi. 5Fuk nꞌtufunak nak alilioor bo mee báyolout nꞌguyaak gaagu son bo nꞌsimontaañ saasu, nak akaaw ban naŋar sílankiin nabehooro sisooho.
6Nan aŋanden mee Yéesu kuhi, natey ngurehoor. Nayahool gújuul, 7nakaaw máamak arok : « Yéesu, Aleeh Atúuha ara fatiya, waa nikaani ? Icíiniciin nꞌgajow gara Atúuha, jambil úlaamenom. » 8Alolob mee mara Yéesu aroge : « Eseytaane, úpur nꞌamaañen aahu ! » 9Nasonken yo : « Gajai buu ? » Nerogool : « Gajaom Gayooŋ, mara éli umemmeeŋ. » 10Ñeer to bújooŋoor, néciin Yéesu jambil akam so nsípur mꞌmof maamu.
11Tootook min ekoore yáamak yara sikumba yon dó nꞌemontaañ yaayu ngafoop. 12Ñeer siseytaane saasu nsíciin Yéesu sirogool : « Ukahóli nunogen nꞌsikumba saasu. » 13Nasoŋ. Ñeer nsípur sinogen nꞌsikumba saasu. Ekoore yaayu yabaj mee sikumba cik to síwuli síruba (2,000), nebohoorúl fatiya emontaañ yaayu eriiŋen bu dó nu fal faafu nésiim dó peepe.
14Umaha so ngutey guyiis elob yaayu nꞌésuk yaayu son bo nꞌurager waawu. Ñeer bugan gaagu ngúpurul gújool be eñow wabaj mee. 15Ngutook to Yéesu, nguñow to may amaañen aahu han gayooŋ siseytaane saasu gunogeneen mee nalakoe, mabonnoore, nájuhe jaj. Ñeer ngúsebi. 16Gañow mee ngugaaniil wabaj mee nꞌamaañen aahu han siseytaane saasu sinogeneen mee son wabaj mee nꞌsikumba saasu. 17Ñeer nguyiho, nguhuoor Yéesu min ápur nꞌésugiil.
18Nan Yéesu ammee ngájupo mꞌbusaana baabu, amaañen aahu han siseytaane saasu sinogeneen mee náciinool mimbil asoŋ ngujawoor. 19Bare Yéesu asoŋut. Narogool : « Oot bu mꞌbugani, útiiŋ nugaaniil waaf waawu peepe wan Acila aahu akaani mee mara nabonkehi. » 20Ñeer amaañen aahu najow bu mꞌmof maamu man guroge mee Dekapolis,#5.20 Dekapolis : Yo yommee sísuk guñen. nagaan bugan wan Yéesu akaanool mee. Bugan gaagu peepe ngujaahali.
Bájur Yairus bugo nꞌakoña hagor mee gájuwo Yéesu
(Máca 9.18-26 ; Lúk 8.40-56)
21Púr to, Yéesu nabaañ átip bu nꞌgaagu gahaja. Tan ammee nꞌgapana fal, gayooŋ gáamak ngújool gugongenool. 22Ñeer acee nꞌunafaan fúrehoorum fara gawaare furim Atúuha, gajaool Yairus, nájool, nañow Yéesu, naloh to nꞌgoohool. 23Nahuoorool báyolout arogool : « Ajúrom umu necet. Ujóol uritenool guñeni min akolo naroŋ. » 24Ñeer Yéesu najaoor nu ho. Gayooŋ gáamak ngulagenool, nguñoncoor nu ho.
25Akoña acee nan dó habaje gásomut gara gabuulen fúsim kábiriŋ símit guñen nꞌsíruba. 26Ayoyok máamak ngateoor nꞌúsontena gameeŋe. Abehembehen fubajool peepe bare tebout haani fáriita ; gásomuhool no ngureg mee ngucigenool. 27Nan ajam mee gulob mara Yéesu, namelenoorúl nꞌgayooŋ gaagu búsol Yéesu jaram agor gájuwo'ool, 28mara arorok mꞌbúyegehool : « Eéni íjuh igor gájuwo'ool déhooro, ínje bu gakolo. » 29To mee nakat gabuulen fúsim ban nañow nꞌeniinool mara akolokolo. 30To bújooŋoor, Yéesu nañow mara sembe sicee sípupur nu ho. Dó nꞌetut gayooŋ gaagu, nálowulo narok : « Ay agore gajuwo'om ? » 31Ulagenaool ngurogool : « Taŋ aw gasonken ay agori ban uñoñow gayooŋ gaagu gañoncoor mee nꞌaw ? »
32Bare Yéesu najegoor gayooŋ gaagu abos be eñow ay akaan mee mee. 33Akoña aahu námir mee wabajool mee, násebi jaram atelen. Nájool aloh to nꞌgoot Yéesu, nalobool maregen maamu peepe. 34Ñeer Yéesu narogool : « Añúm, gáyineni gupageni. Ujow nꞌgásuumaay. Aw bu gakolo nꞌgásomuhi nújuh jaj. »
35Yéesu bafaagerut elobool, bugan ngúpurul nꞌyaŋ anafaan fúrehoorum faafu, ngújool gurok Yairus : « Ajúri acecet ! Tíiŋut gayogen aliiga aahu ! » 36Yéesu ajanjam gurim gaagu, bare ajogut go waaf. Narok Yairus : « Jambil úsebi, úyinen déhooro. » 37Akahut anooan nalagenool, éeni let Piyeer, Saak bugo nꞌatiool Saŋ.
38Nan gútiiŋ mee yaŋ Yairus, Yéesu nañow mara bugan gaagu gúruujooruujoor, ngon nuhuu, nguyah sikaaw nu mo ró. 39Nanogen nꞌyaŋ yaayu, narogiil : « Waa ucile gáruujoor ge son uhuu we ? Aleeh aahu acehut, aŋoŋot. » 40Ngúfookulool. Ñeer Yéesu nápurenuliil peepe, naŋar pay aleeh aahu, jaaool mꞌbugan gajaoorulo mee nu ho min gunogen bu dó dan aleeh aahu ammee. 41Nátiiŋ, najok ájur aahu nꞌgañen, narogool : « Talita kúmi ! », yo yommee : « Jíjur, irogi uyiho ! » 42To bayaas, ájur aahu nayiho, nan nejow. Símihool guñen nꞌsíruba. Ñeer bugan gan to mee nguŋaŋo, ngujaahali máamak. 43Yéesu napangiil arogiil : « Jambil jilob yo anooan. Bare jisenool ácaho. »
Currently Selected:
Maruk 5: gsl
Highlight
Copy
Compare
Share
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
