Maruk 6
6
Bugara Nasaret gúyinenut Yéesu
(Máca 13.53-58 ; Lúk 4.16-30)
1Yéesu nápur to be ebaañ bu mꞌmof man abaak mee. Ulagenaool ngujawoor nu ho. 2Nan funak fara fulako fútiiŋ mee, nalako galiigen bugan nꞌfúrehoorum fara gawaare furim Atúuha. Dó nꞌgammee ngáyentenool, gameeŋe ngujaahali. Ngurok : « Béy námirulo dáaru peepe ? Buu nkaane náluho mee ? Béy nabajulo sembe saasu usu sara ekaan waaf wajaahali mee bugan ? 3Taŋ let ho ammee áminise aahu, aleeh Mari, atii Saak, Suseef, Súud nꞌSimoŋ ? Gúliinool let alaal ucinaale dáare ? » Dáaru peepe cil mee gúyinenutool. 4Bare Yéesu narogiil : « Anabiyoŋ bugan nja gusoŋoosoŋ banooban jaram ŋaño ésugool, fiilool, nꞌyaŋool. » 5Ñeer Yéesu éeni let gariten guñenool nꞌúsonta gupinaay min gukolo, abaañut akaan dó waaf ucee wajaahalie bugan. 6Gáyinenaahi'iil ngujaahaliool máaamak.
Yéesu naboñ ulagenaool gammee guñen nꞌgúruba
(Máca 10.5-15 ; Lúk 9.1-6)
Púr to, Yéesu najow bu galiigen bugan gammee nꞌsísuk saasu sacik mee Nasaret. 7Nawook ulagenaool gammee guñen nꞌgúruba, naseniil sembe sara gápuren siseytaane, naboñiil gúrubaruba. 8Narogiil jambil jiŋar wanoowan bu nꞌgajaoor gaagu éeni let egol déhooro. Bajut eŋar múcahoaay son fulaacen. Bajut sah efut ékori. 9Mbil jikaano usamata, ban jambil jiŋar gájuwo gáruten.
10Nabaañ arogiil : « Eéni jítiiŋ nꞌésuk, yaŋóoyaŋ yan jinogene min guwalenuul, jilako dó bu nan jibil mee épur tin taahu. 11Eéni may jítiiŋ ticee, bugara dó ngufoy eyabuul ban gúyentenutuul, jifaalen bulagouul. Njon népur, mbil jipey mofiil nꞌgoohuul. Dó bil mee gáani gáseedo gajagut bu mꞌbugo. »
12Ñeer ulagena Yéesu ngujow nak guwaare bugan gaagu min gujok émiremma ngúlowul bakaaneriil. 13Nak gukam siseytaane sameeŋe, ngukaan may úsonta gameeŋe muloosoor min gújuh jaj.
Ecet Saŋ Bátiis
(Máca 14.1-12 ; Lúk 9.7-9)
14Ñeer Yéesu gajaool ngujamo jaram gútiiŋ nꞌáyiih han guroge mee Herod. Mbaj bugan garoge : « Dáaru Saŋ Bátiis ayihoulo nꞌgacet mee. Yo ecil mee nabaj sembe saasu sara ekaan waaf wajaahalie mee bugan. » 15Gucee nak gurok anabiyoŋ aahu Eliyas#6.15 Eliyas ammee anabiyoŋ han Atúuha aŋare bu fatiya ho bacehut (2 Gúyiih 2.11-12). Ban éliibar yara Malasi eroge Atúuha be ebaañ áboñul Eliyas bu mꞌbugan gaagu (Malasi 4.5-6)., bugaagu ngurok anabiyoŋ naŋ acee nꞌenabiyoŋ bugara no. 16Bare Herod nan ajam mee dáaru peepe narok : « Saŋ Bátiis aahu han iboñ mee gusaat fukowool, ho pére ayihoulo nꞌgacet mee ! »
17Tooge Herod fannaool naboñemboñ gujok Saŋ Bátiis min gukogool ñiseel ban nguŋarool gúrur nꞌfupeek. Dáaru peepe mara nan abot mee Herodias akoña atiool Fílip ayab, 18Saŋ narogoorok : « Senut min ubot akoña ati'i ! » 19Herodias nafoocoofooc mara yo, ban nak aŋes bu jamugool, bare ájuhut. 20Herod násebisebi Saŋ Bátiis mara námimir Saŋ an átiliŋe naset, bare nak apooyool. Nanoonan nan ngáyentenool, dit ámir buu nabile ekaan, bare gáyentenool nja gúsuumoosuum.
21Ñeer nꞌfunak fan Herod ammee nekaan gagaan gara funak fan abaji mee, Herodias no nabaj mee bulago be ekaan wan apii mee nfuŋes. Herod nawoogulowook usaabaool, unafaan esondaar yaayu bugo mꞌbugan búgaamak bugara mof mara Gálile. 22Funak faafu, bájur Herodias nanogennogen dan gommee nekaan gagaan gaagu, nalako jíboom. Baboomerool mbúsuum máamak áyiih aahu Herod bugo nꞌsijaooraool jaram arogool : « Ugaanom wan ucamen mee, ban ínje be eseni wo. » 23Nabenen arogool nꞌgakali nu mo ró : « Wanoowan wan ubile éciinom, ínje be eseni wo, haani mbil kaan gaŋay gara jáyiihom. »
24Ñeer ájur aahu nápurul asonken jawool arogool : « Waa pére nibilool éciin ? » Narogool : « Ucíinool fukow Saŋ Bátiis. » 25Nasommen abaañ anogen dó, najollen bu nꞌáyiih aahu Herod narogool : « Nicamene uŋarulom maareer maa nꞌgakunaŋ fukow Saŋ Bátiis. » 26Ayíih aahu njogool máamak. Bare nemma nakalie bújooŋoor sijaooraool, acamenut ebaañ búsol. 27Ñeer naboñ acee nꞌupooyaool be éŋarul fukow Saŋ Bátiis. Apooya aahu najow bu nꞌfupeek faafu ásaahul fukow Saŋ Bátiis, 28nabaŋ fo nꞌgakunaŋ átiiŋul, nasen fo ájur aahu. Ajúr aahu nabaañen fo asen jawool. 29Nan ulagena Saŋ Bátiis gujam yo mee, ngújool guŋar eñalenool gufok mꞌbúwaay.
Yéesu nasen gayooŋ gáamak gúcaho
(Máca 14.13-21 ; Lúk 9.10-17)
30Nan ulagena Yéesu gammee guñen nꞌgúruba gan guroge mee epootaar gubaañulo mee nꞌgajaooriil, ngújool guhomenoor tan Yéesu ammee min gugaanool wan gukaan mee peepe son may wan guwaare mee. 31Ñeer Yéesu narogiil : « Jíjool uñagoaal bu tin taririj min jíyolen maa fáriit. » Tooge bugan gammee néjool ngubaañ, gumemmeeŋ jaram Yéesu nꞌulagenaool gubajout bu fúcaho. 32Ñeer ngújupo mꞌbusaana min guñago bu tin taririj. 33Bare bugan gamemmeeŋ nguñowiil bugo nejow, ngufaasiil. Ngúpurul gayooŋ nꞌsísuk saasu peepe ngutey nꞌgoot gulohiil fácil bu tan gommee nejow boot. 34Nan Yéesu awaloulo mee mꞌbusaana baabu, nañow gayooŋ gáamak. Eniinool netey mara gayooŋ gaagu gunogoonogoor naŋ sísaaja sabajut amaha. Ñeer nalako galiigeniil waaf wameeŋe.
35Nan bunak bommee nejon, ulagenaool ngucigool ngurogool : « Taahe ririj máamak ban utu nejon. 36Ukaheniil ngujow bu nꞌsísuk saasu son urager waawu sacik mee taahe min gújuh gunoom múcahoaay. » 37Bare Yéesu narogiil : « Buguul fannauul jiseniil gúcaho. » Ngurogool : « Elí ubabaj pére ukuparu siceme síruba wara síkori be énoomul gúmbuur useniil gúcaho ? » 38Narogiil : « Gúmbuur goono buu njibaje ? Jijow para jisonkenúl. » Ngujow gusonkenúl, ngurogool : « Gúmbuur futok nubaje, mꞌmucaaŋen múruba. »
39Ñeer narogiil gufanjeniil muyooŋ, ngukaaniil ngulako nꞌétuuhuur ewuugul yaayu. 40Gucee ngulako bugan eceme (100), bugaagu gafaŋ gúruba nꞌguñen (50). 41Ñeer Yéesu naŋar gúmbuur gaagu gammee futok son mucaaŋen maamu mammee múruba, nañeer fatiya, náciin Atúuha min ásoonien múcahoaay maamu. Nasaahoor gúmbuur gaagu asen ulagenaool gugaboor bugan gaagu peepe. Nawaajooriil may mucaaŋen maamu mammee múruba. 42Bugo peepe ngúcaho gupooñ jaram guŋañen. 43Ñeer ulagenaool nguhomen búŋañen baabu bara musaat gúmbuur gaagu son mucaaŋen maamu jaram utegel woono guñen nꞌúruba upuus pamm. 44Umaañen gácaho mee gútintiiŋ bugan síwuli futok (5,000).
Yéesu najow dó nu mal
(Máca 14.22-33 ; Saŋ 6.15-21)
45Nan púr to mee déhooro, Yéesu narok ulagenaool gújupo tímer mꞌbusaana baabu ngulohool fácil bu nꞌésuk ecee gurok yo Betusaida yammee nꞌgaagu gahaja gara fal faafu, min ho fannaool arok gayooŋ gaagu gubaañ. 46Nan abaañen go mee, najow bu nꞌemontaañ yaayu be éciin.
47No nu fuk faafu, busaana baabu mbon nꞌetut fal faafu, Yéesu nan bo ho noonool. 48Nañow mara ulagenaool siniiniil sijanjam nꞌgaŋaab, mara galaaj érus yaayu ngon nu yo. Bu nꞌurab, Yéesu najow nꞌgoot nu fal faafu ajooŋooriil jaram an newujiil. 49Nan guñowool mee nejow nu fal faafu, ngupinoor mara dáaru let an bo mee, nguyah sikaaw. 50Bugo peepe nguñowool, úyegehiil nuyiho mara gúsebisebi. To bayaas Yéesu narogiil : « Jibeben úyegehuul ! Jambil jísebi, dáare ínje ! » 51Najiŋ atoogiil dó mꞌbusaana baabu, érus yaayu néyolo. Nkaaniil gajaahali. 52Múluhoiil mucilutiil ngúmir buu Yéesu akaane min gúmbuur gaagu gumeeŋ mara muhankiil úyeget.
Yéesu násonten bugan mꞌmof mara Genesaret
(Máca 14.34-36)
53Nan gútip mee fal faafu, nguyah nꞌésuk yan guroge mee Genesaret. 54Nguwaloúl mꞌbusaana baabu déhooro, bugara ésuk yaayu ngufaas Yéesu, 55ngutey gugangaanen mof maamu búroom mo. Bugan nak gubaŋ úsonta nꞌuyaaju ngutebuliil bu tanootan tan gujame to naam. 56Ñeer tanootan najae, nꞌésuk yáamak, son ésuk yáriita, káŋ bu nꞌsiyaŋ sammee nꞌeramba ró, ngútebul úsonta bu nꞌfúroum ésuk yaayu. Ngúciinool min abonket akahiil ngugor gájuwo'ool, haani mbil kaan fufeŋ go déhooro. Bugan gaagu peepe gagorool mee gukolokolo.
Currently Selected:
Maruk 6: gsl
Highlight
Copy
Compare
Share
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
