Maruk 7
7
Yéesu naceeŋ múkaaniinaay Efarisiit yaayu
(Máca 15.1-9)
1Funak fucee, efarisiit yaayu bugo nꞌgucee nꞌúpajula fuyuhoum Atúuha gápurulo mee Yéruusalem nguhomenoor to nꞌYéesu gugongenool. 2Nguñow mara gucee nꞌulagenaool ubugu nfúcaho ban guñeniil gusehut. Gutaasut go naŋ min bulagoiil burok mee. 3(Tooge efarisiit yaayu bugo nꞌgupaaliil Esúiif búroomiil gúkaanunkaanum múkaaniinaay man sipaayiil gufaan gukahiil mee. Dit gúcaho bugo bataasut guñeniil guset wic. 4Ban éeni gúbaañul marise, dit gúcaho bugo basehenoorout. Gúkaanunkaanum may múkaaniinaay mucee mameeŋe mara sipaayiil, naŋ etaas síraanum, ukunaŋ son ukaraari.)
5Ñeer Efarisiit yaayu nꞌúpajula fuyuhoum Atúuha ngusonken Yéesu gurogool : « Buu nkaane ulagenai gulagenut múkaaniinaay man sipaayolaal gufaan gukaholaal mee, min nak gúcaho guñeniil basehut ? » 6Yéesu narogiil : « Buguul bugan galobériit maregen. Anabiyoŋ aahu Esayi akonkooŋ mꞌbuguul nan alob mee gurim Atúuha arok :
“Bugan gaagu ubugu, nꞌgurim déhooro ngusaleaam,
bare úyegehiil ukuhiankuhi máamak.
7Búsimen ban gukaaneaam mee emontoŋ,
mara wan guliigene mee bugan, guyuhoum gara an déhooro#7.7 Jiñow Esayi 29.13.” »
8Yéesu nabenen arogiil : « Jibehembehen fuyuhoum fara Atúuha, min jijok múkaaniinaay bugan liŋ tiŋ. » 9Nabaañ benen arogiil : « Bare mo njiŋare múluho min jibehen fuyuhoum Atúuha njijok múkaaniinaayuul ! 10Let Móyiis naroge : “Ukáanum paayi nꞌjaayi#7.10 Jiñow Epúrul 20.12 ; Dáteroonom 5.16” ? Naroge may : “An ajel mee paayool mba jawool, jamuk déhooro jijage nu ho#7.10 Jiñow Epúrul 21.17 ; Léwitiik 20.9.” 11Bare buguul jirogerok bugan éeni an arok paayool mba jawool : “Wan íjuheen mee eseni min irandeni, koruban” (yo yommee “esarah bu nꞌAtúuha”), 12an aahu umu añumut ebaañ aŋes ekaan waafóowaaf bu mꞌpaayool mba jawool, ban buguul njikahool nakaan mo. 13Mee njibehen mee mee furim Atúuha. Jititit fo mꞌmúkaaniinaayuul man jiliigen mee bugan. Ban jikaanekaan waaf ucee wameeŋe wanogoore naŋ wo. »
Yéesu nalob mara gaseháahi
(Máca 15.10-20)
14Púr to, Yéesu nabaañ alob nꞌgayooŋ gaagu narogiil : « Buguul peepe jíyentenom mimbil jíjuh jijok wan ibiluul mee elob. 15Bajut wájuhe unogen nꞌan nucilool naseháahi. Wápurulo mee nu ho déhooro, újuhe ukaanool naseháahi. [16Hakaan mee ajama, najam.]#7.16 Mꞌbusafer bameeŋe bútiyaara, furim fe fulet ró. »
17Nan Yéesu akat to mee gayooŋ gaagu min aat bu síndo'ool, ulagenaool ngurogool ápajuliil elob yaayu yan alob mee nꞌfuguub. 18Narogiil : « Taŋ may buguul jijogut elob yaayu ? Jímirut mara waafóowaaf wara tíyaŋ wanogene mee nꞌan újuhut ukaanool naseháahi ? 19Let kum mꞌbúyegehool nunogene, bare nꞌfarool. Wo be épur nu ho nan abil mee ejow nꞌgaseh. » Yéesu mee naliik mee mara múcahoaay maamu peepe mújuhe múcahoi.
20Ban nabenen arok : « Waaf waawu wápureul mee nꞌan, wo nja ukaanool naseháahi to nꞌAtúuha. 21Maregen maregen, upinoor wajagut mꞌbúyeget an nja úpurul : gakajen uñuuho, síkuet, jamuk bugan, 22gafiihen ukoña bugan, gafogo, múlaaj, gabanten bugan, buroŋ bajagut, guciiñ, elob kóji uyah mꞌbugan, gatebenooro son gabajáahi fukow. 23Waaf waawu uwu peepe wajagut mee ñara dáara nꞌan nja úpurul, ban wo nja ukaanool naseháahi. »
Gáyinen gara akoña aahu alet mee Asúiif
(Máca 15.21-28)
24Yéesu nápur tan ammee, ajow bu mꞌmof man guroge mee Tiir. Nátiiŋ, nanogen nꞌyaŋ ecee. Acamenut an ámir mara ho umu dó, bare kum ájuhut akoop. 25Akoña acee han bájurool eseytaane enogene ajanjam ngulobe mee mara Yéesu, nátiiŋ néteyul aloh to nꞌgoohool. 26Akoña aahu alet Asúiif bare mꞌmof mara Siri-fenisi nabaji. Nahuoor Yéesu mimbil akam eseytaane yaayu népur mꞌbájurool. 27Bare Yéesu nalobool nꞌfuguub : « Umundum ukat guleeh gaagu ngúcaho gupooñ. Jagut eŋar múcahoaay guleeh gaagu usen siyen. » 28Akoña aahu narogool : « Acila, uñoñow, haani siyen saasu siŋareŋar bapooy guleeh gaagu balohe mee nꞌetaam. » 29Ñeer Yéesu narogool : « Iyoo. Básuuperi bucicil eseytaane yaayu népur mꞌbájuri. Ujow ukaa bóot. » 30Akoña aahu naat átiiŋ, natook aleehool min afiihoe nꞌeral, eseytaane yaayu bápurer nu ho.
Yéesu násonten émumune yara futiiŋoon
31Púr to, Yéesu nápur mꞌmof maamu mara Tiir nasaat Sidoŋ, nátip mof mara Dekapolis#7.31 Dekapolis : Yo yommee sísuk guñen. najow nꞌgara fal faafu fara Gálile. 32Ho nejow yaayu, nguŋarulool amaañen hara futiiŋoon han baloberool busehut, nguhuoorool min ariten guñenool nu ho. 33Ñeer Yéesu naŋarool min atos akuhi gayooŋ gaagu, nárur gusiigool nꞌgunuu amaañen aahu afaak, naŋar gumasool agorool nꞌfúleelum. 34Púr to náraahulo, nañeer bu fatiya, nayif fuuf narok amaañen aahu : « Efata ! » (Yo yommee útojulo !) 35To bayaas, gunuool ngútojulo, fúlelubool nfukahen, nalob ŋanto pas. 36Yéesu narok gan to mee jambil gulob yo an. Haani min apangeiil mee, mo may ngureg mee ngulobe moola. 37Ban bugan ngujaahali máamak ngurok : « Wan akaan mee peepe, maregen ujajak ! Akankaan bugara gutiiŋoon ngujam, nakaan may símumune nsilob ! »
Currently Selected:
Maruk 7: gsl
Highlight
Copy
Compare
Share
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
