Maruk 8
8
Yéesu nasen benen bugan gamemmeeŋ gúcaho
(Máca 15.32-39)
1Funak fucee bandiŋ, gayooŋ gáamak nguhomenoor benen to nu Yéesu. Ngubajut mee waafóowaaf bu fúcaho, Yéesu náwoogul ulagenaool narogiil : 2« Eniinom etetey mara bugan gaagu ubugu gubaje taahe nꞌínje gunak gúfaajiir, ban gubajut waafóowaaf bu fúcaho. 3Eéni irogiil goot bu síndoiil mꞌbacaariil ró, bugo be eyok mꞌbulago. Gameeŋe mꞌbugo gúpurulopur kuhi. » 4Ulagenaool ngurogool : « Baabe bahay maa maa, éli tuu nújuhe ubaj wan ubiliil esen gúcaho jaram gupooñ ? » 5Narogiil : « Gúmbuur goono buu njibaje ? » Ngurogool : « Goono futok nꞌgúruba. » 6Ñeer narok bugan gaagu gulako nꞌetaam, naŋar gúmbuur gaagu gammee futok nꞌgúruba, nasal Atúuha, nasaahoor go asen ulagenaool gugaboor bugan gaagu peepe. 7Gubajembaj may mucaaŋen fáriit. Naŋar mucaaŋen maamu, nasal Atúuha, narok ulagenaool gugabooriil mo may. 8Bugo peepe ngúcaho jaram gupooñ guŋañen. Ulagenaool nguhomen waŋaño mee mꞌmusaat maamu, nupuusen utegel futok nꞌúruba. 9Gácaho mee jooŋoojooŋoor bugan síwuli sibaagiir (4,000).
Nan gúcaho mee gufaak, Yéesu narogiil goot.
Efarisiit yaayu ngurok Yéesu akaan búyiisenum babile gajaahali an
(Máca 16.1-4)
10To bayaas, Yéesu nájupo mꞌbusaana bugo nꞌulagenaool, min gujow bu mꞌmof man guroge mee Dalumanta.
11Nan gútiiŋ mee, Efarisiit yaayu may ngútiiŋul. Nemmee fuliigiil ejok Yéesu nꞌgabuut, ngubehool fuñut, ngurogool akaan búyiisenum babile gajaahali an, mbuliik mara sembeool nꞌémit nsípurulo. 12Yéesu nayif fuuf. Narok : « Waa ucile bugan bugara jaat nak guŋes be eñow waaf wabile gajaahali an ? Iroguulee : bugan gaagu ubugu mat guñow búyiisenum banooban. » 13Ñeer nakahiil to min abaañ ájupo mꞌbusaana baabu be étip bu nꞌgaagu gahaja.
Ulagena Yéesu gujogut elobool
(Máca 16.5-12)
14Nan gommee nejow, ulagena Yéesu ngumojen eŋar gúmbuur gatootook ; fanur pat nguyekene dó mꞌbusaana baabu. 15Yéesu natariil arogiil : « Jikaan to úyegehuul njíkaanum élewiir yara Efarisiit yaayu son may yara Herod. » 16Ñeer ulagenaool ngurogoor : « Alolob mee mara uŋaruloohaal gúmbuur gamemmeeŋ. » 17Yéesu námir mee wan ngommee nelob, narogiil : « Waa ucile njon galoloboor mara gabajáahiuul gúmbuur ? Bu maareer jímirerut ban may jijogerut ? Uyégehuul mo núlebie ? 18Jibabaj kum gúcil, taŋ jiñowériit ? Jibabaj kum gunuu, taŋ jijamériit ? Jiwosenut 19nan isaahoor mee gúmbuur gaagu gammee futok igaboor bugan goono síwuli futok (5,000) ? Utegel wapuupuus musaat woono buu njitebe ? » Ngurogool : « Guñen nꞌúruba. » 20Nabaañ arogiil : « Nan may isaahoor mee gúmbuur gammee futok nꞌgúruba igaboor bugan gammee síwuli sibaagiir (4,000), utegel wapuupuus musaat woono buu njitebe ? » Ngurogool : « Futok nꞌúruba. » 21Narogiil : « Ñeer bu maareer úyegehuul ujogerut ? »
Yéesu násonten an ápimpiim hara Betusaida
22Nan gútiiŋ mee nꞌésuk yara Betusaida, ngúŋarul Yéesu an ápimpiim, nguhuoorool min agorool. 23Yéesu najogool nꞌgañen, naŋarool min gúpur nꞌésuk yaayu. Nan gúpur mee nꞌésuk yaayu, Yéesu naŋar gumasool alogos amaañen aahu nꞌgúcil, naritenool guñenool narogool : « Waa nuñowe ? » 24An aahu ápiim mee nañeer. Narok : « Niñoñow bugan gan nejow, bare nogoonogoor naŋ ununuk. » 25Ñeer Yéesu nabaañ agor gúcil amaañen aahu. Nabaañ añeer, nárup, nájuh jaj, nañow set wic. 26Ñeer Yéesu narogool : « Oot bu síndoi bare jambil unogen nꞌésuk yaayu [ban jambil ulob yo anooan]#8.26 Mꞌbusafer bameeŋe bútiyaara, furim fe fulet ró.. »
Piyeer narok Yéesu ammee Kirista aahu
(Máca 16.13-20 ; Lúk 9.18-21)
27Púr to, Yéesu nꞌulagenaool ngujow nꞌgara sísuk sacik mee Sesare-Fílip. Bo mꞌbulago, nasonkeniil arogiil : « Bugan gaagu guroge ínje emmee ay ? » 28Ngurogool : « Gucee guroge aw ommee Saŋ Bátiis, bugaagu ngurok aw ommee anabiyoŋ aahu Eliyas, bugaagu bandiŋ ngurok aw acee nꞌenabiyoŋ yaayu. » 29Narogiil : « Yoo ! Ñeer buguul njirok ínje emmee ay ? » Piyeer narogool : « Aw ommee Kirista aahu. » 30Ñeer Yéesu napangiil arogiil : « Jambil jilob an múmbaam. »
Yéesu nalob mara ecehool son gayiho'ool
(Máca 16.21-23 ; Lúk 9.22)
31Yéesu nalako galiigen ulagenaool arogiil : « Aleeh An ho be élaam máamak. Unafaan sísuk saasu, unafaan úsimena waawu bu nꞌúpajula fuyuhoum Atúuha ró be efoyool jaram gumugool. Bare éeni baj gunak gúfaajiir, ho bu gayihoúl dó nꞌgacet mee. » 32Nagaaniil yo set wic. Ñeer Piyeer nawoogool nguyiho nooniil, nalako búrotoorool mara gurim gaagu. 33Bare Yéesu nálowulo, nañeer ulagenaool, narotoor Piyeer arogool : « Seetaane, úpur taahe ! Ukuhiom ! Bapinooreri bujaoorut mꞌbara Atúuha, bare mꞌbara an. »
Buu an abile galagen Yéesu eeno
(Máca 16.24-28 ; Lúk 9.23-27)
34Yéesu náwoogul gayooŋ gaagu, narogiil bugo nꞌulagenaool : « An acamen mee galagenom, jambil abaañ apinoor mara fukowool : ateb ekuruwaool#8.34 Eteb ekuruwa : Taahe Yéesu umu nelob mara ecehool, nan gubil mee efaaŋool nꞌekuruwa. Ñeer narok ulagenaool gumuuyen sílaam san gubil mee ebaj mara gáyineniil nu ho. (Máca 10.38) min alagenom. 35An acamen mee gapagen buroŋool, buroŋ bafaagoériit mee be epagool. Bare an abil mee ecet mara ínje son furim fásuum mee, ho be eroŋ ñáleb. 36Nafa yéy yon to an ebaj waaf waawu peepe wara dúniya, ban yaaloorool mat epak ? 37Babaj pére wan ájuhe asen bu gapagen buroŋool ? 38Bugan bugara maareer gufofoy furim Atúuha, ngon ukaana síjunube. Eéni an asuom ban nasuu gurimom fácil bugan gaagu ubugu, ínje Aleeh an be esuool may nan ibil mee ébaañul nꞌgasal gara Paayom, nu ganur nꞌsimalayika. »
Currently Selected:
Maruk 8: gsl
Highlight
Copy
Compare
Share
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
