Yohanes 11

Lazarus nmat

11:1-16

1-2Na pnu Betania merwan sa ngarany Lazarus. I nmorip nor urnir du, sa ngarany Marta ma sa e ngarany Maria. Maria ye ma keta nbui ngule angat ngafele na Yesus emnir betno nei nor uluny bukrir.

Na ler sa e urnir Lazarus a ne nafanas. 3Mpe urnir du a ne rluan tomwatar sa ma nti nfalak ber Yesus, “Maken, tbwarim ma mkwamis i a ne nafanas.” 4Noak ma Yesus ndengar farane I nfalak, “Ni maninik a ne keta to nose ma nmat, nempa nose ma tomwatar rsalan Ratu Ni kuase ma nlie nlengan, nwayat ma keta rdangin Ratu Anaky a nbal.” 5Ma botuan feti Yesus nkamis Marta, wainy Maria ma Lazarus. 6Nempa noak ma ndengar feti Lazarus nafanas, I to nasnyalik ma nti, ma namin iane lerar du a nbal. 7Lama ni lerar du a rsak, Yesus nfalak ber Ni manglartar, “Mya ma tbali kit far propinsi Yudea.” 8Ne manglartar a ne rfalak, “Tuangguru, bete ye mangfaret Yahudyar rose ma rakjai rfen Ko, ma lolone mpweang ma mbwali Ko far iane e?” 9Nempa Yesus nfalak, “Kmi to mifai feti nof bobolisin terik ma lere nfufw e jamar buti resin du e? Mpa ise ma nmpan a na ngaodir dalam keta to ntutuk i, fali ngaodir a ne nodir saryamprene ma nwayat ma nkeban dalamtene. 10Nempa ise ma nmpan a na makrokap dalam, keta ntutuk i fali to sasaf ma nodir i.” 11Lama Yesus nfalak farane, I nfalak a nbal ber Ni manglartar, “Waninrar Lazarus a ne narwa lo, nempa la ktwi iano ma kpwangun i.” 12Mpa Ni manglartar a ne rfalak ber I: “Maken, farlan i narwa lo e iane nangafel fali keta nangamon ma koko i a npote i.” 13Safo Yesus nfalak farane iane feti Lazarus a nmat lo. Nempa Ni manglartar rafliak feti i narwa far biase motak. 14Iane nwayat ma Yesus nfalak desar ber sir, “Lazarus a nmat lo. 15Nempa Yakw kswenang feti noak ma nmat e to kumin iano. Yakw kose farane fen mir ngamone nema kmi bise ma milele Yakw. Mpa mya ma ti takmat i.” 16Ne Tomas ma rtar feti Didimus nfalak ber tbwarnir, “Mya ma tlarat Yesus ma ti nema tmat tor I.”

Yesus nafkoran Marta ma Maria dalmir

11:17-37

17Lama Yesus nor Ni manglartar rait pnu Betania e, tomwatar rfalak ber I feti Lazarus a nmat, ma rafonak i lerar fat ye lo. 18Pnu Betania ye nlosir kote Yerusalem ma doan fafa kilwar tel. 19Na iane tomwat Yahudyar yadin rma ma rakmat Marta ma Maria ma rafkoran dalmir fali urnir a rmat.

20Noak ma Marta ndengar feti Yesus ketla nait pnue ne, i nti nakmat Yesus. Nempa Maria e namin das. 21Ne Marta nfalak ber Yesus, “Maken, farlan Ko mumin ye noak a ne, urangw to nmat. 22Boloka farane yakw kufai feti farlan lere ye Ko mswampayang ber Ratu, keta nal safe-safe ma mtwak mof I a ne.” 23Ne Yesus nfalak ber Marta, “Uram a ne keta nmorip a nbali.” 24Mpa Marta nfalak, “Yakw kufai feti keta i nmorip a nbali na ler famudi noak ma mangmwatar rmorip a rbali.” 25Yesus nfalak, “Yakw ye ma kose ma tomwatar rmorip a rbali ma kal momorip ber sir. Mpa ise ma nalele Yakw, keta nmorip a nbali boloka i nmat lo. 26Ma tomwatar monuk ma rmorip ma ralele Yakw, keta sir to rmat terik ma dedesar. Mpa mulele safe ma kfwalak ye e?” 27Ne Marta nfalak, “Au Maken, yakw kulele feti Ko ye Ratu Anaky, ma Ray Silai ma luryain e Ratu nyoding I ma keta nma saryamprene.”

28Lama Marta nfalak farane i nti ntar wainy Maria. Noak ma nait e i nasarmpumpu i ber Maria ma nfalak, “Tuangguru namin iano ma nluan ma ktwar ko.” 29Maria ndengar farane nasnyalik ma nti nakmat Yesus. 30Noak a ne Yesus to nti pnue dalam a fuky. Ma I lolone namin pnue burit, ain ma Marta natungan nor I a ne. 31Noak a ne tomwat Yahudyar ramin Maria ni das ma ralonge i. Lama rsalan ma Maria nasnyalik ma nti burit e, sir rlarat i a nbal. Fali sir rafliak feti Maria nti kubur ma ntasing. 32Noak ma Maria nait ain ma Yesus namin a ne, i nsatngur a na Yesus sounlury ma nfalak, “Maken, farlan mumin ye noak a ne e urangw to nmat.”

33Ne Yesus nsalan Maria numur tomwat Yahudyar ma raktem a rma ne ma rtasing e I dalamy loloi desar ma ketla ntasing. 34Mpe I nenrat sir, “Kmi mkyubur i a na mpe?” Ne sir rfalak, “Maken, mwa ma mswalan.” 35Ne Yesus lunir a rtur. 36Mpe tomwat Yahudyar ma ramin iane rfalak, “No msyalan I nlompang resi Lazarus.” 37Nempa tomwatar ketnir nof sir a ne rfalak, “I nose ma matbolar rakeban, ma safema I to bise ma nose ma Lazarus to nmat?”

Yesus nafmorip a nbali Lazarus

11:38-44

38Mpe Yesus dalamy loloi desar ma nti kubur a ne. Kubur a ne bangar sa ma repat ror bati. 39Ne Yesus nfalak, “Mlyawe bati ne far seriny!” Nempa Lazarus urany ma rtar feti Marta ne nfalak, “Maken, i nmat lerar rfat lo mpa keta angtany.” 40Ne Yesus nfalak, “Yakw kfwalak ber ko lo feti, farlan mulele Yakw, keta mswalan Ratu Ni kuase silai ma nlie nlengan a ne.” 41Mpe tomwatar rlawe bati ne far seriny. Ne Yesus nfon far langit ma nfalak, “O Amo, Yakw kose alang ber Ko fali Ko mdwengar Ningw tatakar. 42Ma kufai feti Ko dedesar ma mdwengar Yakw. Nempa Yakw kswampayang farye nema tomwatar yadin ma ramdir a rkolu Yakw ye ralele feti Ko ye ma mswiduk Yakw.” 43Lama Yesus nfalak monuk farane, I nfalak nor liriny silai, “Lazarus, mwa burit ye!” 44Metryat e Lazarus ma nmat a ne nma burit. Ma limany-emany lolone rkete ror maloly buri, ma maloli ma repat souny a ne lolone namin a nbal. Ne Yesus nfalak ber sir, “Mtyatar malolyar a ne ma msyalan lonri ma i nti.”

Mangfaret Yahudyar rfat ma lese ma rfen Yesus

11:45-57

45Noak a ne tomwat Yahudyar yadin rma ma rakmat Maria. Ma sir rsalan safe ma Yesus nose ne. Iane nwayat ma yadin nof sir a ne ralele I. 46Nempa ketnir e rti rakmat tomwat Farisyar ma rasaur safe ma Yesus nose ne.

47Ne mangsomp ulnir ma tomwat Farisyar rafburat sir ror mangtetak agamar ma raenrat sir, “Tomwate ne nose ngrimpasalnar yadin lo, mpa tose farpe I? 48Farlan kit tsalan lonri I e keta tomwatar monuk ralele I. Mpa mangfaret Romar keta rma ma rsose ninr nuse ma Ratu Ni Das Silai ye#11:48 Mangfaret Yahudyar ramtaut feti farlan tomwatar yadin rlarat Yesus keta rfil I ma neluk Rai ber Yahudyar. Nwayat ma rbangal mangfaret Romar a ne mpa keta rma ma rsose nir nuse ne..”

49Nempa tomwatar sa nof sir a ne ngarany Kayafas. Na ngarak a ne i neluk Mangsomp Silai. I nfalak ber sir, “Kmi to mifai sasaf! 50Kmi ka mifai feti ni ngafele e tomwatar sa nmat ber ninr nuse, ma kete tomwate lese nwayat ma ninr nuse nayatak.”

51Kayafas nfalak farane iane to nof lan koko i ni andaun. Nempa i to nfenai feti i nafbotin snyurat nof Ratu lo fali i neluk Mangsomp Silai na ngarak a ne. Ma i nfalak feti Yesus keta nmat la ntebus tomwat Yahudyar. 52Safo ni botuan e I to nmat ber lan tomwat Yahudyar. Nempa I nmat la nafburat Ratu Ni tomwatar monuk ma rakes rasam sir a ne ma fen lese.

53Ntabw nof lere ne mangfaret Yahudyar rfat ma lese ma rfen Yesus. 54Iane nwayat ma Yesus to nafbotin I ber tomwat Yahudyar a ne. Mpa I nti pnu sa ma nlosir ain letkape. Pnue ne ngarany Efraim. Ma I nor Ni manglartar ramin iano.

55Noak a ne tomwat Yahudyar nir ler silai Paskah sesedin lo. Ma tomwatar yadin rof pnuar mpane rti Yerusalem. Sir rti baluan ma raflerap tenir nema bise ma rlarat ler silai Paskah ne. 56Tomwat ngayadin ranriak Yesus. Noak ma sir rafburat sir a na Ratu Ni Das Silai e raenrat sir, “Farpe? Kmi mdyaun e keta I nma festa e?” 57Sir raenrat sir farane fali mangsomp ulnir ma tomwat Farisyar ral farete ber tomwatar monuk lo feti ise ma nafai feti Yesus namin mpe e ka nafbotin ber sir nema romat I.

Currently Selected:

Yohanes 11: YMD

Highlight

Copy