Yohanes 7

Yesus wanir to ralele I

7:1-13

1Lama Yesus natanuk monuk nor tomwat ngayadin e, I nmpan a nlole propinsi Galilea. Ma I to nmpeang ma nti propinsi Yudea fali mangfaret Yahudyar na iano rareke ma rfen I.

2Noak a ne ketla ni tewat ma tomwat Yahudyar rose nir ler silayar sa. Na ler silai ne biase sir rose kenryape ma rtaup ror donyar ma ramin. 3Mpe Yesus wanir rfalak ber I, “Kete mumin ye ma mtwi propinsi Yudea, nema Nim manglartar a ne bise ma rsalan ngrimpasalan ma mose. 4Tomwatar to rose ramudim kabanir farlan rmpeang ma tomwat walyetar rafai sir. Mpa mose kabain mpasalnar na iano la mfwatutu ber tomwatar monuk feti ise Ko.” 5Yesus wanir a ne rfalak farane fali koko sir e to ralele I.

6Mpa Yesus nfalak ber sir, “Lere ye to ni tewat ma ktwi Yerusalem a fuky, nempa kmi e ler mpeye motak e bise ma mtyi. 7Ma tomwatar na saryamprene to rkedan a kmi, nempa sir rkedan Yakw. Fali dedesar ma kfwalak feti kabanir ma sir rose ne kabain yatkar. 8Mpa mbyalun ma mtyi festa ne. Ma Yakw to ktwi fali to ni tewat ma ktwi a fuky.” 9Yesus nfalak farane ber sir, ma I e namin lerar fir a ne na Galilea.

10Yesus wanir rti Yerusalem ma raosfesta lo. Ma to dodo nof a ne Yesus nti a nbal, nempa nti e namlin motak nema tomwatar to rafai I. 11Na festa ne mangfaret Yahudyar ranriak Yesus ma raenrat tomwatar na iane feti tomwate ne namin mpe.

12Ne tomwatar yadin rasarmpumpu sir a na Yesus. Ketnir rfalak, “Tomwate ne nangamon.” Ma ketnir rfalak a nbal, “Tate, I nfule tomwatar yadin lo.” 13Nempa to tomwate fen lese nbal ma nbaran ma nfalak na Yesus na tomwatar sonirlury, fali ramtaut mangfaret Yahudyar.

Yesus naftutu na Yerusalem

7:14-24

14Noak ma festa nmpan lerar fir a ne, Yesus nti Ratu Ni Das Silai ni latyompur ma naftutu tomwatar na iane. 15Mpe mangfaret Yahudyar rampriang ma rfalak, “No, tomwate ne to naskol agame far kit a ma nafai resi.”

16Ne Yesus nfalak, “Safe ma kuftutu ye to nof Yakw nempa nof I ma nsiduk Yakw ne. 17Tomwate ma nose nlarat Ratu Ni mpempeang, keta nafai feti safe ma kuftutu ne nof Ratu, ma to nof koko Yakw Ningw andaun. 18Tomwate ma naftutu tomwatar nor ni andaun, nmpeang lan ma tomwatar rdangin i. Nempa tomwate ma naftutu tomwatar nema rdangin Ratu ma nsiduk i, botuan feti i nfalak lan kabain botunar ma to nlepusuk. 19Luryain e Musa nal tetetkar ma Ratu nal ber i a ne ber a kmi lo nre! Nempa to tomwate fen lese nbal ma nof a kmi ye ma nose nlarat tetetkar a ne. Ma safema mireke ma mfyen Yakw?”

20Ne tomwat ngayadin a ne rfalak, “Smwangat yatak a nsung Ko lo! Ali ise nose ma nfen Ko?”

21Ne Yesus nfalak ber sir, “Yakw kose ngrimpasalan sa na Yahudyar nir ler Sanari motak e, kmi mimpriang lo. 22Nempa koko kmi a nbal e msyunat angkimir merwanar na nir lerar wal, boloka lere ne nfufw a na ler Sanari. Luryain e Musa nal tetetkar a ne ma rsunat a kmi, safo ni botuan e sunat a ne to nof i nempa nof empninrar ma rbalun rof i a ne. 23Mpa farlan msyunat angkimir merwanar na ler Sanari fali mlyarat Musa ni tetetkar a ne, safema kufngamone tomwatar sa tenany na ler Sanari e mirese Yakw? 24Ka kete mtyetak tomwatar nir ngriar mlyarat safe ma msyalan, nempa ka mtyetak nir ngriar mlyarat safe ma botuan.”

Tomwat Yahudyar raenrat sir feti Yesus ye Ray Silai nre tate

7:25-36

25Mpene tomwat Yerusalemar ketnir a rfalak, “Botuan feti tomwate ye ma kit ninr mangfaretar ranriak i ma rose ma rfen i ye lo nre? 26No msyalan, I natanuk na tomwat ngayadin sonirlury nempa ninr mangfaretar ramlin motak. Nre kete rafai lo feti Ray Silai I. 27Nempa noak ma ninr Ray Silai nma e, to tomwate fen lese nbal ma nafai feti I nof mpe. Safo kit monuk tafai feti tomwate ye nof mpe.”

28Noak ma Yesus naftutu na Ratu Ni Das Silai e I nfalak nor liriny silai, “Kmi mdyaun feti kmi mifai Yakw e ma mifai feti kof mpe nbal e? Ma mdyengar ma kfwalak, Yakw kmwa saryamprene ye to klwarat koko Yakw Ningw mpempeang. Nempa Yakw kmwa e klwarat I ma nsiduk Yakw ne Ni mpempeang, ma I a ne ma kmi bise ma milele I botuan. Ma kmi to mifai I. 29Yakw kufai I fali Yakw kof ain ma I namin, ma I ye ma nsiduk Yakw ma kmwa saryamprene.”

30Nof a ne tomwatar ketnir rareke ma romat I, nempa to tomwate fen lese nbal bise ma nomat I, fali to ni tewat ma romat I a fuky. 31Nempa yadin nof tomwatar a ne ma ralele Yesus. Sir rfalak, “Botuan feti I ye ninr Ray Silai lo fali to tomwate fen lese nbal ma bise nose ngrimpasalnar yadin nlengan nof ngrimpasalnar ma I nose ye.”

32Noak ma tomwat Farisyar rdengar ma tomwat ngayadin rasarmpumpu sir a na Yesus farane, sir rti rakmat mangsomp ulnir ma rluan mangajakar ma ramin Ratu Ni Das Silai ne ma romat I. 33Mpe Yesus nfalak ber sir, “Yakw kor a kmi e to dodo. Ma keta kbwali Yakw ber I ma nsiduk Yakw ne. 34Kmi keta minriak Yakw nempa to mtyungan Yakw, fali to bise ma mtyi ain ma kumin a ne.”

35Mangfaret Yahudyar a ne rafalak ber sir, “I nti mpe, ma keta to tkeban I ye? Nre kete I nose ma nti nakmat tomwat Yahudyar ma reluk mangum na tomwat Yunanyar nir nuse ne ma keta naftutu tomwat Yunanyar a ne. 36Safema nfalak feti keta minriak Yakw, nempa to mtyungan Yakw? Ma nfalak a nbal feti keta to bise ma ti ain ma kumin a ne.”

Yesus ye neluk weye ma nal momorip ber kit

7:37-44

37Noak a ne festa nmpan ma ketla nait lerar fir a ne. Ma na lere ma festa ne ketla omp, iane lere ma ubany desar nlengan nof lerar ma raosfesta ne#7:37 Noak ma tomwatar Yahudyar rose nir ler silai e sir raosfesta ketla minggu dalam. Ma na ler ketujuh e Yahudyar nir mangsompar rti ral weye rof kloloku Siloam ma rbui na altar na Ratu Ni Das Silai. Sir rose farane ma ranremi feti luryain a ne Ratu nal weye ber sir noak ma ramin ain letkape. . Ne Yesus namdir Ratu Ni Das Silai ma nfalak nor liriny silai, “Ise ma namwes, nma ma nakmat Yakw, nema kal weye ma nenum! 38Iane feleles farlan ma rarengi na Kitap Lelerap dalam farye: ‘Ise ma nalele Yakw keta kose ma weye matan nlale nof dalamy. Weye ne ma keta nal momorip dedesar.’” 39Yesus nfalak farane iane nfalak na Ratu Smwangtany ma keta Ratu nal ber tomwatar ma ralele Yesus. Nempa noak a ne Ratu to nal Ni Smwangtany ber sir fali to ni tewat ma nafdas Yesus a fuky.

40Noak ma tomwat ngayadin rdengar safe ma Yesus nfalak a ne, ketnir a rfalak, “Botuan, tomwate ye nabi ma Ratu nyoding I luryain a ne.”

41Ketnir a nbal e rfalak, “I ye Ray Silai.”

Nempa ketnir a nbal e rfalak, “Yesus ye nof Galilea nempa Ray Silai to nof Galilea, 42fali na Kitap Lelerap dalam rarengi feti Ray Silai ye nof Daud ni dasdalam. Ma I nof kote Betlehem, Daud ni pnue sori.” 43Mpe tomwat ngayadin a ne rabangal a na Yesus. 44Ne tomwatar ketnir nof tomwat ngayadin a ne rose ma romat I, nempa to fen lese nbal ma nbaran ma nomat I.

Mangfaret Yahudyar to ralele Yesus

7:45-53

45Mpene mangajakar#7:45 Mangajakar ye ma mangsompar ulnir ma tomwat Farisyar rluan sir ma romat Yesus. a ne rti rakmat mangsomp ulnir ma tomwat Farisyar ma rluan sir a ne. Ne sir renrat mangajakar a ne, “Safema kmi to myor I a mya?”

46Mpe mangajakar a ne rfalak, “To lain sa ma mdengar ma tomwatar sa natanuk far I a fuky.”

47Ne tomwat Farisyar a ne rfalak, “Nre kete I nfule kmi lo. 48Ali kmi mdyengar feti ninr mangfaretar nre Farisyar kam ye ketnir a ralele I lo e? Tate nre! 49Nempa tomwatar yadin a ne sir ralele I fali to rafai tetetkar ma Ratu nal ber Musa. Mpa Ratu nukun sir.”

50Tomwat sa nof tomwat Farisyar a ne ngarany Nikodemus#7:50 Kit bise ma tbaca ansaur ye na Yohanes 3:1-21. I ye ma luryain e i nti nakmat Yesus lo. Ma i nfalak ber sir, 51“Amngur, farlan tlarat tetetkar ma Ratu nal ber Musa e, ka tdengar ma tomwatar ratanuk la rafdiat sir a fuky, betno kit bise ma tal tetetkar a ne la tetak nir ngriar a ne.”

52Noak ma Nikodemus nfalak farane, sir rfalak, “Ali ko tomwat Galilea far I a nbal e? No mswalan fen ngamone safe ma rarengi na Kitap Lelerap dalam nema mufai feti to nabi ma nof Galilea.”

53[Lama rfalak farane, tomwatar a ne rbali sir far nir dasar.

Currently Selected:

Yohanes 7: YMD

Highlight

Copy