Lukas 7
7
Yesus nafngamone suldadw Romar nir ulnir sa ni kawar
7:1-10
(Mat. 8:5-13; Yoh. 4:46-53)
1Lama Yesus nfalak monuk ber tomwat ngayadin a ne, I nti kote Kapernaum. 2Na kote ne suldadw Romar nir ulnir sa ni kawar, ma nkamis resi i nafanas ma ketla nmat.#7:2 Na ayat ye suldadw Romar nir ulnir sa nfarete suldadwar rati. 3Suldadw Romar nir ulun a ne ndengar feti Yesus namin Kapernaum, mpa naluan maken Yahudyar ketnir ma rti rakmat Yesus ma rtak I, ma nti nafngamone ni kawar a ne. 4Lama rait e, tomwatar ne raloloi desar sir ma rfalak ber Yesus, “Maken, mtwulung mamy suldadwar nir ulun yo fuky, 5fali nkamis tomwat Yahudyar kit, ma nafdiri nbal das sampayang ber kam.”
6Mpene sir raktem Yesus a rti. Noak ma ketla rait ni das, suldadwar nir ulun a ne naluan tbwarnir ma rti rfalak ber Yesus feti, “Kete nawar I ma nma ningw das lo, fali kmweat ma klwangun I. 7Iane nwayat ma yakw to bise ma kukmat I a nbal. Mpa nfalak motak ngribatnir sa e, ningw kawar a ne nangamon lo. 8Fali yakw e tomwatar sa ma nlengan nof yakw ne ma nfarete yakw. Ma yakw e kfwarete ningw suldadwar a nbal. Ma farlan kfwalak ber suldadwar sa feti, ‘Mtwi!’ Ne i nti, ma kfwalak ber sa nbal feti, ‘Mwa!’ Ne i nma. Nre kfwalak ber ningw kawar, ‘Mose ye!’ Ne i nose desar.”
9Lama Yesus ndengar tomwate ne ni tnyangkwar, I nampriang desar. Ne nbali I ma nsalan tomwat ngayadin ma rlarat I a ne ma nfalak, “Mdyengar fen ngamone, nof tomwat Israelar monuk e, to lain sa ma ktwungan tomwate ma nalele desar Ratu farlan tomwate ye fuky, safo tomwate ne to tomwat Israel i!” 10Lama tbwarnir ma nluan sir a ne rbali sir far ni das e, rsalan kawar a ne nangamon lo.
Yesus nafmorip tabwer sa na Nain
7:11-17
11Mpene Yesus nal far kote sa ngarany Nain. I nti nor Ni manglartar, ma tomwat ngayadin rnrur a rlarat I a nbal. 12Ketla rait kote ne ni finru matan, tomwatar rabare mangmwate na mpeluk far kote burit. Mangmwate ne tabwer mesan, i ye bat som sa anaky. Tomwatar yadin rof kote ne rorang bate ne. 13Noak ma Yesus ninr Mangnrure nsalan bat some ne nlompang i, mpa nfalak, “Batmaken, kete mtwasing lo!” 14Mpene nti nlosir mpeluk ne ma nasyol. Mpa mangabarar a ne ramdir a rtabu sir. Ne I nfalak, “Tabweri mpwote ko!” 15Ne npote desar i ma natanuk, ne Yesus nal i ber enany.
16Tomwatar monuk na iane ramtaut. Sir rdangin Ratu ma rfalak, “Nabi silayar sa nbotin ber ninr kateman lo! Ratu nma ma nfair Ni tomwatar lo!” 17Mpe ibar na Yesus a ne namelir monuk na propinsi Yudea ma na yamprenar seriny baldu.
Yohanes mangadiris nluan ni manglartar ma rti renrat Yesus
7:18-35
(Mat. 11:2-19)
18Lama Yohanes ni manglartar rasaur ansarwar monuk a ne ber i e, 19mpe ntar ni manglartar du ma rti renrat Yesus ninr Mangnrure feti, “Maken, Ko ye Ray Silai ma Ratu nyoding a ne lo nre ka kam mdaf tomwat walyetar sa nbal?” 20Ne Yohanes ni manglartar du a ne rti renrat Yesus, “Amangw, Yohanes mangadiris nluan kam ma menrat feti, Ko ye Ray Silai ma mwa ye lo nre ka mdaf tomwat walyetar sa nbal?”
21Noak a ne Yesus nafngamone tomwatar yadin nir maningkyar felnir mpane. I natian kalin a nbal smwangat yatkar nof sir, ma nafngamone matbolar ma rakeban. 22Mpa Yesus nfalak ber sir, “Mbyali kmi, ma mfyalak ber Yohanes, na safe-safe monuk ma msyalan ma mdyengar. Matbolar rakeban, mangamluktwar rmpan, mangampalwar rangamon a rbali, mangtokar radengar, mangmwatar rmorip a rbali, ma ber tomwatar ma rawatan kufwibar Ibar Ngamone.#Yes. 35:5-6; 61:1 23Ma ngamone ber tomwatar ma to ratliur Yakw nempa dedesar ma ralele Yakw.”
24Lama Yohanes ni manglartar a rbali sir e, Yesus ntabw ma natanuk na Yohanes ber tomwat ngayadin na iane. I nfalak, “Luryain e kmi mtyi msyalan Yohanes na ain letkape ma fen safe? Mtyi msyalan tomwate ma ni andaun to ntai farlan riar ma mnaur nanrir sir a ne e? Tate nre! 25Nre mtyi ma msyalan safe? Msyalan tomwate ma nfonak rabit ngafele e, tate nre? Tomwate ma nfonak rabit ngafelar ma nir momorip nangafel, namin lan rayar nir das silayar. 26Mpa mtyi ma msyalan safe? Mtyi msyalan nabyar sa e? Au, botuan desar, fali Yohanes silai i a nlengan nof nabi walyetar. 27Ma i ye ma nasusan tomwatar dalmir ma rlangun Yakw. Ma iane farlan ma Ratu nfalak na Kitap Lelerap dalam farye: ‘Msyalan, I ye ma kswiduk i, ma nbalun nof Ko, ma naflawar dalamtene ber Ko!’”#Mal. 3:1
28Yesus nfalak, “Mdyengar fen ngamone, na saryamprene ye to tomwate fen lese ma uban nlengan nof Yohanes mangadiris. Nempa nait ma Ratu neluk Rai ma nfarete tomwatar, sir ma to ubnir sasaf a ne keta ubnir a rlengan Yohanes mangadiris.”
29Tomwatar monuk ma mangtak ulbatyar, ryoding feti Ratu Ni ngribatnir ma Yesus nfalak a ne botuan. Sir a ne ma Yohanes nadiris sir lo.#Mat. 21:32; Luk. 3:12 30Nempa tomwat Farisyar ma mangaftutu Musa ni faretar to rlampir ma rlarat Ratu Ni mpempeang. Sir to rmpeang ma Yohanes nadiris sir.
31Mpene Yesus nfalak a nbal, “Keta kal safe la kpwasal tomwatar na are ye? 32Sir farlan kangkir ma ramtoran pasar, klop sa nabali nor klop sa:
‘Kam mtef tibal#7:32 Mtef tibal na teks asli nfalak feti mfangus buli. ber a kmi,
nempa to mlyampir ma myenari,
kam mbeu bew mangmwate,
nempa to mtyasing!’
33Farlan Yohanes mangadiris a nbal, i nma e, to nane roti ma to nenum anggur, ne mfyalak, ‘Smwangat yatak a nsung i!’ 34Yakw, Tomwate Anaky kmwa e, ktwame ma kwenum ne kmi mfyalak, ‘No msyalan tomwate ne! Nampayatak, manganabuk, natbwarin nor mangtak ulbatyar, ma tomwat salar.’ 35Boloka kmi mfyalak Yakw farane, nempa tomwatar bise ma rafai Ratu Ni anfai silai. Sir rafai Ratu Ni anfai silai ne nof ma rsalan tomwatar ma rlarat Ningw anftutwar a ne nir wewelmpampan ngamonar.”
Bat yatkar sa nbui ngule angat ngafele na Yesus emany
7:36-50
36Tomwat Farisyar sa ngarany Simon, ntar Yesus ma ntame na ni das. Mpa Yesus nti ni das ma ntame. 37Na kote ne bat yatkar sa namin iane nbal. Noak ma ndengar feti Yesus ntame na tomwat Farisi ne ni das e, i nma nonry ngule angat ngafele na botal marmer anak.#Mat. 26:7; Mrk. 14:3; Yoh. 12:3 38I namdir Yesus butryan nlosir emany ma ntasing, ma lunir a ne rafmpwetan Yesus emany. Ne nal uluny bukrir la nei, betno nbon, ma nal ngule angat ngafele ne la nyonge. 39Tomwat Farisi ma ntar Yesus a ne nsalan farane, nfalak na dalamy, “Farlan tomwate ye nabi, botuan feti keta nafai bate ma nasyol emany a ne ise i. Fali bate ye bat yatak.”
40Ne Yesus nfalak, “Simon, Yakw kose ma kfwalak kabanir sa ber ko.”
Ne Simon nfalak, “Au Amangw Tuangguru, mfwalak motak.”
41Mpene Yesus nfalak, “Tomwat sa nafmpwane ni dotyar ma naosanak ber tomwatar du. Tomwat sa nutang doit dinar raty lim, ma sa nbal e, dinar buty lim. 42Tomwatar du a ne to rbaras ral nir utngar. Mpa tomwate ma nafmpwane dotyar a ne nkes kalin motak. Nof tomwatar du a ne ise ma nkamis resi tomwate ma nafmpwane ni dotyar a ne?”
43Simon nfalak, “Yakw kdwaun feti tomwate ma ni utang yadin a ne.”
Ne Yesus nfalak, “Nim andaun a ne diat!” 44Mpene Yesus nmange I ma nfon bate ne betno nfalak ber Simon, “No mswalan bate ye. Yakw kmwa nim das e, ko to mnwau weye ma mbwur emngur, nempa bate ye nal lunir la nafmpwetan emngur, betno nal uluny bukrir la nei. 45Yakw kmwa nim das e, to mbwon Yakw, nempa ntabw ma kumin das ye bate ye dedesar ma nbon emngur. 46Ko to myonge ngule na ulungw, nempa bate ye nyonge ngule angat ngafele na emngur. 47Mdwengar fen ngamone ma kfwalak, bate ye nkamis desar Yakw fali ni salar ma yadin a ne Yakw klwure lo. Nempa tomwate ma Ratu nlure ni salar lan ketnir, keta ni ankamis lan rufuky a nbal.”
48Mpene Yesus nfalak ber bate ne, “Klwure nim salar lo.”
49Mpa tomwatar ma rtame ror Yesus a ne rdaun a na dalmir, “Ise I ye? Mampe bise nlure tomwatar nir salar?”
50Nempa Yesus nfalak ber bate ne, “Ko mulele Yakw, mpa kfwair ko. Mbwali ko mor maline!”
Currently Selected:
Lukas 7: YMD
Highlight
Share
Copy
Want to have your highlights saved across all your devices? Sign up or sign in
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
