Markus 16
16
Yesus nmorip a nbali
16:1-8
(Mat. 28:1-10; Luk. 24:1-12; Yoh. 20:1-20)
1Na nronram e noak ma Yahudyar nir ler Sanari omp lo, Maria Magdalena, Salome, ma Maria Yakobus enany rti rselir ngul angat ngafelar, ma keta ronr far kubur la ryonge Yesus tenany. 2Na Minggu bobolisin dalam desar noak ma lere betno nbet e sir rti kubur. 3Na dalamtene let e rafalak ber sir, “Ise ma keta ntulung kit ma nlawe kalin bati ma nepat bange ne nema bise ma ti dalam?” 4Sir rfalak farane fali bati ma nepat bange ne iane baty sa ma silai desar. Nempa lama rait e sir rsalan bati ma nepat bange ne nlalau lo. 5Ne rti bange dalam ma rsalan e tabwer sa nfonak rabit mafuty melawas namtoran sir balisya fian mpa rmetryat ma ramtaut. 6Nempa tabweri ne nfalak ber sir, “Kete mimtaut! Yakw kufai feti kmi minriak Yesus tomwat Nasaret ma rsangwalu I a ne. I nmorip a nbali lo ma to namin ye. No msyalan ain ma rfele I ye. 7Mpa mbyali kmi ma mfyalak ber Petrus ma Yesus Ni manglartar feti I nmorip a nbali lo. Ma mfyalak ber sir feti I nbalun far Galilea lo. Na iano la msyalan I farlan ma nfalak ber a kmi a ne.”
8Lama batar a ne rdengar farane, sir rafla rbie rof kubur a ne ma rngangasar fali ramtaut desar. Ma sir to rfalak sasaf ber se nre se na dalamtene let fali ramtaut.#16:8 Na teks Yunani e Kitap Markus nater lan ayat 8. Nempa na teks Yunani walyetar e tomwatar rarengi kitap Markus ma rtafal ma melawas. Safe ma sir rtafal a ne kit tose na catatan kaki farye: Batar a ne rasnyalik ma rti rakmat Petrus ma tbwarnir, ma rafbotin safe-safe monuk ma tabweri ne nfalak. Ne Yesus nluan Ni manglartar ma rti rafwibar Ratu Ni ngribatnir far saryamprene ni kateman. Ratu Ni ngribatnir a ne ma nfair tomwatar nema ronri momorip dedesar.
Yesus nafbotin I ber Maria Magdalena
16:9-10
(Mat. 28:9-10; Luk. 24:13-35; Yoh. 20:11-18)
9Na Minggu bobolisin noak ma Yesus nmorip a nbali e, I nafbotin I baluan ber Maria Magdalena. Maria Magdalena ye ma luryain e Yesus natian kalin smwangat yatkar itw nof i#16:9 Ayat 9-20 to namin teks Yunani asli nbal nempa namin teks Yunani walyetar. Iane nwayat ma kam marengi ayatar ye mpaki tanda kurung. . 10Ne i nti nafbotin ngrie ne ber Yesus Ni manglartar. Noak a ne sir lolone rampalim ma rtasing. 11Nempa noak ma sir rdengar feti Yesus nmorip a nbali ma nafbotin I ber Maria e, sir to ralele.
Yesus nafbotin I ber Ni manglartar du
16:12-13
12To dodo nof a ne, Yesus nafbotin I ber Ni manglartar du. Noak a ne radu a rmpan far kote burit. Nempa to weni rafai Yesus fali souny felan sa. 13Ne tomwatar du a ne rbali sir ma rti rakmat tbwarnir ma rafbotin ber sir feti ratungan ror Yesus. Nempa sir to ralele nbal.
Yesus nafbotin I ber Ni manglartar
16:14-18
14Mpene Yesus nafbotin I a nbal ber Ni manglartar buti resin lese noak ma rtame. Ne I narese sir fali nir andanwar to rmpan ma to ralele I botuan. Mpa boloka tomwatar rafbotin ber sir feti rsalan desar ma Yesus nmorip a nbali, nempa to ralele tomwatar a ne. 15Ne Yesus nfalak ber sir, “Mtyi saryamprene ni kateman ma mifwibar Ibar Ngamone ber tomwatar monuk. 16Ma ber tomwatar ma ralele Ibar Ngamone ma rlarat ma radiris sir keta Ratu nfair sir. Nempa ber tomwatar ma to ralele Ibar Ngamone ne keta Ratu nukun sir. 17Ma tomwatar ma ralele Yakw ne keta Ratu nal kuase ber sir ma rose kabain mpasalnar neluk faniak feti, sir keta ratian smwangat yatkar ror Ningw kuase, ma keta ratanuk ror liliryar ma to rkaul ral. 18Ma boloka romat kasyar nre renum racun keta to sasaf diat sir. Ma farlan rsaup limnir a na mangafansar keta rangamon.”
Yesus nfangat far surga
16:19-20
(Luk. 24:50-53; Kis. 1:9-11)
19[Lama Yesus natanuk monuk ber sir e, I nfangat far surga ma namtoran Ratu seriny fian ma nfarete. 20Mpe Ni manglartar a ne rti ma rafwibar Ibar Ngamone na mpenempen. Ma ninr Mangnrur Silai nal kuase ber sir ma rose kabain mpasalnar neluk faniak. I nose farane la nfatutu feti Ni ngribatnir ma sir rafwibar a ne botuan nof Ratu.]
Currently Selected:
Markus 16: YMD
Highlight
Share
Copy
Want to have your highlights saved across all your devices? Sign up or sign in
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
