တမန်တော် 4
4
တရားလွှတ်တော်ဆေ့တွင် ပေတရုနဲ့ ယောဟန်
1ပေတရုနဲ့ ယောဟန်လို့ဟ လူလို့အား ဟောပြောလျက် နေကြစဉ် အချို့ ယဇ်ပုရောဟိတ်များ၊#၄.၁ ယဇ်ပုရောဟိတ်များ၊ တချို့ လက်ရေးမူကျမ်းများတွင် ယဇ်ပုရောဟိတ် အကြီးအကဲများ၊ ဟူယွေ့ ပါဆိအယ်။ ဗိမာန်တော် အစောင့်တာဝန်ခံ အရာဆိနဲ့ ဇဒ္ဒုကဲများဟ ရောက်လာကြအယ်။ 2တမန်တော်နေဦးလို့ဟ ယေရှု သေခြင်းမှ ဆှင်ပြန်ထမြောက်လဲ့အကျောန်းဟို လူလို့အား သင်ကြားနေသောကျောန့် သူလို့ဟ စိတ်အနှောင့်အယှက် ဖြစ်ကြအယ်၊ ကိုယ်တော်ရဲ့ သေခြင်းမှ ဆှင်ပြန်ထမြောက်ခြင်းဟို အကျောန်းပြုယွေ့ လူလို့အား သက်သေပြလျက် ဆိအယ်။ 3အေးလိုမို့ သူလို့ဟ တမန်တော်လို့ဟို ဖမ်းဆီးပင်း မိုးချုပ်ပီ ဖြစ်သောကျောန့် နောက်တနေ့တိုင်အောန် ထောင်ထဲမှာ ထည့်ထားကြအယ်။ 4အဲလိုလဲ သတင်းစကားဟို ကြားသောသူများဟ ယုံကြည်လဲ့သူ ယောက်ျားအရေအတွက်မှာ ၅,၀၀၀ ခန့်မျှ တိုးပွားလာအယ်။
5နောက်တနေ့တွင် ယုဒခေါင်းဆောင်များ၊ အကြီးအကဲများနဲ့ ကျမ်းတတ်ဆရာများဟ ယေရုရှလင်မြို့နှိုက် စုဝေးကြအယ်။ 6ယဇ်ပုရောဟိတ်မင်း အန္နတ်နဲ့ ကယာဖ၊ ယောဟန်၊ အာလေဇန္ဒြု မှစယွေ့ ယဇ်ပုရောဟိတ်မင်းရဲ့ မိသားစုဝင် ဆိသမျှလိုဟ တွေ့ဆုံကြအယ်။ 7အဲသူလို့ဟ မိမိလို့ဆေ့တွင် တမန်တော်နေပါးဟို ရပ်စေယွေ့ “နင်လို့ဟ စလို တန်ခိုး အဲဟာမဟုတ်ရင် စလို နာမအားဖြင့် ဟေအမှုဟို ပြုလုန်း” ဟု မေးမြန်းကြအယ်။
8အဲအခါ ပေတရုဟ သန့်ဆှင်းသော ဝိညာဉ်တော်နဲ့ ပြေ့ဝလျက် “လူများဟို အစိုးရသော ခေါင်းဆောင်လို့နဲ့ အကြီးအကဲလို့၊ 9ခြေမသန်စွမ်းသောသူ တယောက်ဟို ကောင်းကျိုးပြုလဲ့ အကျောန်း၊ သူကျန်းမာလာပုံ အကျောန်းနဲ့ ပတ်သက်ယွေ့ ခနေ့ ငါလို့ စစ်ဆေးခံရရင်၊ 10နာဇရက်မြို့သား ယေရှု ခရစ်ရဲ့ နာမတော် တန်ခိုးအားဖြင့် အဲသူဟ ခြေသန်စွမ်းလာယွေ့ နင်လို့ ဆေ့တွင် ရပ်လျက်နေတာဟို နင်လို့နဲ့အတူ ဣသရေလအမျိုးသားအပေါင်းလို့ သိမှတ်ကြလော့၊ အဲအဆှင်ဟ နင်လို့ လက်ဝါးကပ်တိုင်မှာ တင်ယွေ့ သတ်ပင်းနောက် ဘုရားသခင် ဆှင်ပြန်ထမြောက်စေသောသူ ဖြစ်အယ်။ 11ကျမ်းစာဟ ရည်ညွှန်းသူမှာ အေးယေရှုပင် ဖြစ်အယ်၊
“ ‘တိုက်ဟို တည်ဆောက်ရာတွင် နင်လို့ ပယ်ထားလဲ့ ကျောက်ဟ၊
အရေးကြီးဆုံးဖြစ်လဲ့ ထောင့်ချုပ်ကျောက် ဖြစ်လာအယ်။’
12ကယ်တင်ခြင်းဟ အခြားစသူမှာမှ မဆိ၊ အကျောန်းမှာ အေးနာမမှတပါး ငါလို့အား ကယ်တင်မဲ့ အခြားသော နာမဟို ခေါန်းခင်အောက် လူလို့နှိုက် ပေးအပ်ထားခြင်း မဆိ” ဟု သူလို့အား ဆိုအယ်။
13ပေတရုနဲ့ ယောဟန်လို့ဟ ပညာမတတ်သူ၊ သာမန် လူများသာဖြစ်လျက်နဲ့ စလောက် ရဲရင့်ကြတာဟို တရားလွှတ်တော်အဖွဲ့ဝင်လို့ မျော်ကြသောအခါ ရမ်းဆာ့အံ့ဩကြအယ်။ အေးသူနေဦးလို့ဟ ယေရှုရဲ့ အပေါင်းအဖော်များ ဖြစ်ခဲ့ကြတာဟိုလည်း သတိပြုမိကြအယ်။ 14အဲလိုလဲ ရောဂါပျောက်ကင်းသွားသူဟ သူလို့နဲ့ ရပ်လျက်နေတာဟို မျော်သောကျောန့် သူလို့ဟ စလိုမျှ ငြင်းဆိုရန် မတတ်နိန်ကြ။ 15အေးလိုမို့ သူလို့ဟို တရားလွှတ်တော်ထဲမှ ခဏထွက်ခွာစေရန် ပြောပင်း သူလို့အချင်းချင်း စတင် ဆွေးနွေးကြအယ်။ 16သူလို့ဟ “ဟေသူလို့အား ငါလို့ စလိုလုပ်လုန်း” ဟု မေးကြအယ်။ “သူလို့အားဖြင့် ထူးခြားသော နိမိတ်လက္ခဏာ ဖြစ်ပေါ်ခဲ့တာဟို ယေရုရှလင်မြို့သားအပေါင်းလို့ ကောင်းစွာ သိကြတာ ဖြစ်ယွေ့ ငါလို့ ငြင်းဆိုယွေ့ မရနိန်ပီ။ 17အဲလိုလဲ အဲအကျောန်းဟ လူလို့အထဲတွင် ပိုယွေ့ ပျံ့မသွားစေရန် ယေရှုရဲ့ နာမဟို အမှီပြုယွေ့ နောက်တခါ ဖယ်သူဟိုမှ မဟောပြောရန် ငါလို့ တင်းကျပ်စွာ သတိပေးကြစို့။”
18အဲပင်းရင် သူလို့ဟို ပြန်ခေါ်ယွေ့ ယေရှုရဲ့ နာမတော်ဟို အမှီပြုယွေ့ ဟောပြောခြင်း အဲဟာမဟုတ်ရင် သွန်သင်ခြင်း လုံးဝမလုပ်ရန် အမိန့်ပေးကြအယ်။ 19အဲလိုလဲ ပေတရုနဲ့ ယောဟန်လို့ဟ “ဘုရားသခင်ရဲ့ စကားဟို နားထောင်တာထက် နင်လို့ရဲ့ စကားဟို နားထောင်ခြင်းဟ ဘုရားသခင်ဆေ့မှာ မန်အယ် မမန်ဝူးဆိုတာဟို နင်လို့ ဆုံးဖြတ်ကြလော့။ 20အကျောန်းမှာ ငါလို့တတ်တိုင်း ကြားရမျော်ရလဲ့ အမှုအရာများအကျောန်းဟို မဟောပြောဘဲ မနေနိန်” ဟု အေးသူလို့အား ပြောကြအယ်။ 21အဲလိုမို့ တရားလွှတ်တော် အဖွဲ့ဝင်လို့ဟ သူလို့ဟို ထပ်မံကျပ်တည်းစွာ သတိပေးပင်းနောက် ထွက်ခွာသွား စေကြအယ်။ လူအပေါင်းလို့ဟ ဖြစ်ပျက်ခဲ့လဲ့ အမှုအရာကျောန့် ဘုရားသခင်ရဲ့ ဘုန်းတော်ဟို ချီးမွန်းလျက် နေကြသောကျောန့် သူလို့ဟ တမန်တော်လို့ဟို အပြစ်ဒဏ်ပေးနိန်မဲ့ နည်းလမ်းဟို ဆှာမတွေ့ကြ။ 22ဟေနိမိတ်လက္ခဏာအားဖြင့် အကောင်းပကတိဖြစ်လာသော သူဟ အသက်လေးဆယ်ကျော် ဆိအယ်။
ရဲရင့်မှုအတွက် ယုံကြည်သူများဟ ဆုတောင်းခြင်း
23ပေတရုနဲ့ ယောဟန်လို့ဟ လွတ်မြောက်လာကြသောအခါ မိမိလို့ရဲ့ လူစုဆေဟို ပြန်ပင်း ယဇ်ပုရောဟိတ်ကြီးများနဲ့ အကြီးအကဲများ ပြောသမျှလို့ဟို ပြန်ပြောကြအယ်။ 24အဲအကျောန်းဟို သူလို့ ကြားကြသောအခါ၊ အဲသူလို့ဟ အတူတကွ ဘုရားသခင်ဆေမှာ အသံလွှင့်လျက် “အစိုးရသော အဆှင်၊ ကိုယ်တော်ဟ ခေါန်းခင်၊ မြေကြီး၊ သမုဒ္ဒရာမှစယွေ့ ဆိသမျှအရာအားလုံးဟို ဖန်ဆင်းသောအဆှင် ဖြစ်အယ်။ 25ကိုယ်တော်ဟ မိမိရဲ့ အစေခံ၊ ငါလို့ရဲ့ ဖိုးဖေး ဒါဝိဒ်မင်းရဲ့ နှုတ်မှတဆင့် သန့်ဆှင်းသော ဝိညာဉ်တော်အားဖြင့်၊
“ ‘လူမျိုးတကာလို့ဟ ပစာကျောန့် ရုန်းရင်းဆန်ခတ် ပြုကြလုန်း။
လူလို့ဟ ပစာကျောန့် အကျိုးမဲ့ ကြံစည်ကြလုန်း။
26မြေကြီးရဲ့ ဆှင်ဘုရင်လို့ဟ ထကြယွေ့၊
အုပ်ချုပ်သူလို့ဟ အတူတကွ စုဝေးကြကာ ထာဝရဘုရားနဲ့ ကိုယ်တော်ရဲ့ မေဆှိယဟို ဆန့်ကျင်ကြအယ်’ ဟု မိန့်ခဲ့အယ်။
27 #
လု ၂၃.၇–၁၁;
မ ၂၇.၁,၂; မာ ၁၅.၁; လု ၂၃.၁; ယော ၁၈.၂၈,၂၉ အမန်ပင် ဟေရုဒ်မင်းနဲ့ ပုန္တိပိလတ်မင်းလို့ဟ လူမျိုးခြားလို့၊ ဣသရေလ အမျိုးသားလို့နဲ့ ပေါင်းဖော်ပင်း ကိုယ်တော် ဘိသိက်ပေးလဲ့ ကိုယ်တော်ရဲ့ သန့်ဆှင်းသော အစေခံ ယေရှုဟို ဆန့်ကျင်လျက် ဟေမြို့တွင် စုဝေးကြအယ်။ 28ကိုယ်တော်ရဲ့ တန်ခိုးတော်နဲ့ အလိုတော်လို့အားဖြင့် ဖြစ်ပျက်လာရန် ကြိုတင် သတ်မှတ် ထားသမျှသောအရာလို့ဟို ပြုခဲ့ကြပီ။ 29ထာဝရဘုရား၊ အခု အေးသူလို့ရဲ့ ခြိမ်းခြောက်ခြင်းဟို ရှုမှတ်ပင်း ကိုယ်တော်ရဲ့ အစေခံလို့အား တရားတော်ဟို ရဲရင့်စွာ ဟောပြောနိန်ခွင့်ဟို ပေးသနားပါ။ 30တချိန်တည်းမှာပင် အနာရောဂါများဟို ငြိမ်းစေရန် ကိုယ်တော်ရဲ့ လက်တော်ဟို ဆန့်တန်းယွေ့ ကိုယ်တော်ရဲ့ သန့်ဆှင်းသော အစေခံ ယေရှု နာမအားဖြင့် နိမိတ်လက္ခဏာများနဲ့ အံ့ဩဖွယ်ရာများဟို ပြုခွင့်ပေးပါ” ဟု ဆုတောင်းကြအယ်။
31သူလို့ ဆုတောင်းကြပင်းသောအခါ စုဝေးရာနေရာဟ တုန်လှုပ်အယ်။ သူလို့အားလုံးဟ သန့်ဆှင်းသော ဝိညာဉ်တော်ဖြင့် ပြေ့ဝလျက် ဘုရားသခင်ရဲ့ တရားတော်ဟို ရဲရင့်စွာ ဟောပြောကြအယ်။
ယုံကြည်သူများ ပိုင်ဆိုင်သော ဥစ္စာများဟို ဝေမျှသုံးစွဲခြင်း
32 #
တ ၂.၄၄,၄၅ ယုံကြည်သောသူအားလုံးဟ စိတ်နေလုံး တညီတညွတ်တည်း ဖြစ်ကြသဖြင့် စသူမျှ မိမိရဲ့ ဥစ္စာပစ္စည်းများဟို မိမိပိုင်တာဟု မဆိုဘဲ၊ ဆိသမျှသောအရာလို့ဟို ဘုံစုအဖြစ် ထားကြအယ်။ 33တမန်တော်လို့ဟ သခင် ယေရှု ဆှင်ပြန်ထမြောက်ခြင်း အကျောန်းဟို ကြီးသောတန်ခိုးဖြင့် သက်သေခံကြအယ်။ ဘုရားသခင်ဟ သူလို့အားလုံးအပေါ်ဟို ကောင်းချီးမင်္ဂလာ ကြွယ်ဝစွာ သွန်းလောင်းအယ်။ 34အဲသူလို့တွင် ဆင်းရဲသောသူ တယောက်မျှ မဆိ။ အကျောန်းမှာ နေအိုင် အဲဟာမဟုတ်ရင် မြေကွက်ဟို ပိုင်သောသူဆိသမျှလို့ဟ ရောင်းပင်း၊ ရသောအဖိုးဟို ယူခဲ့ယွေ့၊ 35တမန်တော်လို့ရဲ့ ခြေရင်းတွင် ထားကြသဖြင့် တဦးချင်းစီနှိုက် လိုအပ်မှုဆိလဲ့အတိုင်း အသီးသီးလို့အား ဝေငှပေးကမ်းကြအယ်။
36ယောသပ်ဟု နာမယ်ဆိသော လူတယောက်ဆိအယ်၊ သူ့ဟို တမန်တော်လို့ဟ ဗာနဗ ဟု ခေါ်ကြအယ်၊ ဗာနဗရဲ့ အနက်ဟ “နှစ်သိမ့်ခြင်းရဲ့ သား” ဟု အဓိပ္ပာယ်ရအယ်။ သူဟ ကုပရုပြေသား၊ လေဝိအနွယ်ဝင် ဖြစ်အယ်၊ 37မိမိပိုင်သောလယ်ဟို ရောင်းယွေ့ ပိတ်ဆန်ဟို ယူလာပင်း တမန်တော်လို့ရဲ့ လက်နှိုက် အပ်လေအယ်။
Currently Selected:
တမန်တော် 4: NTDNB24
Highlight
Share
Copy
Want to have your highlights saved across all your devices? Sign up or sign in
The New Testament in Danu Language © The Word for the World International and the Danu Bible Translation Committee, 2024.
