लुका 6
6
ङासुगीन ङीमागी चोवो
(मेथा १२:१-१४; मारकु २:२३-२८;३:१-६)
1येशु ङासुगीन ङीमागोला, ढोई श्यीङने हाला फेई हो़तालाक। धेनी खोङबागी ङेनेक्याई ढोई ॱङीमा थी़री, लागागी ॱङीरी शेवालाक। 2हीना फारुसीपा रीङगागी ॱनेवालाक, “ङासुगीन ङीमाला, खेक्या घीझ्येरी क्षो़ठीमला ॱमीथी़न्गीन लेगा झ्यीदाले?”
3धेनी येशुगी खुङक्याला सुवालाक, “दावीद धाङ खी़मुला हो़गीनक्या फोवा तोई घाङला, खी़ घी झ्यीगीनगो खेक्याई माढोक हो़ती? 4खो को़न्क्षोकगी क्षो़खाङ नाङला जुरी, को़न्क्षोकगी कुम्दीनदु पुपा ग्याङगागो खेरती शेवालाक धेनी खोरीमुला हो़गीनक्याला तेरपालाक। होदे ग्याङगागो क्षो़पो़नक्याई माना, श्येम्मा सी़या शा ॱमेछोक्वालाक।” 5धेनी येशुगी खुङक्याला सुवालाक, “मी-भु ङासुगीन ङीमागी चोवो लाक।”
लाक्पा काम्गा मी च्यीकला चो़गा
(मेथा १२:९-१४; मारकु ३:१-६)
6याङ श्येम्मा ङासुगीन ङीमा च्यीकला, येशु छोक्खाङला फेप्ती क्षो़ तो़न जेदी हो़तालाक। धेनी होदुरु लागा ॱये काम्गा मी च्यीक हो़तालाक। 7धेनी येशुला ङेक्यो़न चुक्ये घुकाप चायेगी क्षीला, क्षो़ठीमगी ॱलोपो़नक्या धाङ फारुसीपाक्याई, खोङबागी ङासुगीन ङीमाला चो़गा झ्यीदी मीझ्यीदी, ॱनेरी तेरी धेबालाक। 8हीना खोङबागी खुङक्याई साम्लो खेन्दा जेदी, होदे लाक्पा काम्गा मीला सुवालाक, “दुरु स्योक धेनी घीरीगी दोङदु लोङ।” धेनी होदे मी लारी दोङला सोवालाक।
9धेनी येशुगी होदेक्याला सुवालाक, “ङा खेक्याला ढीलाहीन, ङासुगीन ङीमाला शाङा झ्यीये याङना ङेन्पा झ्यीये धेनी सोक क्योप्ये याङना सोक चेयेने, क्षो़ठीमला घीन्गो थी़न्दाले?”
10धेनी खोङबागी घीरीला शीक्पालाक धेनी खोला सुवालाक, “ख्यी़ लागा क्योङ।” मीगी़ होदेराङ झ्येवालाक धेनी खी़ लाक्पा ढाक्पालाक। 11हीना क्षो़ठीमगी ॱलोपो़नक्या धाङ फारुसीपाक्या, ॱमीच्यीकी खोङडो लारी, येशुला घी झ्यीगुनाङ ॱनेरी, खोराङक्या नाङदु ढो़ झ्येवालाक।
कुछाप च्युङङी
(मेथा १०:१-४; मारकु ३:१३-१९)
12ङीमा च्यीक येशु री स्योकला फेप्ती, होदुरु छेन्घाङ को़न्क्षोकला सोवा ताप्ती श्युक्पालाक। 13धेनी ॱङारोकगो खोङबागी खोरी ङेनेक्याला भो़या जेदी, होदेक्याने च्युङङीला दाम्दी, देक्याला कुछाप ॱनेरी मीङ ता जेपालाक। 14देक्या नी, खोङबागी पेटो ॱनेरी मीङ ताक्ता, सीमोन धाङ खी़ नो आन्डीरीया धेनी याकोब धाङ योहान्ना धेनी फीलीप धाङ बारथोलोमा धाङ 15मेथा धाङ थोमा धाङ आल्फायुगी भीजा याकोब धाङ ग्याल्चेपा#६:१५ राङगी ग्याखापगी राङजेगी क्षीला दो़पा क्षे धाङ ॱमाक टाप थुप्कीन ॱनागीन सीमोन धाङ 16याकोबगी भीजा युदा धेनी ङोलोक झ्यीगीन युदा ईस्कारीयोत लाक।
येशुगी नेपाक्या चो़गा जेपा
(मेथा ५:३-१२)
17धेनी येशु कुछापक्या मुला रीने माला फेप्ती, खोङबा थाङगा च्यीकरु श्येङदी श्युक्पालाक। होदुरु खोङबागी स्याबाला डागीन, मीछोक क्षे च्यीक धाङ युदेया युगी सा घीरीने धाङ येरुसालेम ग्याजाने धाङ ग्याछोगी थामाला हो़गीन, ताएर धाङ सीदोन ग्याजाने होवा मीछोक क्षे च्यीक होदुरु जोम हो़तालाक। 18होदे मीक्या खोङबागी का ङेन्ये धाङ राङगी नाजाक्याने ढाक्येला, खोङबागी डुङदु च्यारपालाक। धेनी डे जुरी दुक्पु झ्युजुवा मीक्या ढाक्पालाक। 19धेनी मी घीरीगी खोङबाला जुयेला थापस्यी झ्येवालाक घीझ्येरी ॱनाना खोङबाने नी़थु थो़न्दी, मी घीरी चो़गा झ्युङी हो़तालाक।
झ्यीलाप क्षेक्या
(मेथा ५:१-१२)
20धेनी येशुगी खोरी ङेनेक्याला शीक्ती सुवालाक,
“खे उटेक्या झ्यीलाप क्षे,
घीझ्येरी ॱनाना को़न्क्षोकगी ग्यासी खेराङक्याई लाक।
21खे तोक्कीनक्या झ्यीलाप क्षे,
घीझ्येरी ॱनाना खेक्या डागुलाक।
खे ङुगीनक्या झ्यीलाप क्षे,
घीझ्येरी ॱनाना खेक्या घो़मु स्योरकीलाक।
22मी-भुगी दो़न्दु,
खेला मीक्याई दाङा झ्यीना,
पेरी श्याक्ना धेनी ॱमेबेप ताङना,
धेनी खीकी मीङला ङेन्पा चीना,
खेक्या झ्यीलाप क्षे लाक।
23“होदे ङीमागोला ङ्यामो घेरी फोक घीझ्येरी ॱनाना नाम्खे श्यीङखामदु खीकी ज्यागा क्षे हो़तालाक। घीझ्येरी ॱनाना देक्याई धाङबी फामाक्यागीयाः ॱङो़नस्येखेनक्याला देरेराङ झ्येवालाक।”
24“हीना धान्दा क्षुक्पु हो़गीनक्या ॱङ्याली,
घीझ्येरी ॱनाना खेक्याला कीदा थोप्सालाक।
25धान्दा डागीनक्या ॱङ्याली,
घीझ्येरी ॱनाना खेक्या तोक्कुलाक।
धान्दा घो़मु स्योरकीनक्या ॱङ्याली,
घीझ्येरी ॱनाना खेक्या धुक ॱरुङगीलाक धेनी ङुगुलाक।
26धान्दा घीरीने तो़टा राक्कीनक्या ॱङ्याली,
घीझ्येरी ॱनाना शोक्पो ॱङो़नस्येखेनक्याला, खुङक्याई धाङबी फामाक्याई देरेराङ झ्येवालाक।”
ख्यो़री डाला चेवा झ्यी
(मेथा ५:३८-४८;७:१२)
27“हीना ङाला ङेन्गीनक्याला ङा ॱनाहीन, खेरी डाक्याला चेवा झ्यी धेनी ख्यो़ला दाङा झ्यीगीनक्याला शाङा झ्यी। 28ख्यो़ला ॱमेमो देप्कीनक्याला झ्यीलाप तेर। धेनी ख्यो़ला ॱमेटा ताङगीनक्याला ॱमो़लाम धेप। 29ख्यो़री डाबा च्यीकला डाम्चाक ग्याप्कीनला, श्येम्मागोवा शे। धेनी ख्यो़री फीघो़ ठोक्कीनगोला, ख्यो़री घो़ गोवा खेरतु च्युक। 30ख्यो़ने ॱलाङगीन घीरीला तेर धेनी ख्यी़ च्यालाक खेरती डुगीनक्याने याङ ॱलोक ॱनेरी ॱमाना। 31श्येम्मागी ख्यो़ला घारे झ्यीगीनगो दो़दी, होदेरेराङ खुङक्याला झ्यी।
32“ख्यो़ला चेवा झ्यीगीनक्याला च्यीगा चेवा झ्यीना, ख्यो़ला घी फेन हो़ताले? घीझ्येरी ॱनाना धीक्चेनक्याः खोराङला चेवा झ्यीगीनला चेवा झ्यीदालाक। 33याङ ख्यो़ला घा झ्यीगीनला च्यीगा घा झ्यीना, ख्यो़ला घी फेन हो़ताले? घीझ्येरी ॱनाना धीक्चेनक्याः होदेरेराङ झ्यीदालाक। 34कीपा थोप्येगी रेवा झ्येरी श्येम्माला ख्यी़ कीना, ख्यो़ला घी फेन हो़ताले? होदे छो़लाराङ थोप्येला धीक्चेनक्यागीयाः धीक्चेनक्याला कीलालाक। 35हीना राङगी डाक्याला चेवा झ्यी धेनी शाङा झ्यी धेनी कीपा लेन्येगी रेवा मीझ्यीदा मी श्येम्माला की। धेनी ख्यो़ला ज्यागा क्षे थोप्कीलाक धेनी खेक्या ॱलानामेपे को़न्क्षोकगी से झ्युङगीलाक घीझ्येरी ॱनाना को़न्क्षोकगी काटीन ॱमेसाम्गीन धाङ ङेन्पाक्याला ॱङीङजे जेदालाक। 36खीकी याप ॱङीङजेचेन हो़गीन च्योक्रे, खेक्या ॱङीङजेचेन झ्युङ।”
मी श्येम्मागी क्यो़न ॱमातो़न
(मेथा ७:१-५)
37“श्येम्मागी ठीम ॱमाचे धेनी ख्यो़ला ठीम चेगीमालाक। श्येम्माला क्यो़न ॱमाचुक धेनी ख्यो़ला क्यो़न चुक्कीमालाक। श्येम्माला घोयाङ तेर धेनी ख्यो़ला घोयाङ ॱनाङगीलाक। 38श्येम्माला तेर धेनी ख्यो़ला ॱनाङगीलाक। ख्यो़ला छे गाङने माङा ॱनेम्दी धाङ टुक्ती धाङ खारी ली़गीन थुक्पे, ख्यो़री थुला ॱलुक्कीलाक। ख्यी़ श्येम्माला छे ग्याप्कीन च्योक्रे, ख्यो़ला होदे छेलाराङ ग्याप्कीलाक।”
39धेनी येशुगी खुङक्याला पे दे सुवालाक, “श्यारा च्यीकगी श्यारा श्येम्माला ठीक थुक्कीलाक से? खुङ ॱङीगारा दोङ-दोङ नाङदु ल्हीम्गी माले? 40ङेने च्यीक खोरी घेगेनने क्षे मेयोङालाक। हीना ॱलोप्चुङ घीरी लेन्सारती, खो खोरी घेगेन च्योक्रे झ्युङगीलाक।
41“राङगी ॱमीकला हो़गीन दुङमागो ॱमेथोङा, राङगी पी़नगी ॱमीकला हो़गीन स्यीङडुकगो, ख्यो़ घीझ्येरी थोङाले? 42खेरी ॱमीकगी दुङमा ॱमेथोङगीन, ख्यी़ राङगी पी़नला ‘ख्यी़ ॱमीकने स्यीङडुकगो तो़न्दु च्युक’ ॱनेरी घाङगी झ्येरी ॱनाथुक्वाले? शोक्पो ख्यो़, एन्ला राङगी ॱमीकगी दुङमागो तो़न धेनी खेरी पी़नगी ॱमीकला हो़गीन स्यीङडुकगो तो़न्येला ख्यी़ सावो थोङगीलाक।”
दोङबो धाङ होदेगी स्यीङदोक
(मेथा ७:१६-२०;१२:३३-३५)
43“दोङबो शाङाला ढेबु ङेन्पा ॱमेकेलालाक होझ्येरीराङ, दोङबो ङेन्पाला ढेबु शाङा ॱमेकेलालाक। 44दोङबो घीरी होदेगी ढेबुने ङो स्येलालाक। ॱरेक्याने सेयाप ॱमीथुवालाक होझ्येरीराङ, छेम्मे खोक्ने घुन्डुम ॱमीथुवालाक। 45मी शाङपोगी खोरी सेमगी झ्यी़ शाङाने राङ, फीला शाङा तो़न्दालाक। धेनी मी ङेन्पागी खोरी सेमगी झ्यी़ ङेन्पाने राङ, फीला ङेन्पा तो़न्दालाक। घीझ्येरी ॱनाना सेमगी नाङला हो़गीनगो राङ खाने थो़न्दालाक।”
खाङबा ॱङीगी पे
(मेथा ७:२४-२७)
46“ङी ॱनागीनगो मीझ्यीना, खेक्या घीझ्येरी ङाला ‘चोवो, चोवो’ ॱनेरी भो़लाले? 47ङीचारु होरी ङी काला ङेन्दी होदे च्योक्रे झ्यीगीनगो, सु च्योक्रे ले ॱनेरी ङी खेक्याला तो़न्दु। 48खो सा तीङ रीङबो ढी़री फोङगीङ खाला, खाङबागी डाम तीरी खाङबा शोगीन मी च्योक्रे लाक। धेनी क्षुलोक होरी खाङबागो तेन्पो शो़सा झ्येरी, क्षुगी श्युरतीया यो़ ॱमाथुक्पालाक। 49हीना ङी काला ङेन्दी होदे च्योक्रे मीझ्यीगीनगो डाम ॱमातीवा, सा खाला खाङबा शोगीन मी च्योक्रे च्यीक लाक। धेनी होदे खाङबाला क्षु फोई घाङला, खाङबागो लाम्साङ धीप्ती मेताला सोवालाक।”
Currently Selected:
लुका 6: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
