मेथा 25
25
भोमो नाच्युङमा च्युगी पे
1येशुगी सुवालाक, “धेनी नाम्खे ग्यासी दे माक्पा थुक्तु डोयेला, क्युङ खेरती डुगीन भोमो नाच्युङमा च्यु च्योक्रे लाक। 2खुङक्याने ॱङा ॱलेन्दा धाङ ॱङा च्याङा हो़तालाक। 3धेनी ॱलेन्दाक्याई क्युङ खेरी घाङला, राङगी क्युङमुला ॱनुम ॱमाखेरपालाक। 4हीना च्याङाक्याई राङगी क्युङमुला ॱनुम यालीङ खेरती सोवालाक। 5धा माक्पागो हुङयेला गोरती, खुङ घीरी ॱङीगी शीरी ङ्यारी धेपालाक।
6“हीना छेनगी घुङला ‘माक्पा ॱलेप्जो! खोङला ज्यारु स्योक!’ ॱनागीन केक च्यीक घोरपालाक। 7धेनी होदे नाच्युङमा च्युगारा लारी, खुङक्याई क्युङगो डाढीक झ्येवालाक। 8धेनी ॱलेन्दाक्याई च्याङाक्याला ॱनेवालाक, ‘खीकी ॱनुमने हेक्याला तीते तेरोझ्यी। हीकी क्युङ स्यीगु झ्यीदी।’ 9हीना च्याङाक्याई लेन ग्याप्ती ॱनेवालाक, ‘खेक्या धाङ हे ॱङीगाराला खेयेगी ॱनुम हेला मेक। होझ्येरी छोङपा चारु सोरी, राङगी क्षीला ॱनुम ङ्यो़।’
10“धेनी खुङक्या ङ्योरु डी़ घाङला, माक्पागो ॱलेप्पालाक। धेनी डाढीक झ्येरी धेताक्या, खी़मुला छाङजागी डो़न नाङदु जुवालाक धेनी घोगो ग्याप्पालाक।
11“स्याम्ला होदे श्येम्मा नाच्युङमाक्या होरी श्यी़वालाक, ‘चोवो, चोवो, हीकी क्षीला घो पेरो जे।’ 12हीना माक्पागी़ ॱनेवालाक, ‘ङा धेन्पाराङ खेक्याला ॱनाहीन, ङा खेक्याला ॱमेस्येहो़क।’”
13धेनी येशुगी सुवालाक, “खेक्याला ङा हुङयेगी ङीमा धाङ धी़चो़गो स्येये मेगीन झ्येरी च्याङजे धो़क।
ॱयोक्पो सुमगी पे
(लुका १९:११-२७)
14“नाम्खे ग्यासी नी ढु ग्याप्तु डुगीन मी च्यीक च्योक्रे लाक। खी़ खोरी ॱयोक्पोक्याला भो़री, खोरी ग्युनोरगो खुङक्याला ची ग्याप्पालाक। 15खुङक्याई ज्यो़न्दाङला तेरी, दाक्पोगी़ धाङपोगोला सेरगी टाङगा ॱङातोङ धेनी ॱङीवागोला ङीतोङ धेनी सुम्बागोला च्यीकतोङ तेरपालाक। धेनी खो होदेने सोवालाक। 16सेरगी टाङगा ॱङातोङ जोरकीनगो, लाम्साङ सोरी होदेने छोङ झ्येरी, सेरगी टाङगा ॱङातोङ यालीङ साक्पालाक। 17होझ्येरीराङ सेरगी टाङगा ङीतोङ हो़गीनगी़, यालीङ टाङगा ङीतोङ साक्पालाक। 18हीना सेरगी टाङगा च्यीकतोङ हो़गीनगो, सोरी सा ढी़री खोरी दाक्पोगी़ टाङगाक्या भेवालाक।
19“धा युन रीङबो स्याम्ला, होदे ॱयोक्पोक्याई दाक्पोगो लोक्ती होरी, खुङक्यामुला ची लेन्बालाक। 20धेनी सेरगी टाङगा ॱङातोङ जोरकीनगी़ यालीङ टाङगा ॱङातोङ खेरती, दोङला होवालाक धेनी श्यी़वालाक, ‘दाक्पो, खेराङगी ङाला सेरगी टाङगा ॱङातोङ ॱनावालाक। धा दुरु ङी टाङगा ॱङातोङ यालीङ शो़हो़क।’ 21दाक्पोगी़ खोला ॱनेवालाक, ‘ॱयोक्पो शाङपो धाङ ॱलो का थुप्कीन, ख्यी़ ॱमीच्यीकी घा झ्येदुक। ख्यी़ ङ्युङाला ढाङपो झ्येरी, धा ङा ख्यो़ला माङागी गेन तेराहीन। धा ङीमुला घाटो ताङदु स्योक।’ 22धा टाङगा ङीतोङ जोरकीनगोवा, दोङला होरी श्यी़वालाक, ‘दाक्पो, खेराङगी ङाला टाङगा ङीतोङ ॱनावालाक। धा ङी दुरु यालीङ टाङगा ङीतोङ शो़हो़क।’ 23दाक्पोगी़ खोला ॱनेवालाक, ‘ॱयोक्पो शाङपो धाङ ॱलो का थुप्कीन, ख्यी़ ॱमीच्यीकी घा झ्येदुक। ख्यी़ ङ्युङाला ढाङपो झ्येरी, धा ङा ख्यो़ला माङागी गेन तेराहीन। धा ङीमुला घाटो ताङदु स्योक।’
24“धा सेरगी टाङगा च्यीकतोङ जोरकीनगोवा दोङला होरी श्यी़वालाक, ‘दाक्पो, राङगी ॱमाताप्कीन साने ॱङागीन धाङ राङगी साङा ॱमातोरकीन साने धुगीन, खेराङ मी ग्योङा च्यीक लाक ॱनेरी ङाला स्येयेहो़क। 25होझ्येरी ङा जीक्जुङ धेनी ङी सोरी खेराङगी टाङगागो साई होकला बेरी श्याक्पी। धा खेराङगी हीन्गीनगो खेराङ लेन्रो झ्यी।’ 26हीना खी़ दाक्पोगी़ ॱनेवालाक, ‘ॱयोक्पो ङेन्पा धाङ फेन ॱमेथोक्कीन ख्यो़, ङी ॱमाताप्कीन साने ङा ॱङालाक धेनी ङी साङा ॱमातोरकीनने धुलालाक ॱनेरी, ख्यो़ला स्येये हो़ना, 27ख्यो़ ॱङुखाङला सोरी, ङी टाङगागो होदुरु श्याक घोयेहो़क धेनी ङा हुङी घाङला ङी ॱङु धाङ होदेगी केकागो ङाला थोप्ये हो़क।’ 28होझ्येरी दाक्पोगी़ सुवालाक, ‘खी़ टाङगाक्या खोने ठोक्ती, सेरगी टाङगा च्यु हो़गीनगोला तेर। 29घीझ्येरी ॱनाना हो़गीनगोला ॱयो़ल्ले माङा तेरकीलाक धेनी खोला मेछो़ली झ्युङगीलाक। हीना मेगीनगोने खोला हो़गीनगोवा, खोने ठोक्कीलाक। 30धेनी होदे फेन ॱमेथोक्कीन ॱयोक्पोला, ङुगीन धाङ सो ढीक्कीन फीदी साज्या मी़नाक्पाला ॱयुक।’
थामेगी ठीम्चो़
31“मी-भु राङगी भाङछेनक्यामुला राङगी शीजेला फेई घाङला, राङगी शीजे धेन्पे श्युक्ठीला श्युक्कीलाक। 32मीरीक घीरी खोङगी दोङदु रुप्कीलाक धेनी लुक्जी च्यीकगी राक्याई खोक्ने, लुकक्या पेगीन च्योक्रे खोङगी मी देक्याला ॱयेवा जेगीलाक। 33धेनी लुकक्याला राङगी ॱये स्योक धाङ राक्याला, राङगी ॱयो़न स्योकला श्याक्कीलाक। 34धेनी ग्यावुगी़ राङगी ॱये स्योकला सुङगीलाक, ‘ङी यापने झ्यीलाप थोप्था, खेक्या स्योक। जीक्तेन को़ने ॱहाला, खीकी क्षीला स्यामस्या ग्यासीगो लेन। 35घीझ्येरी ॱनाना ङा तोयी घाङला, खीकी ङाला शाये तेरजुङ। ङा कोमी घाङला, खीकी ङाला थुङये तेरजुङ। धेनी ङा ङो ॱमेस्येगीन मी च्यीक झ्येरीया, खीकी ङाला ॱनेचाङ ॱयारजुङ, 36ङा घो़न्ये मेती घाङला, खीकी ङाला घोलाक को़न्जुङ। धेनी ङा नी घाङला, खीकी ङाला दाक्पो ग्याप्जुङ। ङा चो़न्खाङदु हेती घाङला, खेक्या ङाला थुक्तु होजुङ।’
37“धेनी मी ढाङतेनक्याई खोला देरे ॱनेरी श्यी़गीलाक, ‘चोवो, हीकी खेराङला नाम टेटा धाङ कोम्गा थोजो, धेनी नाम हीकी खेराङला श्येये धाङ थुङये फी़जो? 38धेनी नाम खेराङला ङो ॱमेस्येगीन थोरी नाम ॱनेचाङ ॱयारजो धेनी घो़न्ये मेता नाम नाशा फी़जो? 39धेनी खेराङला नाम नेपा याङना चो़न्खाङला थोरी ज्यारु होजो?’ 40धेनी ग्यावुगी खुङक्याला लेन दे ॱनाङगीलाक, ‘ङा खेक्याला धेन्पाराङ ॱनाहीन, ङी पी़न देक्याने च्युङस्योक च्यीकला खेक्याई देरे झ्येहो़ना होदे खेक्याई ङाला झ्येवालाक।’
41“धेनी ग्यावुगी़ खोरी ॱयो़न स्योकगी मीक्याला देरे सुङगीलाक, ‘ॱमेमो फोक्पा खेक्या, धी़क धाङ खी़ भाङछेनक्याई क्षीला स्याम्दी श्याकश्या थामेगीन मेला, ङाने डारी सोङ। 42घीझ्येरी ॱनाना ङा तोयी घाङला, खीकी ङाला शामा ॱमातेरजुङ। ङा कोमी घाङला, खीकी ङाला थुङये ॱमातेरजुङ। 43ङा ङो ॱमेस्येगीन मी च्यीकला, खीकी ङाला ॱनेचाङ ॱमायारजुङ। ङा घो़न्ये मेती घाङला, खीकी ङाला घोलाक ॱमाक्यो़न्जुङ। ङा नेपा धाङ चो़न्खाङदु हेती घाङला, ख्ये ङाला थुक्तु मायोजुङ।’
44“खुङक्याई खोङला लेन ग्याप्ती ॱनागीलाक, ‘चोवो, हीकी खेराङला नाम टेपा धाङ कोम्पा धाङ ङो ॱमेस्येगीन धाङ घो़न्ये मेगीन धाङ नेपा धाङ चो़न्खाङदु थोजो, धेनी हीकी खेराङला श्याप्ची माश्युजो?’ 45धेनी खोङगी खुङक्याला लेन दे ॱनाङगीलाक, ‘ङा खेक्याला धेन्पाराङ ॱनाहीन, ङी पी़नक्याने च्युङस्योक च्यीकला खीकी देरे माझ्येवाला, खीकी होदे ङाला माझ्येवालाक।’ 46धेनी देरे मीक्याला थामेपे छेपा फोक्कीलाक हीना ढाङतेनक्यागो थामेपे छेसोकला डुगीलाक।”
Currently Selected:
मेथा 25: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
