मारकु 15
15
येशु पो़न्पो पीलातु दोङदु ठीक्पा
(मेथा २७:१-२,११-२६; लुका २३:१-५,१३-२५; योहान्ना १८:२८–१९:१६)
1ॱनाम लाङलुङ मेताला, क्षो़पो़न क्षेक्या धाङ गोठीक्या धाङ क्षो़ठीमगी ॱलोपो़नक्याई, छोक्दी़दु हो़गीन मी घीरीमुला ढो़ झ्येरी, येशुला कीक्ती ठीक्ती पो़न्पो पीलातुगी लागाला ची ग्याप्पालाक। 2पीलातुगी खोङबाला श्यी़वालाक, “ख्यो़ याहुदापा मीरीकगी ग्यावु हीने?”
येशुगी सुवालाक, “खेराङ राङगी सुजुङ।” 3धेनी क्षो़पो़न क्षेक्याई, खोङबाला क्यो़न्जुक ॱमीच्यीकी माङा कावालाक। 4धेनी पीलातुगी खोङबाला धाब्ले श्यी़वालाक, “मी देक्याई ख्यो़ला क्यो़न्जुक ॱमीच्यीकी माङा काली। ख्यो़ला लेन ग्याप्येला घीया मेते?” 5हीना येशुगी धाब्ले कालेन च्यीया ॱमानावा पीलातु ॱहालेवालाक।
6याहुदापाक्याई पेसाकगी धी़छेन देला, पीलातुगी मीमाङगी दो़पाला हो़गीन चो़न्पा च्यीकला ॱलो़ ताङगीन लुक्सो़ हो़तालाक। 7चो़न्खाङदु हो़गीन गेन्लोक झ्यीगीनक्याने, मी सेसा बाराब्बा ॱनागीन गेन्लोक झ्यीगीन मी च्यीया हो़तालाक। 8धेनी मीछोकगी पीलातुचारु जोम्दी, एम्मागी लुक्सो़ च्योक्रे खुङक्याई छीला ॱनाङरोनाङ ॱनेरी श्यी़वालाक। 9धेनी पीलातुगी खुङक्याला ढीवालाक, “खेक्याई क्षीला याहुदापागी ग्यावुगो ॱलो़ ताङगी़?” 10घीझ्येरी ॱनाना क्षो़पो़न क्षेक्याई येशुला ठादोक झ्येरी, खी़चारु ठीक्ती होवालाक ॱनेरी खोला स्येये हो़तालाक।
11हीना क्षो़पो़न क्षेक्याई येशुला मेन्दा, बाराब्बाला ॱलो़ तोङ ॱनो़ ॱनेरी मीक्याला टुक्पालाक। 12धेनी पीलातुगी याङदा ॱनेवालाक, “देरे हीन्ना, खे याहुदापाक्याई ग्यावु ॱनागीन, मी देला ङा घी झ्यीगु?”
13खुङक्याई फेरा ग्याप्ती, “खोला ग्याङस्यीङ खाला क्याङदी सो़।” ॱनेरी ॱनेवालाक।
14पीलातुगी खुङक्याला ॱनेवालाक, “घीझ्येरी? खी़ ले ङेन्पा घी झ्येदो?”
हीना खुङक्या ॱयोल्ले माङा फेरा ग्याप्ती ॱनेवालाक, “ग्याङस्यीङ खाला क्याङदी सो़।” 15धेनी पीलातुगी मीछोकगी दो़पा काङयेला, बाराब्बाला ॱलो़ तावालाक धेनी येशुला ताजाक श्युरतु च्युक्ती, ग्याङस्यीङ खाला सेयेला रोमापा ॱमाक्मीक्याई लागाला ची ग्याप्पालाक।
ॱमाक्मीक्याई येशुला क्षाले तावा
(मेथा २७:२७-३१; योहान्ना १९:२-३)
16धेनी ॱमाक्मीक्याई येशुला पो़न्पो पीलातुगी, फोडाङगी घोरादु ठीक्ती ॱमाक्पुङ घीरीला रुप्पालाक। 17धेनी खुङक्याई खोङबाला नाशा ग्यामुक च्यीक को़न्बालाक धेनी छेम्मागी चो़पो़न च्यीक शो़री, खोङबागी उला को़न्बालाक। 18धेनी “याहुदापाक्याई ग्यावुला क्षाक छालो” ॱनेरी, खुङक्याई केक ग्याप्पालाक। 19खुङक्याई खोङबागी उला भेक्योक श्युरती, खोङबाला छीमाक तोरपालाक। धेनी पी़मु साला चुक्ती खोङबाला क्षाक छावालाक। 20येशुला ॱङे चासारती खोङबागी नाशा ग्यामुकगो स्यी़री, खोङबाराङगी नाशागो को़न्बालाक। धेनी खुङक्याई खोङबाला ग्याङस्यीङदु क्याङयेला फीला ठीक्पालाक।
येशु ग्याङस्यीङदु सेपा
(मेथा २७:३२-४४; लुका २३:२६-४३; योहान्ना १९:१७-२७)
21धेनी फीला डी़ घाङला, आलेक्जेन्डार धाङ रुफुस ॱनागीन पी़न ॱङीगी आकी, सीमोन ॱनागीन कुरेनेपा खोरी युने हुङगीनगो ॱमाक्मीक्याला थुक्पालाक। धेनी खोला येशुगी ग्याङस्यीङगो उजुक ग्याप्ती खेरतु च्युक्पालाक। 22धेनी खुङक्याई येशुला गोलगोथा ॱनागीन साज्यारु ठीक्ती होवालाक। (गोलगोथा ॱनाना गोरी़गी साज्या ॱनालाक।) 23खुङक्याई मुररा#१५:२३ दे ॱमेन दे घुन्डुमगी क्षाङमुला ॱरेरी थुङना ग्याङस्यीङदु क्याङक्यागी नागीनगो ढाक्तु च्युक्वालाक। ॱनागीन ॱमेन घुन्डुमगी क्षाङमुला ॱरेरी तेरपालाक हीना खोङबागी माश्येबालाक। 24ॱमाक्मीक्याई खोङबाला शेर ग्याप्ती, ग्याङस्यीङ खाला क्याङबालाक धेनी खोङबागी नाशा सु-सुला घी थोप्टु ॱनेरी, गेन ग्याप्ती घो़वालाक।
25खुङक्याई येशुला शेर ग्याप्ती ग्याङस्यीङदु क्याङी घाङला, ॱङारोक छुची घुवा लाक। 26धेनी “याहुदापाक्याई ग्यावु” ॱनेरी ङेक्यो़नगी यीक च्यीक ढीक्ती, ग्याङस्यीङगी गोरु ताक्ती श्याक्पालाक। 27खुङक्याई खोङबामुला झ्याक्पा ॱङी, च्यीकला खोङबागी ये स्योक धाङ च्यीकला ॱयो़नला क्याङबालाक। 28[क्षो़ठीमगी का देरे झ्येरी डुप्पालाक, “खोङबा नी, झ्याक्पाक्यामुला चीवालाक।”]#यस्याया ५३:१२
29होदेने डुगीनक्याई राङ-राङगी गोवा ॱयुक्ती, खोङबाला ॱमेटा तावालाक, “क्षो़खाङ स्यीक्ती श्याक्मु सुमला चीक्ये ॱनागीन ख्यो़, 30धा राङला क्योप धेनी ग्याङस्यीङने माला भाप्ती स्योक।” 31होझ्येरीराङ क्षो़पो़न क्षेक्याई क्षो़ठीमगी ॱलोपो़नक्यामुला, खोङबाला क्षाले झ्येरी च्यीकगी च्यीकला ॱनेवालाक, “खी़ मी श्येम्माक्याला क्योप्पालाक हीना राङला क्योप ॱमीथुक्वालाक। 32ईस्राएलगी ग्यावु, मास्यीका, हीकी थोरी धेपा झ्यीयेला ख्यो़राङ धान्दा ग्याङस्यीङने माला भाप्ती स्योक।” खोङबामुला ग्याङस्यीङ खाला क्याङक्या, झ्याक्पा ॱङीउगीया खोङबाला ॱमेटा पाप्पालाक।
येशु ढोङपा
(मेथा २७:४५-५६; लुका २३:४४-४९; योहान्ना १९:२८-३०)
33ङीङमो छुची च्युङङीने सुम्बा थुक्पे, साज्या घीरी मी़नाकगी तुम्बालाक। 34धेनी छुची सुम्बाला, येशुगी सुङकेक क्षेला सुवालाक, “ईलोई, ईलोई, लामा साबाक्थानी?” दी दो़न्दाकगो, “ङी को़न्क्षोक, ङी को़न्क्षोक, खेकी ङाला घीझ्येरी पाङा हीनो?” 35धेनी ङ्येडामला हो़गीन, मी रीङगागी दे घोरती ॱनेवालाक, “ङेन्दाङ, खो नी ॱङो़नस्येखेन एलीयाला भो़ली।” 36मी च्यीक भाङ तारी सोरी, ॱरीङबा च्यीक घुन्डुमगी छ्याङ क्युरमु नाङदु बारी, ग्युक्पागी गोवाला क्यो़न्दी खोङबाला थुङदु च्युक्ती ॱनेवालाक, “घुक च्यीक, खोला माला पाप्येला एलीया फेप्यी ताउ।” 37धेनी येशुगी सुङकेक क्षे तो़न्दी उप ताङा जेपालाक।
38धेनी क्षो़खाङगी योल्वागो गोने गाप थुक्पे, दुबु ॱङीला रावालाक। 39येशुगी डुङदु लारी धेता ग्यापो़नगी, खोङबा सुङकेक क्षे तो़न्दी उप ताङगीनगो थोरी ॱनेवालाक, “दे मी दे नी, ॱङोन्नेराङ को़न्क्षोकगी से लाक।” 40भोमो रीङगा थाक्रीङाने तेरी धे हो़तालाक। होदेक्याने च्यीक मीरीयाम माक्दालीनी धाङ च्यीक याकोब च्युङा धाङ योसेफगी आमा मीरीयाम धाङ सालोमे लाक। 41येशु गालीलदु श्युक्यी घाङला, देक्या खोङबागी स्याबाला डारी खोङबागी श्याप्ची श्युलालाक। धेनी खोङबामुला येरुसालेमदु होवा, भोमो श्येम्मा ॱमीच्यीकी माङा होदुरु हो़तालाक।
येशुगी कुफुङ धी़ठोदु चुक्पा
(मेथा २७:५७-६१; लुका २३:५०-५६; योहान्ना १९:३८-४२)
42होदे ङीमागी घोमुगो, ङासुगीन ङीमागी डाढीक झ्यीगीन ङीमा एम्मागो लाक। 43पो़न्रीक छोक्पागी मीङ हो़गीन, केटाक्क्षे छोक्मी धाङ को़न्क्षोकगी ग्यासीला घुक्ती धेता, योसेफ ॱनागीन आरीमाथीया ग्याजागी मी च्यीक हो़तालाक। खो ॱङीङक्षे शो़री पीलातुगी दोङदु सोरी, येशुगी कुफुङ ॱनाङरोनाङ ॱनेरी श्यी़वालाक।
44पीलातुगी येशु ढोङसालाक ॱनेरी घोरती ॱहालेरी, ग्यापो़नला भो़वालाक। धेनी खोङबा ढोसाले ॱनेरी लाब ढीवालाक। 45ग्यापो़नने येशु ढोङसागीन लाब दे क्षा झ्युरी, खी़ योसेफला खोङबागी कुफुङ खेरयेला छोक्छेन ॱनावालाक। 46धेनी योसेफगी फुङबु टीगीन रे च्यीक ङ्यो़री, येशुगी कुफुङ माला पाप्ती रेगी़ टीवालाक। धेनी डाकला को़का धी़ठो च्यीक नाङदु श्याक्पालाक। धेनी धोगोङ क्षे च्यीक रीरी, होदेगी घोगु काक्पालाक। 47मीरीयाम माक्दालीनी धाङ योसेफगी आमा मीरीयामगी, येशुगी कुफुङ श्याक्कीन साजागो थोवालाक।
Currently Selected:
मारकु 15: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
