Chenesis 35
35
1Atuk o̱ Chitokaka yʋt Chekob a̱, Wakayʋt Behlel a̱ ish ona cha, yʋmmak o̱ ish ʋttashke: micha yʋmmak o̱ chitibapishi Esau itikba ya̱ ish maleli ma: Chitokaka yʋt a chi̱ haiaka tok a̱ alta ya̱ ish im ai ikbashke, im achi tok.
2Yohmi ma Chekob ʋt in chuka achʋfa ya̱, micha api̱ha tuk moma ka̱, Naholbʋt toba puta hʋch itin takla a̱sha ka̱ hʋsh kanchashke; micha hʋchi kashofa cha, nafohka inla ishit hʋsh fohkashke.
3Micha wakayʋt Behlel ak o̱ il iashke; mikma yʋmmak o̱ Chitokaka ya̱ yʋmmak osh a sʋlbʋsha nitak ma a̱ haponaklo tok, micha kanima a̱ya li ma sʋbafoyuka tuk a̱ alta im ai ikbi lashke, im achi tok.
4Mihma naholbʋt toba puta ibbak fo̱ka tuk ʋt, micha haksobish takali haksobish in takohma̱ya tuk ʋt Chekob a̱ okla ima tok: mihma Chekob ʋt baiyi ʋt Shekem bili̱ka hikia tuk o̱ nutaka luhmi tok.
5Micha bina ha̱ kanʋllichi cha ilhkoli tok: mihma tʋmaha holihta apakfoyupʋt aiasha ka̱ Chitokaka i̱ nukshopa kʋt onʋtonla hatuk o̱, Chekob ushi ʋhleha ha̱ ik hliolo tok.
6Micha Chekob, micha okla moma apehʋt a̱ya tuk ʋt Lus, (yʋmmʋt Behlel) Kenan yakni talaia ka̱ ona tok.
7Micha yʋmma alta ai ikbi mʋt, yʋmma El‐behlel hochifo tok: itibapishi Esau itikba ya̱ i̱ maleli ma, Chitokaka yʋt yʋmmak o̱ ai i̱ haiaka tok oka.
8Atuk o̱ Lebekah ya̱ sholi atok Tebolah ʋt illi cha, Behlel nutaka baiyi hikia ho̱ nutaka yo̱ hollohpi tok: mihma hohchifo ha̱ Baiyi a yaiya, achi tok.
9Atuk o̱ Chekob ʋt Patan‐alam a̱ kohchʋt minti ha ma, Chitokaka yʋt anonti i̱ haiaka cha, yukpali tok.
10Micha Chitokaka yʋt, Chi hohchifo hʋt, Chekob oke; himak pilla ma chi hohchifo ha̱ Chekob acha he keyu, amba Islael chi hohchifa hi oke, im achi tok; micha hohchifo ha̱ Islael, achi tok.
11Micha Chitokaka yʋt, Ʋno ak osh Chitokaka Nan isht im aia̱hli im ataha he iksho sia hoke: wayʋt ish apaknashke; oklushi, micha oklushi kanohmi kia chi atoba hi oke, micha mi̱ko puta kʋt chi haknip a̱ a kohcha hi oke.
12Micha yakni ya̱ Eblaham micha Aisak ima li tok ʋt chishno ak o̱ chima la chi̱ hoke; micha chim isht atiaka et chiakaiya kak o̱ yakni ya̱ ima la hi oke, im achi tok.
13Mihmʋt Chitokaka yʋt ai im anumpulit hikia tuk ʋt ai i̱ filʋmmit ʋba ia tok.
14Mihma Chekob ʋt ai im anumpuli tuk a̱ nan isht‐ithana, nan isht‐ithana tʋli yo̱ hilechi tok: micha nan‐ishko im issa yo̱ on hlatʋbli mʋt, bila yo̱ on hlatʋbli tok.
15Micha Chitokaka yʋt ai im anumpuli tuk yʋmma hohchifo ha̱ Chekob ʋt Behlel, achi tok.
16Mihma Behlel a̱ a̱shʋt bina ha̱ kanʋllichi cha, ilhkoli tok: atuk o̱ Eflalh a̱ ona chi̱ ka̱ ik hopako tok; atuk o̱ Lechel ʋt ʋlla esha chi̱ hosh nukhʋmmi cha i̱ palʋmmi fehna tok.
17Atuk osh yakohmi tok ʋlla esha chi̱ hosh i̱ palʋmmi fehna ma, ʋlleshi ka̱ apelʋchi ohoyo hʋt, Chi nukshopa ná, ilʋppak kia ʋlla nakni yo̱ ish esha chi̱ hoke, im achi tok.
18Atuk osh yakohmi tok im ilhfiopak ʋt kohchʋt ia mʋt, (illi tok okʋt,) hohchifo ha̱ Benoni achi tok: yohmi kia i̱ki ʋto Benchamin hochifo tok.
19Mihma Lechel ʋt illi cha, Eflalh hina takla, yʋmmʋt Behlehem ak o̱ a hollohpi tok.
20Mihma Chekob ʋt im ahollohpi paknaka ya̱ nan isht‐ithana hilechi tok: yʋmmʋt Lechel im ahollohpi nan isht‐ithana atok osh himak nitak a̱ hikia hoke.
21Mihma Islael ʋt bina ha̱ kanʋllichi cha, a̱ya mʋt Eta holihta chaha ai atoni ya̱ misha yo̱ im ʋlhtipo ya̱ ont a hilechi tok.
22Atuk o̱ yakohmi tok, Islael ʋt yakni yʋmma anta ma, Luben ʋt ia cha, i̱ki im itaiena Bilhah ya̱ iba nusi tok: atuk o̱ Islael ʋt haklo tok. Yohmi ka̱ Chekob ushi ʋhleha hʋt auahtuklo tok.
23Leah ushi ʋhleha hʋt Luben Chekob ushi ʋttahpi, micha Simeon, micha Lefai, micha Chutah, micha Issaka, micha Sebulun ak atok:
24Lechel ushi ʋhleha hʋt Chosef, micha Benchamin ak atok.
25Mikma Lechel in tishu ohoyo Bilhah ya̱ ushi tuklo kʋt Tan, micha Naftali ak atok.
26Mikma Leah in tishu ohoyo Silpah ya̱ ushi tuklo kʋt Kat, micha Ashe ak atok. Ilʋppa puta kak osh Chekob ushi ʋhleha hosh Patan‐alam a̱ ai im asha tok.
27Mihma Chekob ʋt i̱ki Aisak ʋt aiʋtta Mamle, tʋmaha holihta Abah (yʋmmʋt Heblon oke,) yʋmmak o̱ Eblaham, micha Aisak ʋt ai a̱shwa ya̱tuk o̱ ona tok.
28Mihma Aisak i̱ nitak puta kʋt afʋmmi tahlepa achʋfa cha pokoli untuchina tok.
29Atuk o̱ Aisak ʋt sipokni, micha nitak la̱wa hosh fiopissʋt illi cha, im okla ha̱ iba holhtina tok: mihma ushi Esau, micha Chekob ʋt hohpit okla tok.
Currently Selected:
Chenesis 35: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913
