Luk 9

Chisʋs ʋt im anumpeshi auah‐tuklo ka ʋbanumpa isht anumpula chi̱ micha nana kʋt isht ahullo fehna kia yʋmihchi a puta hosh im ai ʋlhpesa hatuk ʋt otʋnincha chi̱ ho̱, pit tihleli, 1, 7 Helot ʋt, Chisʋs a̱ pisa bʋnna. 17 Chisʋs ʋt pʋska lumbo tahlapi, micha nʋni chipunta tuklo aiena tuk a, hatak tahlepa sipokni tahlapi ka impʋchi: 18 micha ilapa kʋna hak o̱ okla im ahoba hatuk a̱ ponaklo tok; 22 micha ilap ʋt illi tuk osh, anonti falamʋt tana he aiena kʋt tikbanli anoli: 23 yohmi mʋt nan im ai ithʋna ʋhleha ilapa holitobli pulla kʋt, ile kaiyancha he, micha na‐palʋmmi puta ma pisa chi̱ aiena kʋt im ʋlhtaha hi a̱, i̱ miha. 28 Chisʋs ʋt ʋba pit anumpula chi̱ hosh nʋnih chaha pit oiya atuk osh, ʋba pit anumpulit ahanta moma hosh pisa ka inlʋt toba. 37 Ʋlla yosh nan‐isht‐ahullo okpulo isht abeka tuk a Chisʋs ʋt hlakofichi: 43 mihmʋt anonti ilap i̱ palʋmmit illa hi ʋt tikbanli anoli; 46 nan im ai ithʋna ʋhleha hʋt ilap na‐fehna bʋnna im anukfila puta ka im oktʋbli: 51 Sa malia okla hʋt Chisʋs a̱ ik aiokpacho kʋt okla illit taha chi̱ ka, Chemis, Chan, lta‐tuklo kʋt ahni ma, Chisʋs ʋt nan isht i̱ miha; 57 hatak kaniohmi kʋt chu̱kʋsh a̱ mominchit isht im antia he keyu kʋt a̱sha hatuk o̱, nan i̱ miha.

1Yʋmohmi mʋt ilapo nan im ai ithʋna ʋhleha auah‐tuklo kash hoyot itahobi mʋt, nan‐isht‐ahullo okpulo puta imaiyʋt, mikmʋt abeka ilaiyuka puta ma hlakofihincha chi̱ ka, nan aia̱hlika ya̱ isht im apesa tok.

2Yohmi mʋt, Chihowa apehlichika yoka isht anumpohonlit, anonti abeka puta ma hlakofihincha chi̱ mak o̱ pit tihleli tok.

3Yohmi mʋt, Itʋnowʋt hʋsh a̱ya kʋt tʋbi kia, mikmʋt shukcha, micha pʋska, anonti tʋli holisso, ilefoka lumbo mʋt tuklo aiyuka, peh nanasi kia hʋch ik i̱sho kashke.

4Mikmʋt chuka nana ho̱ ont hʋsh chukowakmʋt, yʋmmak o̱ hʋsh aha̱shwa tuk osh, kohchʋt hʋsh iashke.

5Micha kʋna kia ik hʋchi aiokpachokma, tʋmaha yʋmma a kohchʋt hʋsh iakmʋt, nan‐isht im atokowa mak o̱ hituk tohbi ka hʋch iyi ya̱ tahtulit hʋsh a kanchashke, im achi tok.

6Mihma okla iʋt tʋmaha puta ka hlopullit a̱yʋt, ʋbanumpa isht anumpohonlit, kanima moma ka abeka a hlakofichit itʋnowa tok.

7-8Helot mi̱ko ash ot, yʋmmʋt nana puta ai yʋmihchi ka haklo tok; yohmi mʋt kanimi kʋt, Chan ak osh illi tuk ʋt falamʋt tani tuk, achi ma; anonti kanimi kʋt, Elias ak osh ant haiaka, achi: mihma inlaka mʋt hopaii ʋhleha tikba ya tok ak osh achʋfʋt falamʋt tani hoke, achi hoka, katiohmi ahnit ik im ʋlhpiesot im anukfila tok.

9Mihmʋt Helot ash ot Chan ano noshkoba ha̱ tʋbli li chamo: amba na yakohmi puta a haha̱klo li ka yʋmmak osh kʋta hoh cho? achi tok. Mihmʋt yʋmmak ash pisa bʋnna tok.

10Mihma ʋbanumpeshi ʋhleha hash ot falamʋt ai ona mʋt, nana ai yʋmihchi tuk ʋt mominchit okla im anoli tok. Mihma yʋmmak ash ot pehlinchit il a lumʋt, naksika tʋmaha hohchifo Betsaita ai i̱ bili̱ka yakni haiaka yo̱ ia tok.

11Mihma okla hʋt akostininchi mʋt, yʋmmak ash o̱ pit iakaiya tok; mihma yʋmmak ash ot im aiokpahanchit, Chihowa apehlichika isht im anumpohonlit, yʋmmak okʋt hlakofi bʋnna hokʋno hlakofihinchi tok.

12Atuk o̱ nitak ash ot ont shohbit ma̱ha̱ya ma, auah‐tuklo kash ot ai ʋlʋt, Yakni haiaka yo̱ il aiasha hoka, okla laua ya̱ ish in tohno na ilhkolit tʋmaha puta, micha a kocha chuka hiohli yakni auet a bili̱ka fullota aiena ka ont a nusit, ilhpak ma ahayuchit ma̱yashke, im achi tok.

13Yohmi kia yʋmmak ash ot, Impa oh ipetá, im achi tok. Yohmi ma, Pʋska tahlapi, mikmʋt nʋni tuklo aiena misha keyu hosh pin chi̱yʋshke; kanima yo̱ iʋt okla moma ilʋppa ilhpak a̱ kil in chumpo hokmʋt, okla achi tok.

14Yohmi ka hatak ʋt tahlepa sipokni tahlapi foka ha tok. Yohmi ma nan im ai ithʋna ʋhleha hash o̱, Pokoli tahlapi aiyukʋt ia ho̱ ho binohlichí, im achi tok.

15Yohmi ma yʋmihchit, mominchit okla binohlichi tok.

16Yohmi ma yʋmmak ash ot pʋska tahlapi, micha nʋni tuklo aiena kash o̱ ishi cha, pit ʋba chakalit aiokpʋchi cha, tushahlichi mʋt, okla laua ya̱ in talohla chi̱ ho̱, nan im ai ithʋna ʋhleha hash pit ima tok.

17Mihma okla impʋt momʋt kaiya tok; mihma okla im atampa tuk a̱, boshulli yʋt kishi auah‐tuklo ho̱ okla aiowa tok.

18Atuk o̱ yakohmi tok: nan im ai ithʋna ʋhleha ak illa hosh api̱ha ho̱ antʋt, ʋba pit anumpuli tok: atuk osh yʋmmak ash o̱ i̱ ponaklot, Okla hʋto ʋno ʋt kʋta sia ho̱ achi ho̱? achi tok.

19Yohmi ma afalaminchi mʋt, Chan Ba̱ptist; amba kanimi kʋto, Elias ak o̱ achi: mikma inlaka yʋto, Hopaii ʋhleha ti̱kba ya tok ak osh achʋfʋt falamʋt tani hoke, okla achishke, achi tok.

20Amba, Hʋchishno ʋto ʋno ʋt kʋta sia ho̱ hʋsh achi ho̱? im achi ma, Pita yʋt afalaminchit, Chihowa i̱ Klaist á, achi tok.

21Yohmi ma yʋmma hatak nana kia okla ik im anolo ka chi̱ ka, achukmalit kʋllochit i̱ miha mʋt,

22Hatak Ushi yokʋt nan isht ai ilbʋsha kʋt in laua chi̱, yohmikmʋt hochitoka ʋhleha, micha na holitompa isht a̱sha pehlichi ʋhleha, mikmʋt na holissochi puta aiena mʋt ik i̱ yimmot ik aiokpachot ʋbi tuk ma, nitak ont atuchinakma falamʋt tana hi oke, achi tok.

23Yohmi mʋt mominchit i̱ miha kʋt, Kʋna hosh siakaiya he, ahni hok mʋt, ilapo yʋt ik ile holitoblo hosh nitak moma ka im iti‐taiyukhʋna atuk ma ieshi hosh, ʋno a̱ siakaiyashke.

24Kʋna kia ilap im ilhfiopak a̱ okchalinchi bʋnna hokmʋt, i̱ kʋnia hi oka; amba kʋna hosh ʋno pulla hatuk mak o̱ im ilhfiopak ʋt isht i̱ kʋnia hokmʋt, mihi yosh il im okchalincha hi oke.

25Hatak ʋt yakni a̱ il a mominchit ieshi hosh, anonti ilapo fehna yash il okpʋnichit il issikkopalit kaiyanchi hokmʋto, nanta ho̱ isht ilaiyukpa hinla cho?

26Kʋna hosh ʋno, micha ʋm anumpa puta aiena ka i̱ hofahya tukma, mihi yo̱ Hatak Ushi ʋt ilapo, mikmʋt I̱ki, micha enchil hochukma ʋhleha a puta nan‐isht aholitopa ka il aieshit a̱yʋt ʋlakmʋt, i hofahya hi oke.

27Yohmi kia Chihowa apehlichika ya̱ pisa ha keyuk mʋt, illa chi̱ keyu kʋt ilʋppa kanimi mʋt hiohma̱ya hoke: a̱hli mak o̱ hʋchim anoli lishke, achi tok.

28Ilʋppa puta ka ahanchi tuk ash nitak ont isht untuchina foka ma, Pita, micha Chan, mikmʋt Chemis aiena ka pehlichi cha, nʋnih chaha yo̱ ʋba pit anumpula chi̱ hosh ia tok.

29Atuk osh ʋba pit anumpuli ma, nashuka yʋt inlʋt toba ma, i̱ na‐fohka yʋt tohbit shohmalili tok.

30Yohmi ma hatak tuklo kʋt, yʋmmʋt Moses, micha Elias ita‐tuklo mak osh yʋmmak ash ant im anumpulit okla tok.

31Yʋmmak okʋt nan‐isht a holitopa a̱hli ka il aieshi hosh ant otaiyanit okla cha, yʋmmak okʋt Chelusalem a̱ ai illa hi a̱, isht anumpohonlit okla tok.

32Yohmi kia Pita, micha inlaka aiena yʋmma apehʋt a̱ya tuk ash ot nosilhha fehna tok: atuk osh okla ont okchʋt taha mʋt, isht‐a holitopaka yash, micha hatak tuklo kʋt apehʋt hieli tuk ash aiena ka okla pisa tok.

33Atuk o̱ yakohmi tok; yʋmmak ash ot ai i̱ filʋmmit tamoʋt okla ma, Pita yash osh Chisʋs ash, Pi̱ shahli ma! ilʋppa e ma̱ya kʋt pim achukmʋshke: yohmi ka ʋlhtipo tuchina ka il ikbashke, achʋfa kʋt chimmi hokma, anonti achʋfʋt Moses ak o̱ immi hokma, anonti achʋfa kʋto Elias ak o̱ immi hashke, achi tok: yʋmmak o̱ miha li, ahni keyu hosh:

34Yʋmmak ash ot yakohmichit anumpohonli moma na hoshonti a̱ya kʋt, ant o̱ hoshontikachi tok; yohmi ma hoshonti anu̱kaka ya̱ pit chukowʋt ia kʋt, okla nukshopa tok.

35Yohmi ma hoshonti anu̱kaka ya̱ auet ai anumpa kʋt, Ilʋppak osh Sʋso a̱ holitopa mak oke, hʋsh i̱ haponaklashe, achi tok.

36Atuk o̱ anumpa hash ot ont taha ma, Chisʋs ak illa hosh hiki̱a na okla pisa tok. Yʋmohmi ma nana yakohmi kash okla nana ik achot, nana ho̱ pi̱sa tuk ʋt achʋfonʋchi mʋt hatak nana kia nitak yʋmma foka ka ik im anolo beka tok.

37Atuk o̱ yakohmi tok: ont onna ma nʋnih hash okla a̱sht akowʋt minti ma, okla la̱wa kʋt ont afama tok.

38Yohmi ma okla ha̱ takla a̱ya tuk ʋt hatak achʋfʋt chitolit mihʋt, Nan‐ithʋnanchi ma! sʋso ha̱ ish pisakbano chim ahni lishke, ʋm ʋlla yʋt yʋmmak bano hatuk oke.

39Yohmi ho̱ shilombish okpulo yʋt ishikma, ashali̱ka tahpahanla hoke; mikmʋt haiochichechit itukpokpokihinchi beka hoke: yohmi kʋt kaniohmit i̱ filʋmma he keyu chohmit, haknip litolit hotopahanlishke.

40Yohmi ho̱ na chim ai ithʋna ʋhleha hak o̱ yʋmma kohchicha hinla ka, im asilhha li tuk ak o̱, okla yʋmihcha he keyu ketuk oke, achi tok.

41Mihma Chisʋs ash ot afalaminchi mʋt, Na yimmi iksho, micha nan‐a̱hli ai i̱ shanaia fehna okla hʋchia ma! hʋch iba takla ahantʋt, nana ka isht ak ahno ho̱ katiohmi foka chi̱ cho? Chiso ha̱ ilʋppa ishit mintí.

42Mihma ishit minti hosh a̱ya ma, nan‐isht‐ahullo okpulo yash ot aka pila cha, haiochichechi tok. Mihma Chisʋs ʋt nan‐isht ahullo okpulo yash im alʋmmi cha, ʋlla yash hlakofichit, i̱ki ibbak ash falaminchit fohki tok.

43Yohmi ma Chihowa nan isht im aia̱hli chinto fehna ka momʋt okla isht nukhlakancha tok. Yohmi kʋt nana ka Chisʋs ʋt ai yʋmihchi tuk puta kash momʋt, okokko! okla aiahnit ma̱ya ta̱kla ma, yʋmmak ash osh ilap nan im ai ithʋna ʋhleha hash,

44Anumpa ilʋppa puta kʋt hʋchi haksobish atuk ma ik a foho̱ká, hʋsh ahnashke; Hatak Ushi yokʋt hatak puta ibbak a̱ i̱ foyuka hi oke.

45Yohmi kia anumpa ilʋppa okla ik akostinincho ki tok: mihma na miha kash ik im ai otano; yohmi hoka yʋmmak ash okla ik ai ithaiyano ki tok: mihmʋt anumpa yʋmmak ash im asilhhʋchi okla nukwia tok.

46Yohmi ma, Katima kak osh holitopa kʋt moma i̱ shahla hinla hoh chishba? ahnit okla isht im ai anukfilʋt ma̱ya tok.

47Mihma okla chu̱kʋsh nan im anukfila ha̱ Chisʋs ʋt im akostininchi mʋt, ʋlla yo̱ ishit, il a bili̱kʋchit binilichi tok.

48Mihmʋt, Kʋna hosh ʋlla ilʋppa ʋmmi hohchifo ho̱ ahninchi hokʋto, ʋno ak o̱ si ahninchi hoke: mikmʋt kʋna hosh ʋno a̱ si ahninchi hokmʋt, yʋmmʋt auet sa kanchi tok ma pit ahninchi hoke: kanima hosh moma ik a lauwo kʋt hʋchi takla ahanta hokʋto, mihi yosh moma i̱ shahla hi oke, im achi tok.

49Mihma Chan ʋt afalaminchi mʋt, Pi̱ shahli ma! achʋfa hosh chi̱ hohchifo ha̱ nan‐isht‐ahullo okpulo puta ka ishit kocha weli hosh anta ho̱ e pi̱sa tuk: yohmi kia yʋmmak okʋt ik piba fohko hatuk o̱, il im alʋmmi kano, achi tok.

50Mihma Chisʋs ash ot, Hʋch ik im alammo kashke: kʋna hosh pi̱ sanalit anta keyu hokʋto, pibai achʋfa hoke.

51Atuk o̱ yakohmi tok: yʋmmak ash o̱ aiokpanchit ʋba ya̱ isht ia chi̱ nitak ʋt ont ʋlhpiesa hatuk o̱, Chelusalem a̱ ia chi̱ kʋt ai anukfoyukʋt nashuka ya̱ pit filimmi tok.

52Mihmʋt nan ont im atahla chi̱ ho, anumpa shali ʋhleha ha̱ tikba pit tihleli tok: yohmi na okla iʋt Samalitan okla in tʋmahushi o̱ ont chukowa tok.

53Yohmi ma yʋmmak okʋt Chelusalem a̱ ia ho̱ fehna nashuka yatuk o̱, okla ik aiokpacho ki tok.

54Yohmi na nan im ai ithʋna Chemis, micha Chan ita tuklo kʋt yakomi ka pisa mʋt, Chitokaka ma! Elias ʋt yʋmihchi tok akinli ho̱ chohmichit, pishno mʋt luak ʋba minti kʋt aka itula cha, okla ilʋppa hushmit tahla chi̱ ka il im apesa hinla ka, ish ahni cho? achi tok.

55Mihma yʋmmak ash ot filemʋt im alʋmmi mʋt, Hʋchi chu̱kʋsh ai im anukfila a kaniohmi hosh hʋsh a̱ya kʋt hʋch ik ithanoshke.

56Hatak Ushi ʋt hatak puta ka ʋba chi̱ hosh a̱ya ha tok keyu, amba okchalincha chi̱ ha tok oke, achi tok. Mihma ilhkolit tʋmahushi inla yo̱ ona tok.

57Atuk o̱ yakohmi tok; ia hosh okla itʋnowa ma, takla ya̱ hatak achʋfʋt, Chitokaka ma! kanimak fehna chik a̱ya kia, ʋno ʋt chiakaiya la chi̱ hoke, im achi tok.

58Mihma Chisʋs ash ot, Chula puta kʋt chiluk ʋt im ai ashakma, ʋba hushi puta kʋt ʋlhpichik ʋt im a̱sha hoke: amba Hatak Ushi okʋto noshkobo ha̱ kanima a bohla hi ʋt ik im iiksho hoke, im achi tok.

59Mihmʋt inla yo̱, Is siakaiyashke, im achi tok. Yohmi kia yʋmmak ash ot, Chitokaka ma! ʋlhpesa, ʋm ahni na iʋt, a̱ki ak o̱ ti̱kba ont ak hohpi ha yosh; im achi tok.

60Mihma Chisʋs ash ot, Illi ak osh ilap bi̱ka illi yokʋno hohpashke: amba chishno ʋto iʋt, Chihowa apehlichika ya̱ isht ish anumpohonlashke, im achi tok.

61Mihma anonti inla mʋt, Chiakaiya la chi̱ mak oke; yohmi kia iʋt an chuka ma̱ya kak o̱ tikba ont aiokpʋchi la hi a̱, is sʋm ahnashke, achi tok.

62Mihma Chisʋs ash ot, Hatak nana kia yakni isht patafa ya̱ ibbak a̱ isht ishi ha yʋt, olbʋlaka a pit hopo̱koyo kʋt, Chihowa apehlichika ya̱ ahalaia he ʋlhpesa keyu hoke, achi tok.

Currently Selected:

Luk 9: CHH

Highlight

Copy