मत्ती 12
12
ईसू आराम दिना कौ पिरभू है
(मरकुस 2:23–28; लूका 6:1–5)
1एक बार ईसू और वाके चेला यहुदियन के आराम के दिना खेतन ते हैके जाय रयो हतो वाके चेलान ने भूंक लगी तौ बिन्नें गेहूँ की कछू बाल तोड़ी और बिन्नें खायबे लग गये। 2जि देखकें फरीसीयन नें ईसू ते कही, “देख तेरे चेला बू काम कर रयेएं जो यहुदियन के आराम के दिना में करबौ हमारी व्यबस्था के बिरोध में है।”
3ईसू ने बिनते कही, “का तुम लोगन नें जि नांय पढौ कै जब दाऊद कूं और वाके संगियन कूं भूंख लगी हती, तब बानें का करौ हतो? 4बिन्नें तौ परमेस्वर के बड़े पिराथना घर में घुसकै भेंट की रोटी खाईं ऐसौ करबौ व्यबस्था के बिरोध में हतो। चौंकि व्यबस्था के अनुसार केवल यहुदी पुरोहितई खाय सकतै। 5का तुम लोगन नें व्यबस्था में जि नांय पढ़ौ, कै यहुदी पुरोहितई आराम के दिना में बड़े पिराथना घर में काम करके आराम के दिना कौ नियम तोड़तै तौऊं बिनें कोई दोसी नांय ठहराबत? 6पर य्हांपै बू खड़ौ है जो बड़े पिराथना घर तेऊ बड़ौ है। 7#मत्ती 9:13 ‘मैं चाहतूँ आदमी दया करे, पर मैं जि नांय चाहत कै बू बलिदान चढ़ाबै,’ अगर तुम जा बातै जान जाते तौ तुम बिन पै दोस ना लगाते जो निरदोस है। 8चौंकि मैं, ‘मनुस्य कौ बेटा’ यहुदियन के आराम के दिनां कौऊ पिरभू हूं।”
सूखे हात बारे आदमीं कूं ठीक करबौ
(मरकुस 3:1–6; लूका 6:6–11)
9म्हांते चलकें ईसू पिराथना घर में आयौ, 10म्हांपै बाय एक आदमी मिलौ जाकौ हात सूखौ भयौ हतौ। म्हांपै कछू लोगऊ हते, बिन्नें ईसू पै दोस लगायबे काजै बाते पूछी, “का आराम के दिना व्यबस्था के अनुसार काऊऐ चंगौ करबौ सही है?”
11 #
लूका 14:5
तब ईसू नें बिनते कही, “तुम मेंते ऐसौ को है जाकी एकई भेड़ होय और बू यहुदियन के आराम के दिन में गढ्ढे में गिर जाबे तौ का तुम बाय नांय निकारौगे? 12तौ फिर आदमी तौ भेड़ ते कहीं बढ़कै है, जामारै आराम के दिना भलौ करबौ व्यबस्था के अनुसार सही है।”
13तब ईसू नें बा आदमी ते कही, “अपनों हात आगे कूं बढा।” और बा आदमी नें अपनों हात आगे बढ़ायौ और बा आदमी कौ हात दूसरे हात की तरैह ते जैसौ पैहले हतो बैसौई ठीक है गयौ। 14फरीसियन्नें बाहर आयकें जि योजना बनाबे लगे कै हम जाय कैसै मारें।
परमेस्वर कौ चुनों भयौ सेबक
15ईसू बिनकी योजना समझ गयौ और बू म्हांते चल दियौ। पर एक बड़ी भीड ईसू के पीछे चल दई और बानें भौत ते बिमारन कूं चंगौ करौ। 16और बानें बिनें चेतायकै कही, “मेरे बारे में काऊ ते मत कहियों।” 17बानें जि जामारै करौ कै परमेस्वर की ओर ते बात बतायबे बारे यसायाह नें जो वचन कहौए बू पूरौ है जाय,
18“देखौ, जि मेरौ दास है जाकूं मैने चुनों है,
जि मेरौ प्यारौए, जाते मेरौ मन भौत खुस है।
मैं अपनी आतमा बापै डारूंगौ,
बू देस देस के लोगन कौ ईमानदारी ते न्याय करैगो।
19ना तौ बू लड़ेगौ ना बू ऊदम मचाबैगौ।
और गलियों में ना कोई वाकी अबाज सुनैगौ।
20बू झुके भये सकन्डेऐ नांय तोड़ेगौ,
ओर भुजते भये दीयाऐं नांय बुझाबैगौ।
जब तक बू आदमिन कौ ईमानदारी ते न्याय नांय कर देय बू काऊ कौ नांस नांय करैगौ।
21तब फिर सब देस के लोग बाई के नाम पै आसा रखेंगे।”
ईसू और बालजबुल
(मरकुस 3:20–30; लूका 11:14–23)
22तब कछू लोग एक आदमीऐ ईसू के जौरै लाये जामें दुस्ट आतमा हती बानें बाय अँन्धो और गूँगौ बनाए रखौ हतो। बा आदमी कूं ईसू नें चंगौ करौ जाते बू देखबे और बोलबे लगौ। 23जा चमत्कार कूं देखकै सबरे लोग चकित भये और कैहबे लगे, “का जि दाऊद कौ बन्सज है?”
24 #
मत्ती 9:34; 10:25 जब फरीसियन्नें जि सुनों तब बे कैहबे लगे, “जि तौ दुस्ट आतमांन कूं वाके मुखिया बालजबुल की सहायता ते निकारतै।”
25ईसू ने बिनके मन की बात जानकै फिर बिनते कही, “जा राज में दरार पर जाबै तौ बू कैसे टिकौ रैहबेगौ बू तौ खतमई है जाबेगौ। और जा नगर और कुल में फूट पर जाबे तौ बू उजड़ जाबैगौ। 26अगर सैतान सैतानईए निकार रयोए तौ बू अपनौई दुसमन बन रयोए। वाकौ राज कैसै सही सलामत रैहबैगौ? 27अगर मैं बालजबुल की सहायता ते दुस्ट आतमांन कूं निकार रयौऊं तौ तुमारे लोग कौन की मदद ते दुस्ट आतमांन कूं निकारतैं? जामारै बेई तुमारौ न्याय करिंगे। 28अगर मैं परमेस्वर की आतमा की मदद ते दुस्ट आतमान्नें निकारतूं तौ समझ लेओ कै परमेस्वर कौ राज तुमारे जौरै आ पौंहचौ है।
29“का कोई आदमी काऊ बलबान के घर में घुस के वाके माल कूं लूट सकै? जब तक कै बू बा बलबान कूं बांध नांय दैबै, तब बू वाके घर कूं लूट लैबैगौ।
30 #
मर 9:40
“जो मेरे संग नांय, बू मेरौ बिरोधी है। जो मेरे संग इकठ्ठौ नांय करत, बू बाय बिखेरतै। 31-32#लूका 12:10जो कोई आदमी मेरे यानी की ‘मनुस्य के बेटा’ के बिरोध में कैहबेगौ, वाकौ जि पाप तौ मांफ कर दियो जाबेगौ। पर जो कोई पबित्र आतमा के बारे में बुरौ कैहबेगौ, तौ वाकौ जि पाप न तौ जा लोक में और ना परलोक में मांफ करौ जाबैगौ। जामारै मैं तुमते कैहतूं, कै आदमी के सबरे पाप और बुराई मांफ करे जाबिंगे, पर जो आदमी पबित्र आतमा की बुराई करैगौ, तौ बू मांफ नांय करौ जाबैगौ।
फल ते पेड़ की पैहचान
(लूका 6:43–45)
33 #
मत्ती 7:20; लूका 6:44 “तुम लोग जानतेऔ के अच्छौ फल लैबे काजै तुमें अच्छौ पेड़ई लगानों चहिऐं। और बुरे पेड़ ते बुरौ फलई मिलतै चौंकि हर एक पेड़ अपने फलतेई जानों जातै। 34#मत्ती 3:7; 23:33; लूका 3:7; मत्ती 15:18; लूका 6:45अरे सांप के सपोलेओ! तुम बुरे हैकें अच्छी बात कैसे कर सकौ? चौंकि जो मन में भरौ रैहतै बेई मौंह पै आबतै। 35जो आदमी अच्छौ होगौ, बू अपने मन के भन्डार में ते अच्छी बात निकारैगौ। और बुरौ आदमी अपने मन में ते बुरीई बात निकारैगौ। 36मैं तुमते कैह रयौऊं, न्याय के दिनां में, हर एक आदमी कूं अपनी कही भई हर एक निकम्मी बात कौ लेखा दैनों परैगौ। 37चौंकि तू अपनी इन बातन की बजैह ते दोसी और इनई बातन के बजैह ते निरदोस ठहरायौ जाबैगौ।”
लोग चिन्न माँगतैं
(मरकुस 8:11–12; लूका 11:29–32)
38 #
मत्ती 16:1; मर 8:11; लूका 11:16 फरीसी और सास्त्रन कूं सिखाबे बारेन्नें ईसू ते कही, “गुरू हम तोते एक चिन्न देखबौ चांहतें।”
39 #
मत्ती 16:4; मर 8:12 तब ईसू नें बिनते कही, “जा युग की बुरी और कुकर्म करबे बारी पीढ़ी के लोग चिन्न माँगतैं। पर मैं तुमते कैहतूं परमेस्वर की ओर ते बात बतायबे बारे योना की बातन नें छोड़कै और कोई दूसरौ चिन्न नांय दिखायौ जाबैगौ। 40जा तरैह ते योना तीन दिन और तीन रात तक बड़ी मछली के पेट में रहौ, जाई तरैह ते मैं, ‘मनुस्य कौ बेटाऊ’ धरती के भीतर तीन दिन और तीन रात तक रहूंगौ। 41नीनबे के लोग न्याय के दिना जा पीढ़ी के लोगन के संग उठकै बिनईऐं दोसी ठहराबिंगे। चौंकि बिन्नें योना कौ पिरचार सुनकें अपने पापन ते मन फिरायो हतो, य्हांपै बू है जो योना तेऊ महान है। 42दछिन की रानी न्याय के दिना जा पीढ़ी के लोगन के संग उठकै, बिनईऐं दोसी ठहराबैगी चौंकि बू सुलेमान कौ ग्यान सुनिबे काजै धरती कै छोर ते आई है पर जो य्हांपै है बू तौ सुलेमान तेऊ जादा महान है।
दुस्ट आतमा कौ लौटकै आयबौ
(लूका 11:24–26)
43“जब दुस्ट आतमा आदमी में ते निकर जाबै तौ बू सूखी जगैहन में भटकत रैहते और जब बाय आराम करबे कूं जगैह नांय मिलत, 44तौ बू कैहतै, ‘मैं अपने बा घर में जाऊँ जामें ते निकरी हती’ और जब बू बामें जातै तौ घर कूं पैहले ते साफ सुथरौ और सजौ सजायौ पाबतै। 45और बू अपने संग अपने तेऊ बुरी सात आतमांन्नें संग लैकै आवतै और वाके भीतर घुस जातै और बा आदमी कै भीतर रैहबे लगतै, और बा आदमी की दसा पैहले तेऊ और जादा बुरी कर दैतै। जा पीढ़ी के बुरे लोगन की दसा ऐसीई होबैगी।”
ईसू की माँ और भईया
(मरकुस 3:31–35; लूका 8:19–21)
46जब ईसू भीड़ ते बातें कर रयौ हतो, तबई वाकी माँ और भईया बाहर आये और बे बाते बात करबौ चाह रये हते। 47तब काऊ नें बाहर ते आयकै कही, “कै तेरी माँ और भईया बाहर खड़े भए हैं और तोते बात करबौ चाहतैं।”
48जि सुनकें ईसू नें कही, “मेरी माँ और मेरे भईया को हैं?” 49बानें अपनों हात चेलान की ओर बढ़ायकै कही, “मेरी माँ और मेरे भईया जेई हैं। 50जो मेरे सुरगीय पिता की इच्छा पै चलतै बेई मेरी माँ और मेरे भईया बहन हैं।”
Currently Selected:
मत्ती 12: BRAJ
Highlight
Share
Copy
Want to have your highlights saved across all your devices? Sign up or sign in
NonCommercial-NoDerivatives 4.0 International (CC BY-NC-ND 4.0)
