मत्ती 17
17
ईसू कौ रूपान्तरन
(मरकुस 9:2–13; लूका 9:28–36)
1छै दिन के बाद ईसू पतरस, याकूब और वाके भईया यूहन्ना कूं अपने संग लैके एकान्त में ऊंचे पहाड़ पै गयौ। 2और बिनकेई सामने ईसू कौ रूप बदल गयौ और वाकौ मौंह सूरज के नाईं चमकबे लगौ और वाके कपड़ा उजाले की तरैह ते चमकबे लगे। 3और देखौ बिन्नें बू मूसा और एलियाह के संग बात करते भये दिखाई दियौ।
4जापे पतरस ने ईसू ते कही, “हे पिरभू य्हांपै रैहबौ हमारे काजै कितनौ अच्छौ है। अगर तेरी इच्छा हौबे तौ हम तेरे काजै, एलियाह और मूसा कै काजै तीन कुटिया बना दैमें।”
5 #
मत्ती 3:17; 12:18; मर 1:11; लूका 3:22 #
2 पत 1:17,18 जब बू जि बात कैह रयौ हतो तबई एक चमकते भये बादर ने बिन तीनोंन कूं ढक लियौ और बामें ते अबाज आई, “जि मेरौ प्यारौ बेटा है, जाते मैं भौत खुस हूं। और तुम जाकी बातन्नें सुनौ।”
6चेला जि सुनिकें डरप गये और बे मौंह के बल गिर गये। 7तब ईसू ने बिनके जौरै आयकै बिनकूं छूऔ और बिनते कही, “उठौ, डरपौ मत।” 8तब चेलान नें अपनी आँख खोलकें देखौ तौ बिनें ईसू कूं छोड़कै और कोई दिखाई नांय दियौ।
9ईसू नें पहाड़ पैते नीचे उतरते समै बिनकूं जि आग्या दई कै, “जब तक मैं, ‘मनुस्य कौ बेटा’ मरे भयेन में ते जीबित नांय है जाऊं, तब तलक जो कछु तुमनें देखौ है बू काऊ ते मत कहियों।”
10तब चेलान नें बाते पूछी, “सास्त्रन कूं सिखाबे बारे जि चौं कैहतैं कै एलियाह कौ पैहले आयबौ जरूरिए?”
11और तब ईसू नें बिनते कही “एलियाह जरूर सब कछू सही करबे आबेगौ। 12#मत्ती 11:14पर मैं तुमते जि कैह रयौऊं, कै एलियाह तौ आ चुकौ है। पर लोग बाय पैहचान नांय पाये, पर लोगन्नें वाके संग बैसौई करौ जैसौ बिन्नें करबौ चाहौ। जाई तरैह ते मैं, ‘मनुस्य कौ बेटा’ बिनके हातन ते दुख उठाऊंगौ।” 13तब बे चेला समझ गये कै जि बपतिस्मा दैबे बारे यूहन्ना के बारे में कैह रयौए।
ईसू नें लड़का में ते दुस्टआतमा निकारी
(मरकुस 9:14–29; लूका 9:37–43a)
14जब ईसू बापस भीड़ के जौरै आयौ तब एक आदमी ईसू के जौरै आयौ, और वाके पामन में घुटुनन के बल बैठकै, 15बाते ते कही, “हे पिरभू! मेरे बेटा पै दया कर। जाय मिरगी आतै जामारै जाकी हालत भौत खराब है और जि बार बार आग और पानी में गिर जातै। 16और मैंनें तेरे चेलान ते कही पर बे जाय ठीक नांय कर पाये।”
17तब ईसू ने बिनते कही, “अरे अबिसबासी और हटीले लोगो मैं तुमारे संग कब तक रहूंगौ? और कब तक मैं तुमें सहुंगो? बा लड़का कूं मेरे जौरै लैके आऔ।” 18तब ईसू ने बा दुस्ट आतमा कूं फटकारौ और बू दुस्ट आतमा बामें ते निकर गई और वाकौ बेटा बाई समै सही है गयौ।
19तब चेला ईसू कूं एकान्त में लै गये और ईसू ते पूछी, “हम बाय चौं नांय निकार सके?”
20 #
मत्ती 21:21; मर 11:23; 1 कुरि 13:2 तब ईसू ने बिनते कही, “तुमारे भरोसे की कमी की बजैह ते। मैं सच कैह रयौ हूं, अगर तुम में राई के दाने कै बराबर भरोसौ होतौ तौ तुम जा पहाड तै कैहते, ‘कै य्हांते चलौ जा’ तौ बू चलौ जाबैगौ। तुमारे काजै कोई काम असम्भब नांय होबेगौ।” 21#17:21 कछू हात ते लिखे लेखन में 21 वीं आयत को जोड़ो गयौ है जामें जि लिखौ गयौ है कै ऐसी दुस्टआतमा उपबास और पिराथना के बिना नांय निकरतीं
दूसरी बार ईसू कौ अपनी मौत के बारे में बताबौ
(मरकुस 9:30–32; लूका 9:43–45)
22जब बे गलील में हते,तब ईसू नें चेलान ते कही, “मैं, ‘मनुस्य कौ बेटा’ आदमिन के हातन ते पकरबायौ जाऊंगौ। 23और बे मोय मार डारिंगे और मैं तीसरे दिन जी उठूंगौ।” जा बात पै चेला भौत उदास भये।
बड़े पिराथना घर कौ कर
24जब बे कफरनहूम में आये, तौ पिराथना घर के काजै कर लैबे बारेन में ते दो लोगन नें पतरस के जौरै आयके पूछी, “का तुमारौ गुरू बड़े पिराथना घर कौ कर नांय देतै?”
25बानें कही, “हाँ देत तौ हतै।”
जब पतरस अपने घर में आयौ तौ ईसू नें पतरस के बोलबे ते पैहलेई बाते पूछी, “हे सिमौन तू का समझतै? जा धरती के राजा ब्याज और कर कौन पैते लैतें अपने बेटातें या परायेन ते?”
26तब पतरस नें कही, “परायेन ते।”
जापै ईसू ने कही, “तब तौ बेटा बच गये। 27फिरऊ हमें बिन लोगन कूं नाराज नांय करनों। तू झील कै किनारे जा और म्हांपै अपनी बन्सी डारिओ और जो मछली पैहले फसै वाके मौंह खोलियो। तौ तोय एक सिक्का मिलेगौ, बाय तू अपने और मेरे बदले में कर दै दियो।”
Currently Selected:
मत्ती 17: BRAJ
Highlight
Share
Copy
Want to have your highlights saved across all your devices? Sign up or sign in
NonCommercial-NoDerivatives 4.0 International (CC BY-NC-ND 4.0)
