Jon 1
1
1Le nerwowunan Nakaran ramemarik, an Nakaran ramemarik to Wuhgin, an Nakaran in Wuhgin.
2In ramemarik to Wuhgin le nerwowunan.
3Naremnar min kamol lan, an nar ker remesolatuan ton lenar min kamol.
4Nemihwan ramemarik lan, an nemihwan in hnakakan te neremim.
5An hnakakan ramasia le napinapan, an napinapan ramesuunan in.
6Ieremim ker khalipa resipe le Wuhgin, ierem netigen Jon.
7In rava to nausitoan, moma teramausito in hnakakan, moma neremim petum takani nuparhienan lan mero in ka lan.
8Resolan moma in hnakakan ka, mero ierem kahmalipa to nausitoan in hnakakan.
9In hnakakan parhien ierem terasiakapun neremim min petum karua le ten uk.
10In le ten uk, an ten uk kamol lan, an ten uk remetiktik in.
11In rava imwanena, an tahan min neremim kamesariran in to ilar?
12Mero nerem karos in to ilar ramofen nesanenan kam ilar to nolan ilar nereri Wuhgin, nerem kamani nuparhienan le netigen;
13Nerem kuaih ilar, resolan moma le nita wa le nolkeikeian te nubalaki til wa le nolkeikeian te neremim, mero le Wuhgin.
14An Nakaran reknua le nubalakin, an ramemarik to katar, an iemaihm nevitan tahan, nevitan kama taha Neri Remin ierem ramos karena am, ret le nevitan mene nuparhienan.
15Jon ramausito in mameni apahm moma, In uk ierem iemameni lan, moma, Ierem ramoatisig in io reknaupan lak, mero in ka ramaupan lak.
16Mero in ka katar min kenaros naremnar min remet iau le nekin, mene nevitan le nevitan.
17Mero in ka nowa asul kamofen le Moses, nevitan mene nuparhienan remsipe le Iesu Kristo.
18Resolan moma ieremim ker ramahm Wuhgin le nian ker. Nerin ierem remles nowan karena am, ierem rakamelpen le nekilhi Remin, in remhinhin in.
19An in uk nausitoan te Jon loanian Ju min kamahilipen ton nerem le nuhwasigenan mene nerem Livai min mama takaihrapuk ton mama, Ik pehe?
20An netereni apu mesapninan, an netereni apu moma, Resolan moma io Kristo.
21An netakaihrapuk ton, mama, Mero neta? Ik Ilaias? An netereni, moma, Resolan moma io in. Ik profeta ka? An neteraram moma, Kapa.
22An ilar netakani ton, Ik pehe? moma tiapairam to nerem kamahilipa kamar. Nakameni atu neta lam?
23Netereni, Io noia ierem ramasak leluan, Tenakaikou etuatu suatu taha Ieremera, rolkoma Aiseia profeta rameni.
24An nerem kahmalipa ilar neremim te Farisi min.
25An netakaihrapuk ton mamani ton, Mero retol ik nakamol nebaptisoan takama resolan moma ik Kristo wa Ilaias wa profeta ka?
26Jon neteraram meni to ilar, moma, Io iakamol nebaptisoan le nu, ieremim ker ramail le nekimiar ierem nakatiktik, ierem ramoatisig in io,
27Ierem io iesevitan moma tiakrisin nowanouka le nar rakava lan le nelikin.
28Naremnar min uk kamol Bethabara leninpen le Jordan, iken Jon ramol nebaptisoan iken.
29Lauk in neterahm Iesu rakava ton, an netereni, Aihm ru, Lam te Wuhgin ierem terosita tehwaga tat le ten uk.
30In uk ierem iemameni in moma, Ieremim ker teroatisig in io ierem raknamaupan in io, mero in ka in ramaupan in io.
31An io iemetiktik in; mero iava mamol nebaptisoan le nu to nar uk moma tefhinhin kam nerem Israel.
32An Jon ramausito mameni moma, Iemahm Nanumun ratite le neai rolkoma mak mamowata lan.
33An io iemeshinatinan in, mero ierem rehmalipa io moma tiakol nebaptisoan lenu in rameni tonio, Ierem tenepahm Nanumun teratite mowata lan in ierem terol nebaptisoan le Nanumu Ausim.
34An io ieknahm an iaknausito in moma in uk Neri Wuhgin.
35Mun ka lauk in Jon ramemail ihlel tan ieremim mil kiu,
36Neteret pen in Iesu ramaliwak, netereni, Ahm ru, Lam te Wuhgin.
37An tan ieremim mil kiu netukuarou rameni, an netukuoatisig in Iesu.
38An Iesu neterhwin mahm ilau kamuoatisig in netereni to ilau, Nakamuatkoigen neta? An ilau netukuani ton, Rabi, (ierem takani le nakaran uk, Ietikun) Nakamarik ihia?
39Netereni to ilau, Iava muahm. An netikiava muahm iken ramarik iken, an netakamuarik ihel min loanian ka, mero in ka rolkoma aur katilum katilum.
40Andru nohra Saimon Piter in ierem ker le ilau ierem mil kamuarou Jon muaroupen in.
41In ramaupan mahm pian Saimon mameniton, Iaknaihm Mesia (ierem takani le nakaran uk, Kristo).
42Neterir in muan to Iesu. Iesu neteramahmena in mameni, Ik Saimon neri Jon, tapeni lam kama Sifas (ierem takani le nakaran uk, Kapiel).
43Lauk in rolkeikei moma terierpen Kalili. An Iesu neterahm Filip netereni ton, Aroupa io.
44An Filip in ierem Bethsaida ker, nauanu te Andru mene Piter.
45Filip neterahm Nathaniel netereni ton, Iaknaihm in ierem Moses remrai le nowa asul ilar naprofeta min, Iesu le Nasareth neri Josef.
46An Nathaniel netereni ton, Tokol nar ut ker resipe le Nasareth? Filip netereni ton, Ua mahm.
47Iesu neterahm Nathaniel rakava ton, neterameni lan, moma, Ahm ru, ierem Israel parhien ker ierem neiwean rika lan.
48Nathaniel netereni ton, Nemethuinatin io? Iesu neteraram menipen ton, Paupan Filip terepaunin ik an iemahm ik nemawowata louka nihm.
49Nathaniel neteraram ton, Rabi, ik Neri Wuhgin, ik ieremera te Israel.
50Iesu neteraram menipen ton, Mero in ka iemeni moma iemahm ik louka nihm, nakameni nuparhienan lak? Ik tenepahm nar ribor aken le nar uk.
51An netereni ton, Nuparhien, nuparhien, tikani to kamiar, tenepaihm neai kametita mene nagelo min te Wuhgin teparet mamaitite le Neri Ieremim.
Currently Selected:
Jon 1: LEN1902
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1902, reprinted in 1935.
