Jon 6
6
1Nar min uk reknua muan Iesu neteruan le neutai tehe Kalili, in ka tene Taibirias.
2An nahuto puk netakairoupen in mero in ka kamaihm nimtatin min in ramol le namin kamaremis.
3An Iesu neteret muan le towar neteramowata iken ilar tan ieremim min.
4An Napitean rekinwaket, nauganan te Ju min.
5An Iesu netereitet mahm nahuto puk kamarua ton, an netereni to Filip, Teparos ihia nemri bred moma nerem min uk takarkin?
6An rameni nar uk malimin in ton, mero in ka in atu remhinatin nar terepol.
7Filip neteraram ton, Bred le 200 peni resaukeran in ilar moma teparos asuas le ilar karena kiten.
8Karena le tan ieremin min netereni ton, Andru nohra Saimon Piter,
9Wusuas ker uk ierem ramos bred le barli katilum mene nam asuas kiu; mero nar etol an to nahuto puk mok lan?
10Iesu netereni, Arol neremim kaiwata. An nuhwal ramibor iken. An neremim netakaiwata nahwinan ilar rol koma 5,000.
11An Iesu neteros bred an netereni vivi neteros nouhia lan kam nerem kamaiwata, neterol nar karena le nam rauker in ierem nekin ilar ramakahmo.
12An kenarhepus, an netereni to tan ieremim min, Arhwafugen takeritakerin ierem kamapas puken, mero in ka moma tesiapatouan in ker.
13An netakarhwafugen, an netakaruaipen le karam katilum katilum mekiu karet le takeritakeri bred le barli katilum ierem kamarkin maipas.
14An neremim netakaihm nimtatin min ramol netakani moma, In uk parhien profeta ierem terua le ten uk.
15An Iesu neterhinatin moma ilar kama takarua marhiapatin in marol in reremera, an neterelelegpen mun le towar in pusenam.
16An lehnaiu neterua tan ieremim min netakaitite maruan irhe.
17An netakaruan le bot maisueafugen le neutai tehe to Kaperneam. An reknapinap an Iesu resuean to ilar.
18An peau neteribor mero in ka nemetag ramesesau asul.
19An ilar netakaisua le ferlog 25 wa 30, an netakaihm Iesu ramaliwak le tehe meknua iwaket to bot An netakamarigen.
20An netereni to ilar Inuk io asarigenan.
21An netakaigien maros in le bot, an ihwe am bot reknuat iken kamaruan iken.
22Lauk in nahuto nerem kamailil le neutain tehe netakaihm mama resolan moma bot pusen iken mero karena am, an moma Iesu remesuenan le bot ilar tan ieremim, mero tan ieremim min kamarier pusenam.
23Mero bot nevin netakasipen Taiberias iwaket to nar iken kamarkin bred Ieremera ramohwak aupan ton iken.
24An nahuto netakaihm mama Iesu rika iken mene tan ieremim min mun, an ilar mun nesakaisua le bot min marua Kaperneam maitkoigen Iesu.
25An netakaihm in le neutai tehe netakani ton, Rabi, nahan ik nava ietuk?
26Iesu neteraram to ilar meni, Nuparhien, nuparhien, tiakani to kamiar, Resolan moma nakamaitkoigen io mero in ka nemaihm nimtatin min, mero nakamaitkoigen io mero in ka nemarkin bred mahrepus lan.
27Ailekut, resolan moma to nauganan ierem teramramer, mero to nauganan ierem teramarik to nemihwan lilen, ierem Neri Ieremim terepofena kam kamiar, mero in kar in uk ierem Remin Wuhgin reknehlau nimtatin lan.
28An netakani ton, Neta tiakarol moma tiakarol nolan taha Wuhgin.
29Iesu neteraram menipen to ilar, in uk nolan taha Wuhgin moma tenakani nuparhienan le ierem in rehmalipa.
30An netakani ton, Mero in ka neta nimtatin tenakol moma tiakaihm mani nuparhienan lan? Neta tenakol?
31Remitar min kamemarkin mana leluan, rolkoma kamrai, Ramofen bred le neai kam ilar to nikinan.
32An Iesu netereni to ilar, Nuparhien, nuparhien, tiakani to kamiar, Resolan moma Moses ramofena bred le neai kam kamiar, mero Tata ramofena kam kamiar bred parhien le neai.
33Mero in ka bred Wuhgin in ierem teratite le neai mofen nemihwan kam ten uk.
34An netakani ton, Ieremera, Ofa bred uk kam kamar le nian min.
35Iesu netereni to ilar, Io bred te nemihwan; ierem terua tonio terepesemekan, an ierem tereni nuparhienan lak terepesowawean mun le nian min.
36Mero iemeni to kamiar moma neknaihm io mero nesanian nuparhienan lak.
37Nar min Tata terofa kam io terepua tonio, an ierem terua tonio tiepeshaliatouan in.
38Mero in ka iematite le neai moma tiesolan nar io iokolkeikei mero nowa te ierem rehmalipa io.
39An in uk nar ierem rehmalipa io rolkeikei moma le nar min ramofta kam io tieselakinan ker, mero tiaposit in le nian oatisig.
40Mero in ka in uk nar Tata rolkeikei moma ierem terahm Nerin meni nuparhienan lan teros nemihwan lilen, an tiaposit in le nian oatisig.
41An Ju min netakaitmusmus lan mero in ka rameni, Io bred ierem ramatite le neai.
42An netakani, Resolan moma in uk Iesu neri Josef? Ierem katar karhinatin remin mene inen? An teretua meni moma, Iematite le neai?
43Iesu neteraram menipen to ilar moma, Tenesaitmusmusan le kamiar min.
44Ieremim ker to resuean tonio takama Tata ierem rehmalipa io teresuipean in, an io tiaposit in le nian oatisig.
45Kamrai le profeta min, An tapetikun ilar min le Wuhgin. Ierem tererou to Tata mhinatin terua tonio.
46Resolan moma ieremim ker reknahm Tata, mero ierem remsipen am le Wuhgin in rekahm Tata.
47Nuparhien, nuparhien, tiakani to kamiar, Ierem tereni nuparhienan lak reknos nemihwan lilen.
48Io bred te nemihwan.
49Remimiar min kamemarkin mana leluan an maremis.
50In uk bred ramatite le neai moma ieremim terkin mesemisan.
51Io bred lilen iematite le neai; takama ieremim ker terkin bred uk terepamarik ilen; an bred io tiapofen in nubalakok, to nemihwan te ten uk.
52An Ju min netakameitkauga kam ilar min mamani, mama, Ieremim uk teretua mofa nubalakin kam katar to nikinan?
53An Iesu netereni to ilar, Nuparhien, nuparhien, tiakani to kamiar, Takama tenesarkinan nubalaki Neri Ieremim mesaramnuman nitan, tenesarosan nemihwan le kamiar.
54Ierem terkin nubalakok mamnum nitak reknos nemihwan lilen, an tiaposit in le nian oatisig.
55Mero in ka nubalakok in nauganan parhien, an nitak in namnuman parhien.
56Ierem terkin nubalakok mamnum nitak teramarik lak an io tiakamarik lan.
57Rolkoma Tata lilen rehmalipa io, an io iakamemiuh mero in ka Tata, rol mok ierem terkin io in mun terepemiuh mero in ka io.
58In uk bred ierem ramatite le neai, resolan kama remimiar min kamamarkin an maremis; ierem terkin bred uk terepemiuh lilen.
59Ramameni nar min uk le nimwa ahwak mametikun Kaperneam.
60An tan ieremim min ribor netakairou netakian mama, In uk nakaran riakis; pehe tereperou?
61Mero Iesu neterhinatin atu le nekin moma tan ieremim min kamaitmusmus le nar uk, netereni to ilar, Nar uk ramol kamiar nakamaipitetel?
62An (neta teneparol) takama tenakaihm Neri Ieremim teret muan iken ramemarik iken paupan?
63Nanumun in ramofen nemihwan, nubalakin resevitan to nar ker; nakaran min iemeni to kamiar ilar nanumun an ilar nemihwan.
64Mero le kamiar nevin kasanian nuparhienan lak. Mero in ka Iesu remhinatin le nerwowunan nerem kasanian nuparhienan lan mene ierem terepaurai in.
65An netereni, Mero le nar uk iemameni to kamiar moma ieremim ker to resuean tonio mero takama kenofen kam in le Tata.
66Le nar uk tan ieremim min ribor netakaleleg an mesaivenan mun ilar min.
67An Iesu netereni to nerem katilum katilum mekiu, Kamiar mun nakarolkeikei mama tanakaruan.
68Saimon Piter neteram ton, Ieremera, tiaparuan to fe? Ik nakamos nakaran te nemiwhan lilen.
69An kamar iaknani nuparhienan lam marhinatin mama ik ierem Ausim te Wuhgin.
70Iesu neteraram to ilar, Resolan moma io iemahmpen kamiar nerem katilum katilum mekiu? An karena le kamiar in iaremis?
71An ramameni Judas neri Saimon Iskariot; mero in ka in ierem terepaurai in, karena le ilar katilum katilum mekiu.
Currently Selected:
Jon 6: LEN1902
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1902, reprinted in 1935.
