IVA A’A ANU IAKI 1
1
1Teopilo e, pinai revareva nai kikiriane euna uku Iesu unu iaki uriria eiai, Una ipawkia voa uriria eiai awku, U pinai li’inave,
2Anea’anea lare pani ai U pani muku ai ekeakei’inave ane, i Avaea Iaa mere Iva a’a U ie’eiaka U ekiaka uku iaki eiai:
3I veia miki aila U rokoanave U ipekinave Una imua pani neko mere ai, lare 40 inu eiei i oro U inamu‐oiakei’inave, U voa kurumakei’inave ane uku Eloi inu eiei eiai:
4Oro kiripai U kaupukiakei’inave, oro Ierusalema mere pa enavai U ekinave, oro aioiaka‐ipokoiakana Mai inu maura‐voa la’aruku eiai, kurua maura‐voa la’aruku eiai Na ane epo mere noro viriane euna.
5Uku Ioane ere bapatiso li’inave kapoi; a lare ailapea i Avaea Iaa noro bapatiso‐nakavakeiakana.
6Oro kaupukiaka’ane oro erau voa veve’enave, Amuae, ei pani ana Isaraela a’a anu pani va’au Ni ama‐ekumau?
7U erau voa kuruenave, Lai evera keiape noro eiai uku pani inu uma eiei, va’au eiei ane, ipaliai, kurua pani Mai oiviriane euna U e eiai.
8Avaea Iaa noro upa mere anea’ane noro iva miakana: Na ione a’a noro keiakana Ierusalema ai, Iudea iki ai ane, Samaria ai ane, enaena pani va’au unu orai orai ane.
9U ei voa kuruaka’ane, oro inamu‐ekimakei’inave ane, U ekeakei’inave; i awporo avikiakei’inave ane oro inamu‐oiai a‐li’inavea.
10Oro kaia i inamu‐ekimakei’inave U inamakei’inave ane, a’a rere a’a kape urupu luki‐emiakei’inave oro ai emoki oinave;
11Orere erau voa veve’einave, Galilaia a’a e, uku oiana noro kaia i inamu‐ekimakina? Ei Iesu noro mere ekeakeina pani muku ai, U vairuakana orau noro inamu‐oiane euna U pani muku ai inamakei’inave.
12Oliveta akapu mere oro Ierusalema ai vairunave, kurua akapu Ierusalema mere maili monou kei’inave.
13Oro pai’iri ikiriaka’ane, marea ai oro i‐kaupukinave, marea anu upai lalava ai oro inanave; omo nawi Petero, Iakobo ane, Ioane, Anederea ane, Pilipo, Toma ane, Baratamaio, Mataio ane, Iakobo Alepo onu mere, Simona Selote ane, Iuda Iakobo onu mere ane.
14Ei a’a uriria, a’ero ane, Maria Iesu unu mei ane, Una aroa a’a ane, i‐pokoinave, lai monou nawki‐awkanave ane.
15Ei pani inu lare monou aivara vimu ai Petero oinave, (aivara uriria 120 akoakei’inave) u erau voa kuruenave,
16Ovaki airavaki e, uku uakei’inave kurua voa evere’eai limakina Avaea Iaa kurunave i Davida anu ane epo mere uku Iuda eiai, u ane u a’a era’anave Iesu piriai.
17Uku u ene kaupu a’a akoakei’inave, ei iaki inu aua awku u awkuakei’inave ane.
18Ei a’a una namea kavani inu moni aura inaeali’inave; aura ai una paku ai u ara’anave, una nemo koranave, nemo iki upunave ane.
19Ei voa Ierusalema a’a uriria ipali’inave; ou uku eiai kurua aura nawi Akeledema oroiakei’inave, kurua nawi inu miki, Aro onu Aura.
20Uku ei voa Salamo onu buka laru ai kikiriakeina, una marea kekepere‐li’ina?-?moki, a’a kapeo i‐pokoinamoki: una iaki a’a e mi’inamoki.
21Ou uku eiai ene a’a oro enei kiripai aki‐enava’ane euna Amua Iesu enei awkono avao ai pokoiaka’ane,
22Ioane enu bapatiso pani mere, anea’anea kurua lare ai enei mere U ekeakei’inave ane, oro mere a’a monou enei ie’eai limakina u ione a’a keia’ane‐iai Una imua mere la’ava eiai.
23A’a rere oro ie’einave, Iosepa nawi Barasaba oroiakei’inave, Iusutu unu mere; Matatia ane.
24Oro erau voa nawki‐awkanave, Amua e, a’a uriria anu lai Ni ipali’ina, ei a’a rere ekara vaki Ni ie’eane euna Ni ipakine,
25U ei omoro iaki, iva a’a anu iaki, aua miane‐iai, iaki mere Iuda uku una namea u ara’anave, una mako u enava’ane‐iai.
26Oro ie’ea veia mi’inave, ie’ea veia Matatia eiai oro mi’inave; Iva a’a 11 inu kaupu a’a u akoakei’inave.
Currently Selected:
IVA A’A ANU IAKI 1: IAR1920
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1920.
