Lukas 14
14
Hangkanipi Yesus nepakauri tempo eo Pentuua to Yahudi
1Tempo eo Pentuua to Yahudi, Yesus rau nangkoni i hou hadua to pangkeni to Farisi. Hira to i ria nampenoto-'I. 2I ria naria hadua tauna narata i tingoo Yesus to nohaki nangkumowu, nawoto paana pade palena. 3Yesus nampekunera to nataualu buku Taurat pade to Farisi to i hee, “Mantuku patudu agamata, mamaladihawo mampakauri tauna tempo eo Pentuua, ba moma?”
4Naupawee, momara nowotu. Lauparia Yesus nangkakamu pale tauna to nadua ee mai, nampakauri'i pade nantudu'i manculi. 5Napu ee, iulika-Nara Yesus, “Ane maria anami ba japimi manawu i rara lowu, natantu amimi rau miongko'i, naupa tempo eo Pentuua.”
6Momara hema to nabia nampahonoi to laiuli Yesus lauria.
Patudu Yesus bona nemo mampemabohe wotota moto
7Pampahilo-Nara Yesus tauna to narata nampehimukui moncuna i poncunaara to laibila, iulika-Nara porapa ei mai, 8“Ane maria komi raoka rau i ponikaa, nemo mipelihi poncunaara to laibila. Baka tumpu hou ee mai nampaoka mui tauna to neliupi pampabila'i lako hi komi. 9Naulika komi mei tumpu hou ee, ‘Poencuko lako hetu. Waika baleku ei poncunaa etu.’ Alaana maeamo komi apa kana moencu i poncunaa to nelabi katepainauna. 10Aji, ane maria komi raoka rau i ponikaa, poncunamo komi i poncunaa to natepainau, baka tumpu hou ee mei marata hi komi pade manguli, ‘Bale, koimoko moncuna i poncunaara to laibila.’ Aji, komi mamparata pampemabohe i tingoo to rata ntanina. 11Habana hema-hema to nampemabohe wotona, kana rapemakodi, pade hema-hema to nampemakodi wotona, kana rapemabohe.”
Hema to kana raoka
12Yesus nangulika tauna to nampaoka-'I, “Ane maria pohuhaa to mubabei, eona ba bengina, nemo muoka bale-balemu, ompi-ompimu, ba tongki-tongkimu to nahugi, apa hira mui mei mampaokako rau pohuhaara, pade iko mamparata balahiana. 13Aginalau, ane maria pohuhaa to mubabei, okaramo to nakahiahi katuwura, to moma nagana parewa wotora, to napungku hante to naburo. 14Ane wee mai, Natiroiko Alatala, habana momahawo naria napa-napara mampabalahi belomu. Humawee lauria rabalahikako ane temponapi Alatala mampakatuwu nculi humawee tauna to nanoro ingkura.”
Porapa nangkambelai tauna to notance mantuku Yesus
(Mat. 22:1-10)
15Nangepe lauria, hadua lako tauna to nangkoni dohe Yesus nanguli, “Norahiramo tauna to mamala mangkoni dohe Alatala ane marata-'I moparenta halaku Magau.”
16Naupawee Yesus nangulika'i, “Naria hadua tauna to nobabei huha bohe, pade nadea tauna laiokana. 17Temponapi huha ee mai rababei, laituduna batuana rau mampaulika humawee tauna to laioka, ‘Maitamo, apa humaweena nahadiami.’ 18Naupawee, humaweera notance bona momara marata. To hadua nangulika batua ee mai, ‘Merapi ampu'akuwo, apa welau ei rau'a mampanaa tana to lako ioliku.’ 19To ntanina nanguli, ‘Merapi ampu'akuwo ba moma'a olu maloga tulau, apa welau ei rau'a mopaguru alima pasa japi to lako ioliku.’ 20To hadua muipi nanguli, ‘Lako napu lainika'akuwo, ba moma'a olu maloga tulau.’
21Lauparia, nanculimi batua ee mai pade nangkewo humawee lauria hi tumpu hou to nantudu'i. Alaana nahodo tumpu hou pade laituduna batuana, ‘Koiko i dala-dala bohe bo dala-dala kodi rara ngata, pade okaramo to nakahiahi katuwura, to moma nagana parewa wotora, to naburo pade to napungku.’
22Naliu ee, batua ee mai nangkewo hi maradikana, ‘Tuama, humawee to laipetuduimu laibabeimi. Naupawee, nadeadipi poncunaa to nakaloa.’
23Nehono maradika ee, ‘Koimoko i dala bohe pade dala-dala kodi i hawaliku ngata. Humawee tauna to mupotomu, mupahuru marata, bona houku maponu duu. 24Ku'ulikako, moma hema haduaa tauna to laioka pamulana, mangkoni i pohuhaaku!’ ”
Hangu hangaa kana rabakaha ane mantuku Yesus
25Hangkani tempona, nadea tauna nampodohe Yesus rara pomakoa-Na. Yesus nampeilira pade iuli-Na, 26“Ane maria hadua tauna mingki mantuku-'A, pade nelabipi pampomaihina tina pade tuamana, bangkelena, ana-anana, ompi-ompina ba tuwuna moto, moma'i mamala mawali to pantuku-Ku. 27Hema-hema to moma madota mangkolo kahehaa duuna mamate pade mantuku ingku-Ku, moma mamala mawali to pantuku-Ku. 28Rapana maria hadua to moliwo mopatuna hangu hou bohe, natantu amimi moncuna ncala'i olu moreke hangkua ongkohona, bona nancani kagana doina mopahudu hou ee mai. 29Apa ane moma'i nareke ncala ongkohona, nemo-nemo mei doina magana hudu pondasi moto, momami maria doina napake mopahudu houna ee. Alaana humawee tauna to nampanaa mampopore'i, 30pade manguli, ‘Tauna ei mai nopamula nopatuna, naupawee momami namala laipahuduna.’
31Wee moto mui, ane maria hadua magau moliwo rau mohiwali hante magau ntanina. Natantu amimi moncuna ncala'i olu motimba, ba rabukuradi tantarana to hampulu ncobu dua ee mantingohi magau to rompulu ncobu dua tantarana, ba momadi. 32Ane moma'i nabuku, kana nahuro tauna rau mampotomuka magau to ntanina ee, merapi pohingkabelo. 33Wee mui, butu tauna to moma mampalahi humawee to naria hi hira, momara mamala mawali to pantuku-Ku.
34Poi nadea ami bununa. Naupawee, ane poi mawali matawoo, natantu ami momami mamala rapakapoiki. 35Poi ee momami mamala rapake i bone ba rapake mopakarudu tana. Aji, kana ratadimi.#14:35 Poi to natawoo ee batuana: tauna to moma notimba ncala napa to kana nababei ane mawali to pantuku Yesus, hampena moma'i napumpu petukuna. Hema to natalingaa, epe belo to iuli-Ku lauria.”
Currently Selected:
Lukas 14: MYL
Highlight
Share
Copy
Want to have your highlights saved across all your devices? Sign up or sign in
