Lukas 16
16
Porapa nangkambelai to pouruhi gagu to moma nanoro
1Iulika-Na muira Yesus to pantuku-Na, “Naria hadua to nahugi nampopobago hadua to pouruhi gaguna. To pouruhi gagu ee lairai nampakapu doi to hugi ee mai. 2To hugi ee mai nangkio to pouruhi gaguna pade iulikana'i, ‘Moma'a nagoe nangepe kareba ane laipakapumu mara doiku! Aji, tulihika'amo nangkambelai bewa pobagomu nouruhi gaguku, apa mopamula welau ei momami iko to mouruhi gaguku.’
3Nangepe lauria laiulina to pouruhi gagu ee mai rara bongona, ‘Napa to mamala kubabei? Apa welau ei maradikaku nampopentuu'a lako bagoku nouruhi gaguna. Moma'a naroho ane mohubi, naea mui'a ane merapi-rapi. 4Laincaniku napa to kana kubabei, bona ane napopentuu'apa lako bagoku nouruhi gaguna, maria moto tauna mantarima'a i houra.’
5Napu ee laikiona humawee tauna to noinda hi maradikana. Laipekunena hi to narata pamulana, ‘Hangkua indamu hi maradikaku?’
6Nehono tauna ee, ‘Hatu loya lana.’
Napu ee iulikana'i, ‘Ei hura indamu. Poncuna mahomi pade tulihimi hura inda to nabou ane iko nolume alima mpulu loya aga.’
7Napu ee pekunena to ntanina, ‘Bewa hante iko? Hangkua kadea indamu hi maradikaku?’
Nehono tauna ee mai, ‘Hancobu karu labu gando.’
Iulikana'i, ‘Ei hura indamu, tulihiki indamu nawali walu atu karu labu gando aga.’
8Nangepe napa to laibabei to pouruhi gaguna to moma nanoro ee, maradika ee mai nampolinga'i apa nataualu'i noakala.”
Napu ee Yesus nanguli, “Wee moto mui, tauna to nantuku ingku dunia ei neliupi kataualura nampauruhi uruhiara lako tauna to natuwu i rara kabaana. 9Ku'ulika komi: Pakemi kahugia dunia ei mantulungi tau ntanina bona madea dohemi. Ane mapudimi kahugia dunia ei, Natarima komi mei Alatala i katidaa to naria duu kahae-haena.”
Kana mamala raparahaya rara uruhia to nakodi
10“Hema to mamala raparahaya rara uruhia to nakodi, mamala mui'i raparahaya rara uruhia to nabohe. Pade hema to moma mamala raparahaya rara uruhia to nakodi, moma mui'i mamala raparahaya rara uruhia to nabohe. 11Aji, ane moma komi raparahaya mampauruhi kahugia dunia to nadaa ei, natantu amimi moma hema to mamparahaya komi mampauruhi kahugia to kakonona.#16:11 Kahugia to kakonona ee mai katuwua to moma maria kahuduana i rara huruga pade humawee rahi ntanina to laiwaika Alatala hi todea-Na i rara poparentaa-Na (hilo Mat. 25:34). 12Pade ane moma komi mamala raparahaya mampauruhi gagu doo, natantu ami moma maria tauna to madota mampawaika komi gagu bona mawali gagumi.
13Moma naria batua to mamala mobago hi rodua maradika, habana to hadua mei napodaa pade to ntanina napotowe. Ane moma iwee, hia mei matigu hi to hadua pade mampahauru to ntanina. Moma komi mamala hangkaniliu mepue hi Alatala pade mampaharumaka kahugia dunia ei.”
14Pangepera humawee lauria, to Farisi nampopore Yesus, habana hira nampokono doi. 15Naupawee iulika-Nara, “Komi nampemakono wotomi moto i tingoo tauna, naupawee Alatala nangincani napa to i rarami, apa napa to laipokono manuhia, laipodaa Alatala.
16Patudu Taurat pade to laitulihi rara buku nabi-nabi laipotolele duuna Yohanes to Pediu narata. Nopamula lako karata Yohanes to Pediu, laipotolele Kareba Belo nangkambelai bewa Alatala noparenta halaku Magau, pade humawee tauna nampehimukui bona mawali todea rara poparentaa Alatala ee mai. 17Naupawee, patudu Taurat batena moto'i rapake. Nadolipi langi bo dunia maronto, lako hangu huruf patudu Taurat maronto.
18Butu tauna to nampogaaka bangkelena pade nobangkeleki hante to ntanina, hia ee nogau hala. Pade butu tauna to nampobangkele bangkele to laipogaaka balailona, hia mui nogau hala.”
Porapa nangkambelai tauna to nahugi pade Lazarus to nakahiahi
19“Naria hadua to nahugi, to nabiaha nampake waru to naungu pade kae to naludu. Hia natuwu nasana rara kahugia butu eona. 20Pade naria mui hadua to nakahiahi, hangana Lazarus, noturu i humpii womo to hugi ee mai. Woto Lazarus naponu hante baka, 21pade mingki'i mampakaronto oro taina hante labi konia to nahewu lako meja to hugi ee mai. Pade dike-dike narata nampadilai bakana.
22Narata tempona, namatemi to nakahiahi ee, pade inohana laikeni malaeka-malaeka Alatala i humpii Abraham. Poma nahae lako ee, namate muimihawo to hugi ee pade laitana. 23Napepa mpuu iepena i Po'ohaara to Mate. Netingara'i, hilona i ka'awaana Lazarus noncuna i humpii Abraham. 24Nongare'i hi Abraham, iulina, ‘Tuamaku Abraham, potowe'akuwo! Tudu'i Lazarus molome wuntu karawena i rara ue pade tumai napatudohi i dilaku, apa napepa mpuu iepeku rara apu ei mai.’
25Naupawee iulina Abraham, ‘Anaku, linga tempomu natuwu i dunia, laiwaikako humawee to nabelo, bo Lazarus namparata humawee to nadaa. Naupawee, tempo ei Lazarus laipakasana bo iko napepa. 26Moma wuwu ee, kami hante iko mui laioloti tua to nabohe, bona tauna to mingki medipo lako hei rau hi iko, momara mamala medipo. Wee mui, moma hema mamala medipo lako hi iko rau hi kami.’
27Napu ee, iulina, ‘Ane wetu, kuperapi hi iko, Tuama, tudu'i Lazarus rau hou tuamaku, 28apa nariaradapa alima dua ompiku. Napalingai amira, bona momara mehua rara po'ohaa to napepa ei mai.’
29Iulina Abraham, ‘Naria hi hira buku-buku to laitulihi Musa pade nabi-nabi. Paleleramo manturuhi patudu rara buku-buku ee.’
30Nehono'i, ‘Tuamaku Abraham, moma'i nagana etu. Naupawee ane maria to matuwu nculi lako kamateana rau mampalingaira, mancororamo lako doha-dohara.’
31Naupawee iulina Abraham, ‘Ane moma raepera to iuli Musa pade nabi-nabi, moma muira meparahaya naupa maria tauna to matuwu nculi lako kamatea rau mampalingaira.’ ”
Currently Selected:
Lukas 16: MYL
Highlight
Share
Copy
Want to have your highlights saved across all your devices? Sign up or sign in
