Lukas 19
19
Zakheus
1Nehuami Yesus i ngata Yerikho pade nomako nantara ngata ee mai. 2I hee naria hadua kapala to peduhu paja to nahugi, hangana Zakheus. 3Mingki mpuu'i mampahilo Yesus, naupawee moma-'I namala laihilona apa narede'i pade nadea tauna nahiromu nomako i humpii Yesus. 4Alaana, nokumeno'i nampelodoira todea pade nengkahe i lolo kau ara, bona ane moliu-'I Yesus mamala-'I nahilo.
5Karata Yesus i puu kau to laikahe Zakheus, laitingara-Na pade iulika-Na'i, “Zakheus, dungku panaumoko, apa welau ei moturu i houmu-'A.”
6Dungku nanaumi Zakheus pade nantarima Yesus i houna hante goe rarana. 7Naupawee, humawee tauna to nampahilo Yesus rau i hou Zakheus, nangkaranguhi pade nanguli, “Napa pade rau noturu i hou to nadoha-'I?”
8Tempora i houna, Zakheus nokangkore pade nanguli hi Pue Yesus, “Pue, kupopewai hantongo lako gaguku hi tauna to nakahiahi. Ane naria tauna to laibagiuku, kuwaika nculi'i opo ngkani kadeana lako to ibagiukaku'i.”
9Iuli-Na Yesus, “Eo lauria, naratami kahalamaa i hou ei, apa tauna ei mui muli Abraham. 10Apa Ana Manuhia narata mampali tauna to nahalatara pade mampakahalamara.”
Porapa nangkambelai doi bulawa
(Mat. 25:14-30)
11Bulara tauna ee mai nangepe Yesus, laipadola-Na Yesus jarita-Na hante hangu porapa. Patuju-Na nantuturakara porapa ee, habana para-'Imi marata i Yerusalem, pade pekirira tauna, dungku mopamulami Alatala moparenta halaku Magau i dunia.
12Etu pade iuli-Na Yesus, “Hadua maradika madota meongko rau ngata to na'awa, bona raongko'i mawali magau. Napu ee manculi'i moparenta i ngatana moto. 13Kapomana neongko, laikiona hampulu dua lako batua-batuana, laiwaikanara hore-hore hampeka doi bulawa#19:13 Hampeka doi bulawa nahibali hante tomo tauna nobago hatu eo. pade iulikanara, ‘Pagoli komi doi ei duuku marata nculi.’ Napu ee neongkomi maradika ee.
14Naupawee todea to hangu ngatana nampodaa'i pade laipakatura huro nantuku'i, bona manguli hi magau bohe, ‘Moma kami madota tauna ei mai mawali magau kami!’
15Napupi laiongko nawali magau, nanculimi i ngatana. Laituduna batuana mangkiora batua to hampulu dua to laiwaikana doi ee, bona nancani hangkuami kadeana to laiporahikara nopagoli. 16Batua to pamulana narata pade nanguli, ‘Tuama, laiporahikaku hampulu mpeka muipi lako hampeka doi bulawa to laiwaikamu.’
17Iulikana'i, ‘Nabelo mpuu pobagomu etu! Iko ei batua to nabelo! Laipopahiloimu ane mamalako raparahaya rara uruhia to nakodi. Aji, kuwaikako kaparahayaa moparenta hampulu ngata.’
18Napu ee, batua karoduana narata pade nanguli, ‘Tuama, laiporahikaku alima mpeka muipi lako hampeka doi bulawa to laiwaikamu.’
19Iulina mui hi batua to ee mai, ‘Iko mui, kuwaika kaparahayaa mampauruhi alima ngata.’
20Napu ee mai, batua ntanina narata pade nanguli, ‘Tuama, hilo, eimi doi bulawamu, laiboliku i rara pahapu, 21apa naeka'a hi iko. Iko tauna to naheke. Laialamu napa to moma ibolimu pade laisangkimu to moma laihawumu.’
22Laihonoina'i, ‘Iko batua to nadaa ingkumu, kana kuhukuko hante napa to laiulimu. Laincanimu ane aku tauna to naheke. Laialaku napa to moma laiboliku pade laisangkiku napa to moma laihawuku! 23Ane wetu, napa pade doiku etu mai moma laiwaikamu hi tauna to nobago nopagoli doi, bona ane manculi'a kutarima nculi hante kauntuana?’ 24Napu ee iulikana batua-batua to nokangkore i hee, ‘Alami doi bulawa to hampeka etu lako hi hia pade waika hi batua to naria hampulu mpeka doi bulawana etu!’
25Nehonora batua ee mai, ‘Tuama, nariami hi hia hampulu mpeka doi bulawa, napa pade ratambai muipi?’
26Iulina maradika, ‘Ku'ulika komi, butu tauna to namala raparahaya mampauruhi napa to laiparahayaka hi hia, ratambaiki mei to naria hi hia, hampena melabi kadeana hi hia. Naupawee hema to moma namala raparahaya mampauruhi napa to laiparahayaka hi hia, humawee to naria hi hia, kana ra'ala nculi. 27Naupawee bali-baliku to moma nampokono'a mawali magaura, keniramo tumai, pade patehira i tingooku!’ ”
Yesus nehua i Yerusalem ewa hadua Magau
(Mat. 21:1-9; Mrk. 11:1-10; Yoh. 12:12-15)
28Nahudupi Yesus nanguli humawee lauria, laipadola-Nami pomakoa-Na rau Yerusalem. Hia nomako noilodo pade hira to pantuku-Na nantuku-'I. 29Namohupi Yesus i ngata Betfage bo Betania to i bulu to ikahangai Bulu Zaitun, laitudu-Naramo rodua ana guru-Na, 30iulika-Nara, “Koimo komi i ngata to i tingoota mairia. Pehuami i rara ngata, mirata mei hamaa keledai pagurua to laitaka, pade poma'i naria laihawi tauna. Kakami kalorona, pade keni keledai etu tumai. 31Ane maria tauna mampekune komi, ‘Napa pade laikakami keledai etu?’ ulimi, ‘Pue namparaluu keledai ei mai.’ ”
32Napu ee, rauramo rodua ana guru-Na ee mai, lairatara humaweena nahibali hante napa to laiuli Yesus hi hira. 33Pokakara keledai pagurua ee mai, tumpuna nampekunera, “Napa pade laikakami keledai etu?”
34Nehonora, “Pue namparaluu keledai ei mai.” 35Napu ee laikenirami keledai pagurua ee hi Yesus, lailampiira hante waru pokarolapiira, pade laitulungira Yesus nencawi. 36Laihawinapi Yesus keledai ee mai, todea nowole waru pokarolapiira i dala.
37Namohupi Yesus i Yerusalem, i dala panaua lako Bulu Zaitun, humawee to nantuku-'I nagoe-goe pade nampaune Alatala, habana humawee to nepakahera to laihilora. 38#Mzm. 118:26; Luk. 13:35Iulira,
“Laitiroimi Magau to narata halaku huro Alatala!
Nohingkabelomi Alatala hante manuhia.
Raunemi Alatala to i kalangkoana!”#19:38 Nohingkabelomi Alatala hante manuhia. Raunemi Alatala to i kalangkoana! Rara baha Yunani laiuli iwei, “Kanonea i huruga, pade kaogea i kalangkoana.”
39Napu ee, bahangkua dua to Farisi rara kahiromua todea ee nangulika Yesus, “Guru, ulikara to pantuku-Mu malino.”
40Nehono Yesus, “Ku'ulika komi, ane malinora, watu-watu ei mai mongare mampaune-'A.”
Yesus nangkakeohi Yerusalem
41Namohupi Yesus i Yerusalem, kakeohi-Nami ngata ee, 42pade iuli-Na, “Komi todea Yerusalem, nabelo mpuu ane ke ncanimi welau ei napa to iparaluumi bona mirata katuwu to nanone! Naupawee humawee lauria moma ipahami. 43Kana marata mei tempona, bali-balimi mampatikuhi komi pade mampaupi komi lako rima-rima. 44Rapakaropora ngatami pade rapatehira komi. Moma maria hangua watu rapalelera maboli i lolo watu to ntanina, apa moma laincanimi tempo Alatala narata nampakahalama komi.”
Yesus nampopalaira to nobalu-balu i Hou Alatala
(Mat. 21:12-13; Mrk. 11:15-18; Yoh. 2:13-16)
45Napu ee Yesus nehua i karawaa Hou Alatala, laipopalai-Nara tauna to nobalu-balu i hee. 46#Yes. 56:7; Yer. 7:11Iulika-Nara, “Naria laitulihi rara Buku to Nagaha iwei, ‘Hou-Ku hou pohambayaa, naupawee laipowalimi po'ohaara to perampakimi!’ ”
47Butu eona-'I nopatudu tauna i karawaa Hou Alatala. Naupawee, imam-imam to i matana, to nataualu buku Taurat pade totua-totua ngata Yahudi nampali dala bewa mampatehi-'I. 48Naupawee moma naria dalara mampatehi-'I, habana nadea oa tauna namohu hi Hia, mingki mangepe patudu-Na.
Currently Selected:
Lukas 19: MYL
Highlight
Share
Copy
Want to have your highlights saved across all your devices? Sign up or sign in
