Lukas 3
3
Yohanes to Pediu
(Mat. 3:1-12; Mrk. 1:1-8; Yoh. 1:19-28)
1Kahampulu alima mpae poparentaa Tiberius halaku Magau Bohe Roma, Pontius Pilatus gubernur i Yudea, Herodes magau i Galilea, Filipus ompi Herodes magau i Iturea pade i Trakhonitis, Lisanias magau i Abilene, 2pade Hanas hante Kayafas laipoimam bohe, tempo ee naratami lolita Alatala hi Yohanes ana Zakharia i tongo mpada to nabai. 3Lauparia, Yohanes rau i humangkulili ngata to naria i Ue Yordan nangkarebai lolita Alatala, iulina, “Kancoromo komi lako doha pade popewaimi wotomi radiu bona Alatala mampa'ampuni dohami.” 4#Yes. 40:3-5To laibabei Yohanes lauria nopaganai peboha Alatala to laitulihi i rara buku nabi Yesaya, iwei,
“Naria to pongare i tongo mpada to nabai,
‘Pahadiaka dala Pue,
pakanoro dala to Napomakoi.
5Butu lobuna kana rapakaiwu
pade butu bulu bo buntina rapakahiraya.
Dala to nopalego kana rapakanoro,
pade dala to nopancoke rapakarano.
6Pade humawee tauna i dunia ei mei mampahilo Alatala mampakahalama manuhia.’ ”
7Pangepera kareba to laiparata Yohanes, nadea tauna narata hi Yohanes mingki radiu. Lauparia Yohanes nangulikara, “He, komi muli ule to narahua, iulimi komi, ane radiudamo komi mamala komi mampetiboka pehuku Alatala to kana madupa mei? 8Moingkumohawo hante ingku to nabelo. Eemi tanda ane mpuu-mpuu nancoromo komi lako doha-dohami. Nemo mipekiri i rara bongomi, ‘Moma kami Nahuku Alatala, apa kami ei muli Abraham.’ Bona mincani, ane Napodota Alatala, watu-watu ei mamala Napajadi muli Abraham. 9Nahadiami baliu i puu kau. Humawee kau to moma nabelo wuana, kana ratowo pade ratene i rara apu.”
10Pangepera to laiuli Yohanes lauria, nepekuneramo todea ee mai, “Napa to kana kibabei?”
11Nehono Yohanes, “Hema to rontau waruna, hantau kana nawaika to moma naria waruna, pade hema to naria koniana kana nababei iwee mui.”
12Tempo ee mui, bahangkua dua to peduhu paja narata mingki radiu pade nampekune'i, “Guru, napa to kana kibabei?”
13Laihonoinara, “Nemo meduhu paja melabi lako to laiparentaka komi.”
14Pade bahangkua dua tantara nepekune mui hi Yohanes, iulira, “Ane kami, napa to kana kibabei?”
Nehono Yohanes, “Nemo merampaki pade nemo mamparai tauna hante kalowo bona miala doina. Pakaganami tuwumu hante tomomu.”
15Humawee tauna ee nampaharumaka mpuu pade nepekune i rara bongora, “Nemo-nemo hia eimi Magau to Pepakahalama to laitipa Alatala.”
16Nehono Yohanes, “Aku nampadiu komi hante ue. Naupawee, marata-'I mei to nelabi baraka-Na lako hi aku. Mobole kaloro hapatu-Na aga, moma'a mahipato. Hia mei mampadiu komi hante Inoha to Nagaha pade apu. 17Wera i rara mpale-Nami, Napake mowiri humawee pae-Na hampe magaha opana. Napakagaha mei poihea-Na pade Napalimpuru pae-Na to naihi Naboli i gampiri-Na, naupawee opana mei Napapuhi i rara apu to moma namala laipatehi.”
18Nadea ngaadipi patudu ntani Yohanes noparata Kareba Belo hi todea. 19Yohanes nangkamaro Magau Herodes nangkambelai Herodias, bangkele ompina to ipobangkelena, pade nangkambelai humawee ingku ntanina to nadaa. 20Naupawee laibabeikina laumi Herodes ingkuna to nadaa hante nopahua Yohanes i rara tarungku.
Yesus, Ana Alatala, laidiu Yohanes
(Mat. 3:13-17; Mrk. 1:9-11; Yoh. 1:32-34)
21Nahudurapa humawee tauna laidiu, Yesus mui laidiu. Bula Yesus laidiu bo nohambaya, natebeami langi, 22pade Inoha to Nagaha nanau ewa hamaa tonci bangkebodo nentuu hi Hia, pade laiepe to nololita lako huruga nanguli, “Ikomi Ana towea-Ku, to laipokagoe-Ku.”
Tumpuloko Yesus
(Mat. 1:1-17)
23Tempo Yesus nopamula bago-Na, umuru-Na maria tolu mpulu mpaemi. Mantuku panguli tauna, Hia ee ana Yusuf. Yusuf ee ana Eli.
24Eli ee ana Matat, Matat ee ana Lewi,
Lewi ee ana Malkhi, Malkhi ee ana Yanai,
Yanai ee ana Yusuf, 25Yusuf ee ana Matica,
Matica ee ana Amos, Amos ee ana Nahum,
Nahum ee ana Hesli, Hesli ee ana Nagai,
26Nagai ee ana Maat, Maat ee ana Matica,
Matica ee ana Simei, Simei ee ana Yosekh,
Yosekh ee ana Yoda, 27Yoda ee ana Yohanan,
Yohanan ee ana Resa, Resa ee ana Zerubabel,
Zerubabel ee ana Sealtiel, Sealtiel ee ana Neri,
28Neri ee ana Malkhi, Malkhi ee ana Adi,
Adi ee ana Kosam, Kosam ee ana Elmadam,
Elmadam ee ana Er, 29Er ee ana Yesua,
Yesua ee ana Eliezer, Eliezer ee ana Yorim,
Yorim ee ana Matat, Matat ee ana Lewi,
30Lewi ee ana Simeon, Simeon ee ana Yehuda,
Yehuda ee ana Yusuf, Yusuf ee ana Yonam,
Yonam ee ana Elyakim, 31Elyakim ee ana Melea,
Melea ee ana Mina, Mina ee ana Matata,
Matata ee ana Natan, Natan ee ana Daud,
32Daud ee ana Isai, Isai ee ana Obed,
Obed ee ana Boas, Boas ee ana Salmon,
Salmon ee ana Nahason, 33Nahason ee ana Aminadab,
Aminadab ee ana Admin, Admin ee ana Arni,
Arni ee ana Hezron, Hezron ee ana Peres,
Peres ee ana Yehuda, 34Yehuda ee ana Yakub,
Yakub ee ana Ishak, Ishak ee ana Abraham,
Abraham ee ana Terah, Terah ee ana Nahor,
35Nahor ee ana Serug, Serug ee ana Rehu,
Rehu ee ana Peleg, Peleg ee ana Eber,
Eber ee ana Salmon, 36Salmon ee ana Kenan,
Kenan ee ana Arpakhsad, Arpakhsad ee ana Sem,
Sem ee ana Nuh, Nuh ee ana Lamekh,
37Lamekh ee ana Metusalah, Metusalah ee ana Henokh,
Henokh ee ana Yared, Yared ee ana Mahalaleel,
Mahalaleel ee ana Kenan, 38Kenan ee ana Enos,
Enos ee ana Set, Set ee ana Adam,
Adam ee ana Alatala.
Currently Selected:
Lukas 3: MYL
Highlight
Share
Copy
Want to have your highlights saved across all your devices? Sign up or sign in
