Yohanes 14
14
“Sup An Nasin adema laup andi, Anat,” yiluk, yugeragagi wene
1Yugirigya lagagirik, Yesus en At ane welagwi menda wene ambi inim yugirigya dugwit, “Hit henendawi anggin dogobuk. Ala inim, An ninim, henendawi nenovaga vanggabaluk, avyarat ninumbutu dogones. 2An Nasin amwa andoma avakwa dogop wisane agarik atma. Anderogo dek duklipmu en, “Hit dogopim andoma An dikduk erogo bigigagiluk, landiga o,” yiluk, yukherelabuk. 3An andi hit dogopim andoma dikduk erogo bigiga lagya dogomindik, hit An werekma andoma ninim dogoguluk, hivis hondokhinivi warugwis. 4An lapim andoma sup laup ako hit hinilup aro,” yiluk, yugeragagi.
5Yugirigya lagagimu, Tomas en, At yugugu dugwit, “Nasin, Hat layogonma andoma nit ninunggut atma, sup nit nggarogonggan en ninilup arumwi?”
6Yugugu lagagimu, At Yesus en yugirigya dugwit, “Sup Ala adema laup inim, avyarat wene Ala avok yukheraliga inim, hiniluk okhinivisiga adem inim, andi An nadigat. At saen sup An vaga wagetek halok, An Nasin adema lasogom mondok dek. 7Hit avyarat An hinilup agipik halok, An Nasin ogo, hinilup-at agipik. Yogak yiat At eyave hinil hegep atma, At hinilup aro,” yiluk, yugeragagi.
8Yugirigya lagagimu, at Pilipus en, “Nasin wai! Hat Hasin andi ninil haguluk eyave inuk neran. Inuk nirigya heyalok, nenendawi hogo yusogom.”
9Yugugu lagagimu, At Yesus en, “Pilipus wai! An o muk erogo hinimat welagyo ovara, hat ao dibanenggetek dugwit, yagaliga? Ap ambi saen An neyaliga halok, An Nasin-at il haliga atma, harenen, ‘Hasin inuk neran,’ yegen andi, nggarogo yiluk yegen? 10An andi, Nasin inim hunik, eke, Nasin andi, An ninim hunik ako andi, hat avyarat ombasigadek? Wene An yukheraliga ako, An nadik nendawi wenggebaluk en yukheraligadek. Ata, An Nasin nendawima agarik ako enat ogasiga. 11An Nasin inim hunik, eke, Nasin andi, An ninim hunik ako avyarat umbutu dogones. Eke, An nane yi avyarat ombarup henanggon halok, An nggarogo ogarubuk menda ogarit lagya neyagep ako vaga Nasin niperen nenendawi hunik ako avyarat numbutu dogones. 12Ap ambi saen endawi novaga vanggabaluk, avyarat nimbita halok, An ogasiga akoat ogagya dogosogon. An ogasiga yi maduk. Eke, An Nasin adema lamindikmu andi vaga, at saen novaga vanggabaluk avyarat ombasiga ako mondok ombogat ogagya dogosogon o, yiluk, mondok avyarat yukheraliga. 13Hiren An ninis vaga, ‘Anderogo okbininin o,’ yiluk, Ala nggino yugugu hiniselok, Abut An ogarimi vaga Nasin inis ombok arupwak yiluk, okbugugu neyagup. 14Ambi okbigigaup yiluk ninis vaga nggino yuknugu hiniselok, Anenat okbugugu neyagup,” yiluk, yugeragagi.
Ala Averiniki warup yugeragagi wene
15Yugirigya lagagirik, Yesus en ambi inim yugirigya dugwit, “Hit An henendawi hunik oknitu hiniselok, Anen, yerogo ogarup, nderogo ogarup, yukheraliga ako des erogo ogagu dogosogom. 16-17Anderogo ogagusim, An Nasin nggino yugugu neyalok, Aren adik ambi, yonggat-hinipu dugwit hinim mondok dogopwak yiluk, lakba warisogon. At ako, Ala Averiniki en, avyarat wene Ala avok yukhirigya dogosogon. It o wen vaga yoma agarwik akoen Ala Averiniki inil hegetek inunggut atma, iren At eyave andi waup meyan. Anderogo ovara, hit halok andi, At hinim agarik, eke, hivis, henendawima dogosogon atma, eyave hinilup aro.”
18“Naburi o! An avyak wenavorangge ovagak hekbigiluk layogonbuk. Ata, hivis neyami vaga henadoma wasogon. 19An ambukumat dukluk layogon atma, it avakwa o wen vaga yoma agarwik ambi inim neyasogombuk ovara, hit andi, neyagu dogogup. An niluk agirik atma, hit ogo hiniluk-at dogogup. 20O andi vaga An Nasin inim hunik, hit An ninim hunik, eke, An hit hinim hunik ako hinilup arugup.”
21“Ap ambi saen An nane, yerogo ogarup, nderogo ogarup, yukheraliga ako wokbaluk ogagya dogosogon halok andi, An endawi hunik okneraliga ako at andiat. Aren An endawi hunik oknitya halok andi, An Nasin en ap andi, endawi hunik ogagya dogosogon. Eke, An ogo, at endawi hunik ogagya dugwit, aren An neyapwak yiluk, inugirisogon o,” yiluk, yugeragagi.
22Yugirigya lagagimu, at Yudas Ikariot ako dek, ap Yudas adik ambien Yesus yugugu dugwit, “Nasin! It avakwa ovok erogo heyapwak yiluk inugerayogonbuk, nit nenadigat inuk neraup yegen andi, nggarogo yiluk yegen?”
23Yugugu lagagimu, At Yesus en, “Ap ambi saen endawi hunik oknitya halok, An nane des erogoat ogagya dogosogon. Anderogo ogagya halok, An Nasin en at endawi hunik ogarisogon. Eke, An Nasin niperen at adema wagu dogomindik, ninimat dogosogom. 24Ap ambi saen An endawi hunik oknerayogonbuk halok andi, An nane ndatak ogagya dogosogonbuk. Wene An yukheraliga hit hulisagwi ako andi, An nendawi wenggebaluk en yukheraligadek. Ata, At lakbani wagagi Nasin ako iri halok, yukheraliga.”
25“Wene yukheraliga ovok erogo yi andi, An ao hinim dugwit, yukheraliga. 26Ala Averiniki en hit yonggat-hinipu dogopwak yiluk, Nasin en An ninis vaga lakba wasogon akoen yi wene ndi wene ovok erogo mamulhirigya, eke, yi wene ndi wene yukhirigya lagagis ako hinunggut arugwi en yiluk, ovok erogo hinilup okbugugu, ogagya dogosogon. 27Henendawi anggin dugwit, henalon habuk. Henendawi ugun seyalek wadokdek adenggen dogovovok yiluk, okbigiluk layogon. It avakwa o wen vaga yoma agarwik en okbiselagwi hak, An anderogo okbigigaligadek. Ata, An nendawi ugun seyalek wadokdek adenggen agirik akoat okbigigaliga.”
28“An layogon ovara, hivis henadema warisogon, yukhirigi ako vage henaruk hunggip. An andi, maduk. Eke, An Nasin andi, ombok atma, hit henendawi hunik okbanilipmu en, ‘At Asin adema layogon atma,’ yiluk, henendawi adenggen ombok umbutu duklip. 29Wene yi yukheraliga ako, atma des iri halok, henendawi novaga vanggabaluk, avyarat nombarugup yiluk, ao oklagetek hegek, yukheraliga. 30It avakwa o wen vaga agarwik enowa inis ombok Sile ako vage wandiga atma, wene ambi inim adup erogo yukherayogonbuk. At wagya dogomindik, An at avema banup mondok dek. 31It o wen vaga yoma agarwik akoen An Nasin nendawi hunik agirik inilup arupwak yiluk, An Nasin en, ‘Yerogo ogarup, nderogo ogarup,’ yuknisiga ako wane-wane-at ogasiga.”
Yugirigya lagagirik, “O yoma hekbaluk, lasogom o,” yiluk, yugeragagi.
Currently Selected:
Yohanes 14: nbq2013
Highlight
Share
Copy
Want to have your highlights saved across all your devices? Sign up or sign in
