Lukas 22
22
Yesus warup wene mbanggugwa wene
(Matius 26:1-5; Markus 14:1-2; Yohanes 11:45-53)
1Isogo Erom Roti Virisigadek Menda inis Vasika#22:1: Isogo Erom Roti Virisigadek Menda inis Vasika ako, saut Maret a, April a, isogo ombok isagu lagagwa. Isogo Vasika ogagu dugwit, wam ndomba eyak warogo nunggu lagagwa. It ogagagwa andi, it enombawi o muk Ala en o Mesir en visilogo wogonombolok wulu wagagi ako inilup dogoguluk adenggen ogagu lagagwa. Keluaran 12:17-20 yokhanes. ako, adenggen isarup vage vanggo yi wagagirikmu, 2it imam-imam enasini inim, it ap Ala wene vagago welagagwa menda inim, iren avakwa wisane ako enalon en, “Yesus nggarogonggan waruk?” yiluk, mbauk erogo wene mbalit nagu lagagwa.
Yesus warupwak yiluk, Yudas yonggo lagagi wene
(Matius 26:14-16; Markus 14:10-11)
3Mbauk erogo mbalit nagusim, at Sile en it ap 12 menda ambi inis Yudas Ikariot endawima nonggagagi. 4Nunggwigya lagagimu, it ap imam-imam enasini inim, it Ala awi valek malogo welagagwa enasini inim, at Yudas en yugirigya dugwit, “Yesus warovovok yiluk, nggarogonggan wokheraik,” yiluk, inim wene mbali lagagi. 5Inim wene mbali lagya lagagimu, it enendawi enadenggen umbutu dugwit, “Onggo yoparip wokhurusogom,” yugugu lagagwama, 6at Yudas akoen, “E o,” iri lagagirik, “Avakwa inivaga dekma oklarup eyave vagago wogeraup nanonggal o ngga vaga agya hami?” yiluk, sok higya lagagi.
Isogo Vasika isarup wene
(Matius 26:17-25; Markus 14:12-21; Yohanes 13:21-30)
7Adenggen Erom Roti Virisigadek Menda ogagusim, isogo Vasika isaruguluk ndomba warup amor ari wagya lagagimu, 8At Yesus en Peterus Yohanes iperen lakbugu dugwit, “Isogo Vasika nit naup dikduk erogo belales.”
9Yugirigya lagagimu, iren, “O nggoma nit dikduk erogo belauk?”
10Yugugu lagagwama, At Yesus en, “Hit o kota andoma nunggugu dogomundik, ap ambi is sogolowak vaga nudik wolok lagyama, hinim avuk akluk, ap ako amwa nunggwigya halok, hinim nunggwilalo. 11Hinim nunggugu dogomundik, ap awi werek ako yugugu dugwit, ‘Nenasin Ngguru en, “An nane welagwi menda ako ninim isogo Vasika naguluk, o kamar nggoma vokot werek? yugurup,” yukneragarikmu, yukhisagwi.’ 12Anderogo yugugu hiniselok, at ap awi werek akoen o handimen kamar ombok ogorek ambi ovok ogarek yukhirigya halok, andoma-at isagago belalo,” yiluk, lakbogogi.
13Lakbogogi ako lagu lagagwarik, Yesus en it yugeragagi ndatak-at hugu lagagwarik, andoma isogo Vasika isagago belagagwa.
Erom amburup naup mamuleragagi wene
(Matius 26:20-30; Markus 14:22-26; 1 Korindus 11:23-25)
14Isagago belagagwa ako vage naup vanggo iri lagagimu, Yesus en it lakbigik denogo bogogi menda ako inim hora yagagwa. 15Hora yugu lagagwarik, Yesus en it yugirigya dugwit, “An nova edup-mbedup okbanenggetek hegek, isogo Vasika isago yi, ninim naup ai, yiluk, hinim nasogom. 16Nunggu dogomundik, hivis Ala en avakwa At avema mondok-mondok bugu dugwit, ‘Isogo Vasika eve sek menda adem yi aro,’ yiluk, yedok hagup atma des yi lagatek hegek, An isogo Vasika ako yogak yi hudi ninim nasogombuk ai, ombasiga o, yiluk, avyarat yukheraliga.”
17-18Anderogo yugirigya lagagirik, is owak inggimu wigya lagagirik, “Ai Nasin Ala wa!” yiluk, “An yogak ninim okbaluk hivis Ala en avakwa At avema mondok-mondok bisaup ako ao ari wagetek hegek, An anggur enggen amburup yi, nenggetek dogosogon atma, hidugu dogomundik sumbukhedomanes, yiluk, yukheraliga.”
19Yugirigya lagagirik, roti inggimu wigya lagagirik, “Ai Nasin Ala wa!” yiluk, ugurogo wogirigya dugwit, “Yi An neyave hit henake denek ako yi atma, an henape wenggelnitu dugwit, nunggu dogones.”
20Yugirigya lagagirik, nunggu lagagwama, amburup nudik anderogoat inggimu wigya lagagirik, “Hit visilogo bigigagiluk henonggo bagya dugwit namuya wilisogon ako andi, amburup yi aro. Wene swi menda Ala hinim dambubigigaup yiluk, nggatuk erogo yukheragagi ako, An namuya vaga mondok atma des yisogon,” iri lagagirik, wogeragagi.
21Wogirigya lagagirik, “Avyak! Ap An narupwak yiluk, yugerayogon ako ninim erom naliga yoma agarik. 22An Ap-At Endaklagagis okbanup ako Ala imbitigi ndatak-at okbanisogon ovara, at narupwak yiluk avakwa yugerayogon ako andi mondok anggin iya erogo ovaga arugwi o.” 23Yugirigya lagagimu, “Saen ogarup halok yagas?” yiluk, iren at ambi yugigik, at ambi yugigik yagagwa.
An iya, hat iya, yagagwa wene
24At ambi yugigik, at ambi yugigik yugu lagagwarik, andien, “An iya, hat iya,” yugu dugwit, wene winimuk yagagwa. 25Winimuk yugusim, At Yesus en it yugirigya dugwit, “It ap weram menda enasini ininis ombok en enane anye vaga enaburi yerogo ogarup nderogo ogarup yiluk, wene yugurugwi, eke, it ap ombok-ombok en avakwa ‘Nenasini sek menda wa,’ yukneraup umbutwi, ogasagwi ovara, 26hit andi, anderogo yugu dogobuk. Ap ombok ambi henanggelekma agarik halok, at avyak maduk ovagak arupwak. Eke, at wene yugeraliga menda ako ogo, henayeloman-at arupwak. 27Sa andi eve iya erogo agarik ombasagwi? At erom naliga andi, iya a, ata at naliga ako ake yi welagek ndi welagek ogasiga andi iya a? Dek. At naliga menda ako iya agarik. Anderogo ovara, An henanggelekma dugwit, henayeloman ovagak akluk, henake yi welagek ndi welagek ogasiga.”
28“Anggin-mbanggin okbanunggusigik, hit An hekbanilagwidek mondok ninim agipik atma, 29-30Nasin en avakwa navema bisapwak yiluk, andok okbaninggigi ako ndatak, hit An navema bisaligama erom nunggwi, is nunggwi, eke, avakwa wene yugerelagwima dugwit, avakwa Iserali menda ininis unggul 12 ako enowak dinggwis, ogagu dogovovok yiluk, andok okbigigaliga,” yiluk, yugeragagi.
Simon Peterus en “Yesus an ninggut,” yisogon, yiluk, yugogogi wene
(Matius 26:31-35; Markus 14:27-31; Yohanes 13:36-38)
31Yugirigya lagagirik, Yesus en, “Simon, Simon! Haruk hulu. Gandum eyave delarupwak yiluk, avudit halok wibelagwi hak, at Sile en hit anderogo henavut mbaligiluk, Ala yugugu lagama, ‘Sek,’ yagas ovara, 32hat hendawi novaga vanggabaluk, avyarat nembeten ako, dek agya heyaoen, An hake samban ogagi. Heyami vaga suguliluk nadema wagya dogomindik, haori yi, enendawi aik wakbugu dogogun,” yiluk, yugogogi.
33Yugugu lagagimu, at Simon en iri dugwit, “Ai Nasin. Heda marogo mabiselagwima mabagagwi, mondok hatwis, ogaguselok, an niperen okbininaup sek ombasiga.”
34Yugugu lagagimu, At Yesus en, “Peterus wai. O yogak yi vaga ayam ane ao yegetek hegek, hat elap henggam vaga, ‘Yesus andi, an ninggut,’ iri heyayogon, yiluk, yukhisiga,” yugogogi.
Enayoparip inim, enasum inim, mbusinggarep erasul inim, wolok laup yugeragagi wene
35Yugugu lagagirik, it ovok yugirigya dugwit, “Endak lakbigigis ako, henayoparip wonggalek inim, yerek-terek wokhiruguselok yekhedamunda yum inim, henaropato ambi adik inim, Anen ‘Wolok labuk,’ yukhirigya lagagis ako, hit yi menda ndi menda dek ambi welagagup a, dek a?”
Yugirigya lagagimu, iren, “Dek. Nit nenangge ambi dek welagatek, Nenasin.”
36Yugugu lagagwama, At Yesus en, “Anderogo ovara, yogak en henayoparip wonggalek agarik halok wugwi, yerek-terek wokhiruguselok yekhedamunda yum werek halok wugwi, eke, mbusinggarep erasul dek halok, henayum sogwesum weram menda vaga ambi hunhidugwi, ogagu dogones,” yugeragagi.
37“Andi, Ala en iri dugwit, ‘At ap weyak menda inim ininggis dingginggugwa,’ yiluk, yagagi dirup warek ako, An ogarimi vaga atma des yisogon, yiluk, yukheraliga. An okbanup yiluk, dirup watugwa ako o yogak yi atma des yi wandiga halok, yukheraliga.”
38Yugirigya lagagimu, iren, “Mbusinggarep erasul mberen yi agarik, Nenasin.” Yugugu lagagwama, At Yesus en, “Arat,” yiluk, yugeragagi.
Ndom Saitun vaga dugwit, samban ogagagi wene
(Matius 26:36-46; Markus 14:32-42)
39Yugerelok akoma en wunggu lagagimu, ndom Saitun vaga enggek yagaligama, andi hudi ogo Arat inggigi. Inggya lagagimu, At ane welagwi menda ako inim unggugwa.
40Dagaup imbitigirikmu akoma lagu lagagwarik, it yugirigya dugwit, “Weyak ogarup henendawima mali wagya haoen, samban adigat ogagu dogones.”
41Yugerelok, helep yamburisagwi ako hak, At horok adumu hedarek lagya lagagirik, erambo yunggubaluk, samban ogagagi. 42Samban ogagya dugwit, “Ai, Nasin! Yogak edup-mbedup okneraup ako, dek okbaup imbita heyalok, dek okbain. Eke, dek halok, An ogarup ombasiga andi asugen. Hat ogarup embeten akoat ogarisogon o.” 43Yugugu lagagimu, malaikat ambi mbogot vaga en At adema sigam ari wagya lagagirik, endawi modo okbagagi. 44Endawi modo okbagya lagagimu, endawi mondok wakhidigya dugwit, abwa edok erogo samban ambi inim ogagagi. Ogagya hegek, digak winggigi ako amuya enggen mbalek ovagak ndek erogo wen vaga wombagagi.
45Samban okbaluk, mendek iri lagagirik, At ane welagwi menda enadema eyami vaga lagya lagagirik, it enendawi mondok burup iri halok, nogo yugu sogogi. 46Nogo yugwis ako inigu lagagirik, it yugirigya dugwit, “Hit nano yiluk nogo yilagwi? Weyak ogarup henendawima mali wagya haoen, hiniluk akluk, samban ogagu dogones,” yiluk, yugeragagi.
Yesus vagatugwa wene
(Matius 26:47-56; Markus 14:43-50; Yohanes 18:3-11)
47Wene andi ao yugirigyama, it ap 12 menda ambi inis Yudas ako endak wagya hegek, ap eneyave ambi homago ambetaga wagagwa. It ambetaga wagusigik, at Yudas endak Yesus wa yugirigiluk, adema horok ari wagya lagagimu, 48At Yesus en, “Yudas wai! Hat wa yuknirimi ako vaga An Ap-At Endaklagagis yi, avakwa en narupwak yiluk, wogeraup embeten yi?”
49Yugugu lagagimu, it Yesus inim welagagwa akoen it Yudas melen ogaruguluk, wagagwa ako yedok inigu lagagwarik, “Nenasin wai. Mbusinggarep vaga enaruk a?”
50Yugusigik, it ambien ap imam-imam enasin inis ombok ayeloman aruk amot vikit sobalogo lakbagagi.
51Sobalogo lakbagya lagagimu, At Yesus en, “Anderogo ogarubuk,” yiluk, ap ako aruk inggis vakbagya lagagirik, sek okbagagi.
52Sek okbagya lagagirik, At Yesus en it At vagaruguluk wagagwa imam-imam enasini inim, it Ala awi valek malogo welagagwa enasini inim, it ap ombok-ombok inim, ako yugirigya dugwit, “Ap enonggop agodem welagwi menda vaginivisagwi ako hak, An anderogoat vakneraguluk, yaga veram inim, yo mbandugul inim, wolok wagep yi? 53Ndugurek-ndagarek Ala awi valekma ninim neyagek, vaknetetek welagep ovara, at o hwiserek andok ako hinim okbanup yogak yi atma, ogares,” yiluk, yugeragagi.
Peterus en, “Yesus andi An ninggut,” yagagi wene
(Matius 26:57-58, 69-75; Markus 14:53-54, 66-72; Yohanes 18:12-18, 25-27)
54Yugirigya lagagimu, Yesus vagatu lagagwarik, wolok ap imam-imam enasin inis ombok amwa akoma balagagwa. Balagusigik, Peterus ako enambetaga yamamek lagagi. 55Imam-imam enasin inis ombok ako amwa balagu lagagwarik, at awi mbumbumu andoma hali hubaluk, horaik werekma, Peterus ako enanggelekma hora yagagi. 56Hora yiluk werekma, hwavyak ambi hali hunik awiya vaga Peterus eyave horaik werekma higya lagagirik, at il vurek dugwit, “Ap yi ogo inim wiligya laga.”
57Iri lagagimu, Peterus en an dik-dek iri dugwit, “Hwavyak yi! Ap andi, an mondok ninggut,” yugogogi.
58Yugugu lagagimu, hivis ap ambi adik en Peterus higya lagagirik, yugugu dugwit, “Hat ogo, At menda heyagi!”
Yugugu lagagimu, at Peterus en, “Avyak! An mondok dek!”
59Yugugu lagagimu, andien hivis, mo il ambi okbaluk, ap ambi adik en ane vanggo erogo yugu dugwit, “Ap yi, Galilea menda atma, at ogo inim avyarat wulugu lagao.”
60Yagagi ovara, Peterus en, “Avyak! Hat yegen andi, an mondok ninggut aro.”
Ao yuguguma, ayam ane yagagi. 61Ane iri lagagimu, Nenowa Yesus elokwe endenogo Peterus bikhigya lagagimu, Peterus akoen, “‘O yogak yi vaga ayam ane ao yegetek hegek, hat elap henggam vaga, Yesus an ninggut, yisogon o,’ yuknigas ako, yiat yagas,” yiluk, ape wenggenggu lagagirik, 62weram wunggu lagagirik, endawi burup iri dugwit, yup iya erogo yagagi.
Yesus wiyiknom-weyaknom erogo yo yawi watugwa wene
(Matius 26:67-68; Markus 14:65)
63It ap Yesus vagago welagagwa akoen Yesus aganda yagu dugwit, yo yawi watugwa. 64At il kain vaga vwi okbaluk, ambi inim watu dugwit, “Saen hatya hegen? Iru!” 65Yiluk, At wiyiknom-weyaknom erogo bagu dugwit, wene andi menda adigat wisane erogo yugogogwa.
Yesus owak dinggugwa wene
(Matius 26:59-66; Markus 14:55-64; Yohanes 18:19-24)
66Eke, o yanggo iri lagagimu, it Yakuri enawene amburup mbalisagwima ap ombok-ombok inim, ap imam-imam enasini inim, ap Ala wene vagago welagagwa menda inim, homakbaluk, werekma, Yesus awene amburup mbalupwak yiluk, At eyave wolok it enadema balagu lagagwama, At yugugu dugwit, 67“Ala en denogo mondok okbagagi Mesias ako, Hat heyalok, yukneran.”
Yugugu lagagwama, At Yesus en, “An yukhirigya neyalok, hit avyarat nombarusogombuk, 68eke, Anen hit hemethinitu neyalok, hiren onggo yuknirisogombuk atma, An nggarogo yukheraik? 69Yogak yi hudien andi, An Ap-At Endaklagagis yi, At Anye Adigat Agarik Ala ako inggis amot vikit horaik dogosogon.”
70Yugirigya lagagimu, it ovok erogo At yugugu dugwit, “Eke, andi halok, Hat yi Ala Abut a, dek a?”
Yugugu lagagwama, Aren, “Hit yegep andiat.”
71Yugirigya lagagimu, iren, “At adigat yagas nit vage hunggup atma, wene ambi ngga yuknerapwak yiluk, yagalagwi? Degat!” yiluk, yagagwa.
Currently Selected:
Lukas 22: nbq2013
Highlight
Share
Copy
Want to have your highlights saved across all your devices? Sign up or sign in
