Yohanes 8
8
1hampoꞌ dea ti Yesu lumao i Mungku Saitun. 2I hingkoꞌna, mingkakaꞌ bùruꞌ pole i kaoneang Tamming Kabussùngang, pang nasang tau bùruꞌ mao i Dea. Jadiꞌ, Yesu mesong mampaturo:‑i se.
3Bùruꞌna‑mi ti ung si manarangna i aluku tu Yahudi pang tu Parisi, mambaha besa bahine ung nilampiꞌ malahang. Na suo:‑i se ti bahine to tèdeꞌ i lummu:, 4màli: na musua:‑i se mao i Yesu teꞌ, “O Tungguru, bahine tee nilampiꞌ tarrang malahang, 5pambàtiꞌ i laling atorang-atorang Musa, ta na suo: Musa teꞌ bahine ung mène: tee parallu nihatui deaꞌ mate. Kinta: deꞌ, mangaka ti pantangaꞌTa?”
6Mingkutiki‑i se mène: to, mangkakaꞌi‑I, mangking ara ung hela na pantannaꞌ‑ing se. Hampoꞌ mutatengke: teng ti Yesu, pang muronno: i tampo: mampake hùngang kangkangNa.
7Tòna lupu‑i se mangkutiki, tèdeꞌ, pang musua: moa teꞌ, “Isai-sai i àlaꞌmu se ti ung dang ara kasalaangna, na dea ti ung midolung mantumpa:‑i.” 8Ladu to, mutatengke: pole pang muronno: kang ho i tampo:.
9Na sàdingna‑i se ti suana Yesu to, malai‑mi se si besa-besa, na rara nai ung matua: umuruꞌna. Na palii:‑i se ti Yesu sola: bahine to, ung tèdeꞌ maang i lummu:.
10Tèdeꞌna‑mi ti Yesu pang mangkutiki‑i moa teꞌ, “Iaka‑mi se Ina:? Haranna‑i se naꞌ ung manghukung‑ke?”
11Misùmunna‑mi teꞌ, “Hari: Tuang.”
Na konaina‑mi Yesu teꞌ, “Koi: ho, hang Ku hukung‑ke. I latenna, nàmo:, pang hau mampukauꞌ hura: dosa.”]
Yesu dea‑mo kamasilaoang ung massilaoi: lino
12Ara kang ho na musua: ti Yesu mao i tau boso: teꞌ, “Koi:‑mo ti kamasilaoang ung massilaoi: lino. Tau ung mangulaꞌ‑Kaꞌ, harai:‑da na mammulao i kamakarinnìngang, sangadinna mangampua kamasilaoang ung mi patuho:.”
13Musuana‑mi se ti tu Parisi teꞌ, “PassabiimMu to, mampatu: kalenanna teng kalaeMu. Deanna‑mo to, hang sipatu:‑ida nitarima.”
14Na sùmui Yesu teꞌ, “Na moi passabiingKu mampatu: kalaeKu, sipatu:‑da nitarima, sàbaꞌ Ku ìsang‑ko nai iaka ti bùruꞌKu, pang pàli iaka ti Ku lumaꞌi. Hampoꞌ dio se, ha u ìsang‑ko se nai iaka ti bùruꞌKu, pang pàli iaka ti Ku lumaꞌi. 15U mangesòngi dosse: pangaena tau siulaꞌ kabiasaangna tulino. Hampoꞌ Koi:, hang mangesòngi‑Kaꞌko pangaena moi besa tau. 16Hampoꞌ ìna Ku mangesòngi, sipatu:‑da ti ung Ku kàtui, sàbaꞌ hang Koi:‑kaꞌko teng, sangadinna Ku na pasola:‑ko Ama: ung mampantuyu‑Kaꞌ.
17I laling atorang-atorang Musa, dea‑mo atorang-atorangmu se, nironno: moa teꞌ ìna ara passabii ung sibali nai idua tau, baꞌ sipatu:‑da nitarima. 18Pang ara‑da idua ung mampadeaꞌ passabiinNa mampatu: kalaeKu, dea‑mo Koi: pang AmangKu ung mampantuyu‑Kaꞌ.”
19Mingkutikìna‑mi se moa teꞌ, “One: iaka ti AmamMu?”
Na sùmui Yesu teꞌ, “Hang Mi ìsang‑ko dosse: ìnang, mène: ho ti AmangKu. Àla: ung Mi ìsang‑ko se, manassa‑da u ìsang se ho ti AmangKu.”
20Nasang to, na pusua: Yesu tempona mupaturo: i kaoneang Tamming Kabussùngang, dungkuꞌ i panti-panti pangànaang pinomba. Pang hari: moi besa tau mantingkang‑I, sàbaꞌ hang na lampiꞌ‑mida ti tempoNa.
Yesu hang nai lino‑ida
21Musua: kang ho ti Yesu mao i dei: se teꞌ, “Ku lumaa‑moko, pang u Mi okaꞌa se. Hampoꞌ u matea se i laling dosammu. Hang hela‑ko dosse: lumao i anto ung Ku lumaꞌi.”
22Sikutikìna‑mi se ti ung si nipiama: i aluku tu Yahudi teꞌ, “Mintuyoa‑Da naꞌ pùna musua: mène: to? teꞌ, ‘Hang hela‑ko dosse: lumao i anto ung Ku lumaꞌi.’ ”
23Musuana‑mi ti Yesu teꞌ, “U nai hoiꞌ dosse:, nai lino tee. Koi:, Ku nai iaho‑ko. Hang nai lino tee‑Kaꞌko. 24Dea‑mo to pu Ku musua: matung teꞌ, U matea se i laling dosa-dosammu. Sàbaꞌ ìnang u matea se i laling dosa-dosammu, i dang nu patongang‑ko se moa teꞌ Koi:‑mo ti Ung Lupu Ara.”*#8:24 Sua: Ung Lupu Ara na pake tu Yahudi manturo: pàli i Puang.
25Mingkutikìna‑mi se teꞌ, “Isai‑Ko sitongangna?”
Na sùmui Yesu teꞌ, “Mène: teng to ung Ku ongi‑mingko se nai pararanna, isai ti Koi:. 26Boso: ti ung hela Ku pusua: pang Ku esòngi mampatu: dio se. Hampoꞌ aka pòteng ti ung Ku sàding nai Dea ung mampantuyu‑Kaꞌ, dea ti ung Ku pusua: i lino. Pang mahulo:‑da ti Dea ung mampantuyu‑Kaꞌ.”
27Hang na pahang‑i dasse: moa teꞌ suaNa to, manturo: Puang Ama:.
28Deanna‑mo to, musua: ti Yesu moa teꞌ, “Ìna u mallanto‑ming se Anaka Tulino, u ìsànga‑mo se teꞌ Koi:‑mo ti Ung Lupu Ara. Pang u ìsànga se ho moa teꞌ hari:‑da moi besa ung Ku pukauꞌ nai kalaeKu kalenanna, sangadinna aka teng ti ung na pipaturo:‑mingNaꞌ AmangKu, dea ti ung Ku pusua:. 29Pang Ku Na terei‑ko ung mampantuyu‑Maꞌ. Hang Na patatang‑Kaꞌko na besa‑i, sàbaꞌ Ku lupu‑ko mampukauꞌ ung Na pusannang.”
30Tòna tarrang mampusua: nasang to ti Yesu, boso:‑mo ti tau ung mampatongang‑I.
Anaka mangulaꞌ ung na pukauꞌ AmanNa
31Musuana‑mi ti Yesu mao i tu Yahudi ung mampatongang‑Mi teꞌ, “Ìna u pàraꞌ se i pipaturoKu, baꞌ u tongang-tongang se pasikolaKu, 32pang u ìsànga‑mo se ti katongangang. Pang katongangang to massalokaꞌio: se.”
33Misùmunna‑mi se teꞌ, “Kami tee, ki hatiꞌna‑ka Abraham, pang hara‑mangka ki na pukaunang isai teng. Aka ti palleona Ta konai: teꞌ, ‘U nisalokaꞌia se’?”
34Na sùmui Yesu teꞌ, “Matantu te ung Ku pusua: matung e teꞌ Nasang tau ung mampukauꞌ dosa dea‑mo kaunangna dosa. 35Pang dea ti kaunang hang pàraꞌ‑ida i tanandapoꞌna tuangna, hampoꞌ anaka, pàraꞌ‑da deaꞌ tùrungna. 36Deanna‑mo to, ìna u na salokaꞌi se Anakàna Puang, u miluhali‑mo se tongang-tongang mardeka.
37Ku ìsang‑ko moa teꞌ u hatiꞌna se Abraham. Hampoꞌ tiꞌ u mangokaꞌ se dalang mampatei‑Kaꞌ, sàbaꞌ ha u tarima‑ko se ti pipaturoKu. 38Aka ti ung Ku ita‑mo i heleꞌna AmangKu, dea ti ung Ku pusua:. Mène: ho ti dio se, mampukauꞌ ung nu sàding se nai amammu se.”
39Misùmunna‑mi se teꞌ, “Amangki, dea‑mo Abraham.”
Musuana‑mi ti Yesu teꞌ, “Àla: ung anakàna‑ko se Abraham, baꞌ manassa àla: u mampukauꞌ se aka ti ung na pukauꞌ. 40Ku mampadeaꞌ‑mo matung katongangang, ung Ku sàding nai Puang, hampoꞌ i latenna u palea: se mampatei‑Kaꞌ. Abraham hang mampukauꞌ‑ida ung mène: to! 41Hampoꞌ dio se mampukauꞌ teng ung na pukauꞌ amammu.”
Misùmunna‑mi se teꞌ, “Kami tee, hang dea‑kangka anakàna lipu:. Amangki besa‑ida, dea‑mo Puang.”
42Musuana‑mi ti Yesu teꞌ, “Baꞌ àla: Puang‑i ti Amammu se, baꞌ àla: u Mi pulemu se, sàbaꞌ Ku bùruꞌ‑ko nai Puang. BùruꞌKu, handei:‑Ko pangkapelaiKu kalenanna, sangadinna nai Dea ung mampantuyu‑Kaꞌ. 43Pu dang nu pahang‑ko se ti ung Ku pipaturo:‑ing, sàbaꞌ hang mio:‑ko se mampisàdìngi pipaturoKu. 44Datuna dihata bulituku ti amammu se, pang u mio: se mampukauꞌ pampuinahanna, sàbaꞌ ìnang papateang‑da nai pararanna. Hara tungka‑ida na toroꞌi ti katongangang, sàbaꞌ hari: katongangang i dea. I kabuto‑i, sipatu:‑da ti to, sàbaꞌ mène:‑moda to ti aena, dea‑mo kabuto-buto pang toaꞌna nasang kabuto.
45Hampoꞌ Koi:, Ku mampusua:‑ko ung tongang, dea pùna hang Mi patongang‑ko se. 46Isai ti nai àlaꞌmu se ung hela manturo: teꞌ ara kasalaangKu? Jadiꞌ, i mampusua:‑Kaꞌ ung tongang, aka dang nu Mi patongang se? 47Dea ti ana-anakàna Puang, mampisàdìngi‑da suaNa. Hampoꞌ dio se, hang dea‑ko se anakàna Puang, pu dang nu pisàdìngi‑ko se.”
Yesu pang Abraham
48Na konaina‑mi se ung si nipiama: i aluku tu Yahudi mao i Yesu teꞌ, “Hang tongang‑i naꞌ ti suaki teꞌ U tu Samaria pang U na katama dihata bulituku?”
49Na sùmuinna‑mi teꞌ, “Hang na katama‑Kaꞌko dihata bulituku, sangadinna Ku massangadi‑ko AmangKu. Hampoꞌ ha Mi sangadi‑ko se. 50Hang mangokaꞌ‑Kaꞌko mangking Ku nipaiaho. Ara‑da ti ung mangokaꞌ‑ingNaꞌ, pang Dea ti ung mangesòngi nasang angkanna. 51Matantu te ung Ku pusua: matung e teꞌ Tau ung mantoroꞌi suaKu, harai:‑da na mate.”
52Musuana‑mi se ti tu Yahudi ung nipiama: to teꞌ, “I latenna, ki ìsang tungka‑mo moa teꞌ U na katama dihata bulituku. Abraham mate‑moda, pang mène: ho ti nasang nabi sintàna:. Hampoꞌ U musua: teꞌ, ‘Tau ung mantoroꞌi suaKu, harai:‑da na mate.’ 53Oꞌ, U konai: naꞌ moa teꞌ U làbi iaho nai amangki Abraham ung mate‑mo, pang nasang nabi sintàna: ung mate‑mo ho? Jadiꞌ, U konai: isai ti kalaeMu?”
54Na sùmuinna‑mi Yesu teꞌ, “I mènena‑i to moa teꞌ Ku mampaiaho kalenanna kalaeKu, hari:‑da palleona ti to. AmangKu ti ung mampaiaho‑Kaꞌ. U moa se teꞌ Dea‑mo ti Puang ung nu pinombai se, 55pambàtiꞌ ha u ìsang‑mo: dosse:. Hampoꞌ Koi:, Ku ìsang‑ko ti Dea. Ìna Ku moa teꞌ, Hang Ku ìsang‑Iko, baꞌ Ku kabuto-buto, mène: dio se. Hampoꞌ Ku ìsang‑ko ti Dea, pang Ku toroꞌi ti suaNa. 56Amammu Abraham haka: tungka sàbaꞌ hela mangita àlo kabùruꞌangKu mao i lino. Haka:‑moda sàbaꞌ na ita‑mo.”
57Musuana‑mi se teꞌ, “Umuruꞌmu hang na lampiꞌ‑mida lima pulona heaꞌna. Aka pu U itaa‑mido ti Abraham?”
58Misùmunna‑mi ti Yesu teꞌ, “Matantu te ung Ku pusua: matung e teꞌ Hang ara‑mi ti Abraham, Ku ara‑moko, Ung Lupu Ara.”
59Na sàdingna‑i se ti suaNa to, ung mangkonai: kalaeNa Puang, na ala‑i se ti hatu àla: na panghatui‑ing. Hampoꞌ hùling nai pihelena‑i se ti Yesu, pang mampalii: kaoneang Tamming Kabussùngang.
Currently Selected:
Yohanes 8: skx
Highlight
Share
Copy
Want to have your highlights saved across all your devices? Sign up or sign in
