Yohanes 9
9
Yesu mampapaita besa tau ung buta songka: aranna
1Tempona Yesu tarrang mammulao, mangita besa muane ung buta songka: aranna. 2Mingkutikìna‑mi ti pasikolaNa teꞌ, “O Rabi, ummanna ti ung mampukauꞌ dosa ung mambùruꞌ‑ing tau tee nikianaka buta‑ingda? tau tee? dea‑raka tudolunna.”
3Na sùmuinna‑mi Yesu teꞌ, “Tau tee buta, handei:‑da sàbaꞌ dosanna, dea‑raka dosanna tudolunna. Hampoꞌ mangola: kabutaangna, nipupiitaa ti kamaꞌangna Puang i dea. 4Tempona masilao: maang, parallu ni mangkamaꞌ kamaꞌangNa ung mampantuyu‑Kaꞌ. Hengia‑mo, tempona hari: moi besa tau ung hela mingkamaꞌ. 5Tempo Ku one: maang i lino tee, Koi:‑mo ti kamasilaoang ung massilaoi:.”
6To Na pusua:‑mo ti to, mitangkudunNa‑mi i tampo:, màli: Na pasilaoko‑i tampo: ti tangkudunNa. Na pirrupaꞌna‑ming i matanna tau to, 7màli: na musua: teꞌ, “Nàmo: muhunniaꞌ i Limmong Siloam.” (Siloam, palleona nipantuyu.) Lumanna‑mi muhunniaꞌ. Pang dea tòna mangule:‑ing, paita‑mo.
8Nai anto, tau sidungkuꞌna rasangna pang tau ung si ara‑mo na mangita‑i kapalau-lau, musua:‑i se teꞌ, “Oꞌ handei: naꞌ tau tee to ung biasa mesong kapalau-lau?”
9Ara ung moa teꞌ, “Dea hanga‑da.” Pang ara ho ti ung moa teꞌ, “Handei:‑da, musarrupanna‑da.”
Hampoꞌ tau to‑mo ti ung mampusua: kalenanna teꞌ, “Koi:‑mo ti to.”
10Jadiꞌ, na silàhana‑ming se teꞌ, “Mangaka pu u paita‑mo deꞌ?”
11Misùmunna‑mi teꞌ, “Tau ung nikonai: Yesu to, mampumapètaka tampo:, màli: Na pirrupaꞌ‑ing i matangku pang musua: teꞌ, ‘Nàmo: muhunniaꞌ i Limmong Siloam.’ Lumangku‑mi muhunniaꞌ. Ladu to, ku paita‑moko.”
12Na konaina‑mi se teꞌ, “Iaka‑mi ti Tau to?”
Misùmunna‑mi teꞌ, “Hang ku ìsang‑iko.”
Tu Parisi mamparessa kadadiang to
13Na bahanna‑mi se mao i tu Parisi ti tau to, ung paita‑mo. 14Àlo to, sileo: àlo kapillìheang, ung na kaonei: Yesu mampumapètaka tampo: mampapaita tau to. 15Na kutikìna‑mi dasse: ho tu Parisi teꞌ, “Mangaka pu u paita‑mo?”
Na sùmuinna‑mi moa teꞌ, “Na rupaꞌ pètaka ti matangku. Muhunniaꞌku‑mi, pang ku paita.”
16Deanna‑mo to, pira-pira nai tu Parisi to, mangkonai: moa teꞌ, “Handei:‑da ung nai Puang ti Tau ung mampukauꞌ tee, sàbaꞌ hang Na toroꞌi‑i ti àlo kapillìheang.” Hampoꞌ ara ho sintàna: ung mangkonai: moa teꞌ, “Helaa naꞌ ti tau ung madosa mampukauꞌ kalle-kalleang ung mène: tee?” Urungang sikeboꞌi ti pantangaꞌna‑i se.
17Jadiꞌ, na kutikìna‑mi se pole teꞌ, “Mangaka ti pantangaꞌmu mampatu: to ung mampapaita‑mo:?”
Na sùmuinna‑mi teꞌ, “Nabi‑Da.”
18Tau to‑i se, ung nipiama: i aluku tu Yahudi, hang na patongang‑i moa teꞌ tau to ìnang buta‑da dolung pang i latenna paita‑mo. Jadiꞌ, na pupihàngo‑i se ti tudolunna, 19pang na kutiki‑i se moa teꞌ, “Tongang naꞌ anakàmu se ti tee, ung nu konai: se buta songka: aranna? Mangaka pùna paita‑mo deꞌ?”
20Misùmunna‑mi se teꞌ, “Tongang‑da, anakàki‑ka ti te, pang ìnang nikianaka buta‑ingda. 21Hampoꞌ na mangaka‑da pùna paita‑mo i latenna, hang ki ìsang‑ika. Mène: ho isai ti ung mampapaita‑i, hang ki ìsang‑ika. Belona ìna ta kutiki kalenanna, sàbaꞌ baraꞌ‑mo to‑da. Hela musua: kalenanna.” 22Musua:‑i se mène: to sàbaꞌ mariaꞌ mao i tu Yahudi to‑i se. Sàbaꞌ na kasitoroꞌi‑mi se moa teꞌ isai-sai ti ung mangakui moa teꞌ Yesu‑moda ti Datu: Pipasalamaꞌ, nisaràkia nai jamaa. 23Dea‑mo to pùna musua: ti tudolunna moa teꞌ, “Baraꞌ‑mo to‑da, kutiki kalenanna‑ko dosse:.”
24Deanna‑mo to, na hàngona‑mi se pole ung nipiama: ti tau to, ung buta dolung. Na konai:‑i se moa teꞌ, “Musua: tongang‑ko i heleꞌna Puang. Ki ìsang‑ka ti Tau to, teꞌ ung madosa‑Da.”
25Misùmunna‑mi teꞌ, “Madosa‑raka ti Tau to, hari:‑rika, hang ku ìsang‑iko. Besa‑i ti ung ku ìsang, teꞌ dolung ku buta, pang i latenna ku paita‑mo.”
26Jadiꞌ, na kutikìna‑mi kang‑i se ho teꞌ, “Oꞌ aka ti ung Na pukauꞌ matung deꞌ mampapaita‑ko?”
27Misùmunna‑mi teꞌ, “Ladu‑mo u ku patidolu‑ing se, hampoꞌ hang mio:‑ko se mampisàdìngi. Aka pu u palea: se massàding pole? U mangkapelai: dosse: ho naꞌ miluhali pasikolaNa?”
28Na oraina‑mi se pang musua: moa teꞌ, “Dio‑do ti pasikolana Tau to! Hampoꞌ kami, ki tau ung mangulaꞌ‑ka Musa. 29Ki ìsang‑ka moa teꞌ Puang massilàha:‑ming Musa. Hampoꞌ Tau to, hang ki ìsang‑ika nai iaka ti bùruꞌNa.”
30Misùmunna‑mi ti tau to teꞌ, “Ku kalle tungka‑ko ha u ìsang‑ko dosse: nai iaka ti bùruꞌNa, pambàtiꞌ ku Na papaita‑moko. 31Ta ìsang se moa teꞌ Puang hang mampisàdìngi‑ida pampalaunna tau ung madosa, sangadinna tau ung tuho: massangadi Puang pang mampukauꞌ pampuinahanNa. 32Songka: aranna lino, hara‑mida ni massàding moa teꞌ ara tau ung mampapaita tau ung nikianaka buta‑ing. 33I dang nai Puang‑i ti Tau to, hang hela‑Ida mampukauꞌ aka-aka.”
34Misùmunna‑mi se teꞌ, “Aka o:? Oꞌ dio ung pùno: dosa songka: arammu, u mampaturoa sule: kami?” Na saràkinna‑mi se nai jamaa.
Buta kapatongangang
35Na sàding Yesu moa teꞌ na saràki‑mi se ti tau to nai jamaa. Na okaꞌna‑mi, pang Na kutiki teꞌ, “U patongang naꞌ ti Anaka Tulino?”
36Misùmunna‑mi teꞌ, “Isai‑I Tuang? Pulemu‑kaꞌko, paìsàngi‑kaꞌ mangking ku mupatongang mao i Dea.”
37Na sùmuinna‑mi Yesu teꞌ, “U ita‑modo! Dea‑mo ti ung tarrang massilàha:‑ingko.”
38Musuana‑mi moa teꞌ, “Ku patongang‑ko Puang!” màli: na mukalimuntuꞌ tumunnuku i heleꞌNa.
39Musuana‑mi ti Yesu teꞌ, “Ku bùruꞌ mao i lino tee mangking pangaena nasang tau nikàtui, mangking tau ung buta miluhali paita, pang tau ung paita miluhali buta.”
40Pira-pira tu Parisi ung one: i anto, massàding to suana Yesu. Mingkutikìna‑mi se mao i Yesu teꞌ, “Jadiꞌ, u konai: naꞌ teꞌ kami ho tee buta?”
41Na sùmuinna‑mi Yesu teꞌ, “Àla: ung buta‑ko se, hang sala:‑ko dosse:. Hampoꞌ tiꞌ u moa dosse: teꞌ, ‘Ki paita,’ baꞌ palleona u pàraꞌ se i kasalaangmu.”
Currently Selected:
Yohanes 9: skx
Highlight
Share
Copy
Want to have your highlights saved across all your devices? Sign up or sign in
