Lukas 15
15
Rampeang besa domba ung hùling
(Mat. 18:12-14)
1Boso: tupassima pang tau sintàna: ung niàna: si madosa bùruꞌ lao mampisàdìngi Yesu. 2Hampoꞌ tu Parisi pang ung si manarangna i aluku mamputuntui:‑I moa teꞌ, “Hele‑mi, Tau tee mantarima tau ung si madosa, pang na pasola: parodo manne:.”
3Deanna‑mo to, Yesu mampatidolu‑ing se rampeang tee moa teꞌ, 4“Ìna ara besa tau nai àlaꞌmu se ung mangampui sangatuꞌ domba, pang hùling ti besa, aka ti ung na pukauꞌa? Tantu tau to mampalii: ung kamesaa: pulona kamesaa: i padang pang lumao mangokaꞌ to ung hùling deaꞌ na korai:. 5Pang to na korai:‑mo ti domba to, lammuꞌ tungka ti pihakana, pang na koha: mangule:‑ing. 6Pang tòna bùruꞌ‑mo i rasangna, na hàngo ti solana pang sidungkuꞌna moa teꞌ, ‘Hàme: se ta sikahaka:-hakai:, sàbaꞌ dombangku ung hùling ku korai:‑mo.’
7Ku pusua: matung teꞌ, Mène: ho to ti i suruga, ara kahakaang ung làbi lammuꞌ mampatu: besa tau ung mingkatobaꞌ, nai none: mampatu: tau ung kamesaa: pulona kamesaa: ung tongang pang hang parallu‑i mingkatobaꞌ.”
Rampeang seeng ung hùling
8“Mène: ho, ìna ara besa bahine ung mangampui sampulo: seeng peraꞌ, pang hùlingna‑mi ti besa, aka ti ung na pukauꞌa? Tantu bahine to massohei pallita pang massangkii rasangna pang mangokaꞌ deaꞌ na korai:. 9Pang to na korai:‑mo, na hàngo ti sola:-solana pang sidungkuꞌna moa teꞌ, ‘Hàme: se ta sikahaka:-hakai:, sàbaꞌ ku korai:‑mo pole ti seengku ung hùling.’
10Ku pusua: matung teꞌ, Mène: ho to ti Puang pang malaikaꞌ-malaikaꞌNa haka: ìna ara besa tau ung madosa ung mingkatobaꞌ.”
Rampeang anaka ung hùling
11Mampusua: kang ho rampeang ti Yesu moa teꞌ, “Ara besa tau ung mangampu idua anaka muane. 12Ara sangàlo, pinuadi: musua: mao i amanna teꞌ, ‘O Ama:, hengi‑mingnaꞌko ti manaꞌ ung ku puumpaa.’ Jadiꞌ, na kàlaꞌna‑mi amanna ti kaaraangna mao i idua anakàna to.
13Ha masai‑i nai anto, na baloko anaka to ti umpana, màli: na kakarang mao i lipu: ung karao:. One: i anto tuho: mantoroꞌi teng pangkapelaina pang mampitusa: seengna. 14Tòna lòsoꞌ‑mo ti seengna na pake, bùruꞌ‑mo ti kaburoràngang ung lammuꞌ i lipu: to, mambùruꞌ‑ing marrara‑mo maparriꞌ. 15Jadiꞌ, lumao mingkamaꞌ i besa ampu lipu: i anto. Nisuona‑mi mao i kinete: mangkuyaꞌ bahi.*#15:15 Mingkamaꞌ miluhali pikuyaꞌ bahi mampupiita mangaka ti kamasussaang tuhona anaka muane to, sàbaꞌ dea ti bahi pumali mao i tu Yahudi. 16Pang burorang‑mo tungka, mambùruꞌ‑ing moi kinannena bahi, na kapelai:‑mo na anne:, sàbaꞌ hari: moi besa tau ung manghengi‑ing aka-aka.
17Tampàkang, pasàdaꞌ pang musua: moa teꞌ, ‘Tau ung mingkamaꞌna amangku milàbi ti kinannena, hampoꞌ koi: tee ku mate burorànga‑ko inne:. 18Jadiꞌ, ku lumaa sahe: i amangku pang ku ongiing moa teꞌ, O Ama:, ku madosa‑moko mao i Puang pang matung Ama:. 19Hang sipatu:‑kaꞌko hura: nikonai: anakàmu. Àna:‑maꞌ teng besa pumpingkamaꞌmu.’ 20Kakarangna‑mi mangule:‑ing mao i amanna.
Karao: maang nai rasangna, na ita‑mo amanna. Sìnang pinanaha ung malemu tungka, amanna miruru: mao mantadoꞌi‑i, màli: na kalapu:‑i pang na udung. 21Musuana‑mi ti anakàna teꞌ, ‘O Ama:, ku madosa‑moko mao i Puang pang matung Ama:. Hang sipatu:‑kaꞌko hura: nikonai: anakàmu.’
22Hampoꞌ musua: ti amanna mao i pangkoringna teꞌ, ‘Baha‑ko se mai masàraꞌ ti juba ung kamìnang matairing u pangkayaꞌiing‑ko se. Pang hengi‑ingko se annuli: sola: sapatu na pake‑i. 23Pang ala‑ko se ti anaka sapiꞌ ung nilompoi:, u rereꞌ‑ko se. Hàme: se, ta mampaara besa pampukauꞌ pang sikahaka:-hakai:. 24Sàbaꞌ anakàku tee mate‑mo, hampoꞌ i latenna tuho:‑mo pole. Hùling‑moda, hampoꞌ i latenna nikorai:‑mo pole.’ Na pukauꞌna‑mi se ti pampukauꞌ to.
25Tempo to, dea ti anaka lihoana one: i kinete:. Pang dea tòna mangule:‑ming pang dungkuꞌ‑mo i rasangna, na sàding ti moninna musiꞌ pang tau ung si minariꞌ. 26Na hàngona‑mi ti besa pangkoring pang mingkutiki moa teꞌ, ‘Oꞌ aka pùna ara‑da pampukauꞌ i rasang?’
27Na sùmui teꞌ, ‘Adimmu mangule:‑ming mai. Pang amammu massuo:‑kang marrereꞌ anaka sapiꞌ ung nilompoi:, sàbaꞌ na korai:‑mo pole ti adimmu pang salamaꞌ to‑da.’
28Hampoꞌ lalaka ti anaka lihoa: to, pang hang mio:‑i mintama i rasang. Missòhongna‑mi ti amanna na palau tungka mangking mintama i rasang. 29Hampoꞌ misùmu moa teꞌ, ‘Hele! Maheaꞌ-heaꞌ‑moko u ku pingkamaꞌ karraꞌ‑ing. Pang hara‑kaꞌko mantengkai: parentammu. Hampoꞌ hara‑miko u mi hengi‑ing moi besa anaka bemmeꞌ ku pake i laling pampukauꞌ sola: solaku. 30Hampoꞌ anakàmu to, ung mampalòsoꞌ teng kaaraangmu sola: bahine ung mambaloko kalaena, sumule:‑mo pang u parrereꞌ‑ing anaka sapiꞌ ung nilompoi:!’
31Na sùmuinna‑mi amanna teꞌ, ‘O anàku, u mi pasola:‑do leleng, pang nasang angkanna ung ku ampu, u ampui‑do ho. 32Hampoꞌ adimmu to, mate‑moda, pang i latenna tuho:‑mo pole. Hùling‑moda, hampoꞌ i latenna nikorai:‑mo pole. Hang sipatu:‑i naꞌ ta sikahaka:-hakai: se pang mampaara pampukauꞌ?’ ”
Currently Selected:
Lukas 15: skx
Highlight
Share
Copy
Want to have your highlights saved across all your devices? Sign up or sign in
