Lukas 14
14
Yesu mampumatalete: kang ho besa tau tempo àlo kapillìheang
1Ara sangàlo tempo àlo kapillìheang, Yesu lumao manne: i rasangna besa tau ung nipiama: i àlaꞌna tu Parisi. Pang tau i anto mangkapupui‑I, 2sàbaꞌ ara besa tau i heleꞌNa ung na leo: sai ung mangurungang‑ing kammang ti kalaena. 3Mingkutikìna‑mi ti Yesu mao i ung si manarangna i aluku pang tu Parisi ung si one: i anto teꞌ, “Manuruꞌ atorang alukùta, mading naꞌ ta mampumatalete: tau i àlo kapillìheang? hari:‑rika.”
4Hampoꞌ mimmànaꞌ‑i se teng. Na tokaꞌna‑mi Yesu ti tau ung mipanaꞌ to, pang Na pumatalete:, màli: Na suo:‑i sumule:. 5MusuaNa‑mi mao i tau to‑i se teꞌ, “I mènena‑i to moa teꞌ arammu se ung mangampu besa anaka, dea‑raka besa sapiꞌ, ung marèneꞌ mao i bubung tempona àlo kapillìheang, ara naꞌ i àlaꞌmu se ung dang mallantoing sahe:?”
6Hampoꞌ hang hela‑i se misùmu mampatu: nasang to.
Tau ung mampaihoiꞌ pinanaha
7Na hele Yesu moa teꞌ to tau ung si nihàngo manne: tempo to, mampirarai: kaoneang ung kamìnang nisangadi. Deanna‑mo to, Na pipaturo:‑ing mao i tau to‑i se moa teꞌ, 8“Ìna u nihàngo mao i pampukauꞌ kasilopàkang, hau mampirarai: kaoneang ung kamìnang nisangadi. Hangkàliꞌ araa tau ung nihàngo ung làbi iaho nai dio, 9mambùruꞌ‑ing u na suoa ampunna pampukauꞌ moa teꞌ, ‘Kaoneang tee parallu nihengi‑ing tau tee.’ Mambùruꞌ‑ing u madiaa pang u mingeliꞌ mao i keboꞌ. 10Sangadinna, ìna u nihàngo, pirarai: ti kaoneang i keboꞌ, ingke: to u na ita ampunna pampukauꞌ, u na ongi‑ing teꞌ, ‘O Mantàdi:, hàme: i antee sidungkuꞌ e.’ Nai anto u nisangadia i heleꞌna nasang tau ung bùruꞌ i anto. 11Sàbaꞌ nasang tau ung mampaiaho kalaena nipaihoiꞌa, pang tau ung mampaihoiꞌ kalaena nipaiahoa.”
12Musuana‑mi ti Yesu mao i ampu rasang teꞌ, “Ìna u mampukauꞌ besa pampukauꞌ, i pitàlo dea‑raka i pihengi, hau manghàngo sekomu, dea‑raka mantàdimu, dea‑raka tau deammu, dea‑raka sidungkuꞌmu ung si sukiꞌ. Pakala u na hàngo‑do ho, pang nai anto u koraia‑mo ti pibalaꞌinna ung nu pukauꞌ. 13Sangadinna, ìna u mampukauꞌ besa pampukauꞌ, hàngo ti tau ung mase-mase, ung na kosu, ung kempang, pang ung buta. 14Pang u nipasakkea, sàbaꞌ tau to‑i se hang pahela‑i mampabalaꞌi kabeloangmu, mambùruꞌ‑ing kabeloangmu na pabalaꞌia Puang tempona tau ung si tongang nipatuho: pole nai kamateang.”
Rampeang pampukauꞌ ung lammuꞌ
(Mat. 22:1-10)
15Massàding suana Yesu to, besa nai àlaꞌna tubùruꞌ ung manne: sola: tempo to musua: teꞌ, “Maupaꞌ ti tau ung mannea i kadatuangna Puang.”
16Hampoꞌ musua: ti Yesu mao i tau to teꞌ, “Ara besa tau ung mampukauꞌ pampukauꞌ ung lammuꞌ pang mihàngo boso: tau. 17Temponaa‑mo ti pampukauꞌ to, na pantuyu‑mo ho ti pangkoringna mao i dei: se ung nihàngo‑mo moa teꞌ, ‘Hàme:‑mo se. Tokana‑mo.’
18Hampoꞌ nasang tau to‑i se mingkatabeꞌ. Ara ti ung mangkonai: moa teꞌ, ‘Ku mambalaꞌ‑mo sallaoang kinete: pang parallu ku lumao manghele. Ku palau matung, padeaꞌ‑ingnaꞌ ti pingkatabeꞌku.’
19Ara ho ti ung mangkonai: teꞌ, ‘Ku mambalaꞌ‑mo lima pasang sapiꞌ pang ku lumaa massukaꞌ mampake. Ku palau matung, padeaꞌ‑ingnaꞌ ti pingkatabeꞌku.’
20Pang ara ho ti ung mangkonai: moa teꞌ, ‘Baꞌ, ha masai‑maꞌko kibahine, jadiꞌ hang hela‑kaꞌko lumao.’
21Jadiꞌ, pangkoring to mangule:‑ing pang mampadeaꞌ nasang to mao i tuangna. Lalakàna‑mi tungka ti tuangna to mao i tau ung si na hàngo pang musua: moa teꞌ, ‘Masàraꞌ‑ko lumao pai dalang ung si lammuꞌ pang ung si supi:‑i i lipu:, pang baha‑i mai ti tau ung si mase-mase, ung sala-salaang, ung buta pang ung na kosu.’
22Tòna sumule:‑mo ti pangkoringna, musua: moa teꞌ, ‘Parentanta Tuang nitoroꞌi‑mo, hampoꞌ na moi mène: to, ara maang kaoneang.’
23Musuana‑mi kang ho ti tuang to teꞌ, ‘Nàmo: pai dalang i sòhongna lipu:, pang dàraꞌ‑i se nasang mai ti tau pai anto, mangking rasangku pùno:. 24Sàbaꞌ matantu te ung ku pusua: matung e teꞌ Harai:‑da moi besa nai àlaꞌna tau ung nihàngo dolung to, ung mantàmiꞌa ung niannena i pampukauꞌku!’ ”
Kasadiaang mangulaꞌ Yesu
(Mat. 10:37-38, 5:13, Mrk. 9:50)
25Ladu nai anto, Yesu mampatùrung pammulaoangNa pang boso: tungka ti tau ung mingulaꞌ. Misailena‑mi ti Yesu pang musua: mao i dei: se moa teꞌ, 26“Ìna ara tau ung bùruꞌ mao i Koi:, hampoꞌ làbi mampulemu amanna, inanna, bahinena, anakàna, mantàdi:-tàdina, pang tuhona, tau to hang hela‑i miluhali pasikolaKu. 27Pang tau ung dang mangkoha: oròngangna pang mangulaꞌ‑Kaꞌ, hang helai: miluhali pasikolaKu.
28Sàbaꞌ, ìna ara nai àlaꞌmu se ung mangkapelai: mampatèdeꞌ besa rasang, hang na rekeng‑i naꞌ dolung ti angkosoꞌna mangking na ìsang ti seengna, moa teꞌ kànaꞌa‑raka deaꞌ ladu? hari:‑rika. 29Sàbaꞌ, ìna nibabe‑mo ti pondasinna, pambàtiꞌ ha hela‑i na patùrung deaꞌ ladu, baꞌ miluhalia ung na patahai nasang tau ung mangita, 30moa teꞌ, ‘Hìnaꞌ le:, tau too le:, hang na hela‑i manna: ti mampaladu pampatèdeꞌna.’
31Dea‑raka ìna besa datu: ung mangampu sampulo: sàbunna tantara mangaku: situda: datu: sintàna: ung mangampu idua pulona sàbunna tantara, tantu na tangaꞌ belo:-belo:‑kang dolung ìna kànaꞌ ti kapabuuangna mangeba ponina. 32Sàbaꞌ, ìna na rekeng moa teꞌ hang kànaꞌ‑i, matantu na pantuyu sahe: ti taunna lumao mampalau sidame.”
33Musuana‑mi ti Yesu teꞌ, “Mène:‑da ho ti mao i dio se. Hari: moi besa ung hela miluhali pasikolaKu i dang na palii:‑i ti nasang ung na ampui.”
34“PasikolaKu nirampe mène: sia. Sia ìnang belo:‑da, hampoꞌ ìna miluhali matahaꞌ ti tàmiꞌangna, niakaa ti mampumasia pole? 35Hari: hura: palleona, moi mao i tampo: dea‑raka nipallaok‑ing pupuꞌ. Jadiꞌ, nitibe teng.
Isai ti ung kitalinga, na pisàdìngi‑i!”
Currently Selected:
Lukas 14: skx
Highlight
Share
Copy
Want to have your highlights saved across all your devices? Sign up or sign in
