Lukas 13
13
Mingkatobaꞌ te ara maang kanàha:
1Tempo dea ho teng to, ara tau i anto ung si mampatidolu mao i Yesu mangaka ti tu Galilea ung na patei gubernur Pilatus, tòna tarrang‑i se mampimmalaꞌ‑ing pimmalaꞌ mao i Puang. 2Na sùmuinna‑mi Yesu moa teꞌ, “U sannaꞌi se naꞌ moa teꞌ nipateinna‑i se to, mampupiita moa teꞌ làbi madosa‑i se nai tu Galilea sintàna:? 3Hari:‑da! Hampoꞌ Ku pusua: matung teꞌ, Ìna hang mingkatobaꞌ‑ko se, u mangkoraia dosse: ho kamasolàngang nasang. 4Mène: ho to sampulo: karoꞌa: tau ung mate i Siloam, na kamaronnòngi menara to. U sannaꞌi se naꞌ moa teꞌ dei: se làbi madosa nai nasang tau sintàna: ung leta: i Yerusalem? 5Hari:‑da! Hampoꞌ Ku sulei: Ku pusua: matung teꞌ, Ìna hang mingkatobaꞌ‑ko se, u mangkoraia dosse: ho kamasolàngang nasang.”
Rampeang lòpo: ara ung dang hoa:
6Na patidolunna‑mi Yesu ti rampeang tee, “Ara besa tau ung mangampu besa lòpo: ara i kinete: anggoroꞌna. Ara pimbesa, na lumao mangkapang hoana lòpo: to, hampoꞌ hari: na korai: moi besa. 7Musuana‑mi mao i pumpingkamaꞌna moa teꞌ, ‘Hele, itàlu‑mo heaꞌna ku bùruꞌ lao mangkapang hoana lòpo: ara tee, hampoꞌ hari: moi besa. Tìhing‑mi teng! Mantipoi: teng salalona tampo:!’
8Hampoꞌ na sùmui moa teꞌ, ‘O Tuang, eloꞌna‑kang na tuho: te sammeaꞌ tee. Ku pamangkia‑ko ti tampo: mimpaling lòpo: to, pang mallompoi:. 9Ìna hoa: heaꞌ pole, baꞌ belo:. Hampoꞌ ìna hari:, baꞌ nitìhing.’ ”
Yesu mampumatalete: besa bahine ung bungku:, sileo: àlo kapillìheang
10Ara pimbesa, tempo àlo kapillìheang, Yesu mupaturo: i besa tamming kapinombaang. 11I anto, ara besa bahine ung sampulo:‑mo karoꞌa: heaꞌna masainna mipanaꞌ, sàbaꞌ na kaonei: dihata bulituku. Bahine to bungku:, hang hela tungka‑i hura: tèdeꞌ mahulo:. 12Na itanna‑i Yesu, Na hàngo. Na tokaꞌna‑mi, Na pasianu massilàha:‑ing moa teꞌ, “O Ina:, i latenna u salokaꞌ‑mo nai saimmu.” 13Tempo dea ho teng to, tèdeꞌ mahulo: pang mampaiaho Puang.
14Lalakàna‑mi ti ketua jamaa sàbaꞌ Yesu mampumatalete: tau tempo àlo kapillìheang. Musuana‑mi mao i tau boso: teꞌ, “Ùnung àlona ti àlo kapingkamaꞌang. Jadiꞌ, àlo dea‑ra: to ti u mai se mampalau nipumatalete:, pang hau na àlo kapillìheang.”
15Hampoꞌ musua: ti Puang Yesu moa teꞌ, “U tau ung belo: i rupa se teng, hang tongang‑i naꞌ moa teꞌ àlo kapillìheang, u nasang se manghùraꞌ‑ing sapiꞌmu dea‑raka keledaimmu, u riuꞌ se mao nipaenung? 16Deaa‑mo kang bahine tee, besa hatiꞌna Abraham ung sampulo:‑mo karoꞌa: heaꞌna masainna na seaꞌ Datuna dihata bulituku. Hang sipatu:‑i naꞌ niholi i àlo kapillìheang?”
17Nai suana Yesu to, nasang ung mamponi:‑I nipakadia:-dia:, hampoꞌ dea ti tau boso: masannang tungka manghele nasang ung malabiꞌ ung Na pukauꞌ.
Rampeang hatunna tanammong pang rampeang ragi
(Mat. 13:31-33, Mrk. 4:30-32)
18Nai anto, musua: ti Yesu moa teꞌ, “Aka ti ung Ku parrampeing kadatuangna Puang? Pang aka ti ung hela nipasikantereànging? 19Kadatuangna Puang mène: hatunna tanammong ung na sahuꞌ tau i kinetena, ung tuho: millòpo: pang karumpenganna na pisàràngi kudaꞌ.”
20MusuaNa‑mi kang ho moa teꞌ, “Aka ti ung Ku pasikantereànging kadatuangna Puang? 21Niala rampeang sangkìdoꞌ ragi ung na ala besa bahine pang na laoko sangkanduꞌ tarigu, urungang sumangkaꞌ.”
Baba: ung masìkiꞌ
(Mat. 7:13-14, 21-23)
22Tòna mampatùrung pammulaoangNa ti Yesu mao i Yerusalem, mangola: pai lipu:-lipu: pang mupaturo: i anto. 23Aranna‑mi besa tau ung mangkutiki‑I moa teꞌ, “O Tuang, sangkìdoꞌ‑i naꞌ ti tau ung nipasalamaꞌa?”
Musuana‑mi ti Yesu mao i tau pai anto moa teꞌ, 24“Okaꞌ‑ko se tungka dalang ti mintama mangola: baba: ung masìkiꞌ.*#13:24 baba: i rampeang te, dea‑mo dalang mao i suruga. masìkiꞌ sàbaꞌ parallu mangola: teng Puang Yesu. Hele i Yoh. 14:6 pang KUNP 4:12. Gambaraꞌ i ante sisala: sangkìdoꞌ nai gambaraꞌ i rampeang i Suraꞌ Matius 7:13-14. Sàbaꞌ matantu te ung Ku pusua: matung e teꞌ Boso: ti tau ung mangokaꞌa mintama mangola: baba: sintàna:, hampoꞌ hang na helai: se. 25Tempona ampu tamming tèdeꞌ mantanaꞌ babana, màli: u tèdeꞌ dosse: ho i sòhongna mukado: teꞌ, ‘O Tuang, hungkai‑kangka!’
U na sùmuia se teng moa teꞌ, ‘Hang ku ìsang‑ko dosse:, u tu aka se.’
26Musuamua‑mi se teꞌ, ‘Ta sola:‑mo dasse: manne: pang menung, pang U mupaturo:‑mo i lipuki.’
27Hampoꞌ u Na sùmuia se teng moa teꞌ, ‘Hang Ku ìsang‑ko dosse:, u tu aka se. Malai‑ko se nasang nai ninne:, dio‑mo se ti ung mampukauꞌ ung kadetu.’ ”
28Na patùrungna‑mi Yesu ti musua: teꞌ, “Tempona u mangita se Abraham, Isak pang Yakub sìnang nasang nabi i laling kadatuangna Puang, u mantalihuhua se kumàraka pang sikùriki ti sisemu, sàbaꞌ u nipai sòhongna se. 29Pang tau ung dang dea tu Yahudi nai mata kùlaꞌ, nai kalìliang kùlaꞌ, nai utara pang nai selatang, bùruꞌa pang sikahaka:-hakai: manne: i kadatuangna Puang. 30Ìsang‑ko se! Nai àlaꞌna tau ung i hoiꞌ i latenna, ara ung miluhalia ung iaho, pang nai àlaꞌna tau ung iaho, ara ung miluhalia ung i hoiꞌ.”
Yesu mangkàràki Yerusalem
(Mat. 23:37-39)
31Tempo dea ho teng to, ara pira-pira tu Parisi ung bùruꞌ mao i Yesu moa teꞌ, “Malai‑Ke nai ninne:, sàbaꞌ na kapelai: Herodes ti mampatei‑Ke.”
32Na sùmui Yesu teꞌ, “Padeaꞌ‑ing mao i tau ung bulituku to moa teꞌ, ‘Ìsang‑ke, i latenna pang i hingkoꞌna, Ku mampasahua dihata bulituku pang mampumatalete: tau ung mipanaꞌ. Pang àlo ung kaitàlu Ku mampaladua kamaꞌangKu.’*#13:32 i latenna pang i hingkoꞌna hang manturo:‑i palleona ung mahulo:, sangadinna tempo ung dang masaia hura: ung niheleꞌi. Mène: ho àlo ung kaitàlu, manturo: tempo ung na patantu Puang ung dang masaia hura: ung niheleꞌi. 33Na moi mène: to, i latenna, i hingkoꞌna pang i dadumbengi, parallu Ku mampatùrung pammulaoangKu, sàbaꞌ hang sipatu:‑i ti besa nabi nipatei i sòhongna Yerusalem.
34O Yerusalem, Yerusalem, ung mampatei nabi-nabi pang manghatui ung si na pantuyu Puang matung deaꞌ mate! Hari: kàtunna ti Ku mangkapelai: mangkungku‑ko se nasang, mène: inanna manoko mampuraruui: ana-anakàna, hampoꞌ hang mio:‑ko se. 35Deanna‑mo to, pisàdìngi‑ko se belo:-belo:! Tammingmu se nipaliia‑mo. Pang Ku pusua: matung teꞌ, Hang Mi itao: se, deaꞌ tempona u mangkonai: se teꞌ, ‘Nipudi ti Dea ung bùruꞌ i laling konana Puang!’*#13:35 Mas. 118:26.”
Currently Selected:
Lukas 13: skx
Highlight
Share
Copy
Want to have your highlights saved across all your devices? Sign up or sign in
