Lukas 12

Pipaturo: mampatu: pasikolaNa

(Mat. 10:26-33, 19-20)

1Mintoroꞌ nai anto, masàbu-sàbu bosona ti tau ung mangkaropo‑I, urungang siida-idaka. Tempo to, musua:‑kang dolung ti Yesu mao i pasikolaNa pang tau sintàna: ung mangulaꞌ‑Mi moa teꞌ, “Kuyaꞌ‑ko se ti kalaemu nai raginna tu Parisi, palleona, ti belona‑i se i rupa teng. 2Hari:‑da ung tihuni ung dang nipupiitaa, pang hari:‑da ung nihuni‑ing ung dang niìsànga. 3Deanna‑mo to, aka teng ti ung nu pusua: se i tunininna, nisàdìnga i heleꞌna tau boso:, pang aka ti ung nu punenik‑ing se i laling kamaraꞌ ung titanaꞌ, nipikakoànging nai iaho atuꞌna rasang.

4Mantàdi:-tàdiKu, Ku pusua: matung teꞌ, Hau mariaꞌ se mao i tulino ung hela mampatei kalae: hampoꞌ hang hela‑i mampukauꞌ làbi nai anto. 5Sangadinna, u Ku paìsàngia se isai ti ung parallu u kariaꞌ se. Mariaꞌ‑ko se mao i Puang ung makuasa mupatei, pang makuasa‑Da ho mantibe mao i laling naraka! Matantu te ung Ku pusua: matung e teꞌ Dea‑da ti ung parallu u kariaꞌ se.

6Lima kakalong hela teng nibalaꞌ idua‑i seeng ung kàle: i hoiꞌ. Na moi mène: to, hari:‑da moi besa ung na puhuta Puang. 7Dukanna bahulaka i bakàmu se pang, Na ìsang‑da nasang ti bosona. Deanna‑mo to, hau mariaꞌ se! U làbi kianggaꞌna dosse: nai kakalong ung boso:.

8Ku pusua: matung teꞌ, Isai-sai ti ung mangakui‑Kaꞌ i heleꞌna tulino, na akuia‑da ho Anaka Tulino i heleꞌna malaikaꞌ-malaikaꞌna Puang. 9Hampoꞌ isai-sai ti ung mampissangkaꞌ‑ingNaꞌ i heleꞌna tulino, na pissangkaꞌing‑da ho Anaka Tulino i heleꞌna malaikaꞌ-malaikaꞌna Puang.

10Pang nasang tau ung mampusua: sua: ung mangeba Anaka Tulino, hela nipantengkai:‑ing, hampoꞌ tau ung mantumpaꞌ pingkamaꞌna Pinanaha Malìsong, hari:‑da dalang nipantengkai:‑ing. 11Pang tempona u nibaha se mao i tamming-tamming kapinombaang niparessa, dea‑raka i heleꞌna ampu parenta pang ung makuasa sintàna:, hau mariaꞌ se mangaka pang aka ti ung parallu u pusuaa se mampusuai: kalaemu, dea‑raka aka ti ung parallu u pusua: se. 12Sàbaꞌ tempo dea ho teng to, aka ti ung parallu u konai: se, na pipaturoing‑da Pinanaha Malìsong matung.”

Tau ung sukiꞌ ung bebe, pang pipaturo: aka ti ung niàna: làbi parallu

(Mat. 6:25-34)

13Besa nai àlaꞌna tau boso: i anto musua: mao i Yesu moa teꞌ, “Tungguru, konai:‑ing mao i mantàdiku mangking mangkàlaꞌi‑kaꞌ manaꞌ nai amangki.”

14Hampoꞌ Na sùmui moa teꞌ, “Isai ti ung manturo:‑Kaꞌ miluhali haking dea‑raka ung mangkàlaꞌ manaꞌ i àlaꞌmu se?”

15Musuana‑mi ti Yesu mao i dei: se nasang moa teꞌ, “Hele-hele‑ko se pang karaoi:‑ko se ti nasang laoangna lammuꞌ inaha. Sàbaꞌ moi maranga ti kaaraangmu, tuhona tulino hang mintokaꞌ‑ida nai bosona kasukiꞌangna.”

16MampatidolunNa‑mi rampeang mao i dei: se mène: tee, “Ara besa tau ung sukiꞌ, pang ara pimbesa pintaùngang, tampona mampabùruꞌ haseleꞌ ung boso:. 17Nai none: i anto, na tangaꞌ-tangaꞌ i laling pinanahanna moa teꞌ, ‘Aka ti ung ku pukauꞌa? Sàbaꞌ hang kànaꞌi: ti kaoneang mangàna: haseleꞌna tampoku.’ 18Musuana‑mi mao i kalaena moa teꞌ, ‘Ku marràbaa nasang talukungku pang mampatèdeꞌ ung si làbi lammuꞌ. I anto ti ku kobui: nasang ti gandumku pang aka-akangku sintàna:. 19Ladu to, ku musuaa mao i kalaeku moa teꞌ, U maupaꞌ‑do! Boso:‑mo ti aka-akammu ung nu àna:, ung maheaꞌ-heaꞌ u pakea. Millìhe‑mo: i latenna! Manne:‑ko, menung pang pumasannang-sannang ti tuhomu!’

20Hampoꞌ musua: ti Puang mao i dea moa teꞌ, ‘U tau ung bebe‑do! Hengi tee ho teng ti u matea, pang isai ti ung mangampua aka-aka to ung nu pasadia‑ming kalaemu?’

21Mène:‑mo to ti tau ung mangkobu: kasukiꞌang pàli i kalaena pòteng, hampoꞌ hang mangkobu:‑i kasukiꞌang pàli i Puang.”

22Musuana‑mi ti Yesu mao i pasikolaNa moa teꞌ, “Dea‑mo to pu Ku pusua:‑i matung moa teꞌ, Hau pusussa se ti tuhomu, aka ti ung nu annea se, dea‑raka aka ti ung nu pakea se. 23Sàbaꞌ dea ti tuho:, làbi‑da nai ung niannena, pang dea ti kalae:, làbi‑da nai pakeang. 24Pumahele‑ko se ti kalikaoko. Hang sumahuꞌ‑i, hang mangkìtiꞌ‑i, hang mangampui‑i ho talukung. Hampoꞌ moi mène: to, na parakai‑da ho Puang. Deaa‑mo kang dio se, ung làbi kianggaꞌna nai kudaꞌ! 25Pang isaimmu se ti ung nai mampusussa tuhona hela mampakànaꞌi sungaꞌna, moi sanjaang‑i? 26Mampakànaꞌi sungaꞌ moi sanjaang pòteng, hang hela‑i u pukauꞌ se. Jadiꞌ, aka pu u pusussa‑i ti aka-aka sintàna:?

27Pumahele‑ko se ti bunga-bunga pang mangaka ti tuhona. Hang mingkamaꞌ‑i pang hang sumasa:‑i. Hampoꞌ moi mène: to, Ku pusua: matung teꞌ, Moi Datu: Salomo i laling nasang kamalabiꞌangna, hang mipake‑ida ho ung sibali matairingna nai besanna bunga-bunga tee. 28Pang dea ti làmaka i padang ung manghoa:‑ing bunga-bunga to, i latenna tuho:, hampoꞌ i hingkoꞌna dumbengi nikobu: pang nituhe:.*#12:28 nikobu: pang nituhe:. Sua: Yunani nituhe: i pantunuang roti. Na moi mène: to, làmaka to, na pakei‑da Puang ung matairing. Deaa‑mo kang dio se! Hampoꞌ ha mupatongang tungka‑mo: se.

29Jadiꞌ, hau puliling se aka ti ung nu annea pang ung nu enùnga se, pang hau pusussa se ti to. 30Sàbaꞌ nasang to, na lola tau ung dang si mangìsang Puang, pambàtiꞌ Amammu mangìsang moa teꞌ nasang to u parallui se. 31Hampoꞌ okaꞌ‑kangko se ti kadatuangna Puang, pang nai anto, aka-aka sintàna: to u nihengiing ho.”

Kasukiꞌang i suruga

(Mat. 6:19-21)

32“Dio se te ung mène: domba ung sampolaiang ung dang pira e, hau mariaꞌ se! Sàbaꞌ Amammu masannang manghengi‑ingko se kaoneang i kadatuangNa.

33Baloko‑ko se ti aka-akammu, pang haseleꞌna to, hengi‑ingko se mao i tau ung mase-mase. Babe‑ko se ti pangànaang seeng ung dang mannoa, palleona kasukiꞌang ung niàna: i suruga. Kasukiꞌang to, hang lòsoꞌi:, pang hari: pumanauang ung hela mangala, dea‑raka toa:-toa: ung manganne:. 34Sàbaꞌ iaka ti na one: kasukiꞌangmu, onea‑da ho i anto ti pinanahammu.”

Toka:-tokana‑ko se

(Mat. 24:43-51)

35“Parallu u lupu se tokana, dea‑mo, u mipakeang se pang hùrong ti lampummu se. 36Pang parallu u mène: se tau ung si mangahong tuangna sumule: nai pampukauꞌ kasilopàkang, mangking tòna bùruꞌ pang mangkado: baba:, pàtu: na hungkai‑ing se. 37Maupaꞌ ti pangkoring ung si tokana, to na kabùruꞌi tuangna. Matantu te ung Ku pusua: matung e teꞌ Tuang to mampatokanaa kalaena mulayani, pang manghàngo pangkoring-pangkoringna mesong, màli: na palennaꞌ‑ing. 38Ìnang maupaꞌ ti pangkoring ung si na kabùruꞌi tuangna tokana, na moi‑rika bùruꞌ mulummu: hengi dea‑raka masìkiꞌ hengi.

39Kalehai‑ko se ti tee! Àla: na ìsang‑i ampu rasang ti jaang pira na bùruꞌa ti ung pumanauang, àla: tokana‑da, mangking ung pumanauang hang mintama‑i i rasangna. 40Deanna‑mo to, dio se ho parallu toka:-tokana, sàbaꞌ Anaka Tulino bùruꞌa i tempo ung dang nu sàdaꞌ-sàdaꞌ se.”

41Mingkutikìna‑mi ti Petrus moa teꞌ, “O Tuang, mampatui: naꞌ teng mao i kami ti rampeang to? dea‑raka mao ho i nasang tau.”

42Misùmunna‑mi ti Puang Yesu moa teꞌ, “Pangkoring ung minumpu pang kitangaꞌ belo:, na turoa tuangna mangìsang pangkoring sintàna:, mangking lupu mampangatoroꞌ‑ing ung na annena‑i se songka: na palii: tuangna. 43Maupaꞌ ti pangkoring to ung na kabùruꞌi tuangna tarrang mangkamaꞌ kamaꞌangna. 44Matantu te ung Ku pusua: matung e teꞌ Tuangna mallantoing pangkoring to mangìsang nasang aka-aka ung na ampu. 45Hampoꞌ pangkoring ung mantangaꞌ moa teꞌ, ‘Masaia maang ti tuangku màli: na bùruꞌ,’ pang mangala kanàha: mampanaꞌi pangkoring sintàna:, belo: muane, belo: bahine, pang manne:, menung deaꞌ maliling, 46pang tuangna to bùruꞌ i àlo pang jaang ung dang nisàdaꞌ-sàdaꞌ, pangkoring to, na tatàka tuangna pang na tibe mao i kaoneangna tau ung dang si mupatongang.

47Pang pangkoring ung mangìsang pampuinahanna tuangna, hampoꞌ hang tokana‑i pang hang mampukauꞌ‑i siulaꞌ pampuinahanna tuangna, nisantaꞌa nisasa:. 48Hampoꞌ pangkoring ung dang mangìsang pampuinahanna tuangna, màli: na mampukauꞌ ung sala: urungang nisasaa‑da, hampoꞌ hang nisantaꞌ‑i. Nasang tau ung nihengi‑ming maranga, marangaa‑da ho niranung nai dea. Pang tau ung nipatongang‑ming maranga, làbia kang ho niranung nai dea.”

Yesu mampabùruꞌ kasisaràkang

(Mat. 10:34-36)

49“Ku mai mangking mampabùruꞌ pianne: i lino tee pang Ku kapelai: tungka àla: hùrong‑mo! 50Hampoꞌ ara kamaparriꞌang*#12:50 kamaparriꞌang. Hele catatan kaki i Mrk. 10:38. ung parallu Ku ola: dolung, pang masussa tungka ti pinanahangKu deaꞌ nipukauꞌ ti aka to. 51U moa se naꞌ teꞌ Ku bùruꞌ mangking mampabùruꞌ kadameang i lino tee? Hari:‑da. Ku pusua: matung teꞌ, Handei:‑da kadameang, sangadinna kasisaràkang. 52Sàbaꞌ, na rara i latenna, tanandapoꞌ ung lima tau tikàlaꞌa, itàlu mangeba idua, dea‑raka idua mangeba itàlu. 53Ama: siebaa anaka muanena. Ina: siebaa anaka bahinena, pang sira bahine siebaa anaka muaneangna bahine.”

Mantassereꞌ tanda-tanda tempo, pang sikabeloi: te ara maang kanàha:

(Mat. 16:2-3, 5:25-26)

54Musuana‑mi ho ti Yesu mao i tau boso: moa teꞌ, “Ìna u mangita se kahung malotong i kalìliang kùlaꞌ, u konai: se moa teꞌ, ‘Mai‑mo ti urang baraꞌ.’ Pang ìnang mène:‑mo to. 55Pang ìna bùruꞌ ti pasaui nai selatang, u konai: se moa teꞌ, ‘Kùlaꞌa.’ Pang mène:‑mo to. 56E tau ung belo: i rupa teng, u paìsang se mantassereꞌ tanda-tanda i lino pang i langiꞌ, jadiꞌ, aka pùna ha u ìsang‑ko se ti mantassereꞌ tanda-tanda i latenna mampatu: aka ti ung Ku pukauꞌ?*#12:56 Tau ung massabii‑mo tanda kalle-kalleang ung na pukauꞌ Yesu pang massàding pipaturoNa, sipatu: mantassereꞌ moa teꞌ Yesu dea‑mo Datu: Pipasalamaꞌ ung na àluꞌ Puang.

57Aka pùna hang mantoroꞌi kalenanna‑ko se aka ti ung tongang? 58Sàbaꞌ, ìna ara tau ung mampillanto‑ingko mao i pengadilang, okaꞌ ti dalang sikabeloi: sola: dea to u tarrang se maang i pammulaoang, mangking hang na patùrung‑i ti mambaha‑ko mao i haking, pang haking to mampehea‑ko mao i polisi, pang u na patama i putarungkuꞌang. 59Ku pusua: matung teꞌ, Ha helao:‑do sòhong nai putarungkuꞌang i dang nu bayaꞌ‑kai: nasang ti kasalaangmu.”

Currently Selected:

Lukas 12: skx

Highlight

Copy