Lukas 11

Pipaturona Yesu mampatu: musumbayang

(Mat. 6:9-13, 7:7-11)

1Ara pimbesa Yesu musumbayang i besa kaoneang. Ladu musumbayang, besanna nai pasikolaNa musua: moa teꞌ, “O Tuang, paturo:‑kangka musumbayang, sibali Yohanes mampaturo: pasikolana musumbayang.”

2Musuana‑mi ti Yesu mao i dei: se moa teꞌ, “Ìna u musumbayang se, konai:‑ko se mène: tee,

‘Ama:, na konaMu‑rangmo lupu nisangadi.

Bùruꞌ‑Mo: mai muparenta.

3Hengi‑ingnang kinanne: ung kànaꞌ tumpuꞌ àlo.

4Pantengkai:‑ingnang ti kasalaangki,

sàbaꞌ kami mampantengkai:‑ingka ho nasang tau ung kasalaang mao i kami.

Pang pakarao:‑ingnang ti ung mambahai:‑kang mao i kamakarinnìngang.’ ”

5Musuana‑mi ti Yesu mao i pasikolaNa moa teꞌ, “I mènena‑i to moa teꞌ ara nai àlaꞌmu se lumao i rasangna solana mulummu: hengi, pang musua: moa teꞌ, ‘O Mantàdi:, pangindàngi‑kaꞌko rotimmu itàlu, 6sàbaꞌ sekoku màli: bùruꞌ nai pammulaoangna pang hari:‑ko kinanne: ung ku palennaꞌing.’

7Araa naꞌ solamu ung nu maꞌi mène: to, misùmu nai laling rasangna moa teꞌ, ‘Hau mi reroꞌi‑do! Nitiliꞌ‑moda ti baba: pang ku maturu‑moko sola: ana-anakàku. Hang hela‑kaꞌko hura: tèdeꞌ manghengi‑ingko aka-aka.’ 8Ku pusua: matung teꞌ, Na moi‑rika u solana ung dùkuꞌ, hang tèdeꞌi:‑da, hampoꞌ tiꞌ hang mio:‑ida nikonaia tau ung pìsiꞌ, urungang tèdeꞌ‑da pang manghengi‑ingko nasang ti ung nu paralluinna.

9Jadiꞌ, Ku pusua: matung teꞌ, Palau, nihengi‑ingko. Okaꞌ, u korai:‑i. Kado:, nitahungkai‑ingko baba:. 10Sàbaꞌ nasang tau ung mampalau mantarimaa, tau ung muokaꞌ mangkoraia, pang tau ung mukado: nitahungkaiing baba:.

11Ara naꞌ ama: i àlaꞌmu se ung manghengi‑ing talubammaꞌ mao i anakàna, ìna mampalau urung? 12dea‑raka manghengi‑ing aripang bahi, ìna mampalau tùlu manoko? 13Deanna‑mo to, ìna dio se ung kadetu pinanaha mangìsang manghengi‑ing aka ung belo: mao i ana-anakàmu, deaa‑mo kang Ama: i suruga! Manghengiing‑Da Pinanaha Malìsong mao i dei: se ung mampalau mao i Dea.”

Yesu pang Beelsebul

(Mat. 12:22-30, Mrk. 3:22-27)

14Ara pimbesa Yesu mampasahu dihata bulituku nai besa tau ung na pabebe dihata bulituku. Tòna malai‑mo ti dihata bulituku to, tau to musua:‑mo pole, pang mimàha ti tau boso:. 15Hampoꞌ ara i àlaꞌna‑i se ti ung mangkonai: moa teꞌ, “Beelsebul‑da, dea‑mo Datuna dihata bulituku, ti ung mampanghengi‑ing kuasa mampasahu dihata bulituku.” 16Ara‑da ho tau sintàna: ung mangkapelai: mangkakaꞌi Yesu, jadiꞌ na palau‑i se ti Yesu mampupiita tanda kalle-kalleang ung nai suruga.

17Hampoꞌ na ìsang Yesu ti pantangaꞌna‑i se. Jadiꞌ, musua: mao i dei: se moa teꞌ, “Ìna besa kadatuang sikeboꞌ-keboꞌi pang siponi:, kadatuang to hang masaii: pang hùlìnga, pang i laling besa tanandapoꞌ hari: kamamesaang, sangadinna sikeboꞌ-keboꞌi sule:, tantu sikuntang. 18Mène: ho to ti i kadatuangna Iblisiꞌ. Ìna Datuna dihata bulituku siponi: solana, matantu kadatuangna hang helai: tinna:. Sàbaꞌ u konai: se moa teꞌ Ku mampasahu dihata bulituku mangola: kuasanna Beelsebul. 19Hampoꞌ i mènena‑i to moa teꞌ tongang ti ung nu konai: se to, baꞌ mangola: kuasanna isai ti pasikolamu se mampasahu dihata bulituku? Deanna‑mo to, pasikolamu kalenanna se ti ung mampatidolua passabiinna moa teꞌ u sala: dosse:. 20Hampoꞌ ìna Ku mampasahu dihata bulituku mangola: kuasanna Puang, palleona to moa teꞌ kadatuangna Puang bùruꞌ‑mo i àlaꞌ-àlaꞌmu se.

21Ìna tau ung pabuu: mampake pake kaputudaang ung kànaꞌ mangkuyaꞌ tammingna, nasang aka-akanna salamaꞌa. 22Hampoꞌ ìna tau ung làbi pabuu: kang ho*#11:21-22 tau ung pabuu: (sua: 21) manturo: Datuna dihata bulituku. tau ung làbi pabuu: kang ho (sua: 22) manturo: Puang Yesu. mamputuda:‑ing pang mantalo‑i, baꞌ tau to marrampaꞌia pake kaputudaang ung na ranung ampunna tamming to, màli: na kàlaꞌ-kàlaꞌ‑i ti aka-aka ung na ala nai tau to.

23Tau ung dang mangulaꞌ‑Kaꞌ, sitongangna tau to mamponi:‑Kaꞌ. Pang tau ung dang mandului‑Kaꞌ mangkungku dombangKu, sitongangna tau to mampatisahuꞌ ung Ku kungku.”

Sumulena dihata bulituku

(Mat. 12:43-45)

24“Ìna dihata bulituku missòhong nai besa tau, dihata bulituku to kalao-lao pai kaoneang ung tunini ung dang ara uhai mangokaꞌ kaoneangna leta:, hampoꞌ hang na korai:‑i. Musuana‑mi moa teꞌ, ‘Ku sumulea mao i rasang ung ku kaonei: dolung.’ 25Tòna deaꞌ‑mo i anto, rasang to salokaꞌ, mapassi pang niatoroꞌ belo:. 26Lumanna‑mi pang mambaha pitu dihata bulituku sintàna: ung làbi kadetu kang ho nai dea. Mintamanna‑mi se i tau to pang leta: i anto, mambùruꞌ‑ing tuhona tau to làbi kadetu kang nai dolung.”

Ung kamìnang maupaꞌ

27Tòna tarrang musua: ti Yesu, besa bahine nai àlaꞌna tau boso: to, mampilabui: musua: mao i Dea moa teꞌ, “Maupaꞌ ti bahine ung mangkianak‑ing pang mampasusu‑Ko!”

28Hampoꞌ Na sùmui moa teꞌ, “Làbi maupaꞌ kang ho ti tau ung mampisàdìngi suana Puang pang mantoroꞌi!”

Tau mampalau tanda kalle-kalleang

(Mat. 12:38-42)

29Tempo to, sa: boso:-bosona tau mangkaropo Yesu. Na patùrung ti suaNa moa teꞌ, “Dea ti tau ung ara i latenna, kadetu ti pinanahanna‑i se. Mangokaꞌ‑i se tanda kalle-kalleang, hampoꞌ hang nihengiing se, sangadi tanda nabi Yunus. 30Sàbaꞌ nabi Yunus miluhali besa tanda mao i tu Ninewe.*#11:29-30 Yunus nipasalamaꞌ nai kamateang i laling balammangna urung ung lammuꞌ miluhali tanda mao i tu Ninewe moa teꞌ na pantuyu Puang mupakareba. Hele i Yun. 3:4-5, Mat. 12:40. Mène:‑da ho to ti Anaka Tulino, miluhalia besa tanda mao i tau ung ara i latenna.

31Tempona àlo i hunni, datu: bahine ung muparenta lùlung i Selatang,*#11:31 Hele i 1Dat. 10:1-10, 2Taw. 9:1-12. tèdeꞌa nai kamateang pang niparessaa sola: te tau i latenna e. Tempo to, nipupiitaa nai passabiinna datu: bahine to moa teꞌ sala: te tau ung ara i latenna e. Sàbaꞌ dolung, datu: bahine to bùruꞌ mai nai karaona i tampakàna lino mangking mampisàdìngi pipaturona Salomo ung kitangaꞌ belo:. Hampoꞌ i latenna, inne:‑moDa ti ung làbi iaho nai Salomo! 32Tempo àlo i hunni to, tu Ninewe tèdeꞌa ho pang niparessaa sola: te tau i latenna e. Tempo to, nipupiitaa nai passabiinna‑i se moa teꞌ sala: te tau ung ara i latenna e. Sàbaꞌ tu Ninewe to mingkatobaꞌ nai dosa-dosanna‑i se tòna nabi Yunus mampakareba suana Puang mao i dei: se. Hampoꞌ i latenna, inne:‑moDa ti ung làbi iaho nai nabi Yunus!”

Katongangang nai Puang nipasikantereang‑ing kamasilaoang

(Mat. 5:15, 6:22-23)

33“Hari:‑da tau ung massohei pallita màli: na huni‑i dea‑raka na patauꞌi. Sangadinna, na patumenneng i kaoneang iaho mangking pampanana na ita tau ung mintama.

34Mata, dea‑mo pallita mao i hatang kalae:. Ìna maritoto ti matammu, nasang kalaemu miluhali masilao:. Hampoꞌ ìna hùra ti matammu, kalaemu miluhali makarinning. 35Deanna‑mo to, tangaꞌ belo:-belo:‑ko se. Ìnang ung masilao: naꞌ to ung ara i kalaemu? ung makarinning‑raka. 36Ìna nasang kalaemu miluhali ung masilao:, pang hari: moi sangkìdoꞌ ung makarinning, baꞌ masilaoa nasang mène: ung na silaoi: pampanana pallita.”

Yesu mampasala: tu Parisi pang ung si manarangna i aluku tu Yahudi

(Mat. 23:1-36, Mrk. 12:38-40, Luk. 20:45-47)

37Tòna ladu‑mo ti Yesu musua:, besa tu Parisi manghàngo‑I manne: i rasangna. Jadiꞌ, mao ti Yesu manne: i anto. 38Tu Parisi to, mimàha manghele Yesu manne:‑mo dang miase:‑kang siulaꞌ adaꞌna ampe-ampena‑i se. 39Musuana‑mi ti Puang Yesu mao i dea moa teꞌ, “Dio se tu Parisi mampumaase: enùngang pang anneangmu se mui sòhongna, hampoꞌ i laling pinanahammu se, pùno: teng tangaꞌ lammuꞌ inaha pang kakadetuang. 40U bebe dosse:! Hang tongang‑i naꞌ moa teꞌ ung mantampa mui sòhongna to, Dea ho ti ung mantampa mui lalingna? 41Hampoꞌ ung parallu, dea‑mo hengi‑ingko se nai pinanahammu mao i tau ung mase-mase. Nai anto, nasangna miluhalia malìsong i dio, palleona, i sòhongna kalaemu pang i laling pinanahammu.

42Hampoꞌ dio se tu Parisi, u masolang dosse:! Sàbaꞌ hingkùrang, inggu, pang nasang rampa-rampa sintàna:, u pinomba‑ing se ti kàlaꞌ sampulona mao i Puang, hampoꞌ kamahuloang nai Puang pang malemunNa, ha u pukauꞌ‑ko se, pambàtiꞌ dea‑mo to ti ung parallu u pukauꞌ se, pang tùrung ho ti mampinomba‑ing kàlaꞌ sampulo: mao i Puang.

43Dio se tu Parisi, u masolànga se! Sàbaꞌ u puroa: tungka se ti esòngang ung kamìnang nisangadi i tamming kapinombaang pang nitabeꞌ pai pasaꞌ. 44U masolànga se! Sàbaꞌ u mène: se kaburuꞌ ung dang nitannai:, mambùruꞌ‑ing na idàki tau ung dang massàdaꞌ.”*#11:44 Atorangna tu Parisi, mangidaka kaburuꞌ, kalaena miluhali burere.

45Besanna nai ung manarangna i aluku tu Yahudi musua: mao i Yesu moa teꞌ, “Tungguru, mangola: sua:-suaMu to, ki U paihoiꞌ‑ka ho.”

46Na sùmui Yesu moa teꞌ, “Dio dosse: ho, ung si manarangna i aluku, u masolànga se! Sàbaꞌ u babe se ho ti atorang-atorang sintàna: mangaka ti mallayani Puang, ung matìmi na toroꞌi tulino, pang dio kalenanna se hang mandului‑i tau mantoroꞌi atorang to moi sangkìdoꞌ pòteng.

47U masolànga se! Sàbaꞌ u mampabeloi: se kaburuꞌna nabi-nabi lùlung, ung na patei ampe-ampemu se, pambàtiꞌ u mène: dosse: ho ampemu ung mantumpaꞌ suana Puang ung na padeaꞌ tau ung Na pantuyu. 48Nai anto, tòna u mampabeloi: se kaburuꞌna nabi-nabi, u mampupiita se moa teꞌ u mantongàngi se aka ti ung na pukauꞌ ampe-ampemu se, ung mampatei nabi-nabi to. 49Dea‑mo to ti sàbaꞌna pantangaꞌ belona Puang musua: moa teꞌ, ‘Ku mampantuyua nabi-nabi pang suro-suroKu mao i dei: se. Pang nai àlaꞌna‑i se to, ara ti ung na pateii: se pang ara ti ung na solàngii: se.’

50Nai anto, tau ung ara i latenna nihukùnga na tumang kamateangna nasang nabi songka: lino nitampa, 51na rara nai nipateinna ti Habel deaꞌ mao i Sakaria, ung nipatei i àlaꞌna pantunuang pinomba pang Tamming Kabussùngang. Matantu te ung Ku pusua: matung e teꞌ Tau ung ara i latenna nihukùnga nai nasang to.

52U masolànga se, ti dio se ung si manarangna i aluku! Sàbaꞌ u mangala se konting babana kapaìsàngang nai tau boso:, pambàtiꞌ dio kalenanna se ti ung dang mio: mantahungkai pang mintama. Pang tau sintàna:, u parempèngi se.”

53Tòna missòhong‑mo ti Yesu nai anto, ung si manarangna i aluku tu Yahudi pang tu Parisi marrara mamponi:‑I tungka pang mampingkutik‑ing mampatu: boso: kara-kara. 54Patuna‑i se to, mangking marràsang‑ing Yesu nai pisùmunNa.

Currently Selected:

Lukas 11: skx

Highlight

Copy